Read daasanach Matááyo 14 Bible Online

Matááyo 14 - daasanach bible

Matááyo 14

¹Af kinaallá Heróˈde giri kánsích lés Galilaaya onnoyká fayam Yiesu maale.

²Mu gállé gédeká geey, kieye, Máállá he Yuána giri gálaat bie gim nannie-, uushich yé gáá ˈdie, ˈdaa kinaallá in fargogínt hí gaa iđa, hé ki af ˈdaˈdabóóllá ekemeye, muí gáál yie.

³Máá Heróˈde lééllá in héle Yuána ˈgiliˈgay, mú hiigidhe, mú ˈbíl hiiginká gaa kaay. Mu Yuána ˈbíl hiiginká gaa kaayallá, mu nyárlé Fílib minlé Heróˈdias minle hote, hé kinaallá in Yuána hí mú ˈdú ˈdeente.

⁴Yuána ˈdeeny he Heróˈde geeyká kieye, Minnééllá kuun hí minkú hođisatoká hé tagle muuninyo, he mú yie.

⁵Heróˈde đo Yuána yegieská he fede, kor gálaat kiadhe, ˈdaa giri gálaat Yuána hát máá Waag hí ˈdeem ka shigicheká ka dhaˈgameká.

⁶Kor af giri Heróˈde kúlích he gaa ˈdalidheká ˈjilalle ali kí ˈdiiyyeká, ini Heroˈdias gál gaalí kiereká met gaa laalate, Heróˈde geer hí gaa meedhe,

⁷ˈgaađame, Waag ˈdodhdhe, giri hé ini hí heesetoká ini shiguoká.

⁸Aalé ini ˈjielle hí ˈdéé af ki ˈguunuanneká, siete, Heróˈde geeyche, kieye, Yuána gálaat bie gim nannuoká meenyle ye ˈbakalich kí káab, chie.

⁹Heróˈde đo geer hí gaa ˈdeenedhe, kor ˈdaa giri gál kiereká metle Waag gaa ˈdodhdheká ˈdéé mure, giri ini héllé ruogonneká gaalí shiguoká.

¹⁰Aalé máá muí ali gaa kaayká ˈbíl hiiginká sedhe, Yuána mé gáá muˈde.

¹¹Yuána meenyle muí ˈbakalich gáá kaadhdhe, muí ini ˈdu gáá sidhe, ini hí ˈjielle ˈdú site.

¹²Aalé Yuána gállé láliká kie, mú gónle eedhe, mú galie, đo sedhe, Yíésu fayaméél shie.

¹³Yíésu fayaméél maaleká ubaa lalille kie, kadich hile, gaal ál gálaat mán-, Yíésu hí tákámle gaa yíéđianká mé nie.

¹⁴Yíésu bás ílung ka ˈdoy-, kadich gáá leedhe-, nyésébích ilishká argeká, gáál geer hí ˈdú gudhdhe, gáál gállé fursam ˈgieká bisie.

¹⁵Biiy gelga chieká gál láliká Yíésu ˈdú sedhe, mú geey, kieye, Állá ˈbakate, aadh hé gaanate, gálaat Waag ki éeb, gaal hí kie, hí ˈjien siet, hí ˈguomano hol ki yiat, yie.

¹⁶Yíésu kieye, Gáál mee ke ˈdú egee? Gáál itín hí hé geere shía, yie.

¹⁷Gaal Yíésu ˈdéé hol ˈdú nie, kieye, Nyáá nyí hé ˈgayyaká mán, állá balashá chen ubaa béé naama tákáma hí gaa ija, gaalí yie.

¹⁸Yíésu gáál geey, kieye, Balashá ubaa beeny kinaallá állá ka sidháa, gáál yie.

¹⁹Aalé Yíésu gálaat geey, giri gaal les yíéđianká. Aaléka, mu balasha giri chenká ubaa beeny giri naamaká eedhdhe, úr gaa dhaay, Waag ˈgielmít hol ˈdú nie. Mu balashá eiy ˈgiˈgidhie, lalille shie, lali hí gálaat eiy gise.

²⁰Gálaat lulle gololte, heyie. Mú lalille ˈguom ka ˈgisate-, he hol ˈdú shuunneká illam tomon a naama koch koch.

²¹Gál ˈguom kinaallá koeyká lúl ke gál ˈdiet ubaa um taak gaa shuuneka, gál yááb shíí chen.

²²Héél gaalí el ki naateká Yíésu lalille geey, giri gaal kadich higilo-, mú met nannaat-, bás ílung ˈdaatí yé ki ˈdeˈdeen-, mu íín nyesebich Waag ki egewká.

²³Mu nyesebich Waag ki eeyká sedhe, gúm feˈjie, giri Waag vivisatká. Aadh dhúú ˈjiiyyeká Yíésu tákámlé he ál kinaallá gaa ije.

²⁴Kadich af kinaalláka hé fagandhe. Aalé wááních fargogoká ˈdoy, baran le gaa eey, kadich hát ˈdeđewká ˈbaalˈbalsie.

²⁵Bar hátle gil má ká sin, Yíésu bás ˈdug gaa sedhe, lalille ˈdú sedhe.

²⁶Aaléka, mú lalille máádhat bie ˈdug gaa seseme-, argiyyeká sierm ˈdeewká hí faanne, kieye, Gaaram hállá! yie, gaal đo koˈdam ˈdaaˈdie.

²⁷Yíésu đo ál tikiˈde kinaallá ˈdéé hodhe, kieye, Haí néeny, he yú, sierm hayyíe! gáál yie.

²⁸Bétiro mú ˈdéé hol ˈdú nie, kieye, Máá Guđo, he har kúún kátaka, ye géesh, yú bie ˈdug gaa sedhe, ko ˈdu gáá yimedhe, yie.

²⁹Yíésu mú vie, kieye, Káde, yie. Aalé Bétiro kadich gaa leedhe, bie ˈdug gaa sedhe, Yíésu ˈdú sedhe.

³⁰Aalé Bétiro waanich fargogóon argeká ˈbinineny hí faanne, đo he hí ˈdiin yie, kúóˈd ˈdoy, kieye, Máá Guđo, ye rig! yie.

³¹Tíkíˈdé kinaal Yíésu đo gíl helie, mú ká ˈgiliˈgay, mú geey, kieye, Kó iiy yeen ko ninníil! Háteka geer totom gaa ˈgiˈgisatóol? yie.

³²Gaal kadich tákáma he hile, waanich đo ali ki ˈdie.

³³Gál kádích kinaal gaa ijeká lulle mú vite, kieye, Hé ˈduwa, kúún gon Iny Waaˈgiet! gaalí Yíésu yie.

³⁴Gaal baad af ˈdaati-, basietká yé ki ˈdieká, gaal ény Genesaret ílungle ki ˈdie.

³⁵Gál eny kinaalloká Yíésu kimiteká, gaal ˈjien les kinaalloká fayám bash ki hoy, gálaat gállé basham ˈguoká lulle Yíésu ˈdú gáá sisidhe.

³⁶Aalé gaal Yíésu gil ki efe, giri gál basham ˈguoká đafar muí kaadhdheká net đig yegetká. Ameeny gál mú đafarle đig yieká lulle bie.