Read daasanach Márko 10 Bible Online

Márko 10 - daasanach bible

Márko 10

¹Aalé Yíésu Kafarnáum gáá kie, lés Yuuˈdia mé ká nie, ˈjíig wár Yorˈdan yíé ˈdie. Nyesebim burnayká mú ˈdu gáá yiimie. Mu hátlé aađaká geđi gálaat he onisie.

²Gál Farisaayká ˈdáá tikiˈd mú ˈdu gáá yimie, mú hát hinyamoká heete, kieye, Máádhat minle điidhanká ˈdaa hemuumurit Waaˈgietka taglê? yie.

³Yíésu gáál ˈdéé hol ˈdú nie, gáál yiete, kieye, Móshe héle meete hí ki mure? yie.

⁴Aalé gaal kieye, Móshe hé nyí ki mureká kieye, máádhat minle điđidhanka, hí min warˈgat hol eiy gaa galimká ki muro, tá hí min điidho, yie.

⁵Aalé Yíésu gáál ˈdéé hol ˈdú nie, kieye, ˈDaa giri hí met ki guogoká in Móshe hí ˈdeenyééllá ki mure.

⁶Tá Waag erkob he lulle ka kuonneká mááyab ubaa mááˈdieto he tág niiyye.[16]

⁷ˈDaa kinaallá ˈdugaka in mááyab ˈjaalle ubaa ˈjielle haađia, minle hol chiiˈda, gaal hullaalle tikiˈd yeedhe.

⁸Aalé gaal hol shuunneka, gaal hé geđi naam muuniny, gáál gon hí tikiˈde.[17]

⁹Aaléka, gál Waag hí hol fiiyye-, hí tikiˈd hoycheká ha máádhat hí hol eiy gaa ˈgidhîny, yie.

¹⁰Waaséél gaal ˈbíl hileká Yíésu lalille hí ˈdeeny giriká yaalmichle geđi yiete.

¹¹Aalé mu gáál geey, kieye, Máá minle điidho-, min eiy eetká, máá kinaallá minlé he ˈdú hergie, ađáábo he hile.

¹²Tá min bélle điito-, bél éíy taaka eetká, min kinaallá béllé he ˈdú hergiche, ađáábo he hille, Yíésu hí yie.

¹³Aalé gálaat Yíésu um niginiká ˈdu gáá eey, giri um muí met ˈdug ˈdú chichiratká. Aalé gál giri láliká gál um ˈgieká ki ˈday.

¹⁴Yíésu héél argeká chira sare, gállé láliká ki ˈday, Um haí môny, um hí ye ˈdu gáá yimet. Guch Waaˈgiet gál hílléká hát umééllá.

¹⁵Yú hí hé ˈdúwaká geeye, máá Guch Waaˈgiet hát umut ninniká ma ka hilinyká hé Guch Waaˈgiet ma higiliny, yie.

¹⁶Aalé mu um gil ˈdinnam nie, um ˈdú chiichiˈde, um Waag ki vie.

¹⁷Aalé Yíésu ˈgíéríchlé gaa igireká mú tikiˈd hí ˈdú gáá ˈdodhdhe, mu Yíésu ˈgas met les kurram gaa ˈdoy, mú yiete, kieye, Máá ˈdúwa-, gálaat he oonisúóllo, yú háte ˈdeeme, giri yú luolmit biiyoká aargiroká? yie.

¹⁸Aalé Yíésu mú yiete, kieye, Háteka ye máá ˈdúwaká chegetóol? Hé máá níínní ˈdúwaká mán, Waag tákáma ˈdúwa.[18]

¹⁹Hemuumurit Waaˈgiet kó óg, hemuumurít kieye, ha máádhat chíésiny, haí hol ˈdú burúminy, ha buráany, ha máádhat hódho af káany, ha máádhat điđám ki ˈdíiny, ˈjaakú ubaa ˈjiekú kiikíaw,[19] Yíésu hí mú yie.

²⁰Aalé máá giriká Yíésu ˈdéé hol ˈdú nie, kieye, Máá gáál he oonisúóllo, hé kinaallá af giri yú máá nyigeeny onnoyká lulle yáá ki yiel, ˈjíig káána úba đig, yie.

²¹Aalé Yíésu mú gaa dhaay, mú geelnedhe, mú geey, kieye, He tikiˈde tákáma ko gaa laʼ. Sí, he lullé ˈgayyoká bíre yío, bíre kinaallá gál he maamanká eiy gis, kamur guđoká úratíá ha gaa aargiˈda. Hééllá đusicheka káde, ye el gáá véer, Yíésu hí mú yie.

²²Aalé máá giriká héél maaleká innum hol ˈdú shuune, máá kamúrut ki yeetká geer hí gaa ˈdeenedhe, ali gaa sedhe.

²³Yíésu gáál il gaa nie, lalille geey, kieye, Gál kaamúreká Guch Waaˈgiet higiloká hé tág fargogo, yie.

²⁴Gál láliká mú ˈdéé hótle hí birgisiche. Mu geđi gáál geey, Ummo, Guch Waaˈgiet ebá hilít hí fargogóon!

²⁵Máá kamúrutká Guch Waaˈgiet higiloká hé tág fargogo. Galt hirich íllé ninniká nannaatká hí hawul ˈdú man, yie.

²⁶Mú lalille súm héél a ˈdabe, hol heegete, kieye, Tá aaléka gálya rubach aargira? yie.

²⁷Yíésu gáál gaa dhaay, gáál geey, kieye, Hééllá gálaat hai ká aađadhdha, tá Waag hé hí ka aađaatká mán. Waag íín hé he lulle hát gaa ˈgayyo, yie.

²⁸Bétiro đo ˈdéé ká huogodhe, Yíésu geey, kieye, Ebá dháash, nyíín he lullé nyí hayche, nyí ko el gáá veeˈde, yie.

²⁹Aalé Yíésu kieye, Yú hí hé ˈdúwaká geeye, máá ˈdaachú ubaa ˈdaa Fayam Midhaballá ˈdugaka, ényle yíekaʼ, nyaaramle yíekaʼ, ˈjielle yíekaʼ, ˈjaalle yíekaʼ, umle yíekaʼ, tá léslé fafuoká yíekaʼ, hayoká,

³⁰máá kinaallá gon hé súm hééllá lulle ˈdú burnay-, kúˈd nyuoroká lésallá hai gaa aargira, kor manyjasiny úba il haí aargiˈda. Tá mu bííy biraamiet ka chiimetóótíá luolmit biiyoká hai gaa yíéđima.

³¹Tá gál burnay-, káánalka biiy met ˈgieká bár ˈdaatika biiy el hai ki maada, héétí gál burnay-, káánalka biiy el ˈgieká bár ˈdaatika biiy met hai ki maada, yie.

³²Yíésu ubaa lalille ˈgiericho gaa igire, Yerúsalemo he seseme. Aalé Yíésu gáál met nadhe. Mú lalille héél af ˈdabe. Gál gáál el gaa igireká sierm hí faanne. Yíésu gál láli tomon a naamaká geđi tól eedhdhe. Mu hé gaalí ki ekemeyo-, il hí aargiˈdoká fayamle gáál shie.

³³Mu kieye, Bá dhaayyíe, muun Yerúsalemo ke seseme. Ál kinaallá Iny Máádhat gál guguđo-, suoryoká ubaa gál nyatalaamká gíl geer ha gaalí gaa kakaa. Gaal mú kúfach mé hai ki kokoo, tá mú kídh hai ká higita.

³⁴Kídh kinaal mú hai ˈdú kosolmo, mú sillam hai ˈdú fafaa, mú tuuˈd hai ki tuuna, tá mú hai yeese. Tá kúlích ki seđeká sídhle hollo hí hol ˈdú naata, uushich yé hai gáá ˈdeeme, Yíésu hí gáál yie.

³⁵Aalé Yákob ubaa nyárlé Yuána giri hele Dhebeˈdayaká Yíésu ˈdú sedhe, mú geey, kieye, Máá gáál he oonisúóllo, he nyí ko rogononnoká nyí met gaa egeetoká nyí feˈde, gaalí yie.

³⁶Yíésu gáál yiete, kieye, Meete hí ye gaa feˈde? yie.

³⁷Gaal đo mú geey, kieye, Hé nyí ko gaa feˈdeká he bár kuun he lulle kansimle aargiˈdoká nyí haađicho-, mú tikiˈd ko gíl ˈdaa naanietká yíéđian-, máátí ko gíl ˈdaa ˈjíbachká yíéđianká nyí feˈde, gaalí yie.

³⁸Aalé Yíésu gáál geey, kieye, Itín hé hí rogononnoká it muog. It kulu manyjasiny yú igianallá úba hí igiannoká uˈdâ? Tá bie gim naan yú gaa nannaatká itín úba hí gaa nannaataká uˈdâ? yie.[20]

³⁹Aalé gaal kieye, Nyáá nyí uˈda! gaalí yie. Aalé Yíésu gáál geey, kieye, Kulu yú igianallá úba haí igianna. Bie gim naan yú gaa nannaatallá haí gaa naata.

⁴⁰Tá gíl chia ˈdaa naanietká ubaa gíl chia ˈdaa ˈjíbachká yíéđinyle hé yú ma ká mumuriny. Alb kinaallá hé gállé Waag hí tág ki niiyyeká ˈgayyo, muí gáál yie.

⁴¹Aalé lali tomonatí héél maaleká Yákob uba Yuána ˈdú idhane.

⁴²Aalé Yíésu gáál lulle hol ˈdú vie, kieye, Ití óg, kidh gállé kaansúo-, hí met ki ˈgieká hí he ki mumura, in hí guguchle aargisia.

⁴³Tá itín ˈdaakíchoka, he hé hát kinaallá muuniny. Hurtkíchallá máá gúch fedoká, hí máá hí met gaa kekeen-, hí hujich kí nannuoká yeet.

⁴⁴Hurtkícho máá máá méte yegetká fedoká, hí lulkícho gédéchkícho yeet.

⁴⁵Iny Máádhat ka yimíéllá hé gálaat hí hujich ma ki nanniny, ííni gálaat hujich ki nannaa, ííni sídhle gálaat ˈdú silmia, giri gálaat ririanká, yie.

⁴⁶Aalé gaal ˈjien Yeriko kí fame. Yíésu ubaa lalille tá nyésébích he hol ˈgieká hátlé ˈjien gáá kekemeká máá in mán rogonon-, gaalí Bartimááyos yeget-, iny Timaus mare ˈgierich af gaa ija.

⁴⁷Mu Yíésu Nasaretká ali ká nadhe-, maaleká kúóˈd ˈdoy, kieye, Yíésu, Iny ˈDawuˈdallo![21] Geer hí ko ye ˈdú guat! yie.

⁴⁸Gál burnayká mú il ˈdú eey, kerka mú shabo hođie. Aalé mu geđi súm kúóˈd ˈdoy, kieye, Iny ˈDawuˈdallo! Geer hí ko ye ˈdú guat! yie.

⁴⁹Yíésu đo ali ki ˈdie, Mú ka vée, yie. Aalé máá giri in mánká gaalí ká vie, gaal kieye, Ha geer ko gaa ˈdeenêny, ka kííso, mu ko veeme, gaalí yie.

⁵⁰Aalé mu đafarlé gielle ˈgieká úr ki lay, les gaa kiite, Yíésu ˈdú sedhe.

⁵¹Aalé Yíésu mú heete, kieye, Meete ye gaa feˈde? yie. Máá giri in mánká kieye, Máá gáál he oonisúóllo, yú biiy gaa argiroká fede, yie.

⁵²Yíésu đo mú geey, kieye, Sí, iiy yeen kua ye iiy chíéllá hé ko bisiche, mú yie. Aalé ál tikiˈde kinaal mu biiy gaa arge, mu Yíésu el gaa veere.