Read daasanach Matááyo 2 Bible Online

Matááyo 2 - daasanach bible

Matááyo 2

¹Yíésu ény Beteleem lés Yuuˈdia-, ki ˈdalmaatallá, he bár giri Heróˈde kansich onnoyká. Yíésu ˈdalmaatle el ˈdaal gál hidhino dhaˈgasanká ˈdaa baryo gáá yimie, Yerúsalem kí fame.

²Gaal gálaat heete, kieye, Veel ˈdalidhe-, kánsích gál Yuuˈdi yegetká ále he gaa ija? Nyiin mú hidhintlé ˈdaa baryo yé gáá ˈdiiyyeká nyí argiyye, in nyí ká chimie, giri nyí mú met les kurram gaa ˈdaraanna-, nyí mú ˈdúúw shigichaká, gaalí yie.

³Aalé Heróˈde giri kansichká héél maaleká birge. Gál Yerusalem gál gúúđo úba birge.

⁴Heróˈde gál Yuuˈdi-, gállé guguđo-, suoryoká ubaa gállé gálaat nyatalaam[4] oonisuoká hol ˈdu gáá vie, gáál heete, kieye, Máá Waag hí kansím koyye-, ká yiimet-, Messíya lééllá ál he ki ˈdalmaatká in ále? yie.

⁵Gaal mú ˈdéé hol ˈdú nie, kieye, Mu ény Beteleem giri lés Yuuˈdiaká ki ˈdalmidhdha. Hééllá yaalmit giri warˈgat máá Waag hí ˈdeem ka shigicheká hí hote-, giri kieye,

⁶Tá kó ény Beteleem lé-, lés Yuuˈdia gaa iđóóllo! Kuun lés Yuuˈdia énylé ˈduuˈdúwaká kó énylé biiy elloká ma chegen. Kuun máá kansich gál chia Yisirayelká mé ki yaal-, gáál ˈdeˈdeenká yíé hai ko gáá ˈdeeme,[5] chieká, gaalí Heróˈde yie.

⁷Aaléka, Heróˈde gál hidhino dhaˈgasan kinaal hát hinyamoká hol ˈdu gáá vie, gáál yiete, giri ram aleđuđugullé hidhint hí yé kí ˈdiiyyeká gaalí geđuoká.

⁸He đueká mu gáál Bételeem ali ˈdú fie, kieye, Sedhíe, véel álle hát ˈdabaanká ˈgas ka yietíe, hí véel argiyyeka ye fayám ˈdu gáá sidháa, yú úba sedhe, véel vita, gáál yie.

⁹Aalé gaal máá kansichal fayamle maaleká đo kie, sienyle mé gáá kodhdhe. Gaal sienylé gaa igireká hidhint giri gaalí ˈdaa baryo gaa argeká gáál met naate, ˈjíig ál veel hí gaa ijeká ˈdug ˈdú ˈdiiyye.

¹⁰Gaal hidhint argeká đo súm ger hí gaa meedhe.

¹¹Aalé gaal ˈbíl hileká véel ubaa ˈjiellé María arge. Gaal véel metle les kurram gaa ˈdoy, véel ˈdúúw shie. He đueká gaal đo tokolaamle af fuufure, gaal hórkí ubaa íláám ussaká, tá henyit gaalí salab hol fie-, he véel ˈdu gáá sidheká véel shie.

¹²Aalé gaal hát he Heróˈde hol ma ˈdú nannaanká Waag hí amádh gaa geeycheká, gaal đo ˈgíérích éíy taaka nadhe, lésle mé nie.

¹³Aalé gál hidhino dhaˈgasan kinaal he kieká, máá ˈgasso-, urru-, Waaˈgietká hát amadhyoká Yúósef yé ˈdu gáá ˈdie, mú geey, kieye, Les gaa keʼ, véel ubaa ˈjielle éew, lés Misirayim kar ˈdú ˈdóo. ˈDaab yú ko af ma kí ˈdíiny-, yú ko ma géenyká ál kinaallá gaa yíéđía. Heróˈde veelééllá he hol gaa ˈgeˈgedhe, véel yegeská he fede, muí Yúósef yie.

¹⁴Aaléka, Yúósef ram gaa kie, véel ubaa ˈjielle eedhdhe, chúúre kar ˈdoy, lés Misirayim mé nie.

¹⁵Mu ál kinaal gaa yíéđie, ˈjíig Heróˈde kufe. Hát kinaallá in ˈdéé hót giri Máá Guđo Waag hí máállé ˈdeem ka shigieká ká geey-, mu hí ˈdiiyimeká ˈduwayye, giri kieye, Yáá Inychú lés Misirayim gáá vie,[6] chieká.

¹⁶Aalé Heróˈde gál hidhino dhaˈgasan kinaal hát hí af ˈgiteká kimiteká đo idhane, ˈdéé mure, giri um lullé nigini-, yaayab-, warram hí naam ˈdoyyeká ubaa warram hí naam ma ˈdônyká yuoy hí Bételeem geerle ubaa ˈdinnamle gaa beđisatká. Warram naamáállá he aleđuđugul giri héle hidhint hí yé kí ˈdiiyye-, mu gál hidhino dhaˈgameká hát hinyamoká yiete-, gaal mú geeyká.

¹⁷Hatallá in ˈdeeny héle máá Waag hí ˈdeem ká shigiche-, Yeremía léká hí ˈdiiyimeká ˈduway,

¹⁸giri kieye, Shiilmisan ubaa buony kóˈdlé guđoká hé gaalí Ráma gaa maale. Rákel hé umle ˈdú buoyye, hé shab hony ká adhate, ˈdaa giri um hí mán gaa yieká,[7] muí yieká.

¹⁹Aalé Heróˈde mán yieká, máá ˈgasso-, urru-, Waaˈgietká hát amadhyoká Yúósef lés Misirayim álle yé ˈdu gáá ˈdie,

²⁰mú geey, kieye, Keʼ, véel ubaa ˈjielle éew, lés Yisirayel geđi hol ˈdú nú. Gál veelééllá yegieská hé kufe, yie.

²¹Aalé Yúósef kie, véel ubaa ˈjielle eedhdhe, lés Yisirayel hol ˈdú nadhe.

²²Kor mu Arkalâw giri iny Heroˈdeká hát kara ˈjaalle feˈjie-, kánsích lés Yuuˈdia yieká maaleká, lés kinaal seseenká kiadhe. Mu lés kinaal hát ma gaa yíéđiminyká úba amádh gaa arge, đo af tame, lés Galilaaya mé nie.[8]

²³Mu ény gaalí Násaret yegetká álle gaa ˈgudhdhe. Aalé ˈdeeny gál Waag hí ˈdeem ka shigicheká hí hodhe-, giri kieye, Mú máá Nasareto gaalí yeedhe, yieká ˈduway.