Read daasanach Yuána 10 Bible Online

Yuána 10 - daasanach bible

Yuána 10

¹Aalé Yíésu kieye, Yú hí hé ˈdúwaká geeye, máá wála ˈdeeyle kárle ma kí higiliny-, ˈdeey hođoˈd kí tunoká he máá buraallé-, he fargogínt ki egeetká.

²Tá máá wála ˈdeeyle kárle kí higiloká he máá wála lé-, wála ˈdeˈdeenká.

³Máállá hé máá wála ˈdeeyle kárle ˈdeˈdeenká hí kar af ki fufura. Máá wála léká hé walalle hí af kiimisat, mu hé walalle meet veveen, wala hí ˈdú seseen, wála yíé ˈdeđisat.

⁴Aalé mu walalle lulle yíé ˈdeeteka, hé wála met nannaat, tá ˈdaa giri wala mú afle ógká hé mú el gaa vereno.

⁵Wala hé máá afle ma kiimisanká el ma gaa vereniny, mú kar hai gaa ˈdarama, Yíésu hí gáál yie.

⁶Yíésu gáál hibéél geeyká, gaal hé híb hélle eiy ma náásan.

⁷Aalé Yíésu geđi kieye, Yú hí hé ˈdúwaká geeye, yú he wála kárlé.

⁸Gál ye met ká nadheká lulle he gál buraa lé-, he fargogínt ki egeetká,[35] tá wala hé gáál af nee ma kôny.

⁹Yú he kar, máá ye ka naatká rubach hai aargira. Mu ˈdeey hai ká higila, kor yíé hai ˈdeeme, hai ˈdeedhme.

¹⁰Máá buraa léká ká yimieka, hé buruanká, hé yegeská, ubaa hé ˈdeđeneyoká tákáma hí ká egee. Tá yú ka yimíéllá he giri gál ye af maaleká luolmít aargiro-, luolmít ˈduuwle gaa yíéđianká.

¹¹Yú he Máá ˈdúwa-, wála ˈdeˈdeenká. Máá ˈdúwa-, wála ˈdeˈdeenká sídhlé he wála ˈdú silmia.

¹²Máá gaalí he ki gugusso-, wála ˈdeeˈdémo, gaalí yieká, hé wála hát máá hí léká hí ˈdeˈdeenká ma ká ˈdeˈdeminy. ˈDaa kinaallá ˈdugaka in mu bíních kach ˈguoká wála ˈdu gáá yiimet-, argeka, wála okoˈdmia, kar ˈdarama, binich wála walach gaa ˈgiiliˈgaa, waláátí eiy baađaa.

¹³Máá kinaallá wála in kar ka ˈdaraanallá, he ˈdaa giri mú gaalí he ki gugusso-, wala hí geer ma gaa ˈdeenenyká.

¹⁴Yú he Máá ˈdúwa-, wála ˈdeˈdeenká. Yú yáá walachú óg, tá walachú íín hé ye óg,

¹⁵hát káána ˈJaachú ye óg-, yú úba ˈJaachú ógallá. Sídhchú wála ha yú ˈdú silmia.

¹⁶Yú yáá wala éíy taaka ˈdeeyééllá gaa láká ˈguo. Wala kinaallá úba ha yú ká ˈdaanna. Wala kinaallá úba af ha ye maala. Waláállá lulle me tikiˈd haí yeedhe, máállé hí ˈdeˈdeenká tikiˈde.

¹⁷ˈJaachú ye gielallá he ˈdaa giri yú sídhchú silmuo-, kufunan-, sídhchú geđi yáálle hí hol ka nannasatká.

¹⁸Sídhchú hé máá níínní hí ye gaa silmuoká mán, yáállé tákáma hí silmia. Yáá fargogint sídhchú ki silmuo-, tá geđi yáálle hí hol ka nannasatká ˈguo. Hemuritééllá ˈJaa chia yú gaa arge, muí gáál yie.

¹⁹Yíésu hatallá tákáma yie, gál guguđo-, Yuuˈdiká geđi eiy ˈgite.

²⁰Gál burnayká kieye, Mu in aryáán ubaa sigír ˈgaa háluke, tá mú meete ke af nee ˈdú kokoo? yie.

²¹Tá gáál ˈbáál íín kieye, Hééllá hé ˈdeeny máá aryáán ˈguoká hí hogodhoká muuniny. Máá aryáán ˈguoká háteeye máá in mánká in yé ká ˈdeđia? yie.

²²Aalé Yerúsalem álle ˈjila ˈBíl Waaˈgietká ali kí ˈdiiyye.[36] Hé kinaallá he af giri ˈdeenyietká.

²³Yíésu af kinaallá ˈBíl Waaˈgietká gáchlé gaalí Gách Solomon yegetká gaa seseme.

²⁴Aalé gál guguđo-, Yuuˈdiká mú ki made, mú yiete, kieye, Kúún taalle ger totom gaa ˈgiˈgisan nyí mé ki kokoyyo! Ebá kúún har Messíya[37] kátaka, nyí hát ˈdabaanká ka géesh, gaalí mú yie.

²⁵Yíésu gáál ˈdéé hol ˈdú nie, kieye, Yáá kis hí ma géeny, tá itín it ma đíin! Hé gálaat af ˈdaˈdabsuo-, yú ˈJaachú hemuumuritle ki ekemeyóóllá, ˈduuwchú eiy haí kí nannaa,

²⁶tá ˈdaa giri itín hí walachú muuninyká it ye iiy ma chegen.

²⁷Walachú hé afchú maalo, hé yáálle hí óg, ye igiro.

²⁸Hé yáálle hí luolmit biiyoká shiguo, hé ma kufuminy. Hé máá níínní hí ye af ki ririat-, hí ye gíl geer yé gaa ˈdeđisatká mán.

²⁹ˈJaa chia ye waláállá ka shieká ííni guchle he met lulle a mé ˈdú gíri. Waláállá hé máá níínní hí ˈJaachú af ki ririat-, hí mú gíl geer yé gaa ˈdeđisatká mán.

³⁰Yú ubaa ˈJaachú nyí tikiˈde, Yíésu hí gáál yie.

³¹Gál guguđo-, Yuuˈdiká đo geđi waar mú ki tutunoká shuunne.

³²Aalé Yíésu gáál geey, kieye, Yáá hé hí af ˈdaˈdabiyye-, burnay-, midhab-, ˈJaachú yé gáá ˈdeˈdemeká hí ká aargisie. Tá hé kinaallá lulle hé máre hí ye waar ˈdú tuunna? muí gáál yie.

³³Gaal mú ˈdéé hol ˈdú nie, kieye, Nyiin hé kua mákárta-, midhab-, ekeycheká ˈdaalle nyáá nyí ko waar ma ki tutuniny. Nyiin ˈdaa giri kó máádhátallá Waag chachaˈdo-, hol Waag hoycheká in nyí ko waar ki tuunna, gaalí mú yie.

³⁴Yíésu kieye, Warˈgasamkícho hé ˈdeeny Waag hí hote-, kieye, Itín hí waagam, chieká, hé hí gaa mán? [38]

³⁵ˈDeeny Waaˈgiet hé hol ma gaa sorominy. Waag gál ˈdeenyéél shiicheká in waagam chie háluke,

³⁶tá háteka, yáá giri ˈJaa chia Waag ye taak kodhdhe-, ye lésal ali ˈdú gáá kaayká, hí ye hatal ka geđichóol? Yú he Iny Waago, yú hí yieká, hí kieye, Kó Waag chaachaˈde! hí ye chegedhóol?

³⁷Har yú hé midhab-, ˈJaachú yé gáá ˈdeˈdeenká ma ekemenyka, haí ye iiy chéen.

³⁸Tá yáá hé midhab kinaallá ekemeyo. Har úba káána hí ye iiy ma chegenka, hé midhab yú ekemeyoká iiy yiedhíe. Hát kinaallá in hát ˈJaachú ye gaa ijo-, ˈJaachú íín yú gaa ijoká hí kiimisata, hí eiy naasata, Yíésu hí gáál yie.

³⁹Aalé gaal geđi mú ˈgiliˈgany gaa ˈgeˈgedhe, mu đo gáál mé af ˈgite.

⁴⁰Aalé Yíésu hol nadhe, wár Yorˈdan ílung ˈdaatí yé ki ˈdie, ál Yuána hí gálaat bie gim gaa nannieká gaa yíéđie.

⁴¹Gál burnayká mú ˈdu gáá yimie. Gaal hol geey, kieye, Yuána hé gálaat af ˈdaˈdabsuo-, ekeyká mán, kor he lullé ˈdaa maallo-, he huogodheká hé ˈdúwa, gaalí yie.

⁴²Aalé gál burnayká ál kinaallá Yíésu iiy gaa yie.