Read daasanach Matááyo 26 Bible Online

Matááyo 26 - daasanach bible

Matááyo 26

¹Yíésu ˈdeem kinaal lulle huogodheká lalille geey,

²kieye, Ram naam ˈgiteka hát ˈjila máá ˈgasso-, urru-, Waaˈgietká hí gáál ˈdug gaa nadheká ke ˈguoká it óg. ˈJiláállá afle yáá Iny Máádhátallá gál ye ˈgór đarám yaalká ˈdug ˈdú yegeská gíl geer ha gaalí ye gaa kakaa, yie.

³Aalé gál guguđo-, suoryoká ubaa gál káruká ény máá méte suoryo-, Kayáfas léká me hí hol gaa arge.

⁴Gaal ˈgíérích he Yíésu ki ˈgiiliˈgaw-, mú ki yegeská hol af gáá koy.

⁵Gaal úba kieye, Mú ha ke ˈjila afle gaa ˈgiliˈgâny, gálaat shalal ˈdisíiny.

⁶Aalé Yíésu ény Bedhene ki ˈjie-, máá héle nyókot ˈgie-, fayandhe-, gaalí Símon nyókot ˈguoká yegetká ˈbílle gaa ije-,

⁷yiir les veere-, gólol gílka ˈgieká, min sáláb usiyyo-, him hí ilishká đudmit ka ˈgayyeká đo ali kí ˈdiiyye, mú salab mé ˈdú fafiyye.

⁸Yíésu lalille yaalmitééllá argeká idhane, kieye, Sáláballá kor meete he ˈdú manyjayye?

⁹Sáláballá onnônyka bíre guđoká gaalí ká hidhe-, bíre kinaal gaal hí gál he maamanká eiy gísinyka kalat máámaʼ? gaalí yie.

¹⁰Yíésu gáál héllé hogodhe kinaal onnoyká, kieye, Háteka hí min geer gaa ˈdeđeneychéel? Minnééllá hé midhabká ye ki ekeyche.

¹¹Itín gál he maamanká bar lullé hí hol af iđa, tá yú yáá bar lúl ke hol af ma iđiny.

¹²Minnééllá ye salab ˈdú fafiyyééllá, gón chia gaalí ˈguoˈd ki gagaluoká he ye met tág koyye.

¹³Yú hí hé ˈdúwaká geeye, les geer lulle gaalí Fayam chia Midhaballá gaa ˈdiyeenká, hé minnééllá hí ye ki ekeychééllá úba gálaat ha gaalí geđia, giri min table gálaat ma gaa baađanyká, Yíésu hí gáál yie.

¹⁴Aalé gál láli-, tomon a naamaká máállé-, gaalí Yúúˈdas Iskáryot yegetká gál guguđo-, suoryoká ˈdú sedhe,

¹⁵gáál heete, kieye, Yú hí kár itín hí Yíésu ki ˈgilˈgayyaká tág kí koyka, meete hí ye ká shigicha? yie. Gaal đo mú bíre tomon seđ gíl ki tuoy.

¹⁶Aalé Yúúˈdas ˈgíérích giri Yíésu gáál ˈdú egewká hol gaa ˈgeˈgedhe.

¹⁷Balasha máá hí maat fafuo-, mánká[88] ˈjilalle kúlíchlé erká ali kí ˈdiiyyeká gál láliká Yíésu ˈdú sedhe, mú heete, kieye, ˈjila máá urru-, ˈgasso-, Waaˈgietká hí gáál ˈdug gaa nadheká gólólle ále nyí ko tág kí kooyyo? yie.[89]

¹⁸Mu gáál geey, kieye, Sedhíe, Yerúsalem mé náa, máá hí hol argiyyaká hatallá geeyyíe, itín hí kieye, Máá gáál he oonisuoká kieye, Aleđuđugulchú hé ali kí ˈdiiyye. Yú ubaa lalichú ˈbíl kua nyí ˈjila gólólle gaa golmosoto, he yie, yiedhíe, Yíésu hí gáál yie.

¹⁹Gál láliká hát giri Yíésu hí geeyká el gaa veere, sedhe, ˈjila gólólle tág koy.

²⁰Aalé aadh dhúú ˈjiiyyeká Yíésu ubaa lalillé tomon a naamaká hátlé gólol gaa ije-,

²¹golmoteká, Yíésu kieye, Yú hí hé ˈdúwaká geeye, itín mú tikiˈd gál ye oos ˈguoká gíl geer hai ye gaa kakaa, yie.

²²Yíésu ˈdeenyéél hodheká, gál láliká súm ger hí gaa ˈdeenedhe, gaal hát taataká mú heegete, kieye, Máá Guđo, he onnônyká hé yú muuninyáte? yiegie.

²³Yíésu gáál geey, kieye, Máá nyí hol ˈdaat tikiˈd gíl ˈgar ki gatééllá he máá gál ye oos ˈguoká ye gíl geer gaa kakawká.

²⁴Warˈgat Waaˈgiet hé hoteká hai ˈduuwaa, Iny Máádhat ha gaalí yeese. Tá máá Iny Máádhat gál hí oos ˈguoká gíl geer gaa kakawká, ebá he hí ki ˈdéen! Máá kinaallá onnônyka ma ká ˈdalaanka kalat, Yíésu hí gáál yie.

²⁵Yúúˈdas giri Yíésu gál hí oos ˈguoká gíl geer gaa kakawká Yíésu heete, kieye, Máá gáál he oonisúóllo, he onnônyka hé yú muuninyáte? yie. Yíésu mú geey, kieye, Iiy-hí, he gon kúúni, yie.

²⁶Aalé gaal hátlé golmoteká, Yíésu balashá eedhdhe, Waag gielmít hol ˈdú nie, balashá eiy ˈgieˈgie, lalille shie, kieye, Balasháállá eedhdhíe, kóo, hééllá he gónchú, yie.

²⁷Aalé mu kulu ˈduuny vinna-, hí gaa ijeká eedhdhe, Waag gielmít hol ˈdú nieká, kúlu lalille shie, kieye, Kulúúllá eedhdhíe, lulkícho he gaa ˈjía.

²⁸Hééllá he fás chia he hol af iđiny-, Waag ubaa gálle hí hol af iđieká ˈduuwayo-, okodmoot-, gál burnayká nyuogim ubaa ađaabano gaa egewká.

²⁹Yú hí geeye, aalé káána ki gaa ijóóllá yáá geđi ˈduuny vinna ma igiminy, ˈdaab Guch ˈJaachú álle ke ˈduuny vinna kaanaká hol ˈgar ma gaa înyká, Yíésu hí lalille yie.

³⁰Aalé gaal áár ˈdoyká đo yíé ˈdie, Gúm Saano Salabká álle mé nie.

³¹Aaléka Yíésu gáál geey, kieye, Itín chúúrééllá lulkícho in kar haí ye ká ˈdaraanna. Hééllá he hát Waag hí warˈgatle gaa hote-, giri mu kieye, Yú máá wála ˈdeˈdeenká ha yeese, wala íín eiy hai baađaa,[90] muí yieká.

³²Kor yú uushich yé gáá ˈdieka met haí naadha, Galilááya ha seeme, muí gáál yie.

³³Aalé Bétiro Yíésu geey, kieye, Gaal har úba káána lulle ko in kar ká ˈdaneka, yú yáá ko in kar ma ká ˈdaraminy, yie.

³⁴Yíésu Bétiro geey, kieye, Yú ko hé ˈdúwaká geeye, chúúrééllá lúg hátlé ma ˈdânyká kúún a seđ ha ye gaa faalanna, mú yie.

³⁵Bétiro kín điidhe, kieye, Yáá gon ko ma gaa faalminy, har úba ke hol ˈgar kufunanka! yie. Gál lálíítí úba hát tikiˈdééllá Yíésu yie.

³⁶Aaléka Yíésu ubaa lalille kie, gúm kinaal ál gaalí Geđesémane yeget mare mé nie. Gaal ál kinaal nyuoreká mu lalille geey, kieye, Állá ka yíéđía, yú sedhe, Waag vita, yie.

³⁷Aalé mu Bétiro ubaa hele naama-, Dhebeˈdayaká eedhdhe. Mu sesemeká đo geer hí gaa ˈdeenedhe, tawuny úba hí ˈjiiyye.

³⁸Aalé mu lali eedhdhe kinaal geey, kieye, Yáá tág geer ye gaa ˈdeenedhe, kúfach abala ˈdoy. Állá ka yíéđía, kí hol in ˈgar bano, muí gáál yie.

³⁹Aalé mu biiy met á níínni mare ki sedhe, abúún ˈdíínie, Waag vite, kieye, Baabá, har tagle kátaka, kulu manyjasinyallá ye gaa éeb. Tá he hát yú fedoká hai yéen, hí hát kuuní feˈdoká yeet, yie.

⁴⁰Aalé mu lalille hol ˈdu gáá nadhe. Mu gáál af kí ˈdieká gaal ram gaa iifa. Mu Bétiro kiisie, kieye, Itín aadh ˈgas tikiˈd úba ke hol ˈgar in banoká it ma uriny?

⁴¹In eiy ˈdeeyyíe, Waag vitíe, giri hí hé ˈdeewká ekenyle hol ma kí haađinyká. Hodhin hí he feˈde, kor gon hí he má uˈduáte, muí gáál yie.

⁴²Aalé Yíésu geđi hol nadhe, Waag vite, kieye, Baabá, har kulu manyjasinyallá ye gaa egeyyoká tagle muuniny-, yú he gaa igianká feˈdoka, he hí hát kuun hí ye ki feˈdoká yeet, yie.

⁴³Yíésu geđi lalille hol ˈdu gáá nadhe. Mu gáál af kí ˈdieká gaal raf, ˈdaa giri gáál súm in hí dhieká.

⁴⁴Aalé mu gáál hay, hol nadhe, gíl ki seđeká Waag hát tikiˈde he viviteká geđi vite.

⁴⁵Aalé mu gál láliká hol ˈdu gáá nadheká gáál geey, kieye, Hátlé hí hefersete-, hí rayyekâ? Bá in eiy ˈdeeyyíe, aadh ˈgas gaalí Iny Máádhat gál ađaabano ˈguoká gíl geer gaa kakawká hé ali kí ˈdiiyye.

⁴⁶Les gaa kée, kí siet. Máá gál ye oos ˈguoká ye gíl geer gaa kakawká hé ká ˈjobondhe, gáál yie.

⁴⁷Yíésu hátlé ˈdéé hogodheká, lalille geđieká, Yúúˈdas giri lali tomon a naamaká mú tikiˈd onnoyká nyésébích ilish fado orfoká ubaa shar ˈguo-, gál guguđo-, suoryoká ubaa gál káruká hí alb ka fieká hol ˈgaa, ali kí ˈdie.

⁴⁸Máá Yíésu gál hí oos ˈgieká gíl geer gaa kakawallá íín kisso yaalmit gaalí Yíésu ki kimisatká gáál geey, kieye, Máá yú aˈdíne ˈdungoká mu hé kinaallá, mú ˈgiliˈgáa, gáál yie.

⁴⁹Aalé Yúúˈdas đo Yíésu ˈdú sedhe, kieye, Máá gáál he oonisúóllo! yie, đo mú aˈdíne ˈdunge.

⁵⁰Yíésu mú geey, kieye, Musó, háteka állá ka chimíel! yie. Aalé gál Yúúˈdas hol ˈgieká Yíésu ˈgiliˈgay.

⁵¹Gál láli Yíésu hol ˈgieká mú tikiˈd đo faaˈdlé órof ˈgieká ká sillite, máá méte suoryoká gédéchle net gaa sare.

⁵²Yíésu đo máá lalillé kinaal ki ˈday, kieye, Faaˈdkú tobotle hol ˈdú naʼ. Máá gálaat faaˈd ki yegeská faaˈd ha gaalí ki yeese.

⁵³Itín tawuny kíchoka, yú fedînyka, yáá ˈJaachú ma veemîny? Mu ye yuoylé uriet burnayye-, met hí tomon a naamaká ali ma ˈdu gáá fafîny?

⁵⁴Tá hé kinaal har yú ekeyka, hé Warˈgat Waaˈgiet hí hoteká háteeye ˈduuwaa? muí lalille yie.

⁵⁵Aalé Yíésu nyésébích hí ˈgiliˈgay kinaal geey, kieye, Itín hí ká chimie-, hí fado ubaa shar ká chirate-, hí ye ˈgiiliˈgayáállá, yú he máá les ˈjegeduokâ? Yú yáá bar lulle ma ka yímen, ˈBíl Waaˈgiet ma gaa yíéđíminy, gálaat he ma gaa oonisîny, tá har af kinaal hí ye má giliˈganya?

⁵⁶Hééllá lulle hatallá ˈdíéllá he giri ˈdeeny gál Waag hí ˈdeem ka shigicheká hí ˈdiiyime-, Warˈgat Waaˈgiet gaa ijoká ˈduuwawká, Yíésu hí gáál yie. Aalé gál láliká lulle Yíésu in kar ká ˈdane.

⁵⁷Aalé gál giri Yíésu ˈgiliˈgayká Yíésu máá méte suoryo-, Kayáfas léká ˈdú eey. Ál kinaallá he ál gál gálaat nyatalaam oonisuoká ubaa gál káruká hí hol ˈdú sedheká.

⁵⁸Tá Bétiro íín hé tagéétíá sie, gál Yíésu ˈgieká el gaa igire. Mu ˈbíl máá méte suoryoká nyáláárle álle ka ˈdoyká, nyáláár hile, sedhe, ál gál ál kinaal ˈdeˈdemeká hí ijeká yíéđie, giri hé gaalí Yíésu ki ekemeyoká aargiroká.

⁵⁹Aalé gál guguđo-, suoryoká ubaa ar ˈdeem mumuˈdoká lulle gál ˈdaa Yiesuka hé hódhoká hogodhoká hol gaa ˈgeˈgedhe, giri hé hódho kinaal Yíésu ˈdú yegeská.

⁶⁰Tá har úba káána gál burnayká ká yimie, ˈdaa Yiesuka gáál hé hódhoká geeyka, gaal hé mú ˈdú yegeská ˈdabe. Héél el ˈdaal gáál naam ká yimie,

⁶¹kieye, Máállá kieye, Yáá fargogint ˈBíl Waaˈgiet ki ˈgieˈguo-, tá ˈBíl kulich seđ gaa ˈdiisoká ˈguo, he yie, gaalí yie.

⁶²Aalé máá méte suoryoká les gaa kie, Yíésu heete, kieye, Hé ˈdaakúka gálallá hí hodhééllá, kó hé hol gáá nanniyyoká mân? yie.

⁶³Yíésu íín taalle shab yie. Aalé máá méte suoryoká Yíésu geey, kieye, Ebá Waag bííyyo ali iđoká ˈdúo, nyí ka géesh, har kúún he Messíya, Iny Waaˈgiet kátaka, mú yie.

⁶⁴Yíésu mú geey, kieye, He hát hotééllá. Tá yú hí geeye, itín bár ˈdaatika, yáá Iny Máádhátallá Waag fargogínt lulle ˈgayyoká gíllé ˈdaa naanietká ijo-, nyáˈdow kí yiimetká haí ye aargiˈda, Yíésu hí gáál yie.

⁶⁵Tíkíˈdé kinaallá máá méte suoryoká hol đafar eiy ki fue, kieye, Mu har Waag chaara! ˈDeeny máre éíy taaka geđi ki egese? Hé muí hogodhóóllá in hí maalla háluke,

⁶⁶itín háte hí ká dhaayche? muí gáál yie. Gaal mú ˈdéé hol ˈdú nie, kieye, Mú gon he hí oosó! yie.

⁶⁷Aalé gaal mú sillam innum ˈdú faafie, mú ˈdane, mú úba nee ger gaa tune,

⁶⁸gaal kieye, Kó kerka máá Waag hí kansím koyye-, Messíya léel! Ebá nyí ka géesh, mááya ko ˈdoy? gaalí mú yiegie.

⁶⁹Aalé Bétiro hátlé ˈbíl máá méte suoryoká nyáláárle geer gaa ijeká ini gededhe mare hí ˈdu gáá chimie, kieye, Gál Yíésu Galilaayaká hol ˈgar sesemeká mú tikiˈd hé kúún muunîny? chie.

⁷⁰Bétiro gál ál kinaal ijeká metle gaa falme, kieye, Hé hogotóóllá gon yáá muog, ini yie.

⁷¹Aalé Bétiro kie, kar af láá ki ˈdie, ini éíy taaka gededheká mú argiyye, gál ál kinaal ˈgieká geeyche, kieye, Máállá hé Yíésu Nasaretallá hol ˈgie, chie.

⁷²Bétiro geđi falme, Waag ˈdodhdhe, kieye, Yáá máá hogotóóllá muog, ini yie.

⁷³Aalé aadh ˈgas a níínni mare hol ki sieteká gál ál kinaal ˈgieká Bétiro ˈdú sedhe, kieye, Kúún gon máá kinaallá gálle mú tikiˈde. Af kua hogotóóllá sááríchle nyí ko ki kimisate, gaalí mú yie.

⁷⁴Bétiro đo falme, Waag ˈdodhdhe, kieye, Máállá gon yáá muog, yie. Lúg đo ˈdayche.

⁷⁵Aalé Bétiro ˈdeeny Yíésu hí geey-, mu kieye, Kúún lúg hátlé ma ˈdânyká a seđ ha ye gaa faalanna, muí yieká, hí táb ká ˈjie, đo nááb gaa kie, súm buoy.