Read daasanach Márko 16 Bible Online

Márko 16 - daasanach bible

Márko 16

¹Gélgá giri Kúlích Hef ˈGisanká hí gaa ˈgiteká María Magaˈdalaká ubaa María giri Yákob ˈjielléká, tá Salóme sáláb usiyyoká hidhdhe, giri gaal seseen-, Yíésu salab shugudmuoká.

²Aalé rám tiiyaká kúlíchlé erká bííylé ka biˈdeká aadh gulum yé ki ˈdiiyyeká ˈdeg giriká uushich álle siete.

³ˈDég ˈgíéríchlé gaa igiˈdeká hol heesete, kieye, Mááya gáál nyátáábá gaalí uushich af gaa koyal gáál kí gaalgalsia? chie.

⁴ˈDég fuˈjiyyeká uushich nyátáábá afka mán. Nyátáábá kinaallá hé tág guđo, kor nyátáábá uushich af tól ki ija!

⁵ˈDég uushich hilleká, máá ruorich đafar édhká kaadhdheká hí gíl ˈdaa naaniet ija, ˈdég birgiyye.

⁶Aalé máá ruorich kinaal ˈdég geey, kieye, Haí bírginy! Yíésu Nasaret-, gaalí ˈgór đarám yaalká ˈdú yies-, hí ˈdu gáá chimieká hé állá gaa láʼ. Mú hé Waag hí loolnoyche, uushich yé gaa ˈdie. Ebá ál gaalí mú iifieká dhaayyíe.

⁷Sedhíe, mú lalille ubaa Bétiro geeyyíe, Yíésu met haí naadha, Galilááya hai seeme. Mu hát hí geeyká ál kinaallá hollo hí hol gaa aargiˈda, yiedhíe, Máá giri ruorichká hí yie.

⁸ˈDég birgiyye, fađanne, uushich álle gaa ˈdoˈdoote, ˈdaa giri ki birgiyyeká hé máá níínní geeycheká mán.

⁹[Rám tiiyaká kúlíchlé erká bííy ka biˈde-, Yíésu uushich yé gáá ˈdieká, María Magaˈdala-, giri muí aryaan tiiyaká yé gaa ˈdeeyká er mú hol af kí ˈdie.

¹⁰Aalé María kinaal Yíésu gállé hol ˈgar sesemeká ˈdú siete. Gáál af kí ˈdiiyyeká gáál ger hí gaa ˈdeenédhe, gaal bebime. Aalé gáál fayám shiiche.

¹¹Gaal ˈdéé maale-, Yíésu geđi lúol yáá arge, María hí chieká, gaal mú ˈdeenyle điidhe.

¹²Hééllá el ˈdaal Yíésu yaalmit eiy kaadhdhe, gállé ˈgierich gaa igire-, naama mare yé ˈdu gáá ˈdie.

¹³Gál kinaal úba sedhe, mú gálléétí geey. Gaal kinaal ˈdeenyle úba điidhe.

¹⁴Waaséél Yíésu lalillé tomon a takachká hátlé golmoteká Yíésu hí yé ˈdu gáá ˈdie. ˈDaa giri gaal gál kieye, Yíésu hé uushich yé gáá ˈdie, nyáá nyí argiyye, yieká af iiy ma yéen-, met googonoyká in Yíésu hí ki lole.

¹⁵Aalé Yíésu gáál geey, kieye, Les lúl gaa sedhíe, gálaat lulle Fayam chia Midhaballá ki ˈdiiyimíe.

¹⁶Máá ye iiy yeet-, gaalí bie gim nuoká rubach hai aargira. Tá máá ye iiy ma yéenká kúlích Waag gálaat hol eiy gaa nanniyyoká hé ˈdeewká il haí aargiˈda.

¹⁷Gál ye iiy yieká hé gaalí af ˈdaˈdabóóllá hé hol ˈguo: ˈDaa meenychúka gaal gálaat aryáán yé hai gaa ˈdeđia. Gaal af he muogká ˈdéé hai ki hogodho.

¹⁸Gaal chár gíl hai ki chiiˈda. Gaal hé gálaat yegeská ˈjieka, hé kinaallá úba hé hát hí kokuoká mán. Gaal gál basham ˈguoká gil ˈdú fieka, gálaat đo hai bie, muí yie.

¹⁹Aalé Máá Guđo Yíésu gáál ˈdeenyéél geeyká đo Waag hí eete, úr mé nie, Waag gíl ˈdaallé naanietká yíéđie.

²⁰Aalé Yíésu lalille kie, les lúl gaa sedhe, gálaat Fayam Midhab Yiesúúllá shie. Máá Guđo Yíésu úba hé gáál hol hujich ˈgar nannie. Gaal gálaat ki ˈdiiyimeká gálaat hé hé gaalí af ˈdaˈdaboká úba il ki arge. Hatallá in Yíésu fayamlééllá hát ˈdúwaká gálaat argisie.][46]