Read daasanach Lúka 1 Bible Online

Lúka 1 - daasanach bible

Lúka 1

¹Kó súm ˈdúwaʼ, Tíáfeles lééllo,[1] gál burnayká hé hib hélle gáál hurt yé gáá ˈdieká hol ˈdú shuune, veere.

²Gál er ali gaa ije-, hé kinaal il ki arge-, he fayamle ˈdiiyimeká nyí fayám ká shie.

³Aalé káána yáá giri hib kinaallá mé gáá koonle ˈgas eeyká úba ko hib kinaallá ˈdú gáá veere-, ko híb ˈgas gáá koyka kalat.

⁴ˈDeeny yú ko ˈdu gáá verenóóllá ˈdaa giri hé gaalí ko hiibisieká ˈduuwle kuuní kiimisatoká.

⁵Bár giri Heróˈde he kánsích lés gál Yuuˈdi onnoyká mú tikiˈd máá gál suoryo-, Waaˈgiet-, Abiya-, gaalí Sakaría yegie mare hé lés kinaallá gaa ije. Mú minle meenyle Elísabet, ˈbíl íl Aaronno[2] he yé gáá ˈdiiyye.

⁶Gaal hullaalle gál ˈdúwa-, Waag kikiatká. Gaal hé Máá Guđo Waag hemuumuritle ubaa atimle tikiˈd úba ma hâny, gáál úba hé gaalí ˈdú ˈdeensetká mán.

⁷Tá gaal hé um mannay, ˈdaa giri Elísabet ˈdal mannayyeká. Gaal hullaalle eiy warram hí hol ki sedheká.

⁸Aalé Sakaría ubaa gállé Abiyaká hújíchlé suoryo-, Waag metle tág gaa nannuoká kálle ka maˈdeká,

⁹hát giri nyátál gál suoryokáka gaal koiy ˈdoy.[3] Kot Sakaría ˈdú ˈdoyye, giri mu ˈBíl Waaˈgiet higilo-, mu henyit[4] usiyyoká ˈjiet fafuoká.

¹⁰Aalé aadh ˈgas giri gaalí henyit éér kikuoká ali kí ˈdiiyyeká mu ˈBíl Waaˈgiet hile, henyit éér kie. Gál ˈBíl Waaˈgiet álle hol ˈdu gáá yimie-, baaˈd ˈgieká henyit eer hí kieká lulle Waag vite.

¹¹Aalé máá ˈgasso-, urru-, Waaˈgietká Sakaría yé ˈdu gáá ˈdie, kara henyit érle hí ˈdug gaa kekemeká ˈdaa naaniet kí ˈdie.

¹²Sakaría máá urru kinaal argeká birge, fađane.

¹³Aalé mu Sakaría geey, kieye, Sakaría, ha bírginy. Waag visankú hé Waag hí maalle. Min kua Elísabet iny yab hai ko kí ˈdaalla. Íny meenylé shigichoká Yuána.

¹⁴Kúún geer hai ko gaa meedhe. ˈDaa giri iny hí ki ˈdalmaatká gál burnayká úba ger haí gaa meedhe.

¹⁵Iny Máá Guđo Waag metle hai gaa ˈduuwaa. Mu hé ˈduuny vinna[5] ubaa bersh eiy ma igiminy. Mu hátlé ˈjielle geer gaa ijoká in Hím Naasan Waaˈgiet hí koch cheedhe.

¹⁶Mu gál burnay-, Yisirayelká Máállé Guđo Waag hollo hol ˈdu gáá nannaa.

¹⁷Mu Hím Naasan ubaa fargogint Waaˈgiet tikiˈde máá Waaˈgiet Elíya hí ˈgieká hai aargira, mu Máá Guđo Waag met hai ká naadha, giri mu idhaam kasle hol gaa lalaan-, gaal ubaa umle hol higiloká. Mu gál ˈdeeny Waaˈgiet nee ma kokonyká hollo hol gaa laama, giri gaal ˈdaalim gál ˈdúwa-, Waag kikiatká ˈdeenyle iiy yeetká. Mu Máá Guđoká gál hí iiy yegetká met tág hai kokoo, máá ˈgasso-, urruká hí yie.

¹⁸Aalé Sakaría mú geey, kieye, Hé kinaal háte yú og? Yú karsich. Minchú úba karsidhe, yie.

¹⁹Aalé máá ˈgasso-, urru kinaal mú geey, kieye, Yú he Gáburiel, giri Waag innumle gaa yaalká. Yú Waago ko ye ali ˈdu gáá kaayye, giri ko fayam midhaballá shiguoká.

²⁰Bá dháash, ˈdaa giri kuun hí ˈdeenychú iiy ma ki chéenká kúlích kinaallá ˈdaab ali ma kí ˈdíinyká kúún af ha ˈdaabiyya. ˈDeenychú hai ˈduuwaa, kúlíchle ali hai kí ˈdeenne, muí mú yie.

²¹Gál baaˈd ˈgie-, Sakaría egeseká Sakaría ˈBíl Waaˈgiet chuoyká he af ˈdabe.

²²Aalé mu baaˈd yé kí ˈdieká, af gáál hol ki geđuoká mán. Gaal mu hát hé mákártaká hí ˈBíl Waaˈgiet yé ˈdu gáá ˈdieká kimite. Mu af ˈdabe, mu gáál gil ki geeđie.

²³Sakaría kállé he naasan ˈBíl Waaˈgietká ˈgiteká é hol ˈdú nadhe.

²⁴Aalé el ˈdaal mú minlé Elísabet geer hí hile. Min hol shuolsiche, ˈguiyam chen ˈbíl tákáma he gaa iđe. Min kieye,

²⁵Hééllá hé Máá Guđo Waag hí ye ki ekeyká, in aalé káána mu ye ˈdú ˈjie, kern ˈgin yú gálaat innumle ki sesemeká muí ye gaa eey, min hí chie.

²⁶Aalé Elísabet geerle ˈguiyam hí le yieká, máá ˈgasso-, urru-, giri Gáburiel léká Waag hí ény Nasaret giri lés Galilaayaká ali ˈdú kaayye.

²⁷Waag Gáburiel ini gaalí María yegie-, Násaret gaa iđe-, kis Yúósef giri ˈbíl íl ˈDawuˈdká hí đarm sidheká muí ali ˈdú kaay.

²⁸Aalé mu María ˈdú sedhe, kieye, Kó Waag ko ˈdú ˈjiiyyéel, náa! Kúún kó Máá Guđo Waag hí hol af iđa, yie.

²⁹María ˈdeenyéél maalleká súm neeyye, tawuyye, ˈDeenyéél hélle meete? chie.

³⁰Aalé máá ˈgasso-, urru kinaal mú geey, kieye, María, ha néeny. Waag hé ko ˈdú ˈjiiyye.

³¹Bá dháash, kúún geer hai ko higila, iny yab ha ˈdaalla, íny meenylé shigichoká Yíésu.

³²Mu máá ˈdúwaká hai yeedhe. Mú meenyle he Iny Waag Úr Iđoká. Máá Guđo Waag mú kara eshi eshimlé ˈDawuˈdká hai shigia.

³³Mu taalle bííyyo ˈbíl íl Yakobo mé ki yaalla, mú guchle hé a mé mán, muí María yie.

³⁴Aalé María mú heesete, kieye, Héél kor háteeye, yú kálta máá yab nyí hol má arginy? chie.

³⁵Mu María ˈdéé hol ˈdú nie, kieye, Hím Naasan Waaˈgiet hai ko ˈdu gáá leete, fargogint Waag Úr Iđoká hai ko buanna. ˈDaa kinaallá ˈdugaka in veel ˈdalaatká he Iny Waaˈgiet saas mán-, ˈdúwaká.

³⁶Bá dháash, Elísabet giri máá fás kua-, gálaat hí óg ma ˈdaˈdalinyká, har úba káána karsidhe kátaka, hé geer hí hile, geerle káána ˈguiyam hí le.

³⁷Waag hé hé níínní hí ká aađaatká mán, muí María yie.

³⁸Aalé María mú geeyche, kieye, Yú he Máá Guđo Waag gédéchlé, hé hotéél hí hát kinaal ˈdie, María hí mú chie. Máá giri ˈgasso-, urruká đo ali gaa sedhe.

³⁹Rám iraam mánká ˈgiteká María đo kiiyye, siete, ény lés gumano Yuuˈdiaká mé niiyye.

⁴⁰Ál kinaal ki ˈjiiyyeká siete, ˈbíl Sakaria hille, Elísabet naa chie.

⁴¹Elísabet tikiˈde naa Maria maalleká, đo veel hí geer gaa kiite. Aalé Elísabet Hím Naasan Waaˈgiet hí koch chie,

⁴²súm af úr ki eeyye, kieye, Gál ˈdiet lulle kúúni Waag ko ˈdú ˈjiiyye, veel kuun hí ˈdaalloká hé Waag hí ˈdú ˈguunuanne.

⁴³He háteeye, yáá Máá chia Guđoká ˈjielle úba ye ˈdu gáá chimíel?

⁴⁴Bá dháash, tikiˈde giri naakú yú maaleká in veel ninni-, ye geer gaa ijóóllá đo geer hí gaa meedhe, ye geer gaa kiite.

⁴⁵Min halúg ˈdeeny Máá Guđoká hí geey-, He hát kinaal hai yeedhe, muí yieká iiy chíéllá, ebá geer hí gaa meet, Elísabet hí chie.

⁴⁶María kieye, Hodhinchú hé Máá Guđo Waag guđanayche.

⁴⁷Waag giri Rúbách chiaká hé ye geer gaa meeyche,

⁴⁸ˈdaa giri yú mú inillé gedech-, biiy ello-, tá mu ye argééllá. Bá dháash, yú aalé káánaka gálaat hátlé hol ká hođuoká, min Waag hí ˈdú ˈjiiyyeká gaalí ye yeedhe.

⁴⁹Waag Fargogiyyoká hé ye hé guđo midhabká ki ekeyche. Waag meenyle he Máá Saas Mánká.

⁵⁰Waag gál hí iiy yie-, hí kikiatká hátlé hol ka hođuoká geer haí ˈdú guudhdha.

⁵¹Waag hé tág hé farguogoká gíl geerle tág ki niiyye. Mu hé gál hol memeyo-, tawunyleka hol gál ˈdúwaká ka dhaˈgasanká bađisie.

⁵²Mu hé gál farguogoká karmlé guguchiká gáá leesie. Mu hé gál gaalí eesheyká les gaa shuune.

⁵³Mu hé gál kuoˈd ˈguoká hát ˈdabaanká heyisie. Mu hé gál kaamúreká gil búrká ki galie.

⁵⁴Mu hé geer guanle mé ká ˈguo, gedellé Yisirayelká yiir gáá ˈgiliˈgay,

⁵⁵hát giri mu Abirááyam ubaa umlé giri eshim eshim kúnnaaká hátlé taalle bííyyo hol ka hođuoká muí af iđieká, María hí chie.

⁵⁶María ubaa Elísabet hol ˈguiyam seđ a yíéđie, María đo ényle hol ˈdú naate.

⁵⁷Elísabet ˈdálle ali kí ˈdiiyye, mu iny yab ˈdale.

⁵⁸Mú olle ubaa mú gálle fayám maale-, fayam kieye, Máá Guđo Waag hé tág Elísabet ˈdú ˈjie, gaalí yieká, gaal mú hol ˈgar geyie.

⁵⁹Ram síet chieká gaal véel hermisinyle ˈdu gáá yimie, gaal onnônyka véel meeny ˈjaallé Sakaría shigie.

⁶⁰Aalé véel ˈjielle kieye, Hé hát kinaallá muuniny. Véel meenylé ki shiguoká Yuána, chie.

⁶¹Aalé gaal min yiete, kieye, Háteka? Mú ˈbíl ílle máá níínní meenyéél léká mán háluke! gaalí yie.

⁶²Aalé gaal véel ˈjaalle bala ˈdú nie, giri véel ˈjaalle meeny hí shiguoká gaalí maaloká.

⁶³Aalé mu ˈgór ˈbasso-, verenoká gáál yiete, mú gaalí ˈgór shie, ˈgór ˈdeeny muí ˈdug gaa veereká kieye, Véel meenyle Yuána, he yie. Aalé gaal lulle he af ˈdabe.

⁶⁴Ál tikiˈde kinaal Sakaría af hí eiy ˈdie, ˈdéé huogodhe, Waag meey.

⁶⁵Gál ólloká lulle he af ˈdabe, fayam kinaal lés gumano Yuuˈdiaká lulle bash ki chie, gaalí hol ki geey.

⁶⁶Gálaat lulle ˈdeenyéél maaleká gerle ki tawue, kieye, Veelééllá aadh ˈdaatika kor veel háte yaal? gaalí yie. Hatal gaalí yíél, veel íín hé Waag gíl geer gaa ije.

⁶⁷Véel ˈjaallé Sakaría Hím Naasan Waaˈgiet hí koch chie, mu ˈdeeny Waag hí shiicheká ˈdiiyime, kieye,

⁶⁸Kí Máá Guđo Waag Yisirayelká meeyo, ˈdaa giri mu muun gáál ˈdu gáá yimie-, gáál rieká.

⁶⁹Waag hé gédéchlé ˈDáwuˈd ˈbíl ílle máá fargogo-, rubachietká yé gáá ˈdeeyche, mú gáál ká shiiche,

⁷⁰hát giri héle gál Waag hí taak koyye-, Waag hí ˈdéé ka shigicheká hí gáál ka geey-,

⁷¹giri mu kidh ubaa gál lulle gáál nébká gil gerle gáál gáá ririanká.

⁷²Waag eshim eshimkúnno geeyche, giri gáál ˈdaalleka mu gáál geer hí ˈdú guguat-, he af iđiny mu íín dhúrle hí gáál af iđieká hí in ma ka baađanyká.

⁷³He af iđiny Waag hí eshi eshim kúnnaa Abirááyam af iđiche-, máálle hol ˈdodhdhe kinaal hééllá:

⁷⁴Mu kidh gíl geer hai gáál gaa riima, giri hé ki kikiat mán-, ki mú vivisatká.

⁷⁵Tá múún rám kúnnaa ki lésal ˈdú ijoká Waag innum leka ki gál ˈdúwa-, he fedit Waaˈgiet gaa ijoká ki gaa yegetká.

⁷⁶Kó veel chial, kúún Waag Úr Iđoká máállé ˈdéé ka shigichoká cheedhe. Kúún Máá Guđoká met ha naata, mú ˈgíéríchle met tág ha kooyyo.

⁷⁷Kúún Máá Guđoká hát gálle ririanká gálaat ha ki ˈdiyeenne, giri mu gáál nyuogimle gaa egewká.

⁷⁸Rúbách kinaallá Waagkúnno geer kurshamlé yé gáá ˈdeeme, édhum hai gáál shigia, hát giri aadh bur yé ká ˈdeˈdeenno-, gálaat gáá verenoká.

⁷⁹Édhúm kinaal gál bííy gaa ongʼoˈde-, bííyle súm húˈd chieká gaa ijoká yé hai ˈdu gáá ˈdeeme, tá úba ˈgaskúnno ˈgíérích naannáká hai nannaa, Sakaría hí yie.

⁸⁰Aalé veel guđandhe, Hím Naasan Waaˈgiet ˈdaa ki liledhe. Mu ˈbakat álle gaa yíéđie, ˈjíig mu gál Yisirayel ál kinaal ki ˈdiiyime.