Read daasanach Matááyo 9 Bible Online

Matááyo 9 - daasanach bible

Matááyo 9

¹Yíésu kadich hile, ílung ˈdaatí yé ki ˈjie, ˈjienle ki ˈjie.

²Ál kinaal gálaat máá héljoká rokoˈd ˈdu gáá iifite, mú Yíésu ˈdu gáá eey. Yíésu gáál iiy yeenle argeká máá giri héljoká geey, kieye, Inychú, ha geer mare ˈgíiny! Ađaabanokú yáá ko gaa eey, yie.

³Ál kinaal gál gálaat nyatalaam oonisuoká ˈbaal gerle ki tawue, kieye, E mu Waag chaara! yie.

⁴Yíésu gáál tawunyle kimiteká kieye, Háteka hí hé ˈdeđewká ger ki taawuyyáal?

⁵Hé máre súm hawul man yú hogodho? He in ađaabanokú yáá ko gaa eeyyo, yú yeedhee? Ebá keʼ, sí, yú yeedhe?

⁶Aaléka, yáá Iny Máádhátallá hát kansim yáálle lésalláka gálaat ađaabano gaa egewká ˈguoká dhaayyíe, muí gáál yie. Yíésu đo máá héljo kinaal geey, kieye, Les gaa keʼ, rokoˈdkú éew, énykú mé naʼ, yie.

⁷Aalé máá giri héljoká đo les gaa kie, ényle mé nie.

⁸Nyésébích ál kinaal ˈgieká mu les gaa kie-, argeká he af ˈdabe, neey, kor gaal Waag gálaat fargoginsam hat kinaallóóllá shiicheká meey.

⁹Yíésu ál kinaal gaa kie, sienylé gaa igireká máá gálaat gibíre gaa gugusat-, gaalí Matááyo yegie mare arge, mu ˈbíl gibireká gaa ija. Aalé Yíésu mú geey, kieye, Ye el gáá véer, yie. Matááyo đo kie, mú el gaa veere.

¹⁰Aalé Yíésu hátlé ˈbíl Mataayo gaa ije-, ubaa lalille golmoteká, gál gusachietká ubaa gál ađaabano ˈguoká úba ká yimie, gáál hol ˈgar gololte.

¹¹Gál Farisaay héél argeká lali Yiesu heete, kieye, Máá kíchia hí he oonisuoká in háte he ˈdie? Máá gál gusachiet ubaa gál ađaabano ˈguo-, ke hol af ma gaa kokonyká hol af gaa kokúol! yie.

¹²Yíésu hé kinaal maalleká kieye, Gál fayyáká hé gilóny ma fediny, gál basham ˈguoká in gilóny fede.

¹³Aaléka, sedhíe, Waag ˈdeenylé kieye, Yú itín hí gálaat geer guurá ka ˈgayyaká hí gaa fede, yáá suor hí ma gaa fediny,[27] chieká, hélle eiy naatíe. Yú ka yimíéllá, yáá gál ađaabano mánká ma ka ˈgíen, yú gál ađaabano ˈguoká ká ˈgiedhe, muí gáál yie.

¹⁴Aalé Yuána gálaat bie gim nannieká lalille Yíésu ˈdú sedhe, mú heete, kieye, Nyiin ubaa gál Farisaay af burnayká nyí af higisata, tá háteka lalikú íín af ma higisanal? gaalí yie.

¹⁵Yíésu gáál ˈdéé hol ˈdú nie, kieye, máá eedhdheká háteeye gál shien ki kiere-, he hol af ijoká geer hí gaa ˈdeđendhe? Hé ger hí ma gaa ˈdeđenen. Kúlích máá eedhdhe kinaal Waag hí gálaat hurt gaa egeetoká ali hai kí ˈdeenne, bár kinaallá in gaal af higita.

¹⁶Hé máá níínní đafar káánaká toort gáá muuro-, toort đafar guđanteká ki ˈdaraanká mán. Hat muí hát kinaal koyka, toort đo súmmo he đafar guđanteká eiy ˈgiˈgidhicha.

¹⁷Héétí gálaat hé ˈduuny vinna kaana-, hátle ma kárinyká orgom guguđandheká ma fafiny.[28] Har gaalí fieka, ˈduu he kareka, orgom đo eiyyo fufuadhe, ˈduu hai okoˈde, orgom đo hujich hai ˈdabe. Gálaat ˈdaaka ˈduuny vinna kaanaká orgomlé kaanaká fafaa, hát kinaallá in ˈduu ubaa orgom ma ˈdeđenen, Yíésu hí gáál yie.

¹⁸Aalé Yíésu ˈdeeny kinaal huogodheká, gál Yuuˈdi máállé kansich mare hí ˈdu gáá yimie, mú met les kurram gaa ˈdoy, mú ruogone, kieye, Ini chia ninni hé káánallá eiy ˈgeyye, gillo yú ko ki efe, kí énychú siet, inichú gílkú ˈdú íífish, ini hí loolnot, yie.

¹⁹Aaléka, Yíésu ubaa lalille kie, mú hol eedhdhe.

²⁰Min warram tomon a naam-, fas hí hawul gaa ˈgiedhe mare Yíésu mé il ˈgar siete, mú đafar net đig chie,

²¹tawunyleka kieye, Yú mú đafarle đig yieka, yú đo ha bie, chie.

²²Aalé Yíésu hol gáá made, min ki fuˈjie, kieye, Veelééllo, ha geer mare ˈgíiny! Iiy yeen kua ye iiy chíéllá hé ko bisiche, yie. Min đo tíkíˈdé kinaallá fayante.

²³Aalé Yíésu ény máá giri kansichká hileká mu gál fuorisam ˈdaraan-, ubaa gál burnay-, bebemeká argeká, mu gáál geey, kieye,

²⁴ˈBíl yé gaa ˈdée, ini hé mán ma chéen, ini hai rayye, yie. Gaal đo mú ˈdeenyléél eeshey.

²⁵Aalé nyesebich gaalí ˈbíl yé gaa ˈdeeyká, Yíésu ˈbíl geer ini hí gaa iiyyeká hile, ini gíl chiˈde, ini đo les gaa kiiyye.

²⁶Fayaméél lés kinaal geerle lulle eiy bash ki chie.

²⁷Yíésu ál kinaal gaa kie. Sienylé gaa igireká gál naama-, in maamannay mare hí el gaa veere, gaal kúóˈd ˈdoy, kieye, Iny ˈDawuˈdallo,[29] nyí ˈdú ˈjé! yie.

²⁸Yíésu ˈbíl hileká gál naama kinaal hí ˈdú sedhe. Yíésu gáál heete, kieye, Hé hí ye gaa feˈdééllá hát yú ekemeyoká it iiy chíe? yie. Gaal kieye, Iiy-hí, Máá Guđo, nyáá nyí iiy chie, gaalí mú yie.

²⁹Yíésu gáál in gaa chiichiˈde, kieye, He hí hát hí iiy chíéllá yeet, yie.

³⁰Gaal đo biiy gaa arge. Aalé Yíésu gáál il gíl gaa helie, kieye, Haí hééllá máádhat géeny, yie.

³¹Kor gaal kieká đo fayam Yiesúúl les lulle eiy bash ki hoy.

³²Gál Yíésu hí in yé ká ˈdeey kinaal hátlé kieká, gálaat Yíésu máá aryáán hí hille-, aryáán hí af ˈdabsiche mare mú ˈdu gáá eey.

³³Mu tikiˈde Yíésu hí aryáán yé gaa ˈdeđúóllá đo ˈdéé huogodhe. Gálaat he af hiibidhme, kieye, Hé hatallóóllá hé kálta gaalí Yísirayel ma gaa árginy, yie.

³⁴Aalé gál Farisaay íín kieye, Mu aryáán kánsíchle fargogintle in aryáán yiem ki ˈdeđia, yie.

³⁵Aalé Yíésu ˈjien ubaa forim lulle gaa sedhe, mu gálaat énylé ˈdiiyiminyká Fayam Midhab Guch Waaˈgietká gaa ˈdiiyime, gálaat basham ubaa fursam met lulle gaa eey.

³⁶Mu nyesebim argeká nyesebim geer hí ˈdú gudhdhe, ˈdaa giri gaal hát wala máá hí ˈdeˈdeen mánká ka ˈgie-, hát ˈdabe-, mé hí guđandheká.

³⁷Aalé mu lalille geey, kieye, ˈGuom hiteká hé tág guđo, tá gál hí mumuroká íín hé iraam mán.[30]

³⁸Máá Guđo-, ˈguom léká heetíe, muí gállé hí hujich ki nannuoká lesam ali ˈdú fuo, gaal hí mú ˈguom kí muro,[31] Yíésu hí gáál yie.