Read daasanach Lúka 4 Bible Online

Lúka 4 - daasanach bible

Lúka 4

¹Aalé Yíésu Hím Naasan Waaˈgiet hí koch onnoyyeká, wár Yorˈdan hol gáá nadhe, Hím Naasan hí ˈbakat ˈdú eete.

²Mu ˈbakat ram tomon afur gaa yíéđie. Rám tomon afur kinaal kídhích giri Sátan léká mú ki ekesete. Rám tomon afur kinaallá Yíésu íín hé hé kokoeyká mán. Rám kinaal beeyyeká mú geer hí ˈdú ˈjie.

³Aalé Sátan Yíésu geeyche, kieye, Kúún har Iny Waaˈgiet kátaka, ebá ˈdéé hot, wárallá hí balashá yeet, chie.

⁴Aalé Yíésu Sátan ˈdéé hol ˈdú nie, kieye, Warˈgat Waaˈgiet kieye, Máádhat hé ˈguom tákámle ma ki iđinyo,[13] he chie.

⁵Hé kinaal elle Sátan geđi mú gúm ˈdug site, mú lésallá kamurle lúl a tikiˈd ki argisiche,

⁶mú geeyche, kieye, Lésallá guchle ubaa kamurle lulle ha yú ko shigia. ˈDaa giri hééllá lulle hé chúká máá yú ki fedo-, yú shiguoká ha yú shigia.

⁷Har ye visateka, hééllá lulle hé kua yeedhe, Sátan hí mú chie.

⁸Yíésu mú ˈdéé hol ˈdú nie, kieye, Warˈgat Waaˈgiet kieye, Máá kua Guđo Waag tákámle viivíso, met gaa keekémo,[14] he chie, Yíésu hí mú yie.

⁹Aalé Sátan Yíésu ˈjien Yerusalem ˈdú eete, mú ˈBíl Waaˈgiet đírle állé ˈdérká ˈdú koyye, mú geeyche, kieye, Kuun har Iny Waaˈgiet kátaka, hol állá úr gáá lab,

¹⁰ˈdaa giri Warˈgat Waaˈgiet hí ki chie-, kieye, Waag gállé ˈgasso-, urruká ˈdéé hai ki muuˈda, giri gaal ko ˈdeˈdeen-,

¹¹ubaa gaal ko gil ˈdug ki egeet-, waar ko ˈgas mé ma ki ˈdaraminyká,[15] chieká, Sátan hí mú chie.

¹²Aalé Yíésu mú ˈdéé hol ˈdú nie, kieye, Warˈgat Waaˈgiet kieye, Ha Máá kua Guđo Waag ki ekemésenno,[16] he chie, Yíésu hí mú yie.

¹³Aalé Sátan mú hatal lulle ki ekeseteká, mú in ká siete, giri af éíy taaka mú hol ˈdu gáá nannaatoká.

¹⁴Yíésu fargogint Hím Naasan Waaˈgiet hol ki nadhe, Galilááya mé nie. Mú fayamle lés tol iđoká lulle eiy bash ki chie.

¹⁵Mu gáál énylé Waaˈgiet ˈdiiyiminyká gaa oonisie, mú gálaat lulle hí meey.

¹⁶Aalé Yíésu ˈjienlé giri Nasaret-, gáá guđandheká ki ˈjie. Mu hátlé aađaká Kúlích Hef ˈGisanká ˈbíl ˈdiiyiminyká hile. Mu les gaa kie, giri Warˈgat Waaˈgiet totoyoká.

¹⁷Aalé mú gaalí warˈgat máá Yisááya lé-, Waag hí ˈdéé ka shigicheká hí veereká shie. Mu warˈgát fuore, ál muí ˈdeenyéél gaa veereká af eey:

¹⁸Máá Guđo Waag Hím Naasanle hé ye gaa iđo. Waag hé ye salab mé ki liiyye, giri yú gál he maamanká Fayam Midhabká ki ˈdiyeenká. Mu ye ali gáá kaayallá he ˈdaa giri gál gaalí hiigidheká yú ki ˈdiyeen-, gaal yé ka ˈdeˈdeen-, gál biiy ma gaa arginyká úba yú ki ˈdiyeen-, gaal biiy gaa aargiroká. Mu úba ye ali gáá kaayallá he ˈdaa giri gál gaalí mé les ki tieká yú mé fuuro-,

¹⁹wár Waag hí midhantle gálaat gaa aargisichoká yú gáál ki ˈdiyeenká.[17]

²⁰Aalé mú warˈgát tuony hí gaa đuyyeká, mu warˈgát mare, warˈgát máá ˈbíl kinaal hujich gaa nannieká shie, les yíéđie. Gál ˈbíl ˈdiiyiminy kinaal gaa ijeká lulle mú gaa dhaay.

²¹Aalé mu ˈdéé huogodhe, gáál geey, kieye, Kúlíchallá ˈdeeny Waaˈgiet hí warˈgát gaa maalééllá hé ˈduway, muí yie.

²²Mu gáál lulle ger gaa meey, ˈdeeny midhab-, muí hogodheká gaalí af ˈdabe, gaal kieye, Hééllá hé iny Yuosef muunîny? gaalí yie.

²³Yíésu gáál geey, kieye, Hé ˈduwa, itín gon ˈdéé hótallá haí ye ˈdú hogoto: Máá gil onyi, hol bísish! Hé nyí maalle-, gáál af ˈdaˈdabsuo-, Kafarnáum gaa ekeycheká, lés kuallá úba gaa ékesh, haí ye cheedhe.

²⁴Tá hé ˈdúwaká yú hí geeye, máá Waag hí ˈdéé ka shigichoká hé gál lésle hí iiy ma yegen.

²⁵Hé ˈduwa, bár giri héle Elíya ali ijeká, ˈdeg burnayye-, híyeská hé Yísirayel gaa iđe. Bár kinaallá ir hé warram seđ ubaa ˈguiyam eiy le ma gaa túniny. Les lulle kuoˈd guđoká hí gáá ˈdiiyye.

²⁶Elíya hé ˈdeg híyes kinaal min níínní Waag hí ali ˈdú kaayyeká mán. Mú min hiyesidhe-, ény Sarafat giri ˈjien Siˈdon kí ˈjobonoyká gaa iđeká tákáma Waag hí ali ˈdú kaayye.

²⁷Bár giri héle Elísha ali ije-, máálle Waag hí ˈdéé ka shigicheká gál burnay-, nyókot ˈgieká hé lés Yisirayel gaa ije. Gál kinaallá hé máá níínní Waag hí bisicheká mán, Nááman giri máá Siriaká tákáma Waag hí bisiche, Yíésu hí gáál yie.

²⁸Aalé gál ˈbíl ˈdiiyiminyká gaa ijeká ˈdeenyéél maaleká lulle súm idhane.

²⁹Gaal les gaa kie, gaal mú é gaa eedhdhe, mú a chiˈde, mú gurmit giri gaalí é ˈdug gaa ˈdisseká kerka he úr gáá lalame.

³⁰Yíésu đo gáál toom nadhe, ali gaa sedhe.

³¹Aalé Yíésu Kafarnáum giri lés Galilaayaká mé nie, mu Kúlích Hef ˈGisanká ˈbíl ˈdiiyiminyká gálaat he gaa oonisie.

³²ˈDaa giri mu hát máá kansim ˈdúwaká ˈguoká ˈdéé ká hogodheká gaal mú he oonisinyle af ˈdabe.

³³ˈBíl ˈdiiyiminy kinaal geerle máá aryáán hí hille mare hí gaa ije. Máá kinaal súm kúóˈd ˈdoy, kieye,

³⁴Hêy! Yíésu Nasaretallo, meete ke hol ká ˈgaa? Ha ká chimie-, nyí beđisáta? Kúún yáá ko óg, kúún he Máá saas mán-, Waaˈgietká! yie.

³⁵Aalé Yíésu aryaan mú gaa iđeká il gíl gaa helie, kieye, Shab áat, mú yé gaa ˈdé! yie. Aalé aryáán máállé gaa iđe kinaal gáál hurt les ki ˈdoyye, mú yé gaa ˈdiiyye, hé hát mú koyyeká mán.

³⁶Aalé gálaat lulle he af ˈdabe, hol heegete, kieye, Hééllá ˈdeeny máre, ˈdeeny máálle kansimle ubaa fargogintle aryáán he ki mumuro-, aryáán gálaat yiem gaa ˈdeˈdeenal? gaalí yie.

³⁷Fayam Yiesu đo lés kinaal lulle eiy bash ki chie.

³⁸Aalé Yíésu ˈbíl ˈdiiyiminyká yé gáá ˈdie, mu ény Simon mé nie. Mu ál kinaal kí ˈdieká Símon suoglé furs ˈdeewká hí ˈgieˈgieká gaalí mú geey.

³⁹Yíésu min láá kí ˈdie, min báásh yé gaa ˈdeey. Min đo midhante, les gaa kiiyye, gáál gololiche.

⁴⁰Aadh dhúú ˈjiiyyeká gálaat lulle gállé basham ˈgie-, basham hí hol ká eiyyeká mú ˈdu gáá eey, mu gáál lulle gil ˈdú fie, gáál bisie.[18]

⁴¹Aryáán gál burnayká yiem gaa ˈdiiyye, koˈdam ˈdanne, kieye, Kúún he Iny Waago! chie. Yíésu aryáán il gíl gaa helie, giri aryáán shab chegetká. Aryáán mu hát he Messíyaká[19] hé onnoyye.

⁴²Burro-, biiy ka biˈdeká Yíésu kie, ál gálaat mán mare mé nie. Gálaat mú hol gaa ˈgeˈgedhe, mú argeká mú ˈdú sedhe, kerka mú síe he ririme.

⁴³Tá Yíésu gáál geey, kieye, Yú Fayam Midhab Guch Waaˈgietallá gon ˈjien eiy úba gálaat ha gaa oonisia. Yú hé kinaallá ˈdugaka Waag hí ye ali ˈdú gáá kaayye, yie.

⁴⁴Aalé mu lés gál Yuuˈdiká énylé ˈdiiyiminyká gálaat fayám gaa shiigie.