Read daasanach Matááyo 22 Bible Online

Matááyo 22 - daasanach bible

Matááyo 22

¹Yíésu geđi gálaat hát hibiet-, he hol ki ekenyká he onisie, kieye,

²Guch Uratiká yaalmit ki égká he hát máá kansich een inyleka gálaat gólol tág ki koyká he ká taalla.

³Aalé gólol he hí kóony yieká, mu gedelle gál gaalí kiereká ali ˈdú fie, kor gál he kiere kinaal hí gaa điidhe.

⁴Aaléka, mu geđi gede éíy taaka geey, kieye, Sedhíe, gál gaalí kiereká hatallá geeyyíe, Gólol yáá hí tagano kí koy, yáá aarchú ubaa yier chia gegiyyeká yies, he lulle yáá tagano koy, ka yimedhíe, gololtíe, gáál yiedhíe.

⁵Kor gál gaalí kiereká hé kiermit gaalí kiereká hol ma héésen, gaal đo hujichaamle met veere, máátí léslé fafaatká bííyle mé nie, máátí shókódíchlé hol gaa mamaduoká hújíchle mé veere.

⁶Gállé hí gáá ˈgiteká máá kansichká gedellé kinaal ˈgiiliˈgay, gáál manyjasie, gáál yies.

⁷Aalé máá giri kansichká idhane, yuoyle ali fie, yuoy gál giri mú gedelle yieská beesete, gáál ényle ˈjiet gaa veeˈde.

⁸Aaléka mu gedellé he hol af ijeká geey, kieye, Golol hé tág ˈdie, kor gál yú kiereká hé ˈdúúw ˈdabe.

⁹Sedhíe, ˈjien hurt nadhíe, ameeny gál hí argiyyaká geeyyíe, gaal hí gólol ká yimet, yiedhíe, muí gáál yie.

¹⁰Aalé gál gédeká kie, ˈjien hurt mé nie, gaal mu mídhab yíekaʼ, mu ˈdéen yíekaʼ he argeká lúl af ká tadhdhe, gólol álle đo gaalí koch yie.

¹¹Aalé máá giri kansichká ál gálaat hí gólol gaa kokoeyká sedhe, giri gáál af kí ˈdeˈdeenká. Mu gáál hurt kí ˈdieká, mu máá đafaraam gálaat hí kúlích eenká gaa fafaatká ma ka fáanká arge.

¹²Aalé mu máá kinaal geey, kieye, Musó! Kuun gólólallá hát máre álle ká chimie, kor đafaraam kúlích eenká ma ka fáan? yie. Aalé máá kinaal ˈdeeny mú hol ˈdú nannuoká ˈdabe.

¹³Máá giri kansichká đo gállé gédeká geey, kieye, Máállá gil ubaa ˈgas hiigidháa, mú baaˈd gaa ongʼoˈde-, álle gálaat hí gaa bebeen-, hí kach hol af met gaa ˈginianatíá ki láa, yie, Yíésu hí gáál yie.

¹⁴Yíésu hibéél beeteká gáál geey, kieye, Gál ilishká hé Waag hí kieˈde, kor gál muí waaˈdeká hé iraam mánká, gáál yie.

¹⁵Aalé gál Farisaay taak yíé ˈdie, ˈdeeny mú af ki raraat-, mú ˈdú ˈgiiliˈgawká hol af gáá koy.

¹⁶Gaal gállé láliká ubaa Heróˈde gállé hí ˈdú ijoká Yíésu ali ˈdú fie, gaal Yíésu geey, kieye, Máá gáál he oonisúóllo! Kuun hát máá hé ˈdúwaká hogodhoká tág nyáá nyí óg, ˈgierim Waaˈgiet hát ˈduwantiká kuuní ˈdiyeenne, kuun kó ˈdeeny gálaat el ma gaa igiriny, gálaat hol eiy ma gaa nanniny.

¹⁷Ebá nyí ka géesh, háte dhaayche? Káísar[74] ki gibíre ki gugusoká taglée, ebá hé tagle muuniny? gaalí yie.

¹⁸Aalé ˈdaa giri Yíésu gáál điđamle ógká, kieye, It hol egeyye-, hí he lúl ógal! Háteka hí ye ka raatéel?

¹⁹Ebá bíre gusachiet-, Káísar hí muun gáál gaa gugusatká ye tikiˈd kí helía, yie. Aalé gaal mú bíre tikiˈd ki helie.

²⁰Yíésu gáál heete, kieye, Birééllá gách ubaa hedh hí gaa yaalallá hé mááya? yie.

²¹Gaal Yíésu ˈdéé hol ˈdú nie, kieye, Hé Kaisar, yie. Aalé Yíésu gáál geey, kieye, Hé Kaisar máállé Káísar shía, hé Waag hí léká Waagle shía, gáál yie.

²²Gaal Yíésu ˈdeenyléél maaleká ˈdéé af ˈdabe, đo mú hay, ali gaa sedhe.

²³Kúlích tikiˈde kinaallá gál Saˈdukaay giri kieye, Gálaat gál mán yeetká hé sidhamle hí hol ma ˈdú gáá nannaan, uushim yiem ma gáá ˈdeˈdeminy, yegetká Yíésu ˈdéé hót ˈdú gáá eedhdhe.

²⁴Gaal kieye, Máá gáál he oonisúóllo, Móshe kieye, máádhat eedhdhe-, tá hátlé um ma ˈdálinyká mán yieka, mú nyárle hí min kinaallá eet, hí mú um kí ˈdalo, he yie.

²⁵Aaléka, gál yááb hol ki ˈdalidhe mare tiiya. Máá erká min eedhdhe, hátlé ma nyiˈdísinyká mán yie. ˈDaa giri mu um ma ˈdálinyká min mú nyárlé hí elloká kí ˈgisate.[75]

²⁶Mú nyárlé kinaal hátlé um ma ˈdálinyká úba mán yie. Máá kinaal nyárlé hí ˈgar yielká min kinaal úba eedhdhe, kor hátlé um ma ˈdálinyká úba mán yie. Yaalmitééllá gaal lullé hol ki ˈdalidhééllá mé gáá ˈjeeˈjeenne, ˈjíig máá ki tiiyaká đig.

²⁷Min íín úba el ˈdaal mán chie.

²⁸Aaléka, ˈdaa giri min gál hol ki ˈdalidhe-, tiiyyáállá lúl hí shuunneká, af giri gál kufeká uushim yiem gáá ˈdeˈdeenká minnééllá gál tiiyyáállá mááya hí le? gaalí yie.

²⁹Aalé Yíésu gáál ˈdéé hol ˈdú nie, kieye, Itín Warˈgat Waaˈgiet ˈdeenyle ubaa Waag fargogintle ˈdaa giri hí muogká in hí hééllá ˈdeeneyche.

³⁰Af giri gálaat uushim yiem gáá ˈdeˈdeenká hé máá níínní egeet-, ubaa gaalí egeetká mán. Af kinaallá gaal hát Waag gállé ˈgasso-, urruká hai yeedhe, gaal hé ma shugunan.

³¹Itín gálaat uushim yiem gáá ˈdímle ˈdaalleka, it hé Waag hí hoteká Warˈgat Waaˈgiet ma gaa túony? Waag hé kieye,

³²Yú he Waag Abiraayam, Waag Yisak, Waag Yakob, ma chéen?[76] Waag gállééllá har úba káána kis kufeka, hé luolmít hí gaa iđo, ˈdaa giri Waag gálle gál kúfach gaa yíéđianká muuniny-, luolmit biiyoká gaa yíéđianká, Yíésu hí gáál yie.

³³Nyesebich ˈdeenyéél maaleká, Yíésu he onisinyle af ˈdabe.

³⁴Gál Farisaay Yíésu hát gál Saˈdukaay a mé ki ˈjie-, maaleká hol shaalle, mú ˈdu gáá kie.

³⁵Aalé gáál máállé súm hemuumurit Waag hí Móshe ka shiicheká óg mare ˈgíérích he Yíésu ki raraatká Yíésu yiete, kieye,

³⁶Máá gáál he oonisúóllo! Hemurit máre súm hemuumurít lulle met iđa? yie.

³⁷Yíésu mú ˈdéé hol ˈdú nie, kieye, Hemurit giri kieye, Máá Guđo Waag kuaká geerkú lulle ki géélneb, hodhinkú lulle ki géélneb, tawunykú lulle ki géélneb,[77] chieká.

³⁸Hemuritééllá in súm fargogo, hemuumurít lulle met iđa.

³⁹Hemurit ki naamaká ubaa hemurit erkoballá he hol ˈgas ki see. Hemurit ki naamáállá kieye, Máá olkú hát kúún dhúrkú hol gielallá úba géélnebo,[78] he chie.

⁴⁰Hemuumurit naamáállá ííni hemuumurit guđóótíá ubaa hé gál Waag hí ˈdeem ka shigicheká hí huogodheká lúl hí gáá kuonme, Yíésu hí gáál yie.

⁴¹Gál Farisaay hátlé ali ˈgieká Yíésu hí yiete,

⁴²mu kieye, Ebá yú hí heete! Máá Waag hí kansím koyye-, Messíya lééllá he iny mááya? yie. Gaal mú ˈdéé hol ˈdú nie, kieye, Messíya he Iny ˈDawuˈdo,[79] gaalí yie.

⁴³Yíésu gáál geey, kieye, Tá háteeye ˈDáwuˈd af giri Hím Naasan Waaˈgiet hí ˈdéé ka shigicheká kieye, Messíya he Máá chia Guđoká, yíel?

⁴⁴ˈDáwuˈd ˈdaa Messiyaka kieye, Máá Guđo Waag hé Máá chia Guđoká geey, mu kieye, ˈDaab gál ko ka kídhká yú ko ˈgas gim ma fíinyká, ye gíl ˈdaa naanietallá yíéđig, he mú yie,[80] ˈDáwuˈd hí yie.

⁴⁵Aalé ˈDáwuˈd Messíya Máá chia Guđoká in yeedhe háluke, háteeye geđi Messíya hí iny ˈbíl íl ˈDawuˈd cheedhe? Yíésu hí gáál yie.

⁴⁶Yíésu gáál ˈdeenyéél yieteká, hé máá níínní hí ˈdéé af hol ˈdú nieká mán. Ameeny kinaallá gaal hé máá níínní geđi úba Yíésu yieteká mán.