Read daasanach Matááyo 18 Bible Online

Matááyo 18 - daasanach bible

Matááyo 18

¹Af kinaallá gál láliká Yíésu ˈdu gáá yimie, mú heete, kieye, Gál Guch Uratiká gaa ijoká máállé súm guđoká mááya? yie.

²Yíésu veel ninniká vie, véel gáál hurt ká koy,

³gáál geey, kieye, Yú hí hé ˈdúwaká geeye, itín hí hol ma gaa suony-, hí hát um niginiká ma cheenka, it kúlích níínní hí Guch Uratiká higilloká mán.

⁴Máá hol ˈdúúw rio-, hol veel ninni-, hatallóólla hoyoká in Guch Uratiká gálle lulle ˈdú guđo.

⁵Aalé máá veel ninni-, hatallóóllá ˈdaa meenychúka rokoˈd ki goloká yaa ye rokoˈd kí gole.

⁶Tá máá gál nigini-, hatallo-, ye iiy yíéllá mú tikiˈd ye el af gaa tuoká máá kinaallá gaalí yíérích guđo-, ilishká luut ki hidhe-, gaalí bás hurt ki layka kalat.

⁷He bá ˈdéen! Les har hé gálaat ađááb higilsuoká hí gaa ijaa! Yaalmisam hatallóóllá gon les yé hai gáá ˈdeeme, tá máá gálaat ađááb higilsúóllá, ebá he hí ki ˈdéen!

⁸Har gílkú yíekaʼ, ˈgáskú yíekaʼ, ko ađááb higilioka, ali gaa mur, lab. Luolmít gíl tikiˈd ubaa ˈgas tikiˈd ki hilleka kalat. Hát gilkú ubaa ˈgaskú alulle ˈgayyo-, tá Waag ko ˈjiet biiyoká ki lalaannóóllá ˈdeew.

⁹Har ílkú ko ađááb higilichoka, sílish, lab. Luolmit il tikiˈd ki hilleka kalat. Hát in hullaalle ˈgayyo-, tá Waag ko ˈjiet ma kufuminyká ki lalaannóóllá ˈdeew.

¹⁰Onnóo, haí gál niginííllá mú tikiˈd eeshêny. Yú hí geeye, gál niginííllá gál ˈgasso-, urru-, hí ˈdeˈdeenká hé ˈJaa chia úr ijoká aadh lulle hol af ijo.

¹¹Yáá Iny Máádhatallá ka yimíéllá, gál bađayká ririma,[58] Yíésu hí gáál yie.

¹²Aalé Yíésu gáál heete, kieye, Háte hí dhaayche? Máádhat he wála kúˈd tikiˈd ˈguo-, kor wala kinaal walach tikiˈd hí gaa bađayka, mu hé wala giri tomon saal a saal-, gúm ˈdú ˈgieká ma haađiny, ma seeminy, wálách bađayatíá hol ma gaa ˈgeˈgen?

¹³Yú hí hé ˈdúwaká geeye, máá kinaallá walach argeka, súmmo geer hí gaa meedhe. Geer gaa meent muí aargiro kinaallá hé geer gaa meent muí wala tomon saal a saal-, ma bađânyatíá ka ˈguoká af ˈdú gíri!

¹⁴Hát tikiˈdééllá in ˈJaa kíchia úr ijoká gál niginííllá mú tikiˈd úba hí gaa baađawká neb, Yíésu hí gáál yie.

¹⁵Yíésu geđi gáál geey, kieye, Har nyárkú ko he ki ˈdeeneyka, ál gaalí gaa láká ˈdú sí, hé ko ki ˈdeeneyká géesh. Har he ko ˈdéé af ki maaleka, af kinaalka kúún geđi nyááro argiyye.

¹⁶Har he ko af nee ma konyka, máádhat éew, muuninyka, gáál naam hol eedhdhíe, giri aadh ˈdaatika, gál ko ˈdú ijo-, ko ˈdéé ˈdú chichiratká naam ubaa seđ nyuoroká.[59]

¹⁷Har he gál kinaal af ká điidheka, gál Waag iiy yie-, me hí hol aargiroká géesh. Har gál kinaal úba af ká điidheka, mú hash, mú gál Waag iiy ma yéenká ubaa gál birm gugusat-, muom kokuoká mú tikiˈd ka dháash.

¹⁸Yú hí hé ˈdúwaká geeye, ameeny hé itín hí lésallá gaa điitoká, hé Waag hí úr gaa điite. He lullé hí lésallá iiy gaa cheetoká, hé Waag hí úr iiy gaa chie.

¹⁹Geđi yú hí hé ˈdúwaká geeye, it lésallá ˈdú iđáállá, gáál naam hé hol af gáá veetká Waag ruogoneka, ˈJaa chia úr ijoká af haí veedhe.

²⁰Gáál naam yíekaʼ, seđ yíekaʼ, ˈdaa meenychúka me hí hol argeka, yáá hurt gaa ijo, Yíésu hí gáál yie.

²¹Aalé Bétiro Yíésu ˈdú gáá yimie, kieye, Máá Guđo, nyárchú ye he ki ˈdeeneyka, mú a mia yú ˈdú ˈjeeme? A tiiya? yie.

²²Yíésu kieye, Yáá a tiiya ko ma yegen, a tomonaam tiiya a tiiya mú ˈdú ˈjeeˈjémo, yie.

²³Aalé Yíésu gáál hibéél geey, kieye, Guch Uratiká yaalmit ki égká he hát máá kansich gedellé hí bíre gaa hidheká hol êw gaa beđisatká.

²⁴Aalé máá kansichká bíre túóyle mé gáá kodhdheká, gédéch hí ewle bíre shíí tomon ˈgieká gaalí ˈdu gáá eey.

²⁵Aalé ˈdaa giri gédéch kinaal êw ˈdáb kinaalloká hin ma urinyká, máá kansichká đo ˈdéé mure, giri gedech ubaa minle, tá umle, tá héllé lulle ˈguoká gaalí hím ˈdaraan-, êw yíé ˈdeennoká.

²⁶Aalé gédéch êw ˈgie kinaal mú ˈgas met les gaa ˈdoy, mú gil ki efe, kieye, Ha ˈgorôny, ye af yíéđig, ewkú ha yú ko kí higidha, yie.

²⁷Máá kansich kinaal mú buonyléél maaleká, đo mú geer hí ˈdú gudhdhe, ew giri muí ˈgieká mú ki hay.

²⁸Kor gédéch kinaal yíé ˈdieká, máá éíy gedech ál kinaal úba hujich gaa nannie-, hí ewlé ninni-, bireká ˈgie mare hol gaa ˈgeˈgedhe. Mú argeká, đo mú ˈgiliˈgay, mú ˈgóó chiˈde, mú êw ˈdú moy, kieye, Ye ewchú kí hit, yie.

²⁹Máá gedech kinaal mú ˈgas met les gaa ˈdoy, mú gil ki efe, kieye, Ha ˈgorôny, ye af yíéđig, ewkú ha yú ko kí higidha, yie.

³⁰Tá ííni giriká đo mú gaa điidhe, mú eedhdhe, mú ˈbíl hiiginká gaa kaay, giri mu ˈbíl kinaal gaa yíéđian-, ˈjíig ˈdaab mu bíre lulle el yé ma gáá ˈdéenyká.

³¹Aalé gál éíy taaka gédeká mú yaalmitléél argeká, ger hí gaa ˈdeenedhe. Gaal đo máá kansich géde léká ˈdú sedhe, he lullé ˈdeenedhééllá mú geey.

³²Aalé máá kansichká gédéch geer guurá mán kinaal máádhat ali ˈdú kaay, mu ka yimieká mú geey, kieye, Kó gédéch ˈdeewal, kuun he máá ewchú ˈgie-, ye gil ki efe-, yú êw ki hayká muunîny!

³³Tá geerchú ko ˈdú gudhdhe háluke, kuun har geer guura hat kinaalloká gédéch ewkú ˈguoká má argisinya! yie.

³⁴Máá kansichká đo súm idhane, mú ˈbíl hiigin-, álle mú he il hí gaa aargiˈdo-, ˈdaab mu êw lulle yé ma ˈdéenyká ki lay.

³⁵Hát hatallóóllá in ˈJaa chia úr ijoká úba hí itín ki ekemeye. Hé kinaallá har itín nyaaramkícho hé hí ki ˈdeeđeneyká hí ma hany-, hí gáál geer guurá ma argisinyka, Yíésu hí gáál yie.