Read daasanach Márko 9 Bible Online

Márko 9 - daasanach bible

Márko 9

¹Aalé mu geđi gáál geey, kieye, Yú hí hé ˈdúwaká geeye, gál állá ˈgíéllá ˈdáá tikiˈd ˈdaab Guch Waaˈgiet fargogínt ma kí chímenká ma árginyká hé ma kufuminy, Yíésu hí gáál yie.

²Aalé ram le ˈgiteká Yíésu đo Bétiro, Yákob, ta Yuána shuunne, mu gáál tákámle eedhdhe, gaal gúm ˈdér mare feˈjie. Ál kinaal gáál metle Yíésu bis hí hol gaa suoy.

³Mú đafaraamle súm edhdhey, ˈjiimiˈde, edh kálta gálaat hí đafaraamle ma ˈjînyká yie.

⁴Ál kinaal Elíya ubaa Móshe gáál yé ˈdu gáá ˈdie, gaal ubaa Yíésu hol geey.

⁵Bétiro Yíésu geey, kieye, Máá gáál he oonisúóllo, hát ke állá gaa ijóóllá hé tág midhab. Ebá nyí lokoolom seđ ˈdita, lokóól tikiˈd lokoolkú, tikiˈd hí lokool Moshe, tikiˈd hí lokool Eliya, muí yie.

⁶Hé muí hatallá ki yíéllá, he ˈdaa giri mu ubaa sheelle súm birge-, hé hogodhoká ˈdabeká.

⁷Aalé nyáˈdow yé ká ˈdiiyye, gáál buanne, Waag nyáˈdow ˈdéé gáá hote, kieye, Hééllá he Iny chia yú gielká, mú af nee kóo! Waag hí chie.

⁸Aalé gaal fuˈjieká gaal hé máá níínní argoká mán, Yíésu tákáma ali yaalla.

⁹Aalé gaal gúm gáá leledheká gáál Yíésu hí il gíl gaa helie, gaal hai hé ílle ki argééllá máádhat géeny, ˈdaab Iny Máádhat uushich yé ma gáá ˈdíinyká, Yíésu hí gáál yie.

¹⁰Gaal ˈdeenyéél kaadhdhe, hol ki falme, hol heegete, kieye, Uushich yé gáá ˈdímííl kor hélle meete? yie.

¹¹Aalé gaal mú heete, kieye, Háteka gál nyatalaamká kieye, Elíya gon er hai ká yiimedhe, yegetal? yie.

¹²Aalé Yíésu gáál ˈdéé hol ˈdú nie, kieye, Taglé, Elíya he máá erkob ká yimet-, he lulle tág kokuoká. Tá háteka Iny Máádhat ˈdugaka Warˈgat Waaˈgiet gaalí gaa veere-, mu súmo maanyjaa, tá ha gaalí điidhma, gaalí yíel?

¹³Ha yú hí geey, Elíya íín hé ká yimie, hát giri Warˈgat Waaˈgiet hí hoteká, he lullé mákártaká gáál ger hí fedeká hé gaalí ki ekey, muí yie.

¹⁴Aalé gaal gállé láli-, hayká hol ˈdu gáá nadheká gaal nyésébích guđo-, gáál ki kuˈd yieká arge, gál nyatalaamká gáál hol ki fafalma.

¹⁵Nyésébích giriká tikiˈde Yíésu aargiróóllá birge, ˈdoˈdodhdhe, mú naa yie.

¹⁶Aalé Yíésu gáál heete, kieye, Itín meete hí gáál hol ki fafalanna? yie.

¹⁷Gál giri nyesebichká mú tikiˈd Yíésu ˈdéé hol ˈdú nie, kieye, Máá gáál he oonisúóllo, inychú kúúni yú ko ˈdu gáá eey. Mu aryaan hí af riiyyeká ˈgaa.

¹⁸Aadh mú ˈjiiyyoká mú lesso ki tutunna, mú af oshomo ˈdiˈdicha, mu kach ririˈgita, gon lullé hí gaa káw chegedhe. Yú lalikú ruogone, giri mú aryáán yé gaa ˈdeđuoká. Kor hé kinaal gaalí fargogintle mán, yie.

¹⁹Aalé Yíésu kieye, It hí iiy yeen mánnallo! Yú in ˈdáb aake ke hol af yíéđima, tá yú hol gaa tataa? Ebá véel állá kí ée, yie.

²⁰Gaal íny Yíésu ˈdu gáá eey, iny Yíésu argeká íny aryáán hí súm muotisiche, iny le ˈdoy, gaalgalle, af oshom hí ˈdie.

²¹Aalé Yíésu íny ˈjaalle heete, kieye, Hééllá bár máre íny ká hile, tá íny chuoy? yie. Íny ˈjaalle kieye, He íny níínénti ká hile.

²²Aryáán af burnayká mú ˈjiet ubaa bie ki laalaanne, giri mú chegeská. Har kín uˈdoka, geer hí ko nyí ˈdú guat, nyí ˈdú ˈjé! yie.

²³Aalé Yíésu mú geey, Har kín uˈdoka, chíe? Máádhat Waag iiy yieka, he lulle met haí gaa keeme, mú yie.

²⁴Íny ˈjaalle Yíésu ki buoy, gil efe, kieye, Yáá iiy yie. Ye ˈdú ˈjé, hát ˈdabaanká iiy yeedhe! yie.

²⁵Yíésu nyesebich ali ˈdu gáá kirmita argeká, aryaan ˈdeewallá ki ˈday, kieye, Kó af ubaa nee mánnal, he yú ko ki mure, íny yé gaa ˈdé! Ha geđ íny híliny! yie.

²⁶Aryaan giriká kúóˈd ˈdoyye, íny hát ˈdeđewká muotisiche, yíé ˈdiiyye. Iny hát máá giri kufeká ká iifa. Gál burnayká kieye, Iny hé mán yie, yie.

²⁷Aalé Yíésu íny gíl chiˈde, íny les gaa eey, iny leđuđul ˈdie.

²⁸Aalé Yíésu ˈbíl hileká lalille hí hát shuoliteká heete, gaal kieye, Nyiin háteka nyí fargogint aryaan kinaal yé ki ˈdeđicheká mánnal? yie.

²⁹Mu gáál geey, kieye, Aryaan hatalóóllá Waag visan tákáma hí yíé ˈdeđicha. Hé éíy hí yíé ˈdeđuoká mán, yie.

³⁰Aalé Mu ubaa lalille ál kinaal gaa kie, les Galilaaya gaa nadhe. ˈDaa giri mu lalille he oonisieká, mu állé sesemeká gálaat hí ógká má fedo. Mu lalille geey, kieye, Iny Máádhat gálaat gíl geer ha gaalí gaa kakaa, ha gaalí yeese. Tá gaalí yieska, kúlích ki seđeká uushich yé hai gáá ˈdeeme, yie.

³¹

³²Gaal hé ˈdeenyéél tág eiy ma náásan, gaal mú ˈdéé hélle hegesetká kiadhe.

³³Aalé gaal ˈjien Kafarnaum ki fame. Aalé gaal ˈbíl gaa ijeká Yíésu gáál heete, kieye, Le hurtéél meete ˈdugaka hí hol ki fafalanne? yie.

³⁴Gaal ˈdaa giri ˈgierich gaa igire-, hol ki fafalme-, muun mááya guđo, yegieká in shab yie, mú ˈdéé hol ma ˈdú níiny.

³⁵Aalé Yíésu les yíéđie, lalillé tomon a naamáká ká vie, gáál geey, kieye, Har kín máádhat biiy met ki ˈdeˈdeenká fedoka, hí biiy el ki mado, hí gáál lulle gédéchle yeet, yie.

³⁶Aalé mu veel ninni mare ká eey, gáál hurt kaa koy, véel úr ki eedhdhe, tá gáál geey, kieye,

³⁷Máá veel ninni-, ˈdááballóóllá meenychú ˈdugaka lokoˈd ki goloká yaa ye lokoˈd kí gole. Máá ye lokoˈd kí goloká hé yú tákámchú ye lokoˈd ma kí góliny, Máá ye ali gáá kaayká úba lokoˈd ki gole, yie.

³⁸Yuána Yíésu geey, kieye, Máá gáál he oonisúóllo, mú tikiˈd nyí argiyye, gálaat fargogint meenykú aryáán yiem ki ˈdeđia. Nyíín nyí mú hé kinaal ekenyle ká riate, ˈdaa giri mu máákúnno muuninyká, yie.

³⁹Aalé Yíésu kieye, Mu hé ekemeyoká haí ka rían. Hé máá níínní hé ke af ˈdaˈdaboká meenychú ˈdugaka ekemeyo-, kor ál tikiˈde kinaal hé ˈdeew-, ˈdaa chúka hogodhoká mán.

⁴⁰Máá gáál mé il ma gaa yaalinyká he máákúnno.

⁴¹Yú hí hé ˈdúwaká geeye, ˈdaa giri itín hí gál Kiristoká máá hí bíé a geereká ˈdaat kí ˈduoká, bár ˈdaatika hé hé shiicho Waag ma gaa ˈdaabiny, yie.

⁴²Mu geđi kieye, Gál nigini-, hatallo-, ye iiy yíéllá tikiˈd máá hí ye el af gaa tuoká ká máá kinaallá gaalí yíérích guđo-, ilishká luut ki hidhe-, gaalí bás hurt ki layka kalat.

⁴³Har gílkú ko ađááb higilioka ali gaa mur. Gíl tikiˈd maníta-, tá luolmít hilleka kalat. Hát gil hullaalle ˈgayyo-, kor ˈjiet bolo hí ma kufuminyká higilloká ˈdeew. [

⁴⁴]

⁴⁵Har ˈgáskú ko ađááb higilichoka ali gaa mur. ˈGas tikiˈd maníta-, tá luolmít hilleka kalat. Hát ˈgas hullaalle ˈgayyo-, kor Waag ko ˈjiet ma kufuminyá ki lalaannóóllá ˈdeew. [

⁴⁶[13] ]

⁴⁷Har ílkú ko ađááb higilichoka ali gaa sílish. Il tikiˈd maníta-, tá Guch Waaˈgiet hilleka kalat. Hát in hullaalle ˈgayyo-, tá Waag ko ˈjiet ma kufuminyká ki lalaannóóllá ˈdeew.

⁴⁸Gál kufo-, tá ˈjiet kinaallá hiloká kuuˈd hí faanká hé ma kufuminy. ˈJiet íín hé bolo hí ma ˈgieˈgeny.[14]

⁴⁹Ameeny gál ye el gaa igiroká inle ˈjiet bólo[15] hai aargira.

⁵⁰Shúgút hé midhab. Tá shúgút gaalí hé éíy taaka hol warase-, ˈjám ˈdabiyyeka háteeye midhab? Shúgút ˈdúwaká yiedhíe, hol naanná ki yíéđía.