Read daasanach Matááyo 24 Bible Online

Matááyo 24 - daasanach bible

Matááyo 24

¹Yíésu ˈBíl Waaˈgiet yé gaa ˈdie-, sesemeká lalille hí af ˈbóíy ˈdú nie, giri ˈBíl Waaˈgiet ényle hát ˈdisach hí midhabká mú aargisuoká.

²Aaléka, Yíésu gáál yiete, kieye, It ényallá lullééllá argiyyâ? Yú hí hé ˈdúwaká geeye, hééllá lulle ha gaalí ˈgieˈgia, hé wár níínní wár eiy ˈdug ˈdú ˈgiisatká mán, gáál yie.

³Hééllá el ˈdaal, Yíésu Gúm Saano Salabká ˈdú yíéđie mú lalille tákámle mú ˈdú sedhe, mú yiete, kieye, Ebá nyí ka géesh, hééllá lulle bár máre he ali kí ˈdeeme? Tá kuun hol ka naankú ubaa biiy el met ˈdaˈdle bárlé ali kí ˈdeennoká meete yé ká ˈdeeme, nyí ki kiimisata? gaalí yie.

⁴Yíésu gáál ˈdéé hol ˈdú nie, kieye, Hol ˈdeeˈdemíe, ha máádhat hí nyimísan.

⁵Gál burnayká meenychú hai kí yiimedhe, gálaat hai geđia, kieye, Yú he Kirísto,[83] hai yeedhe. Gaal gál burnayká hai baađisia.

⁶Oosom fayamle ubaa oosom hemle haí maalla. Tá haí bírginy! Hééllá yiem hai ká ˈdeeme, tá les el ˈdaˈdle hé geđ igiˈdo.

⁷Kidh hollo hol yeese, kansimano lesam met eiy ki ˈgiiyyoká hollo hol cheese. Biiy alb burnayká kuoˈd ubaa les motiny haí gáá ˈdeenne.

⁸Hééllá lulle kulle hát geer veerit erkob-, min verennoká he ká yaalla.

⁹Af kinaallá itín ha gaalí ˈgiiliˈgaa, gál hí maanyjasuoká gil ger ha gaalí fafaa, ha gaalí yeese, ˈdaa meenychú ˈdugaka kidh met lulle haí neebeedhe.

¹⁰Gál burnay-, ye iiy yieká el af hai ye gaa taama, gaal gál ye iiy yeen ka ˈguoká hai neebeedhe, gáál hem hai gaa siidha.

¹¹Gál burnay hođomlé-, hol gál Waag hí ˈdeem ka shigichoká hođuo-, gálaat baađisuoká yiem hai ká ˈdeeme.

¹²Tá ˈdaa giri hé ˈdeđewká les ˈdú iilishanatká, gielmit gálaat hí hol ka ˈguoká hai gaanata.

¹³Tá máá hééllá lulle mé ki chirsat-, ˈjíig he mé đig yeetká Waag haí rianna.

¹⁴Tá Fayam Midhab-, Guch Waaˈgietallá les geer lulle ha gaalí gaa ˈdiyime, giri kidh met lulle hí mamaloká. Af kinaallá in biiy el met ˈdaˈdle ali kí ˈdeenne.

¹⁵Aaléka, hé súm gaa nyakarich-, Waag hí néb-, ˈBíl Waaˈgiet ˈdeđeneyoká ˈBíl Waaˈgiet geere gaa yaalká haí aargiˈda.[84] Hééllá ˈdeenyle hé máá Waag hí ˈdeem ká shigiche-, ˈDániel léká hí huogodhe. Máá ˈdeenyééllá tuoyoká hí ˈdéé eiy naasat.

¹⁶Hé hat kinaallóóllá hí argiyyeka, gál lés Yuuˈdia gaa ijoká hí gumano kar ˈdú ˈdano.

¹⁷Máá ˈbílle ˈdug ˈdú ijoká hai léen,[85] ˈbíl híliny, shókódích hí ˈbíl geer gaa ijoká ka shúúnan.

¹⁸Máá forich gaa ijoká hai é hol ˈdú náan, đafaraamle shúúnan.

¹⁹Hoba! Af kinaal ebá ˈdeg ger ˈgayyoká ubaa ˈdeg um hí ot ki ˈgieká ki ˈdéen!

²⁰Waag roogonóo, bár hí kar gaa ˈdaraanno kinaal hai af ˈdeenyietká, muuninyka, Kúlích Hef ˈGisanká onnôny.

²¹Af kinaallá manyjasiny súm ˈdeew-, ameeny Waag les ka kuonneká kálta gálaat il hí ma árginy-, tá gálaat geđi il hí ma aargirinyká biiy hai gáá ˈdeenne.

²²Tá Waag har rám ka chiimetóóllá iraam ma rinyka, máá níínní les ˈdug ˈdú ijoká mán. Tá Waag gállé waarateká ˈdaalle ˈdugaka, rám kinaallá Waag iraam haí rianna.

²³Af kinaallá máádhat hí geey-, kieye, Ebá dhaayyíe, Kirísto hállá! muuninyka, Hártá! hí yieka, haí mú af iiy chéen.

²⁴Biiy gál hođomlé-, hol Kirísto ká hođuo-, ubaa gál hođomlé-, gál Waag hí ˈdeem ka shigichoká hol ká hođuoká yiem haí gáá ˈdeeme. Gálallá hé farguogo-, gálaat il hí aargiˈdo-, gálaat hí af ˈdaˈdaboká hai ekemeye. Hé gaalí ekemeyóóllá har hé gaalí hát gaa ˈguoká onnônyka hé gál Waag hí waarateká úba bađisie.

²⁵Aaléka onnóo, yáá biiy hátlé đéém taalallá hí geey.

²⁶Tá har gaalí geey-, gaal kieye, Bá dhaayyíe, Kirísto ˈbakat álle gaa ija, gaalí yieka, haí bííy kinaallá mé níiny. Tá har gaal kieye, Mu ˈbílallá gaa ija, gaalí yieka, gáál héllé hí geđuoká haí iiy chéen.

²⁷Hát ir he ˈdaa baryo gaa birgeka, bololle ˈdaa aadho gaa verenóóllá, yáá Iny Máádhátallá ˈjímchú úba hát tikiˈdééllá hai yeedhe.

²⁸Ál hé kufeká hí iifoká in tére hí hol ˈdú hegelle.

²⁹Manyjasiny bar kinaalloká el me hí ˈgidheka, aadh đo hai ongʼoroyye, ˈguiy đo édhum hai ˈdabe, hidhino đo úr hai gáá ookodmoˈde, Waag hé farguogo-, úr gaa ˈgieká hai muotisiche.[86]

³⁰Aalé hé gálaat yáá Iny Máádhátallá ˈjímchú aargisuoká úr ha gaalí gaa aargira. Aaléka, kidh met lullé les gaa ijoká hai beeme. Gaal yáá Iny Máádhátallá hát nyáˈdow kí yiimet-, fargogínt ubaa ˈduuw guđoká kí leledhoká hai aargira.

³¹Gál chia urru-, ˈgassoká faˈd súm ére léká hai ˈdarama, gáál biiy ˈdinnam afuraalle ali ha yú ˈdú fafaa, giri gál chia yú waaˈdeká gaalí hol ˈdu gáá shugunoká.

³²Ebá kinnach ˈdímlé ka ˈdeˈdeenká kí he gaa onnot. Kinnach kolm éíy taakaká ubaa gurf ká layka, it af saano hí gaa higisoká hát ka ˈjobonteká óg.

³³Hát tikiˈdééllá hé hatallóóllá lulle hí argiyyeka, ˈjímchú hát ka ˈjobondhe-, yú karaf kí ˈdeenká it óg.

³⁴Yú hí hé ˈdúwaká geeye, gálallá[87] hé les ma gaa bebeny, ˈdaab hééllá lulle ali ma kí ˈdíinyká.

³⁵Úr ubaa les el met haí ˈgiidha. Tá ˈdeenychú íín hé el met hí ma ˈgiˈgin, Yíésu hí lalille yie.

³⁶Yíésu geđi lalille geey, kieye, Tá kúlích kinaallá ubaa aadh ˈgásle Waag gállé ˈgasso-, urruká yíekaʼ, yáá Ínyííl yíekaʼ, hé máá níínní hí ogká mán. ˈJaachú tákáma hí og.

³⁷Yaalmit giri héle bár Nowaká in yáá Iny Máádhátallá ˈjímchú bárle úba hí cheedhe.

³⁸Bár giri Nowa kinaallá bie hátlé les lulle er ma súonyká, gálaat hé he kokoey, ubaa he igime, hé hol shugunne, in ˈjíig kúlích Nówa hí kadich gaa hileká đig.

³⁹Gaal hát he hí kí hilééllá hé moonnoy, in đo bie ká rue, hí uune. Aaléka yáá Iny Máádhátallá ˈjímchú úba hát kinaallá hai yeedhe.

⁴⁰Af kinaallá, gál yááb naama-, les gugusoká, mú tikiˈd Waag haí gaa egeete, máátí hai ká ˈgiita.

⁴¹ˈDeg naama-, yierim roroyyoká, min tikiˈd Waag haí gaa egeete, minnéétí hai ká ˈgiisata.

⁴²Aaléka, met hí ˈdú ˈgie, yáá Máá kíchia Guđóóllá kúlích gáá ˈjeˈjeenká ití muog.

⁴³Tá máá ˈbíl léká kúlích máá buraalléká hí gáá yiimetká onnônyka, mu hát me hí ˈdú yaal-, ˈbílle máá hí el fufuro-, hí gaa buruanká mánká it óg.

⁴⁴Aaléka, itín úba tagano ˈdée! Yáá Iny Máádhátallá aadh ˈgás hí ye ki muogká ha gáá ˈjeeme, Yíésu hí gáál yie.

⁴⁵Aalé Yíésu gáál heete, kieye, Gédéch ˈdúwa-, ˈdaallé-, hújíchle hát ˈdabaanká nannuoká he gédéch máre? Gédéch kinaallá he gédéch máállé guđoká hí gede éíy taaka met gaa koyka, géde ˈguom aleđuđugul urgúa gaalí gaa shiguoká gaa shiguoká.

⁴⁶Tá gédéch kinaal máállé guđoká hí af kí ˈdie-, hújíchle tág gaa yaalka, ebá geer hí súm gaa meedhe!

⁴⁷Yú hí hé ˈdúwaká geeye, máá guđo kinaallá héllé lulle ˈguoká gédéchlé kinaallá mé hai ki kokoo.

⁴⁸Tá gédéch muí gede éíy taaka met gaa koyká har he ˈdeenítaka, hát he taawuoká kieye, Máá chia guđoká hé ál ˈjob ma gáá ˈjeeminyo, he yeedhe,

⁴⁹đo gállé géde-, he mé ki yaalká hai tuutune, gál bersham hí fafaanká hollo hol ˈdoy, gáál he ˈgarro hol koey, gáál bersham ˈgarro hol iigime.

⁵⁰Tá gédéch kinaallá aadh ˈgas ubaa kúlích he muogká máállé guđoká haí gáá ˈjeeme.

⁵¹Mú máállé guđo kinaallá mú hát ˈdeđewká he hai ki ekemeye, mú gál hol ˈdug gáá sasaloká hurt hai ki laama. Ál kinaallá he ál gálaat hí gaa bebeen-, hí kach hol amet gaa ˈginianká, Yíésu hí gáál yie.