Read daasanach Márko 3 Bible Online

Márko 3 - daasanach bible

Márko 3

¹Aalé Yíésu geđi ˈbíl ˈdiiyiminyká hile. ˈBíl kinaal geerle máá gil hí ki kiite-, gíl gáá héljo mare hí gaa ije.

²Gáál mé tikiˈd gál Yíésu hem gaa sisidhoká fedo mare úba ál kinaal gaa ije. Gaal aalé Yíésu ˈdeey, mu har Kúlích Hef ˈGisanká máá gíl ˈdeew kinaal gaa biisuoka.

³Yíésu máá gíl ˈdeew kinaal geey, kieye, Le gaa keʼ, biiy metééllá káde, yie.

⁴Aalé Yíésu gáál heete, kieye, Hemuumurit Waaˈgietka, meete ke Kúlích Hef ˈGisanká gaa ekemeye? He in hé midhabká ke ekemeyee? Ebá, hé ˈdeewká ke ekemeye? Máádhat ki biisuoká kalatoo? Ebá, máádhat ki yegeská kalat? yie. Gál giriká hé ˈdéé ma hôn, đo shab yie.

⁵Mu hát idhoká gáál ki fuˈjie, kor gáál met guogintléél hí geer gaa ˈdeeneyche. Mu máá giriká geey, kieye, Gíl fat, yie. Máá giriká gíl fadhe, đo gil hí midhandhe.

⁶Gál Farisaay kinaal đo baaˈd yé ki ˈdie, gaal ubaa gál Heroˈdeká ˈgíérích he Yíésu ki yegeská hol gaa ˈgeˈgedhe.

⁷Aalé Yíésu ubaa lalille kie, bás in mé nie. Nyésébích guđoká Galilááya gáá kie, mú el gaa veere.

⁸Gál éíy ilishká hé muí ekeyká maaleká úba mú ˈdu gáá yimie. Gaal lés Yuuˈdia ubaa ˈjien Yerusalem, tá lés Iđumaya ubaa wár Yorˈdan ílung ˈdaatí gáá kie. ˈJien Turo ubaa ˈjien Siˈdon gál hí innumle gaa ije mare úba Yíésu ˈdu gáá yimie.

⁹Aalé Yíésu lalille geey, kieye, Ye kadich bala ka kóo, kadich gaa yíéđia, nyesebich hai ye ˈdu gáá tuutúminy, yie.

¹⁰Mu gál burnayká bisie, gál basham ˈguoká lulle mú ˈdú tuutume, giri mú đig yegetká.

¹¹Bar lulle aryaan ˈdeđewká Yíésu argiyyeka, mú ˈgas met les hai gaa ˈdanne, kúóˈd hai ˈdoyye, kieye, Kúún he Iny Waaˈgiet! hai chie.

¹²Tá Yíésu aryáán ˈdéé ki mure, giri aryáán mú biiy ma mamalsinyká!

¹³Aalé Yíésu gúm feˈjie, mu gállé fedeká vie, gaal mú ˈdú sedhe.

¹⁴Gáál tomon a naam muí waaˈde, giri mú hol ˈguo-, tá muí alb fafuo-, mú fayamle hol gaa sisidhoká.

¹⁵Gáál muí fargogint gálaat aryáán yé ki ˈdeđuoká shie.

¹⁶Gál tomon a naama muí waaˈdeká meetle hééllá: Símon muí meeny Bétiro léká shie.

¹⁷Yákob iny Dhebeˈdayaká ubaa nyárlé Yuána, hullaalle meenylé muí shieká Bonéˈges. (Bonéˈges hélle kieye, hele ˈgeˈgete.)

¹⁸Tá gálatí he mú Ánˈduru, Fílib, Bartolomáyo, Matááyo, Tómas, Yákob giri iny Alfaayaká, Dhádias, tá Símon giri gálaat ˈjegeduoká,

¹⁹héétí Yúúˈdas Iskáryot máá waaséél Yíésu gál hí oos ˈgieká ˈdú eeyká.

²⁰Waaséél Yíésu ˈbíl hile. Nyésébích ilishká geđi hí ˈdu gáá yimie, mu ubaa lalille ál ki gololsotká úba ˈdabe.

²¹Aalé mú gálle héél maaleká kie, mú ˈgiedhe, Mú sigíre hí faanne? yie.

²²Aalé gál gálaat nyatalaam oonisuo-, Yerúsalem gáá yimie mare kieye, Mu Belsebul[4] giri aryáán kánsích léká ˈgaa, in fargogintle aryáán yiem ki ˈdeđia, gaalí yie.

²³Aalé ál kinaal Yíésu gáál vie, gáál he onisie, kieye, Sátan háteeye hol ali gaa aruanna?

²⁴Les gálle hol af ká điidhe-, hol tuutuneka, hé hol af ma chochony.

²⁵Héétí ˈbíl geer tikiˈde-, hol ki ˈdalaateká hol tuutunneka, đo eiyyo hol gaa galle.

²⁶Hát tikiˈdééllá Sátan tákámle hol gaa maamaˈde-, tá ubaa gálle hol af ká điidheka, Sátan đo me haí ˈgidhe.

²⁷Hé máá níínní ˈbíl máá fargogoká higilo-, shokodaam gaa ugunanká mán. Har gaal mú er hiigidheka, in tákáma mú shokodaamle ugunma.

²⁸Yú hí hé ˈdúwaká geeye, gálaat héllé ˈdeđew ekemeyo-, hát káána ađááb yíekaʼ, chaarim he hol chacharoká yíekaʼ, lulle Waag haí haađicha.

²⁹Tá máá Hím Naasan Waaˈgiet chaaroká ađaablé kinaallá hé Waag hí ma haađiny, ađaab kinaallá taalle bííyyo máálle haí ˈgaa, muí yie.

³⁰Yíésu hatallá yíéllá, he ˈdaa giri gaal kieye, Mu aryaan ˈdeewká he ˈgaa, gaalí yieká.

³¹Yíésu ˈjielle ubaa nyaaramle ká yimie, baaˈd kí ˈdie, mú gáál ali ˈdú fie, Mú nyí kí vée, yie.

³²Nyésébích guđo mú ki madeká mú geey, kieye, ˈJiekú ubaa nyaaramkú baaˈd ˈgee, ko hol gaa ˈgeˈgedhe, yie.

³³Aalé Yíésu gáál ˈdéé hol ˈdú nie, kieye, ˈJiechú ubaa nyaaramchú he gálya? yie.

³⁴Aalé mu gál hí ˈdinnam lulle ijeká ki fuˈjie, kieye, Bá dhaayyíe, ˈjiechú ubaa nyaaramchú he gál ye af nee kokúóllá.

³⁵Máá hé Waag hí feˈdoká ekemeyoká in nyárchú, nyaarchú, ˈjiechú, Yíésu hí yie.