Read daasanach Lúka 2 Bible Online

Lúka 2 - daasanach bible

Lúka 2

¹Bár kinaal máá kansich les ger lulle mé ki yiel-, Káísar giri Agústo léká ˈdéé mure, giri gálaat lullé les gaa ijoká gaalí totoyoká.

²Af giri Kurénios he kánsích Siria onnoyká hééllá he gálaat túóylé erká.

³Aalé gálaat lulle ˈjienle hol ˈdú nadhe, giri meetle gaalí verenoká.

⁴Yúósef úba ény Nasaret giri lés Galilaayaká gaa kie. Ény ˈDawuˈd-, gaalí Bételeem yeget-, giri lés Yuuˈdiaká mé nie, ˈdaa giri mu máá ˈbíl íl ˈDawuˈdká.

⁵Yúósef ubaa inillé đarm sidhe-, geer ˈgayye-, gaal hí María yegieká hol eedhdhe, giri gáál gaalí meet verenoká.

⁶Gaal hátle Bételeem gaa ija, María ˈdálle ali kí ˈdiiyye.

⁷María veel nyigeeny-, ˈgas kí kooteká ˈdalle. ˈDaa giri gaal é ííf gaa ˈdabeká véel súm gaa iifiche, véel đafaraam buuyye.[6]

⁸Chúúré kinaal ény kinaal ˈjobintle hé fórích aiyiet hí gaa ije.

⁹Aalé máá ˈgasso-, urru-, Waaˈgietká fórích kinaallá gálle yé ˈdu gáá ˈdie, Máá Guđo Waag édhúmle gáál ˈdinnam lulle gaa veere, gaal súm birge.

¹⁰Máá ˈgasso-, urru-, Waaˈgiet kinaal gáál geey, kieye, Haí bírginy. Bá dhaayyíe, yú fayam guđo-, geyyiny ˈgayyo-, gálkícho lulle ki midhabká hí ˈdu gáá sidhe.

¹¹Kúlíchallá ény ˈDawuˈd hé máá gáál ririanká hí ki ˈdalidhe. Máá kinaallá he Máá Guđo Kirísto.[7]

¹²Mu hátlé hí kiimisatoká hééllá: Hí sieteka, veel ninni-, gaalí đafaraam bue-, súm gaa iifoká haí aargiˈda, muí yie.

¹³Aalé ál tikiˈde kinaal nyésébích guđo-, yuoyo-, Waaˈgiet-, úr gáá leedheká ubaa máállé ˈgasso-, urru kinaal hol ˈdú fame, gaal Waag meey, kieye,

¹⁴Waag Úr Iđoká gaalí meeyo, gál lesallo-, muí ˈdú iifoká hí naanná yíéđuo, gaalí yie.

¹⁵Aalé nyésébích gál ˈgasso-, urru kinaal kie-, úr mé nieká gál aiyietká hol geey, kieye, Kée, kí kie, kí Bételeem mé nuo, hé yé ká ˈdie-, Máá Guđo Waag hí gáál ka geeyallá kí argo, gaalí hol yie.

¹⁶Aalé gaal harare, gaal María ubaa Yúósef, tá veel giri ninni-, súm gaa iifeká af kí ˈdie.

¹⁷Gál aiyietká véel argeká, gaal fayam veeliet máá ˈgasso-, urru-, Waaˈgietká hí geeyká lulle gáál shie.

¹⁸Gaal lulle fayam gál aiyietká hí geeyká maaleká he af ˈdabe.

¹⁹Aalé María ˈdeenyéél lulle geer ki chirate, taawuyye.

²⁰Gál giri aiyietká hol nanadheká Waag meey, Waag miimire, ˈdaa giri hé máá ˈgasso-, urru-, Waaˈgietká hí gáál geeyká lulle ˈduway-, gaalí argeká.

²¹Veel kúlích he gaa ˈdalidheká gaal tiiya rafe, kúlích ki síetká véel hermisinyle ali kí ˈdiiyyeká gaal véel meeny Yíésu léká shie, meeny giri veel hátlé geer ma hílinyká máá ˈgasso-, urruká hí véel ˈjielle geeyká.

²²Aalé el ˈdaal, hát héle Móshe hí hemuumurit Waaˈgiet gaa veere-, min ˈdalloká he gaa nímle kúlíchle ali kí ˈdiiyyeka gaalí ˈdeˈdeenká Yúósef ubaa María véel eedhdhe, véel Yerúsalem eey, giri véel Máá Guđo Waag met gaa iđimuoká.

²³Hééllá hát Máá Guđo Waag warˈgatle hí chie-, giri kieye, Veel yab er ˈdalaatká gaalí Máá Guđo Waag méé gaa vie,[8] chieká.

²⁴Gaal úba sedhééllá, he hát giri Móshe hí hemuumurit Máá Guđo Waag gaa veere-, giri gaal hóle naama lug sug dhaadhatká, muuninyka, hóle waaroká naam suorle ˈgaˈgaloká.[9]

²⁵Aalé mú tikiˈd máá Yerúsalem gaa ije mare meenyle Símion. Máá kinaallá máá Waaˈgiet. Mu ˈgíérích ˈdúwa-, saas mánká he gaa igire. Mu máá gál Yisirayel imiro gaa shugudmuoká he met egese. Símion Hím Naasan Waaˈgieto hí gaa iđe.

²⁶Hím Naasan Waaˈgiet Símion fayám shiiche, giri Messíya[10] Máá Guđo Waag hí ali gáá kakawká ˈdaab muí ma árginyká mu mán ma yegenká.

²⁷Aalé mú Hím Naasan Waaˈgiet hí geeyche, mu đo ˈBíl Waaˈgiet sedhe. Aalé hát aađa-, gáál nyátállé Yuuˈdiká Yíésu gállé guguđoká hí ˈBíl Waaˈgiet eey.

²⁸Símion véel argeká mu véel ˈjielle gaa eedhdhe, véel úr ki eedhdhe, Waag meey, kieye,

²⁹Máá Guđo Waag, hát giri ye geeyche-, káána ˈduwayallá yáá gédéch kuallá aalé naanná guraam hí guuro.

³⁰Hééllá he ˈdaa giri inchú rúbách kuun hí nyí af iđicheká arge,

³¹rúbách giri kuun hí tág koyye-, kidh lulle hí il ki aargiroká.

³²Rúbáchallá he édhúm kidh lulle hé kua ˈdúwaká aargisuo-, héétí gál kua Yisirayel gaa verenoká, Símion hí yie.

³³Yíésu ˈjielle ubaa ˈjaalle ˈdeeny Yiesu-, Símion hí hogodheká af ˈdabe.

³⁴Símion gáál ˈdú ˈguunume, kor véel ˈjiellé María geey, kieye, Bá dháash, veelééllá ˈdaalle ˈdugaka gál Yisirayel burnayká les hai ˈdarama, gál Yisirayel éíy taaka burnayká les hai gaa keeme. Veelééllá he hedh gaalí điidhan-, gaalí ˈdeem ˈdeđewká ki hogodhoká,

³⁵giri gál burnayká tawunylé ger ka ˈguoká gaalí mamaloká. Tá kúún geer hai ko gaa kaara, kul máálle hát máá gaalí naan veereká ki égká ha aargiˈda, muí María yie.

³⁶Ál kinaal úba hé min gaalí Ánna yegie-, ini Fanuel-, é meeny Asher-, Waag hí ˈdéé ká shigiche mare hí gaa iđe. Min karsidhe kinaallá af giri máá harte onnoyye-, tá gaal hí eedhdheká, ubaa bélle warram tiiya hol a yíéđie, đo bélle mán yie.

³⁷Min hiyesím gaa yíéđiyye, ˈjíig arram úba hí tomonaam síet a afur chie. Min hé bar lulle ˈBíl Waaˈgiet álle ma gaa lalany. Min kulich ubaa chúúre ál kinaallá gaa iđe, Waago vivisate, héétí afo úba he higisate.

³⁸Aadh ˈgás tikiˈde Símion hí ˈdéé gaa hogodhe kinaal, min hiyesidhe kinaal ká chimie, Waag meeyche, Waag gielmít hol ˈdú niiyye. Min gál giri lulle Yerúsalem rímlé Waag hí ririannoká met egeseká véel fayamle geeđiche.

³⁹Aalé gaal he gaa ním hemuumurit Waaˈgietká hí hoteká lulle mé đig yieká gaal lés Galilaaya hol ˈdú nadhe, énylé Nasaretká mé nie.

⁴⁰Veel guđandhe, fargogoy, ˈdaaliledhe, midhant Waaˈgiet gaa yíéđie.

⁴¹Warram hátlé hol el gaa igireká, Yíésu ˈjielle ubaa ˈjaalle ˈjila máá ˈgasso-, urru-, Waaˈgietká hí gáál ˈdug gaa nadheká af léká Yerúsalemo he seseme.

⁴²Yíésu warram hí tomon a naam yieká, gaal hát aađaká ˈjila bííyle mé nie.

⁴³Gaal ˈjila rámle beete-, ˈjienle hol ˈdu gáá nanadheká, Yíésu Yerúsalem ki ˈgite. Mú ˈgisanlé kinaal ˈjielle ubaa ˈjaalle hí moonnoy.

⁴⁴Gaal íín kieye, Mu hé nyésébích ka yiimetallá hol ˈguo, yegie. Gaal kulich tikiˈd síé ki saanie. Af ˈdaa gelgaká gaal mú gállé hol léká ubaa gál gáál hol ógká gaa ebite.

⁴⁵Gaal mú ˈdabeká, gaal hol nadhe, mú Yerúsalem ˈdú ˈgeˈgedhe.

⁴⁶Aalé kúlích ki seđeká gaal mú ˈBíl Waaˈgiet gaa shuunne, mu gál gáál he oonisuoká hurt gaa ija. Yíésu gáál a nee koy, kor gáál heegete.

⁴⁷Gaal lulle mú ˈdeenyle maaleká mú ˈdaalimle ubaa mú ˈdeenylé muí hol ká nannieká a ˈdabe.

⁴⁸Mú ˈjielle ubaa mú ˈjaalle hí argeká he af ˈdabe. Mú ˈjiellé María hí heesete, kieye, Inychú, háteka nyí héél ki egeychéel? ˈJaakú ubaa yú, nyáá tág nyí neeyye, nyí ko hol gaa ˈgeˈgete, chie.

⁴⁹Yíésu gáál ˈdéé hol ˈdú nie, kieye, Háteka hí ye hol gaa ˈgeˈgetéel? It hát yú ˈbíl ˈJaachú gaa ijóól, ití múog? muí yie.

⁵⁰Yíésu ˈdeeny he hodheká hé ˈjielle ubaa ˈjaalle hí hélle ma kimísan.

⁵¹Aalé mu gáál hol eedhdhe, gaal Násaret hol ˈdú nadhe, mu gáál ˈdeenyle el gaa veere. Mú ˈjiellé María ˈdeeny kinaal lulle geerle gaa kaate.

⁵²Yíésu guđandhe, ˈdaaliledhe, mu Waag ubaa gálaat ger gaa meey.