Read daasanach Márko 15 Bible Online

Márko 15 - daasanach bible

Márko 15

¹Bur biiy hátlé ka biˈdeká gál guguđo-, suoryoká ubaa gál káruká, tá gál nyatalaamká ubaa ar ˈdeem mumuˈdoká lulle hol ˈdéé af gáá maale. Gaal Yíésu gil hiigidhe, mú Bilááto ˈdú eey.

²Aalé Bilááto Yíésu yiete, kieye, Kúún in he kánsích gál Yuuˈdi? yie. Yíésu mú ˈdéé hol ˈdú nie, kieye, Hát kuuní hogotóóllá, yie.

³Gál guguđo-, suoryoká hé burnayká Yíésu af kaay.

⁴Bilááto geđi Yíésu heete, kieye, Bá dháash, ˈdeeny guđo-, gaalí ko ˈdú ˈdeentééllá, kó ˈdeeny hol gáá nanniyyoká mân? yie.

⁵Yíésu hé ˈdeeny hol nieká mán. Bilááto mú shab yeenléél af ˈdabe.

⁶Warram lulle ˈjila máá ˈgasso-, urru-, Waaˈgietká hí gáál ˈdug gaa nadheká ali kí ˈdiiyyeka, Bilááto nyátálleka gál gaalí hiigidheká tá máá gaalí fedoká đo gáál hai kí fuura.

⁷Aalé gál gál les met ki ˈgieká ˈjegeduoká fedo-, gaalí hiigidhe mare, mú tikiˈd meenyle Baráábas. Gál kinaallá he gál af giri oos ali kí ˈdiiyyeká gálaat yieská.

⁸Aalé nyesebich Bilááto ˈdú sedhe, mú ruogone, kieye, Nyí hát kua aađaká kog, yie.

⁹Bilááto gáál heete, kieye, Máá Kansich Yisirayelká hí kí fuuroká hí féˈde? yie.

¹⁰Hé muí hatallá ki yieká, he ˈdaa giri muí óg, gál guguđo-, suoryoká hinaaf Yiesu hí faanne-, Yíésu mú ˈdú gáá eeyká.

¹¹Gál guguđo-, suoryoká nyesebich ˈdéé af gaa koy, giri Baráábas Bilááto hí ka fuuroká.

¹²Bilááto geđi gáál heete, kieye, Tá máá hí Kánsích Yisirayel chegetéél íín háte yú kokoo hí feˈde? yie.

¹³Gaal lulle geđi kúóˈd ˈdoy, kieye, Mú ˈgór đarám yaalká ˈdug ˈdú yiesíe! gaalí yie.

¹⁴Aalé Bilááto geđi gáál heete, kieye, Háteka? Mu meete ˈdeeney? yie. Gál giriká geđi súm kúóˈd ˈdoy, kieye, Mú ˈgór đarám yaalká ˈdug ˈdú yiesíe! yie.

¹⁵Aalé Bilááto nyesebich ˈdéé ki aabunayoká fede, mu gáál Baráábas ki fure. Aalé mu yuoyle ˈdéé ki mure, giri gaal Yíésu anakoto gaalí sibilaam met ki higidheká ki tuunoká. Yíésu yuoy hí tunneká, Bilááto geđi yuoy geey, giri Yíésu egeet-, mú ˈgór đarám yaalká ˈdug ˈdú ˈdaraannoká.

¹⁶Aalé yuoy Yíésu ˈbíl ushumba gaalí baratórian yegetká náble eeyye. [42] Ál kinaal yuoy yuoyléétí hol ˈdu gáá viiyye,

¹⁷gaal Yíésu đafar búr korbiso mare kaay. Aalé gaal ˈgór híí ˈguo mare shóte tág gaa nie, mú mé kaay.

¹⁸Gaal mú naa yiegie, Kó ˈdúwa-, Kánsích Yuuˈdííllo! gaalí mu yiegie.

¹⁹Gaal mú mé ˈgulint ki tune, mú sillam ˈdú faafie, mú ˈgas met les kurram gaa ˈdoy.

²⁰Aalé gaal mú eesheny hí gaa đuyyeká, mú đafar búr korbidheká kaayká gaa fure, mú đafaraamle geđi fie, giri mú egeet-, mú ˈgór đarám yaalká ˈdú ˈdaraanká.

²¹Aalé gaal máá forich gáá yiimie-, ál kinaal ká nadhe-, gaalí Símon yeget mare he ˈdú moy, giri mu Yíésu ˈgórlé đarám yaalká ˈgar egeetká. Máá kinaallá he máá lés Kurene, Alekesánda ubaa Rúúfus ˈjaallé.

²²Aalé gaal Yíésu Ál Golgota ˈdú eedhdhe. Ál Golgota hélle kieye, Ál Me ˈGonte.

²³Aalé gaal ˈduuny vinna-, gaalí henyit hol fieká Yíésu shie, ˈduuny kinaal muí điidhe.

²⁴Aalé gaal mú ˈgór đarám yaalká ˈdú ˈdoy, ˈgór ali koy. Aalé gaal hol koiy ki ˈdoy,[43] giri mú đafaraamle eiy shugunatká.

²⁵Gaal mú ˈgór đarám yaalká ˈdú ˈdarameká, hé kinaallá he aadh ˈgas seđe burroká.

²⁶Yíésu hé gaalí ˈdú ˈgiliˈgay-, gaalí ˈgór ˈdug gaa veereká kieye,KANSICH YUUˈDI.

²⁷Gál éíy taaka-, naama-, buraallé mare úba gaalí ˈguor đarám ˈgieká ˈdú ˈdane. Mú tikiˈd gaalí Yíésu gíl ˈdaa naaniet koy, máátí gaalí mú gíl ˈdaa ˈjíbach koy. [

²⁸[44] ]

²⁹Aalé gál ál kinaal ka nanadheká mú chaachare, met gaa muotie, kieye, Kúbu! Kuun he máá hol ˈdabe-, ˈBíl Waaˈgiet ˈgieˈgie-, tá ˈBíl aadh seđ gaa ˈdiˈdiseká muunîny?

³⁰ˈDaa! Ebá káána hol rig, hol ˈgór đarám yaal kinaallá gáá léésish! gaalí mú yiegie.

³¹Hát tikiˈdééllá úba gál guguđo-, suoryoká ubaa gál nyatalaamká hol geey, Yíésu eeshey, kieye, Mu gál eiy riríme, tá íín har káána hol má ririana!

³²Ebá Messíya Kánsích Yisirayelallá hí ˈgór đarám yaallallá úr gáá leedho, kí il ki argo, tá kí iiy yeet, gaalí yie. Gál giri gaalí ˈguor đarám ˈgieká ki ˈdaneká úba mú chaachare.

³³Aalé aadh ˈgas le kulichká ˈdoyyeká biiy lulle đo chuurayye, ˈjíig aadh ˈgas saal đig.

³⁴Aadh ˈgas saal ˈdoyyeká Yíésu af gaa guđoká ki buoy, Eloi, Eloi, lema sabak-dháni? yie. Hé kinaallá hélle kieye, Waagchú, Waagchú, háteka ye haychéel?[45]

³⁵Gál ál kinaal ˈgieká ˈdáá tikiˈd héél maaleká kieye, Ebá dhaayyíe, máá giriká Elíya veveme, hol yie.

³⁶Mú tikiˈd ˈdodhdhe, đafar ˈduuny bírigká ki tie, tá ˈgul mé ki ˈdane, Yíésu ki helie, giri muí ˈbuusatká. Máá kinaal kieye, Ebá kí mú hayo, mú kí ká dhaayo, Elíya har ká yiimet-, mú ˈgór gáá lelesuoka, yie.

³⁷Aalé Yíésu af gaa guđoká kúóˈd ki ˈdoy, đo sidh hí ˈgite.

³⁸Aalé đafar ˈBíl Waaˈgiet-, ˈbíllé geereká af gaa tielká eiy lođuđugul fuate, mé đig, el đig.

³⁹Máá yuoy kúˈd mé ki yiel mare Yíésu bala kí ˈdie. Mu Yíésu yaalmit he kufumeká argeká kieye, Hé ˈduwa, máállá gon he Iny Waaˈgiet, yie.

⁴⁰Ál kinaal úba hé gál ˈdiet Yíésu dhaˈgame-, tagéétí ˈgie mare hí ˈgie. Gál ˈdíét kinaal mú tikiˈd María Magaˈdalaká, mú tikiˈd María giri Yákob ninniká ubaa Yoséítos ˈjielléká, mú tikiˈd Salóme.

⁴¹Gál ˈdíétallá Yíésu Galilááya gaa ijeká ííni mú ˈgar seseme, mú golmie. Gál ˈdiet éíy burnay-, mú hol Yerúsalem ˈgar ka yimieká úba hé ál kinaallá gaa ije.

⁴²Kúlích kinaallá he kúlích gaalí shokodaam hol met tág gaa nannuo-, bííylé ka biiˈdoká Kúlích Hef ˈGisanká.

⁴³Aadh gaanateká máá ˈjien Arimataya-, gaalí Yúósef yegie-, gál arráká máállé ˈdúwa-, Guch Waaˈgiet ka chiimetoká úba met egeseká ká yimie. Máá kinaallá hát sierm mantiká Bilááto ˈdú sedhe, mú gón Yiesu ruogone.

⁴⁴Bilááto Yíésu hát đo kufeká, af ˈdabe. Aalé mu máá giri yuoy kúˈd mé ki yielká ká vie, tá mú heete, Yíésu har kín kufeka.

⁴⁵Bilááto máá kinaal hí fayám shie. Aalé Bilááto Yíésu kúfáchle ˈdúúw maaleká Yúósef geey, giri mu Yíésu gónle egeetká.

⁴⁶Aalé Yúósef đafaraam édh-, ka hidhdheká Yíésu ˈgór úr gáá leesie, mú đafaraam kinaal ki ˈdane, mú liish waariet-, kis gaalí ˈgodhe mare ki galie. Mu nyátáábá gaalgalsie, liish af gaa koy.

⁴⁷María Magaˈdalaká ubaa María giri Yoséítos ˈjielléká ál gaalí Yíésu gaa kaayká arge.