Read daasanach Matááyo 17 Bible Online

Matááyo 17 - daasanach bible

Matááyo 17

¹Aalé ram le ˈgiteká Yíésu đo Bétiro ubaa Yákob, tá Yákob nyárlé Yuána eedhdhe, gaal tákámle gúm ˈdérká feˈjie.

²Ál kinaal Yíésu gáál metle bis hí hol gaa suoy, mú innum hí édh chie, hát aadho, mú đafaraamle súm édh yie, ˈjiimiˈde.

³Toomareka Móshe ubaa Elíya gáál yé ˈdu gáá ˈdie, gaal ubaa Yíésu hol geey.[56]

⁴Bétiro Yíésu geey, kieye, Máá Guđo, múún ke állá gaa ijóólláka hé tág midhab, har feˈdoka, lokoolom seđ állá ha yú gaa ˈdiisa, lokóól tikiˈd hí lokoolkú cheet, lokóól tikiˈd hí lokool Moshe cheet, lokóól tikiˈd hí lokool Eliya cheet, yie.

⁵Aalé mu hátle ˈdéé af ká ˈgaa, nyáˈdów édh gogoká gáál buanne, gaal ˈdéé hót nyáˈdow gáá ˈgisate-, kieye, Hééllá he Iny chia yú giel-, ye geer gaa meeyká. Mú af nee kóo, chieká maale.

⁶Gál giri láliká ˈdéé hótal maaleká súm birge, abuunam les ˈdane.

⁷Yíésu gáál ˈdú sedhe, gáál ˈdú chiichiˈde, kieye, Haí seerêny, les gaa kée, yie.

⁸Gaal met les gaa eeyká Yíésu tákáma ali yiel arge.

⁹Aalé gaal he gum gáá leledheká, Yíésu gáál il gíl gaa helie, kieye, ˈDaab yáá Iny Máádhátallá he uushich yé ma gáá ˈdíinyká hé hí argiyyééllá haí máádhat géeny, muí gáál yie.

¹⁰Aalé gál láliká mú heete, kieye, Háteka gál gálaat nyatalaam oonisuoká kieye, Elíya ííni gon erkob ká yiimedhe, yegetal?

¹¹Yíésu gáál ˈdéé hol ˈdú nie, kieye, Taglé, Elíya he máá erkob ká yimet-, he lulle tág kokuoká.

¹²Tá yú hí geeye, Elíya íín kis hé ká ˈjie, ha gaalí ma kimísan! In hát gaalí fedeká gaalí ki sedhe. Yáá Iny Máádhátallá úba hát gaalí fedoká ha gaalí ye ki seeme, ha gaal ye maanyjasia, Yíésu hí gáál yie.

¹³Aalé Yíésu ˈdeeny Eliyáál huogodheká gál láliká mu hát Yuána gálaat bie gim nannieká ˈdeenyle hogodhoká eiy naate.

¹⁴Aalé gaal he nyesebich álle kí ˈdieká mú tikiˈd ká yimie, Yíésu met les kurram gaa ˈdoy,

¹⁵kieye, Máá Guđo, iny chia farich ˈguo-, ˈgiˈgidhuoká geer hí ko ˈdú guat! Veel aadh ˈdaab lulle edhe ubaa bieto les gaa ˈdarama, veel hé tág manyjay!

¹⁶Yáá véel lalikú ˈdu gáá eey, tá gaal hé fargogint mú ki ririanká mán, yie.

¹⁷Aalé Yíésu kieye, It hí iiy yeen mán-, hí tág ma ˈgiinyal! Yú in ˈdáb aake ke hol af yíéđima, tá yú hol gaa tataa? Ebá véel állá kí ée, yie.

¹⁸Aalé Yíésu aryaan véel gaa iđeká ki ˈday, aryáán đo véel yé gaa ˈdiiyye, ál tikiˈde kinaallá veel đo midhandhe.

¹⁹Aalé gál láliká tákámle Yíésu ˈdú sedhe, mú heete, kieye, Nyiin háteka nyí fargogint aryaan kinaal yé ki ˈdeđicheká mánnal? yie.

²⁰Yíésu gáál geey, kieye, Hé kinaallá iiy yeen kíchia ninni. Tá yú hí hé ˈdúwaká geeye, iiy yeen kíchia hí ˈgayyaká har úba káána ninnenêny-, hát heert onnônyka, hí gúmallá geeyche-, hí kieye, Állá gaa siléew, áltí ˈgúo, hí chegetoká it uˈda, gum đo hai sileedhe. It onnônyka hé níínní hí ka aađadhdheká mán.

²¹Tá fargogint máádhat hí aryaan hatallóóllá yé ki ˈdeđuoká íín Waag visan ubaa af hisan tákáma he gaa iđa,[57] yie.

²²Aalé Yíésu ubaa lalille geđi Galilááya hol ˈdu gáá yimieká, Yíésu lalille geey, kieye, Yáá Iny Máádhátallá gál ye yegeská gíl geer ha gaalí ye gaa kakaa,

²³ha gaal ye yeese, tá kúlích ki seđeká uushich yé ha gáá ˈdeeme, yie. Gál láliká đo súm ger hí gaa ˈdeenedhe.

²⁴Aalé Yíésu ubaa lalille ˈjien Kafarnaum ki fameká gál bíre gaalí ˈBíl Waaˈgiet ki gugusoká gugusatká Bétiro ˈdu gáá yimie, kieye, Máá kíchia hí he oonisúóllá in hé bíre ˈBíl Waaˈgiet gugusô? yie.

²⁵Bétiro kieye, Iiy-hí, hé guguso, yie. Aalé Bétiro he ˈbíl ka hileká, hátlé ˈdéé ma hônká, đo Yíésu hí yiete, Yíésu kieye, Símon, kúún tawunykúka, gál kaansúo-, lesietká gálya he bíre gaa guguta? Gaal in gál é gerlé he birm gaa gugutáa? Ebá gaal gál hí é gerle muuninyká he birm gaa guguta? yie.

²⁶Bétiro mú ˈdéé hol ˈdú nie, kieye, Gaal gál hí é gerle muuninyká he birm gaa guguta, yie. Yíésu kieye, Har hát kinaal kátaka, gáál helelle hé birm he gugusoká mán.

²⁷Tá gáál ha ke chirm kikisíiny, sí, bás bííyle mé naʼ, korbich bie ki lab, béch erkob-, korbich hí ka ˈgiliˈgawká af eiy ˈdéesh, a geerle bíre ha gaa aargiˈda. Bíre kinaallá ka éew, gáál ˈdú sit, hí yú ubaa kúún bíre kúnnaa gusachiet cheet, Yíésu hí Bétiro yie.