Read daasanach Matááyo 23 Bible Online

Matááyo 23 - daasanach bible

Matááyo 23

¹Aalé Yíésu nyésébích gálaat ubaa lalille geey,

²kieye, Gál gálaat nyatalaam oonisuoká ubaa gál Farisaay hé kara kansimo Mosheká ˈdú yíéđie.

³Aaléka, hé gaalí geeyoká lulle chiˈdíe, el gaa veerée. Tá hé gaalí ekemesetká haí el gaa véériny, ˈdaa giri gáál íín hé hí oonisuoká el ma gaa igirinyká.

⁴Gaal ilsh guđo-, gálaat héf ki chegeská he gálaat ˈdú iđimia, kor gaal íín hé gúmúríny tikiˈd úba ma helminy, ilsh kinaal gálaat ma ˈdú chichiran, ma sisin.

⁵Gaal íín héllé lulle ˈdabaan he ekemesetká gálaat hol aargisuoká he fede. Gaal saaw ˈdéé hót Waaˈgiet ˈgayyo-, he met bala ki higisatká ebá guguđáan! Héétí halum gáál đafaraamle ki ˈgiiyyoká ebá ˈdeˈdíer!

⁶Gálallá alb he koonyietká albléká alb gál ˈduuˈdúwaká he hol ki fede, ubaa ény ˈdiiyiminyká karm biiy metoká ˈdú yíéđianká he fede.

⁷Gálallá alb hoyyoká gaalí naa gaa yeget-, gaalí veveen-, Gál kínyaa ˈduuwˈdúwáállo gaalí yegetká he fede.

⁸Itín ˈdaa giri máá kíchia hí af tatuoká tikiˈde-, tá lulkícho hí hol nyaaramká, haí hol vevéminy, Máá kínyaa ˈdúwáállo, hí hol chégen.

⁹Aalé ˈdaa giri ˈJaakícho tikiˈde-, Waag Úr Iđoká tákámaká, haí lésallá máádhat ˈJaachú gaa chéen.

¹⁰Héétí ˈdaa giri máá kíchia hí he oonisuoká tikiˈde-, Máá Waag hí kansím koyye-, Messíya lééllá tákámaká, ha itín mú tikiˈd gálaat hí vevéminy, Máá nyí he oonisúóllo, gaal hí yégen.

¹¹Itín máá kíchia méteká hí gédéchkícho yeet.

¹²Máá hol egewká Waag ˈdúúw haí rianna. Máá hol ˈdúúw rioká Waag haí ˈduuwaycha, Yíésu hí gáál yie.

¹³Yíésu geđi gáál geey, kieye, It gálaat nyatalaam oonisicháállo ubaa it gál Farisaayallo, he ebá hí ki ˈdéen! It hol ˈdug gáá sasalláal! It gálaat Guch Waaˈgiet hilít gáá moyche! Itín dhúrkícho it Guch Waaˈgiet hilít hol ká riate, héétí it gálaat Guch Waaˈgiet hilít ka riate.

¹⁴[It gálaat nyatalaam oonisicháállo ubaa it gál Farisaayallo, he ebá hí ki ˈdéen! It hol ˈdug gáá sasalláal! It ˈdeg híyeská tagano ki ˈdiiyye, hí ˈdég ˈjienle af ki riiriate. It gál ˈduuˈdúwaká hol hoyche-, hí waag visan met ˈdeˈdierká viivisatáállá, aaléka, hé ˈdeewká il haí aargiˈda.][81]

¹⁵It gálaat nyatalaam oonisicháállo ubaa it gál Farisaayallo, he ebá hí ki ˈdéen! It hol ˈdug gáá sasalláal! Itín súm siem basso-, ubaa lesiet-, met ˈdeˈdierká hí seseenne, giri máádhat har úba tikiˈd kátaka, hí lalaataká. Kor máá hí argiyya-, hí ka ennuoká hí ˈdeđeneyche-, hí mú ˈjiet biiyo-, manyjanyietká veelle hođicha-, mu đo súm hí a mé ˈgiisatal!

¹⁶It gálaat met ki ˈgiiyya-, in maamanal, he ebá hí ki ˈdéen! It gálaat geđicha-, kieye, Máádhat ˈBíl Waaˈgiet ˈdodhdheka, ˈdoon kinaal hé káta mán, hí cheget-, kor máádhat hórkí ˈBíl Waaˈgiet ˈdodhdheka, ˈdoon kinaal hí ki ˈdúwáal!

¹⁷It in maaman-, đéesal! Hé máre súm fargogo? He in hórkí fargogiyyaa? Ebá he ˈBíl Waaˈgiet hórkí kinaal ˈduuwasichoká fargogo?

¹⁸Héétí hí kieye, máádhat he kúb suoryoká ˈdodhdheka, ˈdoon kinaallá hé kátaká mán, hí chegedhe, kor hé shiicho gálaat hí Waag shie-, kúb suoryoká ˈdú ijoká, máádhat hí ˈdodhdheka, ˈdoon kinaal hí hé ˈdúwaká chegetóol!

¹⁹It in maamanal, hé máre súm fargogo? He in hé shiicho fargogoo? Ebá he kúb suoryo hé shiicho kinaal ˈduuwayoká fargogo?

²⁰Aaléka, máá kúb suoryo ˈdootká, kúb ubaa héllé hí ˈdug ˈdú ijoká lullé he ˈdodhdhe.

²¹Hát tikiˈdééllá máá ˈBíl Waaˈgiet ˈdootká, ˈBíl kinaallá ubaa Waag hí gaa iđoká he ˈdodhdhe.

²²Tá máá úr ˈdootká kara guchi-, Waaˈgietká ubaa Waag kara kinaal ˈdú iđoká he ˈdodhdhe.

²³It gálaat nyatalaam oonisicháállo ubaa it gál Farisaayallo, he ebá hí ki ˈdéen! It hol ˈdug gáá sasalláal! Hé ˈduwa, ˈguor met bir hí ˈguom fafaataká hí tomon taat argiyyeka, it taat Waag hol ˈdú nanniyya. Hé shiicho nigini hatallóóllá in hí ma haađiny háluke, tá háteeye he hemuumurit súm farguogo-, hát káána hé ˈdúwaká ekeny, ubaa geer guurá ˈgany, tá hé ˈdúwaká huogon hí gíl sug ki haychéel? Hééllá lulle hol ˈdú chiˈdíe, eekemeyyíe.

²⁴It gálaat met ki ˈgiiyya-, hí in maamanal! Itín in nasilil ninni-, bíé hí igiannoká ki ˈjiiyyeká hí egeyye, kor har hí galt gudmisataa!

²⁵It gálaat nyatalaam oonisicháállo ubaa it gál Farisaayallo, he ebá hí ki ˈdéen! It hol ˈdug gáá sasalláal! Itín makal ubaa ˈdaate hí ˈdug gáá ˈjiˈjiyya, kor makal ubaa ˈdaat gerle íín he hol ki fedít ubaa balt hol gáá mony mánká hí koch.

²⁶Kó Farisaay in maamanal, makal erkob geer gáá ˈjig, af kinaallá hé ˈdug úba símis gáá mán.

²⁷It gálaat nyatalaam oonisicháállo ubaa gál Farisaayallo, he ebá hí ki ˈdéen! It hol ˈdug gáá sasalláal! Itín hí hát uushim waarle gaalí kúl édhká shugudie-, ki dhaˈgasanká ˈdug gáá midhab-, kor gerle laf ubaa moˈd hí ˈdiidheká.

²⁸Itín úba hát tikiˈdééllá gálaat hí ˈdug gáá dhaayka, gál ˈdúwaká hí ká dhaˈgama, kor itín hol ˈdu gáá saalít ubaa hemuumurit Waaˈgiet eesheny hí koch.

²⁹It gálaat nyatalaam oonisicháállo ubaa it gál Farisaayallo, he ebá hí ki ˈdéen! It hol ˈdug gáá sasalláal! It uushim gál Waag hí ˈdeem ka shigicheká ˈdiˈdita, héétí gál héle ˈdúwa-, Waaˈgietká uushimle ˈdugle ˈbuukaycha.

³⁰Itín hí kieye, Múún bár giri eshim eshim kúnnaaká ke alb íđinyka, oos eshim eshimkúnno hí gál Waag hí ˈdeem ka shigicheká yegieská hé ke hurt ma higílinyo, hí chegedhe.

³¹Itín hí hatallá chegetallá hollo hí hol ká edhesiche. Itín gon hí um eshim eshimle gál Waag hí ˈdeem ka shigicheká yieská.

³²Aaléka, hújích eshim eshimkícho hí mé gáá kodhdheká beetíe.

³³It chaara-, hí um reewal! Itín háteeye, hí ˈjiet biiyoká manyjasinyle met kar gaa ˈdaraanna?

³⁴Aaléka, gál Waag hí ˈdeem ka shigichoká ubaa gál ˈdaallelléká, tá gál ˈdeeny Waaˈgiet gálaat oonisuoká alb ha yú hí ˈdu gáá fafaa. Gál kinaallá ˈdáá tikiˈd haí cheese, ˈguor đarám ˈgieká haí ˈdú ˈdaraanna. Gáál ˈdáá tikiˈd ény kíchia ˈdiiyiminyká haí gaa tuunna, hollo hí hol gaa aruanna.

³⁵Aaléka, gál lúl ˈduuˈdúwa-, fásle héle gaalí okodieká, gál hí yies kinaallá nyuogimle itíni hí ˈgayya. Hé kinaallá ameeny kúfách Abel máálle hé konf ka ˈgieká mán-, Káyin hí yieská, tá ˈjíig kúfách Sakaria giri iny Barakia-, gaalí ˈBíl Waaˈgiet ubaa kúb suoryoká toom ki yieská đig.

³⁶Yú hí hé ˈdúwaká geeye, fás lullé okoˈdééllá nyuogimle gál hí ˈguo-, ubaa manyjasinyle gál il hí aargiˈdoká he it barallóóllá, Yíésu hí gáál yie.

³⁷It ˈjien Yerusalemallo! It gál Waag hí ˈdeem ka shigichoká cheges-, gál Waag hí ali ˈdu gáá fafiyyoká waar ki tutunnóol! Yú af burnayká hát lug umle kuol gim fafaatokáka itín hí hol ˈdú gáá shuguneká fede. Tá it hé kinaal ká điite.

³⁸Bá dhaayyíe, Waag ˈbílkícho haí kí haađicha, ˈbílkícho éret hai yeedhe.

³⁹Aaléka yú hí geeye, it geđi ye ma aargiriny, ˈdaab hí ye ma árginy-, hí kieye, Máá meeny Máá Guđo Waag kí yimíéllá Waag hí ˈdú ˈguunuan, hí ma chéenká,[82] Yíésu hí gáál yie.