Read daasanach Márko 5 Bible Online

Márko 5 - daasanach bible

Márko 5

¹Aalé gaal lés Gerasanno bás ílung ˈdaatí ki fame.

²Yíésu hátlé kadich gaa leedheká máá aryáán ˈguo mare ál gaalí gál kufeká ki ˈgoˈgodho-, liishó mare, yé gáá ˈdie, Yíésu hol met kí ˈdoy.

³Máá kinaallá liishó gaa ije. Hé máá níínní úba hí sibilaam ki ˈdanoká mán.

⁴Gálaat af burnayká mú sibilaam ˈgas ubaa gil ki ˈdane, kor mu sibilaam giri hí gil ki ˈgieká eiy ˈgieˈgite. Mu muulam ˈgas met ká ˈgieká tune, eiy ˈgieˈgie. Mú hé máá níínní hí ká mooyoká mán.

⁵Mu kulich ubaa chúúrélle ligisham giri uushimká he gaa ije, in gumano gaa feˈjime, koˈdam gaa ˈdaˈdie, hol waar ki mumure.

⁶Mu Yíésu bííy fag ká argeká mú agim ˈdodhdhe, mú met les kurram gaa ˈdoy,

⁷af súm úr ki eey, kieye, Yíésu Iny Waag Úr Iđóóllo, meete ke hol ká ˈgaa? ˈDaa meeny Waaˈgieto yú ko ki ruogone, ha ye manyjasîny! yie.

⁸Hé muí hatallá ki yíéllá, he ˈdaa giri Yíésu mú geđie-, Aryaan ˈdeewallo, máállá yé gaa ˈdé! yieká.

⁹Aalé Yíésu mú heete, kieye, Meenykú háteeye? yie. Máá giriká ˈdéé hol nie, kieye, Meenychú Nyesebich, ˈdaa giri nyí ki burnayyeká, yie.

¹⁰Aalé mu súm Yíésu ruogone, giri Yíésu aryáán lés kinaal ma gaa aruminyká.

¹¹Aalé síri ˈjobintlé kinaal golchom burnayká gaalí gaa ˈdeˈdeme.

¹²Aryaan ˈdeewallá Yíésu ruogonne, kieye, Nyí golchom ˈdú árig, nyí golchom hilla, chie.

¹³Yíésu aryáán ˈdéé met gaa eedhdhe. Aalé aryáán yíé ˈdiiyye, golchom giriká hille. Golchom lullé shíí naamaká síri gáá okoˈde, bás fame, ˈdiiđime, kufe.

¹⁴Aalé gál giri golchom ˈdeˈdemeká ˈdoˈdodhe, fayam kinaal ˈjien gálle ubaa gál lesam gaa ijeká geey. Gálaat hol ˈdu gáá yimie, he arge.

¹⁵Gaal Yíésu ˈdú sedhe. Gaal mú arge, mu ubaa máá aryaan nyesebichká ˈgieká hol af ija. Mu đafaraam fádhdhe, me hí mídhab! Gáál sierm hí faanne.

¹⁶Gál héél argeká gálaat fayám shie, máá aryáán ˈgieká ˈdeenyle tá ubaa golchom fayamle gáál geey.

¹⁷Gaal Yíésu ruogone, giri muí lésle gaa kekeenká.

¹⁸Yíésu kadich higileká máá giri aryáán hí yé gaa ˈdiiyyeká hí ruogone, giri mu taalle Yíésu hol egeetká.

¹⁹Tá Yíésu hé iiy ma yéen, mu mú geey, kieye, Ény gálkú sí, Máá Guđo Waag hát geer hí ko ˈdú gudhdhééllá ubaa hé midhab muí ko ki ekeyallá fayamle gáál shíish, Yíésu hí mú yie.

²⁰Máá giriká đo ali gaa sedhe, ˈjien ˈDekaboles mé nie. He lullé Yíésu hí ki ekeyká fayamle gálaat shie, gaal lulle he af ˈdabe.

²¹Aalé Yíésu geđi kadich hile-, bás ílung ˈdaatí yé ki ˈdieká nyésébích guđoká mú ˈdu gáá yimie, mú ki made. Mu íín bás innó he yiel.

²²ˈBíl ˈdiiyiminyká gállé kaansúoká tá máá gaalí Yáíras yeget mare ká yimie. Mu Yíésu argeká mú ˈgas met les gaa ˈdoy,

²³kieye, Ini chia ninni mare hé tág ayaˈgiyye. Ha yú ko ruogone, káde, ini gílkú ˈdug ˈdú íífish, hí biiyo, hí les ˈdug ˈdú yíéđiyyo, muí yie.

²⁴Aalé gaal hol eedhdhe, nyesebich mú el gaa veere. Gaal mú kuˈd ki yie, mú ki tame.

²⁵Ál kinaallá hé min warram tomon a naam fas hí gaa hegele mare úba hí gaa iđe.

²⁶Min kinaallá gil ony burnayyeká he gaa siete, tá hí gon bolosiche. Min héllé ˈgayyeká lulle gilóny hí gaa gusate. Tá min hé fuu á níínni mare ma chéen, min yaalmít geđi hí súm ˈdeenete.

²⁷Min Yíésu fayamle maalleká nyesebich hurt ká naate, mú sug kí ˈdiiyye, mú đafar đig chie.

²⁸Min hát he tawuyyeká kieye, Mú đafarle yú đig yieka, yú đo ha bie, chie.

²⁹Min mú đig chieká fás giri ˈjibimeká đo ali ki ˈdie, min hát he biiyyeká hol gónle ki shuunate.

³⁰Yíésu hát fargogínt hí gónle yé gaa ˈdiiyyeká hol ki arge. Aalé mu nyesebich bala ki nie, gáál yiete, kieye, Mááya ye đafar đig yie? yie.

³¹Mú lalille hí ˈdéé hol ˈdú nie, gaal kieye, Nyésébích guđo ko ki made-, argiyyóóllá, máá ko đig yieká háte hegesete? yie.

³²Aalé Yíésu gáál il gaa nie, giri máá héél ekeyal aargiroká.

³³Min giriká hol héél ki argiyyeká neeyye, fađanne, ká chimie, mú ˈgas met les gaa ˈdoyye, hé ˈdúwaká huogote.

³⁴Aalé Yíésu min geey, kieye, Veelééllo, iiy yeen kua ye iiy chíéllá hé ko bisiche. Waag ki sí, ál ko gáá ˈdiiyyééllá hát ˈdabaanká gaa bé. Naaná yíéđig, yie.

³⁵Yíésu hátle ˈdéé af ká ˈgaa, gálaat Yáíras giri kansichká ényle gáá fame. Gaal mú geey, kieye, Inikú hé mán chie, ha Máá gáál he oonisúóllá hállééllá hawul ˈgéˈgen, yie.

³⁶Yíésu hé gál ˈdéé hogodheká a nee ma kôny, máá giri kansichká geey, kieye, Ha néeny, iiy tákámle áat, mú yie.

³⁷Mu gál he hol egedhdheká síé rie. Bétiro, Yákob, tá Yuána giri Yákob nyárléká tákámle hol eedhdhe.

³⁸Aalé gaal ény máá kansich kinaal ki fameká Yíésu gál guđo-, bebeen-, shiilmisatká arge.

³⁹Aalé Yíésu ˈbíl hile, gáál geey, kieye, Háteka hí kúóˈd ˈdoyye-, hí hatal buoyéel? Veel hé ma kúfiny, hai rafe, yie.

⁴⁰Aalé Gaal đo mú eeshey. Mu gáál lulle ˈbíl yé gáá ˈdeey. Véel ˈjaalle ubaa ˈjielle tá gállé hol ˈgieká vie. Gaal ˈbíl geer veel hí gaa iifeká mé nie.

⁴¹Mu véel gíl chiˈde, véel geey, kieye, Talídha kúum! yie. Hélle kieye, Ákutú, ha yú ko geey, les gaa keʼ.

⁴²Veel giriká đo les gaa kie, hol gaa seeseme. Véel warram hí tomon a naama. Aalé gaal đo súm he af ˈdabe.

⁴³Yíésu gáál súm il gíl gaa helie, ˈdeenyééllá ha máádhat hí mááliny, yie. Mu úba gáál geey, giri véel gaalí hé geere shiguoká.