Read daasanach Márko 2 Bible Online

Márko 2 - daasanach bible

Márko 2

¹Waaséél Yíésu geđi Kafarnáum hol ˈdú nadhe. Mú é ki ˈjímle fayamle ˈjien eiy ki bash chie.

²Gál burnayká hol ˈdu gáá yimie, ˈbíl hile, hol kar rie, ˈbíl af ˈdú tuutume, ˈjíig ˈbíl af đig yie.

³Yíésu hátlé gáál ˈdeeny Waaˈgiet oonisieká gál afur mare máá héljoká mú ˈdu gáá eey.

⁴Nyesebich aalé ˈbíl af ˈdú tuutumeká mú ál gaalí kí naat-, gaalí Yíésu ˈdu gáá eewká mán. Gaal đo ˈbíl mé hurt ađuđugul giri Yíésu hí ki yielká il gaa veere, mu hátlé lokoˈd gaa iifeká mú ál kinaal kí leesie.

⁵Yíésu hát gálal hí iiy yieká argeká máá giri héljoká geey, kieye, Inychú, ađaabanokú yáá ko gaa eey, yie.

⁶Gál nyatalaam ál kinaal ijeká tawue, kieye,

⁷Máállá háte ˈdeenyéél hí af yé gáá ˈdie? E mu Waag chaara! Waag tákáma gálaat ađaabano gaa egeyye, gaalí yie.

⁸Yíésu hé gaalí táb ˈdoˈdodheká gáál ger ki shuunne. Aalé đo gáál geey, Háteka hí hééllá ger ki taawuyyáal?

⁹Hé máre súm hawul man ki máállá geđia? Hé kua ˈdeđew-, ekeycheká ađaabanolle yáá ko gaa eeyyo, yú yeedhee? Ebá les gaa keʼ, lokoˈdkú éew, sí gal, yú yeedhe?

¹⁰Aaléka, yáá Iny Máádhátallá hát kansim yáálle lésalláka gálaat ađaabano gaa egewká ˈguoká dhaayyíe, muí gáál yie. Aalé mu máá giri héljoká geey, kieye,

¹¹Ha yú ko geey, les gaa keʼ, lokoˈdkú éew, gal! yie.

¹²Gaal hátlé mú gaa dhaˈgameká mu đo les gaa kie, lokoˈdle eedhdhe, ényle mé nie. Gaal lulle héél af ˈdabe, kor Waag meey, kieye, Hé hatalóóllá hé kálta ke ma árginy! yie.

¹³Aalé Yíésu ál kinaal gaa kie, geđi bás in nadhe. Nyésébích guđoká mú ˈdú sedhe, mu gáál he onisie.

¹⁴Aalé mu hátlé ˈgierich gaa igireká máá gibíre gugusat-, gaalí Lévi yeget-, iny Alfus mare ˈbíl gibireká gaa ija arge. Aalé Yíésu mú geey, kieye, Ye el gáá véer! yie. Lévi les gaa kie, đo mú el gaa veere.

¹⁵Waaséél Yíésu hátlé ˈbíl Levi gaa golmoteká gál gibíre gugusatká ubaa gál ađaabano ˈguoká úba ˈbíl ká hile, Yíésu ubaa lalille hol ˈgar gololte. Gál burnay hat kinaalloká úba mú el gaa veere.

¹⁶Aalé gál Farisaay [3] nyatalaamká héél argeká Yíésu lalille heete, kieye, Háteka máá kíchiallá gál gibíre gugusatká ubaa gál ađaabano ˈguoká hol ˈgar golmosotal? yie.

¹⁷Aalé Yíésu héél maaleká gáál geey, kieye, Gál fayyáká hé gilóny ma fediny, gál basham ˈguoká in gilóny fede. Yú ka yimíéllá, yáá gál ađaabano mánká ma ka ˈgíen, yú gál ađaabano ˈguoká ká ˈgiedhe, yie.

¹⁸Bar mé tikiˈd Yuána lalille ubaa gál Farisaayká af hite. Gálaat ká yimie, Yíésu heete, kieye, Háteka Yuána lalille ubaa gál Farisaayká lalille af higisat-, lalikú íín af ma higisanal? yie.

¹⁹Yíésu gáál ˈdéé hol ˈdú nie, kieye, Háte máá eedhdhe-, shien yieská dheegle af higisata, kor mu íín gáál hol af ija? Hé hát kinaallá muuniny. Máá eedhdhe kinaal ubaa dheegle hol af ijoka, hé af ma higisan.

²⁰Kulich íín ali hai kí ˈdeenne, giri máá eedhdhe kinaal Waag hí gálaat hurt gaa egeetoká. Af kinaallá in gaal af higita.

²¹Hé máá níínní đafar káánaká toort gáá muuro-, toort đafar guđanteká ki ˈdaraanká mán. Har muí hát kinaal koyka, toort giri kaanaká đo đafar guđanteká hai gaa ˈgite, đafar đo súm hai ˈgiˈgite.

²²Hé máá níínní ˈduuny vinna kaana-, hátle ma kárinyká orgom guguđandheká fafuoká mán. Har gaalí hát kinaal koyka, ˈduu he kareka, orgom đo eiyyo fufuadhe, orgom ubaa ˈduunyle đo hai ˈdeenedhe. Hé hát kinaallá muuniny, ˈduuny vinna kaanaká orgomlé kaanaká gaalí fafaa, muí yie.

²³Kúlích Hef ˈGisanká tikiˈd Yíésu ubaa lalille lés siindi mare hurt gáá nadhe. Mú lalille ˈgíéríchlé gaa igireká sííndí met af ki ˈgieˈgite.

²⁴Gál Farisaayká Yíésu heete, kieye, Bá dháash! Háteka gálal Kúlích Hef ˈGisanká hé nyátálkúnnoka ki ma ekemenyká ekeyal? yie.

²⁵Yíésu gáál ˈdéé hol ˈdú nie, kieye, It hé ˈDáwuˈd af giri ubaa sheelle ger hí gaa boloyká hí ekeyká Warˈgat Waaˈgiet ma gaa túony,

²⁶giri mu af giri Abiadhar máá méte suoryoká onnoyká ˈBíl Waaˈgiet náble hile-, balasha gaalí Waag taak ki iđie-, nyátálka gál suoryoká tákámle hí kokuoká koey-, tá sheelle úba shieká? muí yie.

²⁷Yíésu geđi gáál geey, kieye, Kúlích Hef ˈGisanká gálaato ki midhínta, in Waag hí taak koyye. Kúlích kinaallá íín hé gálaat ma ˈdú midhanany.

²⁸ˈDaa kinaallá ˈdugaka in Iny Máádhat Kúlích Hef ˈGisanká guchle ˈgaa, muí yie.