Read daasanach Márko 4 Bible Online

Márko 4 - daasanach bible

Márko 4

¹Yíésu aadh eiy geđi gálaat bás in he gaa onisie. Nyésébích guđoká mú ki made, mu kádích bás gaa yielká hile, gaa yíéđie. Gálaat íín ílung yíéđie.

²Mu hé burnayká hát hibietká gáál onisie. Hibano muí gáál onisieká híb tikiˈd hééllá. Mu kieye,

³Nee kóo! Máá les fafuoká áár eedhdhe, les sedhe.

⁴Áár hátlé giri fafieká áár ˈdáá tikiˈd ˈgierich af ki okoˈde, hurum ká yimie, hí koey.

⁵Áár ˈdáá tikiˈd ál waaro-, eeˈd hí iraam mánká ki okoˈde, đo ál ˈjob hirich hí yé gáá ˈdie.

⁶Aadh ka ˈjiiyyeká hirís đo boloyye, ˈdaa giri hidh les ma ki arînyká.

⁷Áár ˈdáá tikiˈd ál híí ˈgayyoká les gaa ˈdane, hirís hí yé ká ˈdiiyyeká hiris kinaal hii hí bolosie, hé ma ˈdáliny.

⁸Ár giri muí ál maal hí midhabká gaa fieká ká ˈdie, hisse, ˈbaal hí tomon seđ ˈdale, ˈbaal hí tomon le ˈdale, ˈbaal hí kúˈd ˈdale, Yíésu hí yie.

⁹Aalé mu gáál geey, kieye, Máá nee ˈguoká hí hééllá maalo, yie.

¹⁰Yíésu tákámle onnoyká gál giri mú hol ˈgieká ubaa mú lalillé tomon a naamaká mú hibano giriká hélle heete.

¹¹Mu gáál geey, Itíni in hé geer geđi Guch Waaˈgietká Waag hí argisiche. Tá gál baaˈd ˈgíétíá in yú he lulle hát hibietká geđia.

¹²Hibano yú gáál geđúóllá, Gaalí dhaaˈgasan, kor ha gaalí kimísan. Gaalí maamalo, kor ha gaalí tág mááliny. Hát kinaal muuninyka, gaal Waag hollo hol ˈdu gáá naadha, Waag ađááb yé haí gaa ˈdeđicha,[5] muí yie.

¹³Aalé Yíésu gáál heete, kieye, Hibéél ití tág ma mááliny? Hibéél hí ma maalinyka, hib eiy háte hí kiimisata? yie.

¹⁴Aalé Yíésu gáál híb hélle geey, kieye, Máá les fafuoká hát máá ˈdeeny Waaˈgiet gálaat oonisuoká. Aar he ˈdeeny Waaˈgiet.

¹⁵Gáál ˈdáá tikiˈd yaalmit giri ˈdeeny Waaˈgiet ki mamaloká he hát ár ˈgierich af ki okoˈdeká. Gaal ˈdeeny Waaˈgiet maaleka, ál tikiˈde kinaal Sátan đo hai ká chimie, gáál ˈdéé hai gaa bađisiche.

¹⁶Yaalmit gáál ˈdáá tikiˈd hí ˈdeeny Waaˈgiet ki mamaloká he hát ár ál waaroká ki okoˈdeká. Gaal ˈdeeny Waaˈgiet maaleka, ˈdéé hát geer gaa meentiká iiy hai yie, kor gáál hé ˈdee hí hát ˈdabaanká ger ma híliny.

¹⁷Aalé gaal hé ˈdeeny Waaˈgiet ˈjíig ma ki yíéđiminy. ˈDeeny Waaˈgiet ˈdugaka, gaal hé ˈdeđewká ubaa manyjasiny il ki argeka, ál ˈjób kinaal gaal đo hai ginnay, ˈdéé gíl sug hai ki hay.

¹⁸Yaalmit gáál ˈdáá tikiˈd hí ˈdeeny Waaˈgiet ki mamaloká he hát ár ál híí ˈgayyoká les gaa ˈdaneká. Gaal ˈdeeny Waaˈgiet hai maale,

¹⁹kor gáál tawuny lesalloká haí ká hille, gáál kamur lesalloká haí laate, gaal hé burnayká he fede. Hát ˈguor híí ˈguo-, hirís bolosíélláka, hééllá lulle gálaat ger hileka, in gaal ˈdéé nee ma kokony, hát Waag hí feˈdoká el ma gaa igiriny.

²⁰Yaalmit gáál ˈdáá tikiˈd hí ˈdeeny Waaˈgiet ki mamaloká he hát ár máá les fafuoká hí máál álle gaa fieká. Gál kinaallá ˈdeeny Waaˈgiet maaleka ˈdéé iiy hai yie. ˈDee gáál hát ˈdabaanká ger hileka gaal đo hát ˈguom hát ˈdabaanká hite-, ˈguom mé tikiˈd hí tomon seđe-, mé tikiˈd hí tomon le-, mé tikiˈd hí kúˈdká hai yie, Yíésu hí yie.

²¹Yíésu geđi gáál geey, kieye, Nyátáá gaalí ˈjiet gaa iđieka, hé máá níínní hí ˈdébé af bubuoká mán, ubaa hí kúb geer gaa iđimuoká mán. Nyátáá hé gaalí úr ma ki ređîny, ˈbíl geer hí ma gaa eedhêny?

²²Hé gaalí kakawká yé hai ká ˈdeeme, hé shuolitiká gálaat haí aargira.

²³Máá nee ˈguoká hí hééllá maalo, Yíésu hí gáál yie.

²⁴Aalé mu geđi gáál geey, kieye, Hé hí maallééllá hát ˈdabaanká nee kóo. Hé hí he ki ekemeycho-, hí gálaat he ki fafiyyoká, in úba Waag hí he kí fafiyya, hé kinaallá hé eiy úba haí ˈdú aargiˈda.

²⁵Máá hé gaalí gíl geer gaa kaayká tág chiratká, hé éíy taaka úba ha gaalí shigia. Tá máá hé gaalí gíl geer gaa kaayká tág ma ki yaalinyká héllé gíl ká ˈguo kinaal ha gaalí gaa egedhdhe, muí yie.

²⁶Yíésu héél gáál geey, kieye, Guch Waaˈgiet hát lés urgúaka máádhat hí fieká.

²⁷Mu bar lulle kulich ubaa chúúrélle rafanan-, tá ka kekeenká, hirich hátlé yé ka ˈdeˈdeenká muí muogká.

²⁸Eeˈd tákámlé ˈguom higisicha. Er hirich yé ká ˈdee, aalé hai ˈdiiyye, ˈdalleka, hai ˈgileyye.

²⁹Waaséél hite-, muran hí ali kí ˈdiiyyeka, máálle faaˈd hai eedhdhe, haí muˈde, muí yie.

³⁰Aalé Yíésu geđi kieye, Guch Waaˈgiet hát meete ki yeedhe? Hib máre ke Guch Waaˈgiet ki ekemeye?

³¹Guch Waaˈgiet hát heert ninniká. Heert kinaallá hé arram lullé gaalí les gaa fafuoká heersamle ˈdú ninni.

³²Tá gaalí fieka, ˈgórle hé ˈguor lullé les gaa ˈgieká ˈdú guđo. Heert ninnííllá ˈgórle ˈdie-, kolm hí gaa fuufuadheka, gáchle đo kimír haí ˈdú galle-, é haí gaa ˈdisate, muí yie.

³³Mu hib burnayye-, hatalloká gáál geey. ˈDaab gaalí met ki chiiratká muí gáál ˈdeenyle ki onisie.

³⁴Mu hát hibietká tákáma gálaat he oonisie. Tá mu af giri ubaa lalille tákámle onnoyká he lulle gáál eiy ki nie.

³⁵Kúlích kinaallá gélgálle Yíésu lalille geey, kieye, Kí bás ílung ˈdaatí yé ki ˈdie, yie.

³⁶Gaal nyesebich hay, kádích Yíésu hí gaa ijeká ˈdeete. Kadis eiy úba gáál hol eedhdhe.

³⁷Aalé baran ká kiisate, huđum kadich geer faafame, kadich bie hí geer koch ká yie.

³⁸Yíésu íín kadich ello he iife, đafare mé ˈdú iđie, rafame. Aalé mú lalille hí ram gaa kiisie, kieye, Máá gáál he oonisúóllo, in ke kufuma háluke, hé ko geer gaa ˈdeew mân? mú yie.

³⁹Aalé Yíésu les gaa kieká waanich ali koy, huđum geey, kieye, Shab áat, ali ki ˈdé! yie. Waanich ali ki ˈdie, biiy đo ˈgidhiche.

⁴⁰Aalé mu lalille heete, kieye, Háteka hí seereyyéel? Ití ye iiy ma chéen? yie.

⁴¹Gáál sierm hí súm faanne, gaal hol heegete, kieye, Héél máá máre, máá waanich ubaa huđum hí af maalóol? gaalí yie.