Read daasanach Matááyo 28 Bible Online

Matááyo 28 - daasanach bible

Matááyo 28

¹Kúlích Hef ˈGisanká he ˈgite-, rám tiiyaká kúlíchlé erká biiy bírle hí ka ˈjobonteká María Magaˈdalaká ubaa María lé-, he hol ˈgieká kie, sedhe, giri liish gaalí Yíésu ki galieká af kí ˈdeˈdeenká.

²Aalé les đo súm motiyye, máá ˈgasso-, urru-, Waaˈgietká úr gáá leedhe, nyátáábá liish af gaa tielká gaalgalsie, nyátáábá ˈdú yíéđie.

³Máá ˈgasso-, urru kinaallá innumle edhle hát ír biirgách, đafaraamle edhle hé tág édh súm gogo.

⁴Yuoy giri uushich ˈdeˈdeenneká đo sierm hí faanne, fađanne, les ˈdane, gon hí eiy okodoote.

⁵Aalé máá ˈgasso-, urru kinaal mú María geey, kieye, Haí seerêny! Itín hát hí Yíésu gaalí ˈgór đarám yaalká ˈdú yieská hí ˈdu gáá chimieká yáá óg.

⁶Tá mu hé ˈguoˈd gaa láʼ. Mu hát giri hodheká hé ˈduway, mú hé Waag hí loolnoyche, uushich yé gaa ˈdie. Ka yimedhíe, mu állé iifeká dhaayyíe.

⁷Aaléka đo hararáa, mú lalille geeyyíe, mu hát Waag hí loolnoyche-, uushich yé gaa ˈdie-, gáál met nannaat-, Galilááya mé nannuo-, gáál ál kinaal hol gaa aargiroká gáál geeyyíe. Fayam yú hí geeyallá chiˈdíe, ˈdég yie.

⁸Aalé ˈdég har úba binineny ˈgayyeka, đo súm úba ger hí gaa meedhe, uushich álle gaa ˈdoˈdoote, giri fayam he maalléél gál láliká ˈdú siitoká.

⁹ˈDég hátlé kat kat chieká Yíésu đo ˈdég yé ˈdu gáá ˈdie, kieye, Náa! yie. ˈDég đo Yíésu ˈdú siete, mú ˈgas met les gaa ˈdanne, mú visate.

¹⁰Aalé Yíésu ˈdég geey, kieye, Haí seerêny! Sedhíe, nyaaramchú geeyyíe, gaal hí Galilááya siet, lés kinaallá in nyí gáál hol gaa aargiˈda, muí ˈdég yie.

¹¹ˈDég sienylé gaa igiˈdeká, yuoy uushich ˈdeˈdeenneká ˈdáá tikiˈd é hol ˈdú nadhe, hé lullé uushich álle yé gáá ˈdieká fayamle gál guguđo-, suoryoká ˈdú sidhe.

¹²Aalé gál guguđo-, suoryoká ubaa gál káruká hol fayaméél geeyká, hol ˈdéé af gáá maale, gaal gál yuoyóká bíre ˈdáb guđoká les ki fie,

¹³kieye, Hé gálaat hí geđicha-, hí hogotoká hééllá. Itín hatallá yiedhíe, Nyiin chúúre-, ram nyí eeteká, mú lalille ká chimie, nyí mú gaa buraayye, yiedhíe.

¹⁴Har fayamééllá máá les mé ki yaalká hí maaleka, nyííni nyí mú hol ká geđicha, it hé níínní ˈdeew muí ki ekemeyoká mán, gaalí yuoy yie.

¹⁵Aalé yuoy bíre kinaal eete, hát gál guguđo kinaal hí geeyká el gaa veeˈde. ˈDeeny hódhóóllá lés gál Yuuˈdi geerle lulle bash ki yie, ˈjíig káána ki gaa ijóóllá hé hátle gálaat hí hogodho.

¹⁶Aalé gál láli-, tomon a takachká lés Galilaaya gúm álle Yíésu hí geey-, mé náa, muí yieká, mé nie.

¹⁷Gáál Yíésu hí ál kinaal yé ˈdu gáá ˈdieká, gaal Yíésu vite, kor gáál ˈdáá tikiˈd mú ki nadhe.

¹⁸Aalé Yíésu lalille kí ˈjobondhe, mu gáál geey, kieye, He lullé uratiká ubaa he lullé lesietká hé Waag hí ye mé ki koyye.

¹⁹Aaléka, sedhíe, kidh met lulle lalichú hoyyíe. Gáál bie gim ki náa, giri gaal fargogint ˈJaa chia úr ijoká ubaa yáá Ínyííllá, tá Hím Naasan Waaˈgiet gim gaa ijoká.

²⁰Itín he lullé yú hí kí mureká gáál onisía, gaal hí he onisinychú chirat. Yú yáá bar lulle ke hol ˈguo, ˈjíig biiy el ˈdáˈdle đig, Yíésu hí lalille yie.