Read daasanach Matááyo 4 Bible Online

Matááyo 4 - daasanach bible

Matááyo 4

¹Aalé Yíésu Hím Naasan Waaˈgiet hí ˈbakat ˈdú eete, giri Sátan hí ki ekemesetoká.

²Mu ál kinaal ram tomon afur kulich ubaa chúúrélle af hite. Rám kinaal beeyyeká mú geer hí ˈdú ˈjie.

³Aaléka máá mú ki ekemete-, Sátan léká mú ˈdu gáá yimie, mú geey, kieye, Har kuun Iny Waaˈgiet kátaka, ebá ˈdéé hot, waarééllá hí balashá yeet, yie.

⁴Yíésu mú ˈdéé hol ˈdú nie, kieye, Warˈgat Waaˈgiet hé hoteká kieye, Máádhat hé ˈguom tákámle ma ki iđiny, ameeny ˈdéé hót Waag af geer yé gáá ˈdeˈdeenká he ki ija,[13] he chie, Yíésu hí mú yie.

⁵Aaléka, Sátan Yíésu ˈjien Yerusalem ˈdú eete, ˈBíl Waaˈgiet đírle állé ˈdérká mú ˈdú koyye,

⁶mú geeyche, kieye, Kuun har Iny Waaˈgiet kátaka, ebá hol úr gáá lab. Warˈgat Waaˈgiet ˈdaakúka kieye, Waag gállé ˈgasso-, urruká ˈdéé hai ki muuˈda, gaal úr hai ko ká ˈgiiliˈgaa, giri waar ko ˈgas mé ma ki ˈdaraminyká,[14] he chie, Sátan hí mú chie.

⁷Yíésu Sátan ˈdéé hol ˈdú nie, kieye, Warˈgat Waaˈgiet hé hoteká úba kieye, Máá kua Guđo-, Waagkúká ha ki ekemésenno,[15] he chie, yie.

⁸Aalé hé kinaal el ˈdaal Sátan geđi Yíésu gúm ˈdérká mé ˈdug site, mú lésallá lulle ubaa kamurle argisiche,

⁹mú geeyche, kieye, Har kúún ye met les kurram gaa ˈdoyye-, ye visateka, he lullé argiyyóóllá ha yú ko shigia, chie.

¹⁰Yíésu đo Sátan geey, kieye, Sátan, ye innum gaa sí, Warˈgat Waaˈgiet hé hoteká kieye, Máá kua Guđo Waag tákámle viivíso, met gaa keekémo,[16] he chie, Yíésu hí Sátan yie.

¹¹Aalé Sátan đo Yíésu in ká siete, Waag gállé ˈgasso-, urruká đo Yíésu ˈdu gáá yimie, mú ál kinaal gaa ˈdeey.

¹²Yíésu Yuána hát gaalí ˈgiliˈgay-, gaalí ˈbíl hiiginká gaa kaayká fayamle maaleká, đo lés Yuuˈdia gaa kie, lés Galilaaya hol ˈdú nadhe.

¹³Mu ény Nasaret gaa kieká sedhe, Kafarnáum-, Bás Galilaaya in ijo-, lés é meeny Dhebulun ubaa é meeny Nafitali gaa taalká álle gaa yíéđie.

¹⁴Yaalmitééllá in Waag máállé ˈdeem ka shigiche-, Yisááya léká ˈdeenylé ˈdiiyimeká ˈduway, giri kieye,

¹⁵Lés Dhebulun ubaa lés Nafitali hátlé taal-, bás veeˈdoká, tá ˈjíig wár Yorˈdan-, ílungle hátlé taal-, giri lés Galilaaya é meet kidhdho léká,

¹⁶gálle bííy gaa ongʼoˈdeká gaa ijeká hé édhúm ˈdúwaká arge. Gaal hé lés gaa ongʼoˈde-, kufachiet-, gaa ijeká hé edhum hí gaa veere,[17] chieká.

¹⁷Ameeny kinaallá in Yíésu ˈdiiyiminyle mé gáá kodhdhe, gálaat geey, kieye, Hé ˈdeđew-, hí gaa seseenneká hayyíe, Waag makan famíe, Guch Waaˈgiet hé ká ˈjobonte, yie.

¹⁸Yíésu ˈgíéríchlé gaa igire-, Bás Galilaaya in sieká, gál naama-, hol nyaara-, awuanká arge. Gál kinaallá he Símon giri Bétiro léká ubaa nyárlé Ánˈduru. Gaal af kinaallá bushlé he bie fafie.

¹⁹Yíésu gáál geey, kieye, Ka yimedhíe, ye el gáá veerée, yú hí gál gálaat Waag ˈdu gáá egewká hoyo, yie.

²⁰Gaal đo bushle hay, mú el gaa veere.

²¹Aalé Yíésu biiy met á níínni mare ki sedheká, gál éíy taaka hol nyaaramká naam arge. Gál kinaallá he Yákob giri iny Dhebeˈdayaká ubaa nyárlé Yuána. Gaal ubaa ˈjaallé Dhebeˈdáya kadicho he gaa ije, bushlé he dhadhadhdhe. Aalé Yíésu gáál vie,

²²gaal đo kadich ubaa ˈjaalle hay, Yíésu el gaa veere.

²³Aalé Yíésu lés Galilaaya geerle lúl gaa sedhe, ény ˈdiiyiminyká gálaat he gaa onisie, Fayam Midhab Guch Waaˈgietká gálaat ki ˈdiiyime. Mu basham ubaa fursam hátlé met hí hol ka burnayká gálaat yiem gaa ˈdeey.

²⁴Mú ˈduuwle úba lés Siria bash ki chie. Gálaat gál lullé basham ˈgie-, hát káána gál fursam met hí hol ka eiy eiyye-, kuukúllaká ubaa gál aryáán hí hilleká, tá gál farich ˈguoká, héétí gál héljoká mú ˈdu gáá shuune, mu gáál lulle bisie.

²⁵Nyésébích gálaat-, Galilááya, ˈDekáboles,[18] Yerúsalem, Yuuˈdía, tá wár Yorˈdan ílunglé ˈdaatí gáá kieká Yíésu el gaa veere.