Read daasanach Matááyo 5 Bible Online

Matááyo 5 - daasanach bible

Matááyo 5

¹Yíésu nyesebich argeká gurmit feˈjie, yíéđie, mú lalille mú ˈdu gáá yimie.[19]

²Aalé mu đo he onisinyle mé gáá kodhdhe, gáál geey, kieye,

³Gál hát lulle mán-, Waag bala ˈdú nieká hé Waag hí ˈdú ˈjeˈjeenno. Guch Waaˈgiet gál hí léká hé kinaallá.

⁴Gál buony gaa ijoká hé Waag hí ˈdú ˈjeˈjeenno, Waag hí imiro gaa shugudmicho.

⁵Gál hol ma egenyká hé Waag hí ˈdú ˈjeˈjeenno, aadh ˈdaatika lésallá lulle hai liileedhe.

⁶Gál hát Waag hí feˈdoká kuoˈdle ubaa barmle hí yegeská hé Waag hí ˈdú ˈjeˈjeenno, Waag hí fafaˈgsicho.

⁷Gál gálaat gerka guurá ˈguoká hé Waag hí ˈdú ˈjeˈjeenno, Waag hí geer guurá aargisicho.

⁸Gál hé ˈdeđewká ger ma ki sisin-, kasle Waag gaa iđieká hé Waag hí ˈdú ˈjeˈjeenno, gaal Waag hai aargira.

⁹Gál naanná gálaat hursam gaa sisidhoká hé Waag hí ˈdú ˈjeˈjeenno, gáál um Waaˈgieto gaalí yegedhe.

¹⁰Gál hát Waag hí feˈdoká el gaa igiro-, tá gaalí maanyjasuoká, hé Waag hí ˈdú ˈjeˈjeenno. Guch Waaˈgiet gál hí léká hé kinaallá.

¹¹Itín af giri gaalí egesheyo-, gaalí maanyjasuo-, he met lullé ˈdeđewká ˈdaachúka gaalí ˈdú hogodhoká, it kinaallá Waag hé hí ˈdú ˈjeˈjeenno.

¹²Yaalmit kinaallá in gál héle Waag hí ˈdeem ka shigiche-, gálaat ki ˈdiyimeká úba gaalí ki maanyjasie. Aaléka, ger hí gaa meet, kosolóo, hé shiicho Waag hí úr ali kí iđicheká hé tág guđo.

¹³Itín lésalláka, hát hí les shugutlé. Tá shúgút gaalí hé éíy taaka hol warase-, ˈjám ˈdabiyyeka háteeye midhab? Shúgút kinaallá hé hujich mán, hélle les ki okoˈdíti, giri gálaat hí ˈdug gaa seseenká.

¹⁴Hát ény gaalí gúm mé ˈdug gaa ˈdisse-, ereny mánkáka itín hí lésallá édhúmlé.

¹⁵Gálaat hé nyátáá ma bolmosiny, nyátáá he af ma bubuny. Nyátáá urgúaka úrro gaalí ki ređia, in édhúmle gál ˈbíl gaa ijoká lulle hí biiy ki arga.

¹⁶Hát tikiˈdééllá édhúmkícho hí gálaat met gaa edhew, giri hé ˈdabaan kíchia hí ekemeychoká gálaat hí aargiro-, gaal ˈJaa kíchia úr ijoká memeyoká.

¹⁷Aaléka, haí kieye, mu ka yimíéllá mu hemuumurit Waag hí Móshe ka shiicheká ubaa ˈdeem gál Waag hí ˈdeem ka shigicheká hí veereká he les gaa beđia, hí ye chéen. Yú ka yimíéllá yáá hé kinaallá les ma gaa beđiny, yú hemuumurit kinaallá ubaa ˈdeem kinaallá héllé đuđusia.

¹⁸Yú hí hé ˈdúwaká geeye, ˈdaab úr ubaa les el met hí ma ˈgînká, hemuumuritééllá hé ˈdéé umut níínní ubaa sányárích níínní hí gaa baađawká mán, ˈjíig héllé huogodheká lulle ali kí ˈdee.

¹⁹Aaléka, máá hemuumuritééllá hemuritlé ninniká tikiˈd gaa ˈdeeneyo-, tá gálaat yaalmit kinaal ki oonisuoká, máá kinaallá Guch Waaˈgietka, máá biiy el ˈdaˈdká ha gaalí gaa yeedhe. Tá máá hemuumurít lulle tág chirat-, yaalmit kinaal gálaat oonisuoká, máá kinaallá Guch Waaˈgietka, máá guđoká ha gaali gaa yeedhe.

²⁰Aaléká, yú hí geeye, itín har hát Waag hí feˈdoká hí hát ˈduwantiká el ma gaa igiriny-, hí gál Farisaay ubaa gál gálaat nyatalaam oonisuoká hí af mé ma ˈgisanka, af kinaalka itín gon Guch Waaˈgiet ál níínní hí ki higillaká mán.

²¹It hemurit Waaˈgiet-, Móshe hí gál heleká geey-, giri kieye, Ha máádhat chíésiny,[20] máá máádhat yeeská hé ˈdéé ki iđiny hí met gaa iđo, chieká maalle.

²²Tá yú íín hí geeye, máá nyárle ˈdú idhanoká hé ˈdéé ki iđiny hí met egeto. Máá nyárle chaaro-, kieye, Kó đeechal, yeetká, hé ˈdéé ki iđiny Waaˈgiet hí met egeto. Tá máá nyárle chaaro-, kieye, Kó ˈdúúw mánnal, yeetká hí ˈjiet biiyoká met gaa onnow.

²³Aaléka, har hé kua shiichoká kúb gaalí Waag hé shiicho ˈdug gaa shiguoká álle site-, tá nyárkú héllé ki ˈdeeneycheká ko táb ká ˈjieka,

²⁴hé kua shiicho kinaallá kúb kinaal álle ki hash, sí, nyárkú makan ˈjé, tá hol nú, hé kua shiichoká Waag shíish.

²⁵Máá ko ˈdéé gaa sisidho-, ko máá arra ˈdú egeetká hí hol ˈgayya-, hí ˈgierich gaa igiˈdaka, đo hol gár ˈdú naʼ, mu hai síen, ko máá gálaat ˈdéé ki iđimuo kinaal gíl gaa káany, máá kinaal ko máállé yuoyóká gíl gaa káany, gaal ko híígin.

²⁶Yú ko hé ˈdúwaká geeye, har ˈbíl hiigin kinaallá gaalí ko gaa kaayka, kó yé ma ká ˈdeeminy, ˈdaab ew gaalí ko ki mureká lúl yé ma ˈdéenyká.

²⁷Aaléka, ˈdaa gál hol shuunnekáka, it hemurit Waaˈgiet-, héle Móshe hí hodhe-, giri kieye, Haí hol ˈdú burúminy,[21] chieká maalle.

²⁸Tá yú íín hí geeye, máá min eiy hí il hergisato-, min baltle ˈguoká, gon hát máá minle ˈdú buraay.

²⁹Har íl kua ˈdaa naanietká ko ađááb mé ki kokoyyoka, ali gaa sílish, lab. Gónkú ali tikiˈd manítaka kalat, hát gónkú alulle ˈgayyo-, tá Waag ko ˈjiet biiyoká ki lalaannóóllá muuniny.

³⁰Héétí, har gíl ˈdaa kua naanietká ko ađááb mé ki kokoyyoka, ali gaa mur, lab. Gónkú ali tikiˈd manítaka kalat, hát gónkú alulle ˈgayyo-, tá Waag ko ˈjiet biiyoká ki lalaannóóllá muuniny.

³¹Hemurit Waaˈgiet hát chieká úba hé Móshe hí hodhe, giri kieye, Máá minle điidhoká hí min warˈgat hol eiy gaa galimiká ki muro,[22] chieká.

³²Tá yú íín hí geeye, máá minle hí ma ˈdú hergîny-, min điidhoká, min herginy ađaabieto he mé ki koy. Tá máá min bélle hí điidheká eetká herginy ađaabieto he hile.

³³It úba hemurit Waaˈgiet Móshe hí gál heleká geey-, giri kieye, Waag ˈdoote-, he af iđicheka hé kinaallá ha hâny, hé Máá Guđo Waag af iđicheká ˈdúwash, chieká, maalle.

³⁴Tá yú íín hí geeye, haí he tikiˈd úba ˈdóon. Haí úr ˈdóon, ur he Waag karallé guchiká.

³⁵Haí les ˈdóon, les he kara Waag hí ˈgasle ˈdú kokoyyoká. Haí Yerúsalem ˈdóon, Yerúsalem he ény Kánsích kúnnaa Guđoká.

³⁶Héétí haí metkícho ˈdoˈdóon, ˈdaa giri metkícho dhúrle tikiˈd hí édh, muuninyka, hí óngʼor ma hođinyká.

³⁷Tá har hí iiy-hí chieka, đo ˈduwayyíe. Har hí híʼi chieka, đo ˈduwayyíe. He ˈdoon hayyíe, he ˈdoon máá súm ˈdeew-, Sátan léká he yé gáá ˈdeˈdeenne.

³⁸It hemurit Waaˈgiet-, Móshe hí gál heleká geey-, giri kieye, Il ílle aˈgaˈd madía, kachint kachintle aˈgaˈd madía,[23] chieká, maalle.

³⁹Tá yú íín hí geeye, máádhat ko hé ˈdeewká ki ekeyka, ha hala káany. Máádhat he ko nét ˈdaa naaniet gaa ˈdoyka, nétatí úba ki kog.

⁴⁰Máádhat he ko ar met egew-, ko shaamít af ki ririatká fedoka, kótekú úba ki fur.

⁴¹Máá yuoyóká har ko ˈdéé ˈdú moy-, ko geey-, Ye shókódíchallá ˈgar éew, yieka, mú shokodich ˈgar éew, ál muí ko ˈdú moyká a naam af yíé ˈdé.

⁴²Máá ko he ruogonoká he shíish, máá ko he gaa eergiatká fedoká ha he rîny.

⁴³It ˈdéé hót kieye, Máá olkú géélneb,[24] kídhíchkú nébet, chieká maalle.

⁴⁴Tá yú íín hí geeye, gál hí hol ka kídhká geelnée, gál hí maanyjasuoká Waag ki viivitíe,

⁴⁵giri ˈJaa kíchia úr ijoká hí umle chegetoká. Hééllá he ˈdaa giri mu aadh gál ˈdeđewká ubaa gál ˈduuˈdúwaká ˈdú koy-, ir gál saas mánká ubaa gál saas ˈguoká ˈdú gáá haađuoká.

⁴⁶Itín har gál hí geelnedheká tákáma hí geelneteka, ˈduuw máre hí yé ˈdú ˈdiiyye? Gál birm gugusatká hé úba hát tikiˈdééllá ekemesetká muunîny?

⁴⁷Har gálkícho tákámle hí naa chegetoka, hé kinaallá hé hát aađa-, galaatká muunîny? Gál Waag muogká úba hé hát kinaallá ekemesetká muunîny?

⁴⁸Aaléka, hát ˈJaa kíchia úr ijoká hí tagléélláka, itín úba gál tagléká yiedhíe, Yíésu hí gáál yie.