Read daasanach Lúka 3 Bible Online

Lúka 3 - daasanach bible

Lúka 3

¹Bár giri Kaisar Tibériyo hí les máállé súm guđo kansichká gaa onnoyká tá wárlé ki tomon tikiˈde a chenká, Bonti Bilááto íín lés Yuuˈdia mé ki yiel. Bár kinaal úba Heróˈde[11] he máá kansich Galilaayaká. Heróˈde nyárlé Fílib íín lés Ituria ubaa lés Tarakoniti kansimle ˈgie. Lusánias íín lés Abileenno he kansimle ˈgie.

²Aalé af giri Ánnas ubaa Kayáfas gál guguđo-, méte suoryoká onnoyká, Yuána giri Iny Sakariaká ˈbakate gaa ije, Waag hí ˈdéé ká shiiche.

³Mu lés wár Yorˈdan ˈdinnamle lulle iđoká af gaa veere, gálaat ki ˈdiiyime, giri gaal héllé ˈdeđew-, eekemeyká gil sug ki haađuo-, gaal Waag makan fafaan-, gáál gaalí bie gim nannuo-, gáál Waag hí ađaabanolle ubaa nyuogimle gaa egeyyoká.

⁴Yisááya giri Waag hí ˈdéé ka shigicheká, ˈdeeny he warˈgatle gaa veereká hé ˈduway. ˈDee kieye, Kóˈd máádhat ˈbakat ha gaalí gaa maala, kuoˈd kieye, Máá Guđoká met les ˈdiidháa, mú ˈgierimle lođuđaat kóo.

⁵Golb lulle úr hai kí keeme. Gumano lulle hai ká leedhe. ˈGierim kuongʼodoká lođuđaat hai ˈdeeme. ˈGierim mokodaam ˈguoká hai saalnadha.

⁶Gálaat lulle Waag rúbáchle il hai ki aargira,[12] hai yeedhe, ˈdee hí yie.

⁷Aalé Yuána nyésébích hí ˈdu gáá yimie-, bie gim nannieká geey, kieye, It ˈdálto chaaráal! Mááya hí fuute, hí idho Waaˈgiet ka chiimetoká met kar gaa ˈdonyle geey?

⁸Saano húgúmle midhab-, gálle Waag makan fameká ˈgáa. Tá haí hol geđîny, hí kieye, ˈJaakúnno he Abirááyam, hí chégen. Yú hí geeye, Waag waarééllá um Abiraayam hođichoká hé uˈdo.

⁹Aaléka, Waag hé yerellé alléká tág ká chirate, ˈguor đuur ˈdú koyye. Ameeny ˈgór saano midhabká hí ma gáá higisinyká lulle ali ha muí gaa muura, ˈjiet ha muí gaa verene, Yuána hí yie.

¹⁰Aalé nyesebich mú heete, kieye, Háte nyí ˈdeenne? yie.

¹¹Yuána gáál ˈdéé hol ˈdú nie, kieye, Máá kosam naam ˈguoká hí kóte tikiˈd máá kóte mánká shio. Máá ˈguom ˈguoká úba hí hát tikiˈde kinaal ˈdie, muí yie.

¹²Gál gibíre guguteká úba ká yimie, giri Yuána hí bie gim nannuoká. Gaal mú heete, kieye, Máá gáál he oonisúóllo, háte nyí ˈdeenne? yie.

¹³Mu gáál geey, kieye, Haí gálaat nyiimísan. Gibíre ˈdaˈdablé giri gaalí ki mureká ki guugutíe, muí yie.

¹⁴Gál yuoyó-, mangis mare úba mú heete, Tá nyíín, háte nyí ˈdeenne? yie. Yuána kieye, Haí hé gálaat farguoginsano ki shugúnan, hé hódhoká úba hí gálaat a ka kâny. Birm kíchia hí símísle dhidhiˈdaká hí gaa ˈdoyyo, gáál yie.

¹⁵ˈDaa giri gaal Messíya giri ˈdeenyle gaalí Warˈgat Waaˈgiet gaa veereká met egeseká gaal lulle gerle ki tawue, kieye, Máállá taalle Messíya máámaʼ? he yegie.

¹⁶Aalé Yuána gáál geey, kieye, Yú tuuˈdchú íín bie hí gim nannaa. Tá máá ye far ˈdú gogoká hai ká yiimedhe. Yáá ˈduuw ˈguo-, mú koiyle saawle fuuroká mán. Máá kinaallá íín Hím Naasan Waaˈgiet ubaa ˈjiete hí gim nannaa.

¹⁷Aaléka mu hé múchlé sííndí ki tutunoká gíl ká ˈguo, giri mu sííndí tuneka, ál sííndí ki tune kinaal gaa hegedho-, sííndí buitle fafuoká. Tá sííndí metle íín ˈjiet ma kufuminyká hai gaa verene, Yuána hí yie.

¹⁸Aalé mu gáál atim éíy burnayyeká geey, gáál Fayam Midhab Waaˈgietká úba shie.

¹⁹Aalé Yuána máá kansich Heróˈde ki lole. Mu Heróˈde héllé ˈdeđew eekemey-, máálle min nyárlé giri gaalí Heróˈdias yegieká eedhdhe-, minle hote-, tá ubaa héllé éíy taaka ˈdeđew-, eekemeyká geey.

²⁰Aalé Heróˈde đo Yuána ˈdú idhane, héllé ˈdeđew kinaal đo geđi hé éíy taaka a ˈdú kaay, mú ˈbíl hiiginká gaa kaay.

²¹Af giri Yuána hátlé Heróˈde hí ma hííginká, Yuána gál ka yimieká lulle bie gim nannieká Yíésu úba bie gim nie. Yíésu hátle Waag vivita úr af hí furme.

²²Hím Naasan Waaˈgiet hát yaalmit holeká mú ˈdu gáá leete. Gálaat ˈdéé úr gaa maale, ˈdee kieye, Kúún he Iny chia yú gielká, kó tág ye geer gaa meeyche, ˈdee hí yie.

²³Yíésu af giri he onisinyle mé gáá kokodheká warram hí tomonaam seđe. Gálaat tawuny leka kieye, Yíésu he iny Yuosefo, he yegie. Yíésu eshille he Héli.

²⁴Héli he iny Mataat. Matáat he iny Levi. Lévi he iny Malki. Málki he iny Yanay. Yanây he iny Yuosef.

²⁵Yúósef he iny Matatias. Matatías he iny Amos. Ámos he iny Naum. Náum he iny Hesili. Hésili he iny Nagay.

²⁶Nagây he iny Maat. Máat he iny Matatias. Matatías he iny Shemey. Shémey he iny Yoseg. Yóseg he iny Yoˈda.

²⁷Yóˈda he iny Yonan. Yónan he iny Resa. Résa he iny Serubabel. Serubábel he iny Salaatiel. Saláátiel he iny Neri.

²⁸Néri he iny Malki. Málki he iny Ađi. Áđi he iny Kosam. Kósam he iny Elmaˈdam. Elmáˈdam he iny Era.

²⁹Éra he iny Yoshua. Yóshua he iny Elieser. Elíéser he iny Yuorim. Yúórim he iny Mataat. Matáat he iny Levi.

³⁰Lévi he iny Simion. Símion he iny Yuuˈda. Yúúˈda he iny Yuosef. Yúósef he iny Yuonam. Yúónam he iny Elyakim.

³¹Elyákim he iny Meliya. Melíya he iny Menna. Ménna he iny Matadha. Matádha he iny Naatan. Náátan he iny ˈDawuˈd.

³²ˈDáwuˈd he iny Yeshay. Yeshây he iny Yobed. Yóbed he iny Bowas. Bówas he iny Shalmon. Shálmon he iny Naashon.

³³Nááshon he iny Aminaˈdab. Amínaˈdab he iny Aram. Áram he iny Heseron. Héseron he iny Beres. Béres he iny Yuuˈda.

³⁴Yúúˈda he iny Yakob. Yákob he iny Yisak. Yísak he iny Abiraayam. Abirááyam he iny Tera. Téra he iny Nayor.

³⁵Náyor he iny Serug. Sérug he iny Rew. Rêw he iny Beleg. Béleg he iny Eber. Éber he iny Shela.

³⁶Shéla he iny Kenan. Kénan he iny Arbakashaˈd. Arbákashaˈd he iny Shem. Shêm he iny Nowa. Nówa he iny Lamek.

³⁷Lámek he iny Metushela. Metúshela he iny Enok. Énok he iny Yared. Yáred he iny Maalalel. Máálalel he iny Kenan.

³⁸Kénan he iny Enosh. Énosh he iny Sedh. Sêdh he iny Aˈdam. Áˈdam he iny Waago.