Read daasanach Matááyo 13 Bible Online

Matááyo 13 - daasanach bible

Matááyo 13

¹Kúlích tikiˈde kinaallá Yíésu ˈbíl kinaal gaa kie, mu bás ílung yíéđie.

²Nyésébích ilishká hol ˈdu gáá yimie-, mú ki madeká, mu đo les gaa kie, kadich hile, kadich geer gaa yíéđie. Gálaat lulle íín ílung ki ˈdie.

³Aalé mu hé burnayká gáál hát hibiet-, he hol ki ekenyká onisie, kieye, Máá les fafuoká les hurt mé nie, giri áár fafuoká.[44]

⁴Mu les fímlé fafieká áár ˈdáá tikiˈd ˈgierich af ki okoˈde, hurum ká yimie, hí koey.

⁵Áár ˈdáá tikiˈd ál waaroká les gaa ˈdane. ˈDaa giri ál waaro kinaal eeˈd hí iraam mannayyeká hirís đo ál ˈjob yé gáá ˈdiiyye.

⁶Aalé ˈdaa giri hirís hidh súm les ma ki arînyká, aadh ká ˈjiiyyeká hirís đo boloyye.

⁷Áár ˈdáá tikiˈd ál híí ˈgayyoká les gaa ˈdane, hirís hí yé ká ˈdiiyyeká hiris kinaal hii hí bolosie.

⁸Ár giri muí ál maal hí midhabká gaa fieká ká ˈdie, hisse, ˈbaal hí kúˈd ˈdale, ˈbaal hí tomon le ˈdale, ˈbaal hí tomon seđ ˈdale.

⁹Aaléka, máá nee ˈguoká hí hééllá maalo, Yíésu hí gáál yie.

¹⁰Aalé gál láliká ká yimie, Yíésu heete, gaal kieye, He onisinykú in hát hibiet-, he hol ki ekenyká tákáma gálaat ki geđicha? mú yie.

¹¹Yíésu gáál ˈdéé hol ˈdú nie, kieye, Itíni in hé geer geđi Guch Waaˈgietká Waag hí shiiche. Tá gálaatí íín hé hé kinaallá Waag hí ma shíiny.

¹²Máá hé gaalí gíl geer gaa kaayká tág chiratká, hé éíy taaka guđoká úba ha gaalí shigia. Tá máá hé gaalí gíl geer gaa kaayká tág ma ki yaalinyká héllé gíl ká ˈguo kinaal ha gaalí gaa egedhdhe.

¹³Yú he onisiny hát hibiet-, he hol ki ekenyká gáál ki geđúóllá he ˈdaa giri gaal he dhaˈgasan-, kor he ma kiimisan-, he maalo-, kor he ma maaliny-, he eiy ma nannasanká.

¹⁴Tá ˈdeeny héle Waag hí Yisááya ka shiiche-, hé gálallá hí ˈduway, giri kieye, Gálallá he maalít hai maala, kor hé he eiy ma naasan, he hai dhaˈgama, kor hé he ma kiimisan.

¹⁵Gálallá hé tág met chúg, gaal hé mamaloká nee afo hol ki yegese, hé argoká hé ma arginy. Gálallá he gál onnônyka inle he ki kiimisat-, neelle he ki mamalo-, kasle he eiy ki nannasat-, ye hol ˈdu gáá nannaat-, yú biisuoká,[45] chie-, Yisááya hí ˈdiiyimeká.

¹⁶Tá itín ebá Waag hí ˈdú ˈjiiy! It inkícho he argo, neekícho he mamalóol!

¹⁷Yú hí hé ˈdúwaká geeye, gál Waag hí ˈdeem ka shigiche-, burnayká ubaa gál ˈduuˈdúwa-, burnayká hé itín hí argiyyééllá úba aargireká he fede, kor hé ma árginy. Gál kinaallá hé itín hí maallééllá úba he mamaleká he fede, kor hé ma mááliny.

¹⁸Aaléka, nee kóo! Ebá yú hí hib máálle les fafieká hélle eiy kí naa.

¹⁹Máá Guch Waaˈgiet fayamle maalo-, kor ˈdéé eiy ma náásan-, ˈdeeny giri he geer ka ˈguoká Sátan hí af ki ririatká, hé kinaallá he hát ár ˈgierich af ki okoˈde-, hurum hí koeyká.

²⁰Ár giri ál waaroká les gaa ˈdaneká hélle he hát máá ˈdeeny Waaˈgiet maaleka, đo ˈdéé iiy yeget-, geer hí gaa memeetká.

²¹Tá ˈdaa giri mu ˈdeeny Waaˈgiet hidh ma ki arînyká mu hé ˈdeeny Waaˈgiet kinaallá súm ma chochony. Hééllá he ˈdaa giri ˈdeeny Waaˈgietallá gaa manyjanyle ubaa he il ká argisinyle mú ali af kí mureka, mu đo ˈdéé gíl sug ki haađuoká.

²²Ár ál híí ˈgayyoká les gaa ˈdaneká hélle he hát máá ˈdeeny Waaˈgiet maaleka, ˈdéé iiy yeet-, kor hé lesalloká ˈgar kirmisat-, kamur lesalloká hí lalaat-, hát Waag hí feˈdoká el ma gaa igirinyká.

²³Ár gaalí eeˈd máálká álle gaa fieká he hol ki ekenyle he hát máá ˈdeeny Waaˈgiet maaleka, ˈdéé hát ˈdabaanká chichiratká. Gál hat kinaallóóllá saano midhab hí yé gáá ˈdeˈdeenká hé burnayyeká, mááká kúˈd, mááká tomon le, mááká tomon seđe.

²⁴Aalé Yíésu hib éíy taaka he hol ki ekenyká gálaat geey, kieye, Guch Uratiká yaalmit ki égká he hát máá ár midhabká lésle gaa fieká.

²⁵Aalé mu gale-, gálaat lulle rafeká mú kídhíchle mú el ˈgite, ísh sííndí hol ki égká umle sííndí muí fieká totom gaa fie, đo úba gale.

²⁶Aalé sííndí ka ˈdiiyye-, tiish chieká sííndí iish totom ká ˈgayye.

²⁷Aalé máá guđo-, les léká gedelle hí ˈdú sedhe, hí geey, gaal kieye, Máá guđo, ár nyí ká shiiche-, nyí ko kí fiiyyeká hé midhabká, muunîny? Tá ísh sííndí totom gaa ˈgíéllá ále he ká nadhe? gaalí yie.

²⁸Mu gáál geey, kieye, Hé kinaallá kídhích ye mé il gaa yaalká hí ekey, yie. Aaléka mú gedelle kieye, Nyí seete, nyí iish ali gaa bííyya? chie.

²⁹Aalé mu gedelle ˈdéé hol ˈdú nie, kieye, Híʼi, iish hí babiyyaká álká sííndí haí babiyya.

³⁰Hayyíe! Hí hol ˈgar ˈdie, ˈjíig sííndí hí hát ˈdabaanká hito. Af giri sííndí he hí mé ˈdony yegetká gál sííndí mumuroká ha yú geđia, giri iish erkob gaalí ká babuo-, hát metoká gaalí hol ki higidho-, gaalí ˈjiet gaa vereno-, ˈguom íín gaalí ye bush kí fafuoká, muí gedelle yie, Yíésu hí gáál yie.

³¹Yíésu geđi hib éíy taaka he hol ki ekenyká gálaat geey, kieye, Guch Uratiká yaalmit ki égká he hát heert ninni-, máá les fafuoká hí eedhdhe-, hí lésle gaa fafuoká.

³²Heert kinaallá hé arram lullé muí léslé ˈguomietká gaa fafuoká súm ˈdú ninni, kor ká ˈdiiyyeka, hé ˈguom lullé mú lésle gáá ˈdeˈdeennoká ˈdú ˈdér, ˈgórle đo kimír haí ˈdú galle, é haí gaa ˈdisate.

³³Yíésu geđi hib éíy taaka he hol ki ekenyká gálaat geey, kieye, Guch Uratiká yaalmit ki égká he hát maat ninni-, min hí eete-, ˈdúlo ongʼolaam hí seđeká ki ˈdaaˈdiche-, ˈdúlo lulle karsicheká.

³⁴Yíésu he onisinylééllá lulle hát hibietká he nyesebich onisie, hé níínní muí nyesebich geey-, muí he hol ma ki ekênyká mán.

³⁵Yíésu hát hibietallá nyesebich geeyallá ˈdeeny héle máá Waag hí ˈdeem ka shigicheká hí hodheká ˈduway, giri kieye, He hát hibiet-, he hol ki ekenyká gálaat ha yú geđia, hé Waag hátlé lés ma ka kúóninyká kaany gaa ijeká ha yú hogodho,[46] chieká.

³⁶Aalé Yíésu nyesebich ki ˈdiiyiminy hí gaa đuyyeká đo sedhe, ˈbíl hile. Mú gállé láliká mú ˈdú sedhe, kieye, Ebá he hol ki ekeny íshle lés ˈguomiet hurt gáá ˈdieká hélle nyí ka géesh, yie.

³⁷Yíésu gáál geey, kieye, Hib máálle les fafuo-, ár midhabká fíéllá he yáá Iny Máádhátallá.

³⁸Les ˈguom hí gáá igitoká íín he lés ke ˈdú ijóóllá. Ár midhabká íín he gál Guch Waaˈgiet léká. Iish íín he kídhích kúnnaa Sátan gállé.

³⁹Kídhích iish sííndí totom gaa fieká he Sátan ííni. ˈGuom mé ˈdony íín he kúlích biiy el ˈdaˈdká. Tá gál ˈguom mé ˈdaraanká íín he Waag gállé ˈgasso-, urruká.

⁴⁰Ísh gaalí met hol ki higidho-, gaalí ˈjiet gaa verenóóllá, hé kinaallá yaalmit Waag hí kúlích biiy el ˈdaˈdká gál ađaabano ˈguoká ki ekemeychoká.

⁴¹Kúlích biiy el ˈdaˈd kinaallá yáá Iny Máádhátallá gál chia ˈgasso-, urruká ali ha ká fafaa, gaal Guchchú gál gálaat ađaabano met ki kokuoká ubaa gál hé gaa nyakarichká gaa seseenká lulle hollo hol ˈdú shuguna,

⁴²gáál ˈjiet biiyoká hai fafaa. Hé kinaallá he ál gaalí gaa bebeen-, gaalí kach hol a met gaa ˈginianká.

⁴³Gál giri Waag gálléká ˈJaa kúnnaa Waag Guchle hai gaa yíéđima, hát aadhka hai ˈjiimiˈda. Máá nee ˈguoká hí hééllá maalo, Yíésu hí lalille yie.

⁴⁴Yíésu hibéél úba gálaat geey, kieye, Guch Uratiká yaalmit ki égká he hát hé him hí ilish-, gaalí lés ˈguomiet ki kaay-, máá hí shuunatká geer hí gaa memeet-, kor geđi hí lés kinaal hurt kakaw-, tá mu seseen-, he lullé ˈguoká el gaa maaduo-, lés kinaal higiatká.

⁴⁵Guch Uratiká úba yaalmit ki égká he hát máá shokodich hol gaa mamaduo-, bier ˈdabaanká hol gaa ˈgeˈgedho-,

⁴⁶bieˈdit súm midhab-, him hí ilishká argeka, đo seseen-, héllé lulle ˈguoká el gaa maaduo-, tá bieˈdit kinaal higiatká.

⁴⁷Guch Uratiká úba yaalmit ki égká he hát mas gaalí bás ki layka, béé met lulle ka ˈgiiliˈgaw-,

⁴⁸beeny hí koch yieká gaalí ílung ki heergiteka, gaal les yíéđian-, gaal beeny hím ˈguoká béé gaa waarat-, beeny hím mánká lalaanká.

⁴⁹Kúlích biiy el ˈdaˈdká úba yaalmitééllá ˈdoonno. Waag gállé ˈgasso-, urruká ali hai ká fafiyya, gaal gál hát Waag hí feˈdoká ekemeyoká ubaa gál hé nyakarichká gaa seseenká eiyyo hol gaa nannaa,

⁵⁰gaal gál hé nyakarichká gaa seseenká ˈjiet biiyoká hai fafaa. Ál kinaallá he ál gaalí gaa bebeen-, gaalí kach hol a met gaa ˈginianká, Yíésú hí gáál yie.

⁵¹Aalé Yíésu gáál yiete, kieye, It he onisinyééllá eiy naasate? Gaal kieye, Iiy-hí, nyáá nyí eiy naasate, gaalí yie.

⁵²Aalé Yíésu đo gáál geey, kieye, Aaléka, máá gálaat nyatalaam oonisuo-, Guch Waaˈgiet lalille yieká he hát máá ˈbíl geerle mé ki yaal-, tokolle hé ˈduuˈdúwa-, kissoká ubaa hé ˈduuˈdúwa-, kaanaká hí gaa ijoká yé gáá ˈdeđuoká, yie.

⁵³Aaléka, Yíésu gálaat he onisiny hát hibiet-, he hol ki ekenyallá gálaat geeyká đo ál kinaal gaa kie,

⁵⁴ˈjien gáá guđandheká sedhe. Mu ˈjien kinaal ˈbíllé ˈdiiyiminyká gálaat he gaa onisie. Gálaat mú he onisinyléél af ˈdabe, kieye, Máállá ˈdaalim guđo he guo-, ubaa hé ki af ˈdaˈdaboká, ekemeyóóllá ále he gaa arge?

⁵⁵Máállá hé máá ˈguor hođuoká inyle muunîny? ˈJiellé hí ˈdalloká meenyle hé María muunîny? Mú nyaaramlé yaabká hé mú Yákob, Yúósef, Símon, tá Yúúˈda muunîny?

⁵⁶Mú nyaaramlé ˈdedhitká lulle hé ényallá gaa ijóóllá muunîny? Tá hééllá lullééllá ále muí gaa arge? gaalí yie.

⁵⁷Aalé gaal mú eeshey. Yíésu đo gáál geey, kieye, Máá Waag hí ˈdeem ka shigichoká hé gaalí ma egesheny. Gál lésle ubaa mú ˈbíl ílle tákáma hí egesheye, yie.

⁵⁸Aalé gaal ˈdaa giri mú iiy yeen ka mánká, mu hé burnay-, gálaat hí af ˈdaˈdabo-, onnônyka ekemeyká hé ˈjien kinaallá ma gaa ekêny.