Read daasanach Matááyo 19 Bible Online

Matááyo 19 - daasanach bible

Matááyo 19

¹Aalé Yíésu ˈdéé huogon hí gaa đuyyeká, đo lés Galilaaya gaa kie, lés gál Yuuˈdi giri wár Yorˈdan ˈdaatí iđoká mé nie.

²Nyésébích guđoká mú el gaa veere, gál fursam ˈguoká muí ál kinaal gaa bisie.

³Aalé gál Farisaay ˈdáá tikiˈd Yíésu ˈdéé af kí dhaay, mú heete, kieye, Mááyab minle hát lulle điđidhan-, min hol eiy gaa gagaloká ˈdaa hemuumurit Waaˈgietka taglê? yie.

⁴Yíésu gáál ˈdéé hol ˈdú nie, kieye, Waag les ka kuonneká hát gálaat tág niiyyeká it Warˈgat Waaˈgiet ma gaa túony? Waag máá yab ubaa máá ˈdedhito he tág niiyye muunîny? [60]

⁵ˈDaa kinaallá ˈdugaka in mááyab ˈjaalle ubaa ˈjielle haađia, minle hol chiiˈda, gaal hullaalle tikiˈd yeedhe,[61] Waag hí chie.

⁶Aalé gaal hol shuunneka, gaal hé geđi naam muuniny, gáál gon hí tikiˈde. Aaléka, gál Waag hí hol fiiyye-, hí tikiˈd hoycheká ha máádhat hí hol eiy gaa ˈgidhîny, Yíésu hí gáál yie.

⁷Aaléka gál Farisaay geđi mú yiete, kieye, Tá háteka, Móshe nyí he kí mure-, kieye, máádhat min điđidhanka, hí min warˈgat hol eiy gaa galimiká ki muro, yíel?

⁸Yíésu gáál geey, kieye, Móshe ˈdegkícho hí điđidhannoká, iiy yíéllá he ˈdaa giri itín hí met guogoká. Tá hééllá bár héle Waag gálaat ka kuonneká hé mannay.

⁹Tá yú íín hí geeye, máádhat har minle hí ma ˈdú herginy-, tá min điidho-, min éíy taaka eetká, máá kinaallá minlé he ˈdú hergie, ađáábo he hile, yie.

¹⁰Aalé gál láliká Yíésu geey, kieye, Har mááyab ubaa minle ˈdeemle ˈgierimle hí hatal kátaka, kalat ki ma eenka, gaalí yie.

¹¹Aaléka Yíésu gáál geey, kieye, Gálaat ˈbaal hé ˈdéé hótallá ma uriny, gál Waag hí fargogintle shiicheká tákáma hí ura.

¹²Les hé gál yaab ka ˈdalidhe-, ˈdal mán-, ma shugunanká ˈgayyo, hé gál yááb gálaat hí đaaf fie-, ˈdal ˈdabe-, ma shugunanká úba ˈgayyo. Gáál ˈbáál ˈdaa Waaˈgiet ˈdugaka hé metlé he kí mure, giri ma shugunan-, ma ˈdaˈdalinyká. Tá yaalmitééllá máá hí uroká hí ura, Yíésu hí gáál yie.

¹³Aaléka, gálaat Yíésu um niginiká ˈdu gáá eey, giri mu um met ˈdug ˈdú chichirat-, um Waag ki vivisatká, kor gál giri láliká gáál ki ˈday.

¹⁴Aalé Yíésu kieye, Um haí môny, um hí ye ˈdu gáá yimet. Guch Uratiká gál hílléká hát umééllá, yie.

¹⁵Mu um met ˈdug ˈdú chiichiˈdeká, đo ál kinaal gaa kie.

¹⁶Guch guđo mán, máá ruorich mare Yíésu ˈdu gáá yimie, mú heete, kieye, Máá gáál he oonisúóllo, meete midhab yú ekemeye, giri yú luolmit biiyoká aargiroká? yie.

¹⁷Yíésu mú geey, kieye, Háte ye hé midhabká hélle heesetéel? Máá midhabká he Waag tákáma. Har luolmit biiyoká higiloká feˈdoka, hemuumurít chíro, el gaa véer, muí mú yie.

¹⁸Mu Yíésu ˈdéé hol ˈdú nie, kieye, Hemuumurit máre? yie. Yíésu mú geey, kieye, Hemuumurít giri kieye, ha máádhat chíésiny, haí hol ˈdú burúminy, ha buráany, ha máádhat hódho af káany,

¹⁹ˈjaakú ubaa ˈjiekú kiikíaw,[62] héétí máá olkú hát kúún dhúrkú hol gielallá géélneb,[63] chieká, Yíésu hí mú yie.

²⁰Aalé máá giri ruorichká Yíésu geey, kieye, Yáá hemuumuritééllá lulle ki yaal. Meete éíy taaka laʼ, yú ma ekêny? yie.

²¹Aalé Yíésu mú geey, kieye, Har he lulle tág gaa taalloká feˈdoka, sí, hé kua ˈgayyoká el gaa mádish, bírellé hí yé gáá ˈdiiyyoká gál he maamanká eiy gis, hát kinaallá in kamúr úratíá ká ˈgayya. Hééllá đusicheka káde, ye el gáá véer, Yíésu hí mú yie.

²²Máá giri ruorichká ˈdeeny Yiesúúl maaleká máá kamúrut ke yeetká geer hí gaa ˈdeenedhe, đo ali gaa sedhe.

²³Aalé Yíésu lalille geey, kieye, Yú hí hé ˈdúwaká geeye, máá kamúrutká Guch Uratiká higiloká, ebá fargogóon!

²⁴Yú geđi hí geeye, máá kamúrutká Guch Waaˈgiet higiloká hé tág fargogo! Galt hirich íllé ninniká nannaatoká úba hí hawul ˈdú man, yie.

²⁵Mú lalille ˈdeenyéél maaleká súm gil hí af fame, kieye, Tá aaléka gálya rubach aargira? yie.

²⁶Yíésu gáál gaa dhaay, gáál geey, kieye, Yaalmitééllá hé gálaat hí hát gaa mán, tá Waag hé he lulle hát gaa ˈgayyo, yie.

²⁷Aalé Bétiro Yíésu geey, kieye, Tá nyííni nyí hékínyo lulle hayche-, nyí ko el gáá veeˈdééllá, hé nyí aargiˈdaká meete? yie.

²⁸Yíésu lalille geey, kieye, Yú hí hé ˈdúwaká geeye, af giri lés kaanaká ka chiimeto-, yáá Iny Máádhátallá kara chia guchiká ˈdug ˈdú yíéđianká, it hí ye el gáá veeˈdééllá úba karm guguchi-, tomon tikiˈde a naamaká haí ˈdú yíéđianna, giri hí é meet tomon tikiˈde anaama-, Yisirayelká met ki ˈgiiyyaká.

²⁹Ameeny máá ˈdaa meenychúka ényle yíekaʼ, nyaaramle yíekaʼ, ˈjaalle yíekaʼ, ˈjielle yíekaʼ, umle yíekaʼ, tá léslé fafuoká yíekaʼ hayoká, héllé hay kinaallá hé éíy taaka hat kinaallo-, hí af ˈdú gíri-, kúˈd nyuoroká hai aargira. Héétí mu luolmit biiyoká hai aargira ubaa hai gaa yíéđima.

³⁰Tá gál burnay-, káánalka biiy met ˈgieká bár ˈdaatika biiy el hai ki maada, héétí gál burnay-, káánalka biiy el ˈgieká bár ˈdaatika biiy met hai ki maada, Yíésu hí gáál yie.