Read daasanach Lúka 16 Bible Online

Lúka 16 - daasanach bible

Lúka 16

¹Yíésu úba lalille hibéél geey, kieye, Máá kamúrut mare aanyle[39] mú tikiˈd mé ki koy. Máá muí aanyle mé ki koy kinaal, hát he mú aanyle ki aaˈdumeká fayamle gaalí mú ˈdú sidhe.

²Aalé máá giri kamúrutká máá hí aanyle mé ki koyká ká vie, mú yiete, kieye, Hé yú ko gaa maalééllá meete? Aanychú ˈdaablé gíl ka ˈgayyoká ebá ye ka géesh. Kuun aalé káána ke gaa ijóóllá kó máá aanychú mé ki yaalká muuniny, mú yie.

³Aalé máá aany mé ki yiel kinaal tákámle hol yiete, kieye, Háte yú ˈdeeme, máá chia guđo-, aanyle yú mé ki yielká in ye aanyle gaa aruma háluke? Yáá fargogint ˈguo-, les ki gugusoká mán. Roog úba kerno ye ˈgiˈgidhicha.

⁴Yáá aalé hát ˈdeˈdeenká ye táb ká ˈjiiyye, giri mu ye aanyle gaa arieka, gálaat ye ˈjienle ˈdú egeetká, yie.

⁵Aalé gál mú máállé guđoká ewle ˈgieká muí hát taataká ká veeveme. Máá erkobká muí yiete, mu kieye, Kuun máá chia guđoká ewle mia ˈgayya? mú yie.

⁶Aalé máá giri êw ˈgie kinaal kieye, Mú ewlé yú ˈguoká salab đudm guguđoká kúˈd tikiˈde yú ˈgaa, yie. Aalé máá aany mé ki yielká kieye, Warˈgat kua ewuetallá éew, hol gaa lab, đudm tomon síet gaa véer, mú yie.

⁷Aalé mu máá ki naamaká ká vie, mú yiete, kieye, Kuun mú ewle mia ˈgayya? yie. Aalé máá kinaal kieye, Mú ewlé yú ˈguoká sííndí orgom kúˈd, yie. Máá giri aany mé ki yielká mú geey, kieye, Warˈgat kua ewuetallá éew, hol gaa lab orgom tomon síet tákámle gaa véer, mú yie.

⁸Aalé máá giri guđoká máá hí aanyle mé ki yiel-, aany ki aaˈdumeká hinyamlé koy kinaal meey. Gál lesalloká hé ˈdaalim gállé lesalloká hurt ki seseenká ˈguo. Gál édhúm Waaˈgiet gaa ijoká íín hé ˈdaalim hatallo-, gál lesalloká hurt ki seseenká mán.

⁹Yú hí geeye, kamur lesallóóllá sheel ki muráa, kamurééllá el me hí ˈgidhe-, sheel kinaallá hí hol úratí gaa argiyyeka, sheel ger haí gaa meedhe, lokoˈd haí kí goolo.

¹⁰Máá hé ninniká gáá ˈdúwaká, úba hé hé guđoká gáá ˈdúwa. Tá máá hé ninniká gáá ˈdeewká, úba hé hé guđoká gáá ˈdeew.

¹¹Aaléka, har itín hí kamur lesallóóllá gáá ˈdeenítaka, mááya hí kamur Waaˈgiet mé ki kokoo?

¹²Har itín hí aany máá eiy hí tág ma ki ˈgiinyka, aany hí mé ki liiletká mááya hí shigia?

¹³Gedech hé gáál naam hí ma liileen, ˈdaa giri kálmaréél mú tikiˈd neebeet-, máátí geelneetká, muuninyka, mú tikiˈd giel-, máátí eesheyoká. Itín it ˈgas eiy ma kokony, Waag gedelle ubaa kamúr gedelle ma chegen, Yíésu hí gáál yie.

¹⁴Aalé gál Farisaay giri birm gielká ˈdeenyéél lulle maaleká Yíésu eeshey.

¹⁵Aaléka Yíésu gáál geey, kieye, Itín innum gálaato hí gál ˈdúwaká hol gaa hođicha, tá Waag íín hé hé ger geđi kíchiaká óg. Tá hé gálaat hí hé súm ˈdúwaká ka dhaˈgasanká, íín hé Waag hí néb.

¹⁶Hemuumurit Waag hí Móshe ka shiicheká ubaa warˈgasam gál Waag hí ˈdéé ka shigicheká hí veereká ˈdeemle hé gaalí ˈdiiyime, ˈjíig Yuána giri gáál bie gim nannieká bárle đig. Ameeny Yuana kinaallá in Fayam Midhab Guch Waaˈgietká yú gáá ˈdiiyime. Tá Guch Waaˈgiet hé gál burnayká hí ˈdu gáá ruruan.

¹⁷ˈDeeny Waaˈgiet hé ˈdeeny níínní ká ˈgiisat-, ma ˈduuwanyká mán. ˈDéé hót ninni kinaallá hanyle les ubaa úr el mé ˈginle hí hawul ˈdú man.

¹⁸Máá minle điidho-, min eiy eetká, máá kinaallá minlé he ˈdú hergie, ađáábo he hile. Máá min bélle hol eiy gaa galoká eetká úba ađáábo he hile, Yíésu hí gáál yie.[40]

¹⁹Aalé Yíésu geđi kieye, Mú tikiˈd héle kamúrut-, đafaraam búr koorbisoká ubaa đafaraam édh-, salsalo-, kírre hí guogiyyoká he fafadhdhe. Mu bar lulle balchá he gaa ije.

²⁰Mú kár ˈbílle máá he mannay-, roˈgonme-, gaalí Lasááro yegie-, gónle lulle gaa lilo mare hí af gaa iife.

²¹Lasááro ˈguom máá kamúrutká hí kokoey-, les ki okodooteká les gaa shugunneká fede. Chier úba ká yimie, mú lilolle eereme.

²²Aalé kulich tikiˈd máá he mannay kinaal mán yie, sídhle gál ˈgasso-, urruká hí eedhe, ál Abirááyam hí ijeká gaalí iđie. Aalé el ˈdaal máá giri kamúrutká úba mán yie, gaalí galie,

²³mu ˈjiet álle mé nie. Mu hátlé ál ˈjiete kinaal gaa aayaˈgeká úr ki fuˈjie, Lasááro Abirááyam bala gaa ija, bííy fag ká arge.

²⁴Aalé mu Abirááyam vie, kieye, Baabá, Abirááyam, geer hí ko ye ˈdú guat, Lasááro ali gáá káab, muí gúmúríny mé er bie ki gadho, hí ye ére bie đig ki yeet, gon hé tág ye boloyye, yie.

²⁵Aalé Abirááyam kieye, Ákutú, af héle kuun hé ˈdabaanká gaa iđe-, Lasááro íín hát ˈdeđewká ijeká táb ˈdúo. Mu íín káána balchá he gaa ija, kúún íín káána hí manyjany gaa iđa.

²⁶Héél lulléél úba kí hayo, toomkúnno ˈguoˈd gaa ˈdérká hí gaa taalla, gál állá gáá yimetká hé hát níínní ál kuun hí iđo kinaallá ka yimetká mán. Héétí hé máá níínní ál kinaallá gáá yiimet-, ˈguoˈd hođoˈd ká ˈdaraan-, nyí ˈdu gáá yiimetká mán, muí mú yie.

²⁷Aalé máá giriká kieye, Baabá, gillo yú ko ki efe, Lasááro ény ˈjaachú ali ˈdú káab.

²⁸Yú yáá nyaaram chen ˈguo. Mu hí gáál il gíl gaa helio, gaal hai ál manyjany yú gaa ijóóllá ka yímen, yie.

²⁹Aalé Abirááyam mú ˈdéé hol ˈdú nie, kieye, Gaal hé hemuumurit Waag hí Móshe ka shiicheká ubaa warˈgasam gál Waag hí ˈdéé ka shigicheká hí veereká ˈguo. Gaal hí ˈdeem kinaallá nee kuo, mú yie.

³⁰Aalé máá giriká kieye, Híʼi, Baabá, Abirááyam, gál kufeká mú tikiˈd gáál ˈdú sedheka, gaal mú af nee hai kokoo, gaal héllé ˈdeđewká hai haađia, Waag makan hai faama, yie.

³¹Aalé Abirááyam mú geey, kieye, Gaal har hemuumurit Waag hí Móshe ka shiicheká ubaa gál Waag hí ˈdéé ka shigicheká ˈdeemle nee ma konyka, af kinaalka úba káána máádhat uushich yé gaa ˈdeˈdéminy-, hí geđînyka, hé ˈdee hí mé ma ki seeminy, muí mú yie.