Read daasanach Márko 1 Bible Online

Márko 1 - daasanach bible

Márko 1

¹Hééllá Fayam Midhab Yiesu Kiristo-, Iny Waaˈgietká mé gáá koonlé.

²Warˈgat máá Waag hí ˈdeem ka shigiche-, Yisááya léká hí veereká hatallá he chie: Ebá dháash, yú máá chia ˈgassoká ali ha gáá kakaa. Mu met hai ko naadha,[1] mu ˈgíérích kua he tág kokoo.

³Kóˈd máádhat ˈbakat ha gaalí gaa maala, kuoˈd kieye, Máá Guđoká les met ˈdiidháa, mú ˈgierimle lođuđaat kóo, hai yeedhe.[2]

⁴Aaléka Yuána giri gálaat bie gim nannuoká ál ˈbakate mare ki ˈjie, gálaat ki ˈdiiyime, giri gaal héllé ˈdeđew-, eekemeyká gil sug ki haađuo-, gaal Waag makan fafaan-, gáál gaalí bie gim nannuo-, gáál Waag hí ađaabanolle ubaa nyuogimle gaa egeyyoká.

⁵Aalé gál lés Yuuˈdiaká ubaa gál ˈjien Yerusalemká lulle Yuána ˈdú sedhe, gaal héllé ˈdeđew eekemeyká ˈdeentle iiy yie, mu gáál wár Yorˈdan álle bie gim gaa nie.

⁶Yuána đafaraam he fadhdheká dhúr galte gaalí tág gaa nie. Mu sáb rokoˈdeká úba seet hite. Mú ˈguomle ˈgamutaach ubaa dhaanite.

⁷Aalé mu gáál fayám shie, kieye, Máá ye súm far ˈdú gogo mare hé ye el gaa igiro, hai ká ˈjeeme. Máá kinaallá hé tág ye ˈdú guđo, yáá ˈduuw ˈguo-, mé les ki ˈduo-, mú koiyle saawle fuuroká mán.

⁸Yú íín bie hí gim nannaa. Mu íín Hím Naasan Waaˈgieto hí gim nannaa, Yuána hí yie.

⁹Af kinaal Yíésu ény Nasaret giri lés Galilaayaká he gáá ˈjie. Aalé Yuána Yíésu wár Yorˈdan álle bie gim gaa nie.

¹⁰Yíésu bie yé gáá ˈdeˈdemeká úr af hí fufurma, Hím Naasan Waaˈgiet hát hóleká mú ˈdu gáá lelete, muí arge.

¹¹Aalé Waag ˈdéé úr gáá hote, Yíésu geeyche, kieye, Kuun he Iny chia yú gielká, kó tág ye geer gaa meeyche, mú chie.

¹²Ál tikiˈde kinaal Hím Naasan Waaˈgiet đo mú ˈbakat álle ali ˈdú kaayye.

¹³Mu ál ˈbakate kinaal ram tomon afur gaa yíéđie, mú Sátan hí ki ekesete. Mu af kinaallá ubaa bine baadietká hol af ije. Aalé Waag gállé ˈgasso-, urruká mú ál kinaal gaa ˈdeˈdeme.

¹⁴Aalé Yuána gaalí hiigidheká Yíésu lés Galilaaya sedhe. Fayam Midhab-, Waaˈgietká gáál ki ˈdiiyime, kieye,

¹⁵Kulich hé ali kí ˈdiiyye, Guch Waaˈgiet hé ká ˈjobonte. Hé ˈdeđewká hayyíe, Fayam Midhaballá iiy yiedhíe! muí gáál yie.

¹⁶Aalé Yíésu Bás Galilaaya in ka nadheká gál awuan-, naama-, Símon ubaa nyárlé Ánˈduru lé-, buit ki awumeká arge.

¹⁷Yíésu gáál geey, kieye, Ka yimedhíe, ye el gáá veerée! Yú hí gál gálaat Waag ˈdu gáá egewká hoyo, yie.

¹⁸Gaal đo bushle hay, mú el gaa veere.

¹⁹Aalé mu biiy met á níínni mare ki sedheká Yákob iny Dhebeˈdayaká ubaa nyárlé Yuána arge. Gál kinaal úba kádíchle gaa ija, bushle dhadhadhdha.

²⁰Yíésu đo gáál vie, gaal ˈjaallé Dhebeˈdáya ubaa gál hí hujich ki nannieká kadich ki hay, mú el gaa veere.

²¹Aalé Yíésu ubaa lalillééllá ˈjien Kafarnaum ki fame. Kúlích Hef ˈGisanká Yíésu ˈbíl ˈdiiyiminyká sedhe, gálaat he onisie.

²²Gaal mú he onisinyle af ˈdabe. Hééllá he ˈdaa giri mú he onisinyle he onisiny máá kansím ˈguoká ka taal-, he onisiny gál gálaat nyatalaam oonisuoká ma ka taalinyká.

²³ˈBíl ˈdiiyiminy kinaal máá hí gaa ije-, aryáán hí hille mare hí kúóˈd gaa ˈdoy, mu kieye,

²⁴Yíésu Nasaretallo, meete ke hol ká ˈgaa? Ha ká chimie, nyí af ki beđisata? Kúún yáá ko óg, kúún he Máá saas mán-, Waaˈgietká! yie.

²⁵Aalé Yíésu aryáán he ki mure, kieye, Shab áat! Máállá yé gaa ˈdé! yie.

²⁶Aalé aryaan giri mú gaa iđeká mú muotisiche, súm kúóˈd ˈdoyye, mú yé gaa ˈdiiyye.

²⁷Gálaat lulle he af ˈdabe, hol heegete, kieye, Héél meete? He he onisiny kaana-, hemuumurít ˈgayyokâ? Máálle aryáán úba he ki mumuro-, aryáán hí met gaa kekeenal! gaalí yie.

²⁸Aalé Yíésu fayamle đo lés Galilaaya lulle bash ki chie.

²⁹Yíésu ubaa lalilléél ˈbíl ˈdiiyiminy kinaal gáá kieká đo sedhe, Símon ubaa Ánˈduru ényle mé nie, Yákob ubaa Yuána úba hé gáál hol ˈgie.

³⁰Gaal é ki fameká Símon suogle ˈbíl gaa iiyye, furs ˈdeewká hí ˈgieˈgíe. Gaal Yíésu min geey.

³¹Aalé mu min ˈdú sedhe, min gíl chiˈde, min les gaa eey. Furs giriká đo mán yie, min đo gáál gololiche.

³²Gelga-, aadh dhúú ˈjiiyyeká gaal gál burnay-, basham ˈguoká ubaa gál aryáán hí hilleká Yíésu ˈdu gáá shuune.

³³Gálaat lullé eny kinaalloká ˈbíl af ˈdú tuutume.

³⁴Yíésu gál burnayká hátlé giri basham hí hol ká eiy eiyyeká bisie. Aryaan burnayye-, gálaat hilleká muí yíé ˈdeey. ˈDaa giri aryáán Yíésu onoyyeká in Yíésu hí ˈdéé huogon ká ridhdhe.

³⁵Búrlé-, biiy hátle ma bírinyká Yíésu ˈbíl yé gaa ˈdie, ál ˈbakate-, Waag gaa vivisatká sedhe.

³⁶Símon ubaa gállé hol ˈgieká mú hol gaa ˈgeˈgedhe.

³⁷Gaal mú argeká mú geey, kieye, Gálaat lulle ko hol gaa ˈgeˈgedhe, yie.

³⁸Yíésu gáál ˈdéé hol ˈdú nie, kieye, Sedhíe, kí ál éíy ˈjienle ka ˈjóbká siet. Ál kinaal úba yú gálaat Fayam Midhab-, Waaˈgietallá ki ˈdiiyime. Yú hé kinaallá ˈdu gáá yimie, yie.

³⁹Aalé mu lés Galilaaya lulle gaa sedhe, gáál énylé ˈdiiyiminyká hile, gáál ki ˈdiiyime, gálaat aryáán yiem gaa ˈdeey.

⁴⁰Aalé máá nyókot hí faanne mare Yíésu ˈdu gáá yimie, mú met les kurram gaa ˈdoy, mú gil ki efe, kieye, Kó uˈdo, har feˈdoka ha ye biisicha, mú yie.

⁴¹Aalé Yíésu mú geer hí ˈdú gudhdhe, gíl helie, mú đig yie, tá mú geey, kieye, Yáá fedo. Midháno! yie.

⁴²Máá giriká đo baash hí ál kinaal yé gaa ˈdie, midhandhe.

⁴³Yíésu mú sí yie, kor mú il gíl gaa helie, kieye,

⁴⁴Hééllá ha máádhat géeny! Sí, hát biiyyééllá aany ˈdááno, máá suoryoká hol argísish, muí ko suor ki ˈgalo. Hé héle Móshe hí gáál geeyká lulle tág kog, gálaat kuun hát fayanteká hí argo, mú yie.

⁴⁵Máá giriká yíé ˈdieká hé shab ma yéen, đo ˈdeeny guđoká huogodhe, fayám biiy bash ki hoy. Aalé Yíésu fayam kinaal hí ˈjien síé riate. Aalé Yíésu alb giri gálaat mánká gaa yíéđie, gál tolloká lulle mú ˈdú sedhe.