Read daasanach Márko 12 Bible Online

Márko 12 - daasanach bible

Márko 12

¹Aalé Yíésu hát hibietká gáál he onisie, kieye, Mú tikiˈd ˈguor saano vinnaká [25] lésle gaa fie, tá đír ki ˈdisse. Mu les hurt ˈguoˈd gaalí saano gaa ˈduˈduoká gaa ˈgodhe, konnoch úba les gaa ˈdisse. Aalé mu gál les ˈdeˈdeen-, aadh ˈdaatika saano hisseka mú hol saano ki léká les af iđie, đo kie, lés eiy mé nie.

²Aalé saano vinna he hí baan yieká, máá giri lesléká gédéchle gál he lésle af iđieká ali ˈdú kaay, giri gál kinaal mú lésle saanolle gaalí mú ˈbaal ka shiguoká.

³Aalé gál giri les ˈdeˈdemeká máá giri gedechká ˈgiliˈgay, mú tune, mú gil ki arie.

⁴Aalé máá giri les léká geđi gédéch eiy gáál ali ˈdú kaay. Máá kinaal gaalí mé ˈdoy, gaalí chaachare.

⁵Máá giri les léká geđi máá éíy taaka ali gaa kaay, máá kinaal gaalí yies. Mu geđi gál éíy burnayká ali fie, gáál ˈdáá tikiˈd gaalí tune, ˈdáá tikiˈd gaalí yies.

⁶Máá muí ali ma gaa káany-, ká ˈgiteká tikiˈde. Máá kinaallá he mú inylé gelaamká. Mu inyle gáál el ˈdaˈdo ali gaa kaay, tawunyleka kieye, Gaal inychú hai kiadha, yie.

⁷Gál giri muí les af iđieká íny argeká hol geey, kieye, Máá lesallá léká inylé hí aˈjibaatle higiloká hállá. Ka yimedhíe, mú kí yees, les kí lilet, gaalí hol yie.

⁸Aalé gaal đo íny hol ˈdú ˈgiiliˈgay, íny yies, íny les sug ki lay.

⁹Aalé máá lesléká háte he ˈdeeme? Mu hai ká yiimedhe, gál kinaal af hai ki beđita, les gál eiy af hai iđimia.

¹⁰Ití Warˈgat Waaˈgiet giri kieye, Wár gál é ˈdiˈdisoká hí điidheká hé ˈbíl árle yie.

¹¹Wár kinaallá Máá kúnnaa Guđo Waago hí hát kinaallá koy. Yaalmit ke il ki argóóllá ebá gáál af gil fafaa! [26] chieká ma túony? Yíésu hí yie.

¹²Aalé gál giri guguđoká hib Yíésu hí hogodhééllá hát hí ˈdaalle ki tielká onnoyká Yíésu ˈgiiliˈgayká fede, kor gaal ˈdaa giri nyésébích Yíésu af nee kokoyká kiadheká mú hay, ali gaa sedhe.

¹³Aalé gál Farisaay ubaa Heróˈde gállé hí ˈdú ijoká ˈdáá tikiˈd gaalí Yíésu ali ˈdú fie, giri gál kinaal ˈdéé um mákárta-, mú a geer yé gáá ˈdeˈdeenká mú af ki raraatká.

¹⁴Gaal mú ˈdu gáá yimie, kieye, Máá gáál he oonisúóllo, kúún hát ˈdúúw hogoto-, afka hódho mánká nyáá nyí óg. Kó máá níínní kikiato-, ubaa ˈdú iiyyoká mán. Tá kuun ˈgíérích ˈdúwa-, Waaˈgietká gálaat oonisicha. Aaléka, Káísar ki gibíre ki gugusoká taglée, ebá hé tagle muuniny?

¹⁵Gibíre ha nyí guutáa, ebá nyáá nyí ma guusiny? gaalí yie. Aalé Yíésu gáál điđamle kimiteká gáál geey, kieye, Háteka hí ye héél af kí dhaˈgasanáal? Ebá ye bíre tikiˈd kí helía, yú dhaaya, yie.

¹⁶Aalé gaal mú bíre tikiˈd kí helieká, Yíésu gáál yiete, kieye, birééllá gách ubaa hedh hí gaa yaalallá hé mááya? yie. Gaal Yíésu ˈdéé hol ˈdú nie, kieye, Hé Kaisar, yie.

¹⁷Aalé mu gáál geey, kieye, Hé Kaisar máállé Káísar shía, hé Waag hí léká Waagle shía, yie. Aalé gaal mú ˈdeenyléél af ˈdabe.

¹⁸Aalé gál Saˈdukaay[27] giri kieye, Gálaat gál mán yeetká hé sidhamle hí hol ma ˈdú gáá nannaan, uushim yiem ma gáá ˈdeˈdeminy, yegetká Yíésu ˈdéé hót ˈdú gáá eedhdhe.

¹⁹Gaal kieye, Máá gáál he oonisúóllo, Móshe hé muun gáál kí veereká kieye, máádhat nyárle eedhdhe-, tá hátlé um ma ˈdálinyká mán yieka, mú nyárle hí min kinaallá eet, hí mú um kí ˈdalo, he yie.[28]

²⁰Aaléka, gál yááb hol ki ˈdalidhe mare tiiya. Máá erká min eedhdhe, hátlé ma nyiˈdísinyká mán yie.

²¹Aalé mú nyárlé hí elloká đo min kinaal eedhdhe, tá hátlé um ma ˈdálinyká úba mán yie. Máá kinaal nyárlé hí ˈgar yielká min kinaal úba eedhdhe, kor hátlé um ma ˈdálinyká úba mán yie. Yaalmitééllá gaal lullé hol ki ˈdalidhééllá mé gáá ˈjeeˈjeenne, ˈjíig máá ki tiiyaká đig.

²²Gaal lullé hol ki ˈdalidhe-, tiiyáállá hídh mánt kufe. Min íín úba el ˈdaal mán chie.

²³Aaléka, ˈdaa giri min gál hol ki ˈdalidhe-, tiiyyáállá lúl hí shuunneká, af giri gál kufeká uushim yiem gáá ˈdeˈdeenká minnééllá gálallá mááya hí le? gaalí yie.

²⁴Aalé Yíésu gáál geey, kieye, ˈDaa giri hí Warˈgat Waaˈgiet ubaa fargogint Waaˈgiet ki muogká, in hí hééllá ˈdeeneyche muunîny?

²⁵Gál kufeká af giri uushim yiem gáá ˈdeˈdeenká hé máá níínní egeet-, ubaa gaalí egeetká mán. Af kinaallá gaal hát Waag gállé ˈgasso-, urruká hai yeedhe, gaal hé ma shugunan.

²⁶Ta gál kufeká uushim yiem gáá ˈdímle ˈdeenyle ití warˈgat Móshe hí veereká ma gaa túony, giri ˈgór bolomeká Waag hí ˈdéé gáá hote-, Waag kieye, Yú he Waag Abiraayam, Waag Yisak, tá Waag Yakob, Waag hí chieká?[29]

²⁷Waag hé Waag gál kúfach gaa yíéđianká muuniny, Waag he Waag gál luogolká. It tág hééllá ˈdeeneyche! muí yie.

²⁸Aalé gál nyatalaamká mú tikiˈd ká yimieká, gál hol ki fafalmeká ˈdeenyle nee koy. Yíésu gáál hát ˈdabaanká ˈdéé hol ˈdú naʼ argeká, mu Yíésu yiete, kieye, Hemuumurit Waag hí Móshe ka shiichééllá, hemurit máre hí met iđa? yie.

²⁹Aalé Yíésu mú ˈdéé hol ˈdú nie, kieye, Hemurit súm hí met iđoká hééllá: Gál Yisirayel, nee kóo, Máá Guđo Waag kúnnaaká tákámlé ká Guđo.

³⁰Máá Guđo Waag kuaká geerkú lulle ki géélneb, hodhinkú lulle ki géélneb, tawunykú lulle ki géélneb ubaa fargogintkú lulle ki géélneb,[30]

³¹hemuritlé ki naamaká kieye, Máá olkú hát kúún dhúrkú hol gielallá úba géélnebo he chie.[31] Hemuumurit naamáállá hé hemuumurit éíy taaka hí met iđoká mán, Yíésu hí yie.

³²Aalé máá giriká Yíésu geey, kieye, Máá gáál he oonisúóllo, kó tág hé ˈdúwaká hote, hát káána kieye, Waag tikiˈde, Waag éíy taaka hé mán, chíéllá.

³³Máádhat he Waag geerle, ubaa tawunyle, tá fargogintle lulle ki geelnedhe-, ubaa máá olle hát íín tuuˈdle hol gielallá geelnedheka, hé kinaallá hé suor ke Waag ki ˈdunmayoká ubaa suor ke Waag ki ˈgaˈgaloká lulle a mé ˈgite, muí yie.

³⁴Yíésu mu ˈdéé hát ˈdaalimoká hol ká nie-, argeká mú geey, kieye, Kúún kó Guch Waaˈgiet ma gaa faganany, yie. Aalé gaal hé máá níínní geđi úba Yíésu yieteká mán.

³⁵Aalé Yíésu ˈBíl Waaˈgiet gáál he gaa oonisieká gáál yiete, kieye, Háteka gál nyatalaamká kieye, Máá Waag hí kansím koyye-, Messíya lééllá he Iny ˈDawuˈd,[32] yegíel?

³⁶ˈDáwuˈd af giri Hím Naasan Waaˈgiet hí ˈdéé ka shigicheká tuuˈdle kieye, Máá Guđo Waag hé Máá chia Guđoká geey, mu kieye, ˈDaab gál ko ka kídhká yú ko ˈgas gim ma fíinyká, ye gíl ˈdaa naanietallá yíéđig, he mú yie,[33] ˈDáwuˈd hí yie.

³⁷ˈDáwuˈd tuuˈdle in Messíya Máá chia Guđoká yeedhe háluke, tá Messíya háte geđi mú inylé? Yíésu hí yie. Aalé nyésébích giri Yíésu af nee kokoyká mú ˈdeenylé kinaal hí geer gaa meey.

³⁸Aalé Yíésu gáál he oonisieká kieye, Gál nyatalaam halúg đafaraam ˈdeˈdier les đigká fafaat-, gálaat in gaa muurshaw-, tá gaalí alb hoyyoká naa gaa yegetká fedóóllá, hol ˈdeeˈdemíe.

³⁹Gaal ény ˈdiiyiminyká ubaa alb he koonyietká karmlé giri gál ˈduuˈdúwaká hí ˈdú yíéđianká fede.

⁴⁰Gaal ˈdeg híyeská tagano ki ˈdeˈdeme, Waag visan met ˈdeˈdierká gálaat met gaa vivita. Gálallá súmo Waag hí hé il ká aargisicha, yie.

⁴¹Yíésu ˈBíl Waaˈgiet gaa ijeká, ál gaalí bíre fafieká láá yíéđie. Gál sanˈdúg bíre fafieká dhaay. Gál burnay-, kaamúreká birm iigilishká ali fie.

⁴²Aalé min he mán-, hiyesidhe mare bakanállé naama ˈgayyeká ali fiiyye.

⁴³Yíésu lalille ká vie, kieye, Yú hí hé ˈdúwaká geeye, min he mán-, hiyesidhééllá hé ali fiiyyeká hé gálallá hí ali fieká lulle ˈdú guđo.

⁴⁴Gálallá hé ali fieká, hé guđoká hí kí ˈgite. Minnééllá íín héllé ninni-, les ki iđeká lullé ali fiiyye, muí yie.