Read daasanach Lúka 8 Bible Online

Lúka 8 - daasanach bible

Lúka 8

¹Hé kinaal đueká, Yíésu đo ˈjien gaa naanadhe, gálaat he oonisie, gáál Fayam Midhab Guch Waaˈgietká shie. Lali giri tomon a naamaká úba mú hol eedhdhe.

²Gál ˈdíét giri Yíésu hí aryáán yé gaa ˈdeeyká ubaa gál ˈdíét giri muí basham gaa bisieká úba mú hol eedhdhe. ˈDeg kinaallá ˈdáá tikiˈd he mú María giri gaalí min ény Magaˈdala yegie-, Yíésu hí aryaan tiiyaká yé gaa ˈdeeyká,

³ubaa Iwánna, giri min Kussa-, bélle máá kansich Heróˈde hujich ki nannieká, tá Susánna. ˈDegééllá ubaa ˈdeg éíy taaka burnayyeká héllé ˈgayyeká Yíésu ubaa lalillé tomon a naamaká he ki wawayche.

⁴Nyésébích ilishká ˈjien yiem gáá ˈdeeˈdeme, Yíésu ˈdu gáá yimie. Yíésu gáál hibéél geey, kieye,

⁵Máá les fafuoká áár eedhdhe, sedhe, lésle fie. Mu af giri ár kinaal les fafieká áár ˈdáá tikiˈd ˈgierich af ki okoˈde, gál ˈgierich nanadheká hí ˈdú ˈdidhme, hurum hí koey.

⁶Áár ˈdáá tikiˈd ál waaroká ki okoˈde. Hirís hí yé ka ˈdiiyyeká, ˈdaa giri he bie ki ˈdabeká hirís đo gogoyye.

⁷Áár ˈdáá tikiˈd guˈdam híí ˈguoká ki okoˈde, hirís hí yé ka ˈdiiyyeká guˈdam híí ˈguo kinaal hí bolosie.

⁸Ár giri muí ál maal hí midhabká gaa fieká ká ˈdie, ˈdale, đuoram hí kúˈd yie, Yíésu hí yie. Aalé mu gáál hibéél geeyká mu af úr ki eey, kieye, Máá nee ˈguoká hí hééllá maalo, muí gáál yie.

⁹Yíésu lalille hí hib kinaal hélle heete.

¹⁰Aalé mu gáál geey, kieye, Itíni in hé geer geđi Guch Waaˈgietká Waag hí shiiche. Tá gáláátatíá íín he lulle hát hibietká yú geđia, giri gaalí dhaayka, gaalí ma aargiriny-, gaalí maaleka, gaalí ma kiimisanká.[26]

¹¹Aalé híb hélle hééllá: Aar he ˈdeeny Waaˈgiet.

¹²Ár ˈgierich af ki okoˈdeká he hát gál giri ˈdeeny Waaˈgiet maalo-, kor kídhích giri Sátan léká ká yiimet-, gáál ˈdéé hodhinaam gaa egeet-, giri gaal ˈdéé iiy ma yegen-, gaal rubach ma aargirinyká.

¹³Ár giri ál waaroká ki okoˈdeká hélle he hát gál ˈdeeny Waaˈgiet maalo-, ˈdéé hát geer gaa meentiká iiy yeget-, kor hidh les ma ki arînyká. Gál kinaallá he gál ˈdéé iiy yie-, kor á níínni yíéđieka, Sátan hí ki ekeseteka, ˈdéé gíl sug ki haađuoká.

¹⁴Ár ál híí ˈgayyoká ki okoˈdeká hélle he hát gál ˈdeeny Waaˈgiet maalo-, kor biiy hol ki sieteka, kamúr ubaa balchá, tá hé lesalloká gerle hí gaa ˈdeew-, he ˈgar aayaˈgoká. Gál kinaallá hé ˈdeeny Waaˈgiet ma ki higirany.

¹⁵Ár giri máá les fafuoká hí ál máálká gaa fieká hélle he hát gál ˈdeeny Waaˈgiet maaleka, ˈdéé ger ˈdúwa-, midhabká hát ˈdabaanká ki chiirat-, hol tatuo-, ˈdeeny Waaˈgiet ki higirawká, Yíésu hí lalille yie.

¹⁶Aalé Yíésu geđi kieye, Nyátáá gaalí ˈjiet gaa iđieka, hé máá hí ˈdébé af bubuoká mán. Héétí ubaa hí shomodhe gaa kakawká mán. Nyátáá úrro gaalí ki ređia, in gál ˈbíl higiloká ˈbíl geer gaa arga.

¹⁷Hé gaalí kaawká lulle Waag haí ká eedhesicha. Hé geer geđiká lulle kaany hai ˈdaaba, ha gaalí kiimita.

¹⁸ˈDeeny Waaˈgiet hí mamalloká hát ˈdabaanká nee kookóo, chiˈdíe. Máá hé gaalí gíl geer gaa kaayká tág chiratká, hé éíy taaka úba ha gaalí shigia. Tá máá hé gaalí gíl geer gaa kaay-, hélle ka dhaˈgame-, kor he tág ma chiranká héllé kinaal úba ha gaalí gaa egedhdhe, yie.

¹⁹Yíésu ˈjielle ubaa nyaaramle ká yimie. Aalé ˈdaa giri nyésébích gálaat hí ki ilshanayká, gaal ál Yíésu hol ki argoká mán.

²⁰Aalé Yíésu gaalí fayám shie-, gaal kieye, ˈJiekú ubaa nyaaramkú baaˈd ˈgee, ko aargiroká fede, gaalí yieká,

²¹Yíésu gáál geey, kieye, ˈJiechú ubaa nyaaramchú he gál ˈdeeny Waaˈgiet mamalo-, ˈdéé ki ˈgíéllá, yie.

²²Kulich tikiˈd Yíésu lalille geey, kieye, Kí bás ílung ˈdaatí yé ki ˈdie, yie. Aalé gaal kadich hile, kudhdhe.

²³Gaal kádíchlé gaa ijeká Yíésu in hí dhie, ram hí eete. Aalé waanich ká ˈdoy, huđum ká kiite, bie kadich geer faafame, gáál kufach hí kí hile.

²⁴Gaal Yíésu kiisie, kieye, Máá Guđo, Máá Guđo, kufach he gáál kí hile! yie. Aalé Yíésu les gaa kie, mu waanich ubaa húđúm ka ˈdarameká ki ˈday. Aalé waanich ali ki ˈdie, biiy đo ˈgidhiche.

²⁵Aalé Yíésu gáál heete, kieye, Iiy yeenkícho eeyye? yie. Gaal birge, he a ˈdabe, hol heegete, kieye, Héél máá máre, máá waanich ubaa huđum he ki mumuro-, he hí af maalóol? gaalí hol yie.

²⁶Aalé Yíésu ubaa lalille kudhdhe, lés Gerasan giri Bás Galilaaya ílung ˈdaatíká yé ki ˈdie.

²⁷Yíésu kadich gáá leledheká máá é gáá yimie-, aryáán hí hille mare hol arge. Máá kinaallá hé rám ilishká đafaraam ma gaa fáan, ubaa hé é ma gaa íđiny, mu likisham gaalí gálaat ki ˈgoˈgodheká he gaa ije.

²⁸Mu Yíésu argeká mú ˈgas met les gaa ˈdoy, súm af úr ki eey, kieye, Yíésu Iny Waag Úr Iđóóllo, meete ke hol ká ˈgaa? Gillo yú ko ki efe, ha ye manyjasîny, yie.

²⁹Máá aryáán ˈgieká hatallá yíéllá, ˈdaa giri Yíésu aryáán geey-, kieye, Máállá yé gaa ˈdé, yieká. Aryaan kinaallá úba kíssóótí af burnayká mú ki chegies. Har úba af kinaal gaalí nyarugano gil ubaa ˈgas ki ˈdane-, tá gaalí ˈbíl gaa kakayka, mu aadh lullé hé kinaal eiy ˈgiˈgita, aryáán hí ˈbakat ˈdú egeete.

³⁰Aalé Yíésu mú heete, Meenykú háteeye? yie. Mu Yíésu ˈdéé hol ˈdú nie, kieye, Meenychú Yuoy, yie. Mu hatallá yíéllá, mú aryaan burnayyeká hí gaa iđe.

³¹Aryaan giriká Yíésu gil ki efiyye, giri muí he ma ki muuriny-, ma keeminy-, ˈguoˈd gaa ˈdér-, el mé mánká ma higilinyká.

³²Ál kinaal golchom burnayká gaalí gúm ˈdug gaa ˈdeˈdeme. Aalé aryaan burnayye-, mú gaa iđe kinaal Yíésu gil ki efiyye, giri golchom higilloká. Aalé Yíésu aryáán af iiy yie.

³³Aryaan giriká máá giriká yé gaa ˈdiiyye, golchom hille. Golchom giriká gúm gáá okoˈde, bás ki ˈdiiđime, kufe.

³⁴Gál golchom ˈdeˈdemeká héél argeká ˈdoˈdodhe, gaal gál é gaa ijeká ubaa gál forimle é kí ˈjobonoy mare fayám shie.

³⁵Aalé gál giri fayám maaleká ká yimie, hé aargireká he fede. Aalé gaal Yíésu af kí ˈdieká gaal máá giri aryáán hí yé gaa ˈdiiyyeká arge, mu Yíésu ˈgas met gaa ija, đafaraam fádhdhe, ˈdaalilédhe! Gaal đo neey.

³⁶Gál hé kinaal argeká gál ka yimieká máá aryáán ˈgieká hát Yíésu hí bisieká geey.

³⁷Aalé gál giri lés Gerasan ˈdinnam lulle gáá yimieká sierm hí súm faanne. Gaal Yíésu gil ki efe, giri muí lésle gaa kekeenká. Aalé Yíésu đo kadich hile, hol nadhe.

³⁸Máá giri aryáán hí yé gaa ˈdiiyyeká Yíésu hátlé giri hol ma náanká mú gil ki efe, giri mú hol egeetká. Yíésu hé mú síé ma shíiny, mú hol nie, kieye,

³⁹Énykú hol ˈdú nú, hé midhab Waag hí ko ki ekeychééllá énykú gaa ˈdiiyímo, mú yie. Aalé máá giriká sedhe, héllé midhab Yíésu hí ki ekeyká ˈjien lulle gaa ˈdiiyime.

⁴⁰Yíésu bás ílung ˈdaatí hol gáá nadheká, nyésébích guđo-, mú egeseká lulle ger hí gaa meedhe, mú agim nadhe.

⁴¹Ál kinaal máá gaalí Yáíras yegie-, ˈbíl ˈdiiyiminyká mé ki yiel mare úba Yíésu ˈdu gáá yimie, Yíésu ˈgas met les gaa ˈdoy, mú gil ki efe, giri muí ényle seseenká.

⁴²Yáíras Yíésu hatallá heetééllá ˈdaa giri veellé ali ka takach-, harte-, war hí tomon tikiˈde a naamaká hí súm gil ki ayaˈgiyyeká. Aalé Yíésu sienylé gaa igire-, ˈbíl Yairas sesemeká nyesebich hí ki tame.

⁴³Min fas hí warram tomon tikiˈd tá a naam gaa hegeleká hé nyésébích kinaallá gaa iđe. Min kinaallá héllé ˈgayyeká lullé gilóny ˈdú beesete, kor hé máá níínní hí bisieká mán.

⁴⁴Aalé min kinaal Yíésu sug ki ˈdiiyye, mú đafar net đig chie. Min fáslé hí gaa hegeleká ál tikiˈde kinaal đo ali ki ˈdie.

⁴⁵Aalé Yíésu gáál yiete, kieye, Mááya ye đig yie? yie. Aalé gálaat lulle kieye, Nyáá nyí ko đig ma chéen, yieká, Bétiro kieye, Máá Guđo, nyesebich hé tág ko ki made, tá ko kí tame, yie.

⁴⁶Aalé Yíésu kieye, Máádhat hé ye đig yie, fargogínt hát ye yé gaa ˈdiiyyeká yáá hol kimite, yie.

⁴⁷Min giriká hát níínní hol kaayyo mán argiyyeká hol yé ká ˈdeeyche, fađanne, Yíésu ˈgas met les gaa ˈdoyye. Min hát Yíésu đig chie-, ál tikiˈde kinaal đo gaa biiyyeká gálaat met gaa hote.

⁴⁸Aalé Yíésu min geey, kieye, Inííllo, iiy yeen kua ye iiy chíéllá hé ko bisiche, Waag ki sí, yie.

⁴⁹Yíésu hátle ˈdéé af ká ˈgaa, Yáíras mú tikiˈd hí fayam ényle ˈdu gáá sidhe, mu kieye, Inikú hé mán chie, háteka máá gáál he oonisúól hawul ˈgeˈgetóol? muí yie.

⁵⁰Yíésu héél maaleká Yáíras geey, kieye, Ha néeny, iiy tákámle áat, veel hai miidhandha, mú yie.

⁵¹Yíésu he é nyuoreká, mu hé máá níínní éíy taaka iiy yie-, hol ˈbíl ˈgar hileká mán. Gál mú hol ˈbíl ˈgar hileká he Bétiro, Yuána, Yákob, tá véel gállé hí ˈdaleká tákáma.

⁵²Gálaat lulle shiilmite, véel ˈdú buoy. Aalé Yíésu gáál geey, kieye, Haí búony, veel hé ma kúfiny, veel hai rafe, gáál yie.

⁵³Gál giriká Yíésu eeshey, ˈdaa giri gaal veel hát he mán yieká ógká.

⁵⁴Aalé Yíésu véel gíl chiˈde, kieye, Ákutú, les gaa keʼ, véel yie.

⁵⁵Véel đo sídhle hí hol ˈdu gáá naate, veel les gaa kie. Aalé Yíésu gáál geey, Véel hé geere shía, yie.

⁵⁶Véel gál hí ˈdaleká he af ˈdabe. Yíésu gáál ˈdéé ki mure, giri gaal máádhat hééllá ma geđinyká.