Read daasanach Yuána 15 Bible Online

Yuána 15 - daasanach bible

Yuána 15

¹Aalé Yíésu kieye, Yú he ˈgór ˈdúwaká. ˈJaachú he máá ˈguor ootoloká.

²Mu kolm ye ki ˈgie-, saano hí ma gaa higisinyká ali hai gaa muura, kolm saano hí gaa higissoká íín in hollo hol ki nannaa, giri saano hí hát ˈdabaanká gaa higissoká.

³Itín ˈdeeny chia yú hí geeyká ˈdaalleka, it káána kolm ye ki ˈgie-, ˈJaachú hí in hol ki nannuoká chie.

⁴Ye gaa yíéđía, yú hí gaa yíéđia. Kolmit hé tákámle ma higisiny, ˈgórle ki taalka, in higita. Itín hí ye ma ki ˈgiinyka, it ma higisiny.

⁵Yú he ˈgór, itín hí kolmo. Máá ye gaa yíéđuo-, yú gaa yíéđuoká, súmmo higissa. Itín hí ye gaa líítaka, it hé níínní hí uˈdaká mán.

⁶Máá ye ma gaa iđinyká, he hát kolmit gaalí lay-, gogoyyeká. Kolm hatallóóllá hollo gaalí hol ˈdú shuguna, ˈjiet ha gaalí ki lalama, hai ˈdunnuma.

⁷Har hí ye gaa iđa-, ˈdeenychú hí gaa ijoka, hé hí feˈdeká heetíe, haí aargiˈda.

⁸Itin saano burnayká hí gáá higisso-, hí lalichú ká iđaka, hé kinaallá in ˈJaachú ˈdúúw shigia.

⁹Gielmit ˈJaachú hí ye ká ˈguoká in yú hí ká ˈgaa. Gielmit chiallá gaa yíéđía.

¹⁰Hát yú hemuumurit ˈJaachú ki yaal-, mú gielmitle gaa ijóóllá, itín har hí hemuumuritchú ki taalka, gielmitchú haí gaa yíéđianna.

¹¹Yáá hí hééllá geey, giri geer gaa meenchú hí gaa yíéđianno-, geer gaa meenkícho ˈduuwayoká.

¹²Hemuritchú hééllá: Hát yú hí gielallá itín úba hol geelnedhíe.

¹³Gielmit máálle sídhle sheelle ˈdú sillieká, hé gielmit níínní guđo-, hí a mé iđoká mán.

¹⁴Hé yú hí ki mureká ˈgíéríchle hí naateka, itín hí sheelchú.

¹⁵Yáá geđi hí géde ma yegen, ˈdaa giri gedech máállé hí hoteká héllé ekemeyoká muogká. Yáá káána hí sheelchú yie, ˈdaa giri he lullé yú ˈJaachú gaa maaleká, yú hí geeyká.

¹⁶Itín it ye ma ka éeny, yaa hí ká shuune, hí hujichaam met ki kuokoy, giri hí seseenne-, saano hí gáá higisso-, saano kinaal bííyyo ali ijo-, hé hí ˈdaa meenychú ˈJaachú ki hegesetoká muí ká shiguoká.

¹⁷Hé yú hí kí mureká hééllá: Hol geelnedhíe, Yíésu hí gáál yie.

¹⁸Aalé Yíésu geđi kieye, Har les gálle hí nebítaka, hát erkob ye nebedheká onnóo.

¹⁹Itín hí lésallá gálle kátaka, les hát hí léká gálle onnônyka hé hí giel. Itín ˈdaa giri hí gál lesalloká muuniny-, yú hí waaˈde-, hí lésallá gíl sug ki haycheká in les gálle hí neb.

²⁰ˈDeeny yú hí geeyká táb ˈdodhdhíe, giri yú kieye, Gedech hé máállé hí hoteká ma ˈdú ˈduwanany, yú yieká. Gáál ˈbáál hé ye manyjasie, gaal itín úba haí maanyjasia. Gáál ˈbáál hé he onisinychú chiˈde, gaal he onisinykícho úba hai chiiˈda.

²¹ˈDaa giri itín hí gálchú-, ubaa Máá ye ali gáá kaayká gaalí muogká, in gaalí hatallá maanyjasia.

²²Yú onnônyka ma ká yimen-, gáál ma geenyka, gaal hé onnônyka ađaabano mán. Tá káánaka, gaal hé hát níínní ađaabano gaa faalanká mán.

²³Máá ye nébká hé ˈJaachú úba néb.

²⁴Yú onnônyka hé gálaat af ˈdaˈdabsuo-, máádhat hí ma ekemenyká gáál hurt ma gaa eekemenyka, gaal hé onnônyka ađaabano mán. Tá káána gaal hé hé kinaallá arge, kor hé yú ubaa ˈJaachú nyí hol ˈgar nebedhe.

²⁵Tá hééllá hé gaalí Warˈgat Waaˈgiet gaa veere-, giri kieye, Gaal hállééllá ye nebedhe, chieká, he ˈduwasie. [52]

²⁶Máá hí rangʼite-, ˈJaachú gáá yiimetká ali ha yú hí ˈdu gáá kakaa. Máá kinaallá he Hím Naasan ˈJaachú yé gáá ˈdeˈdeen-, hí ˈduuw Waaˈgiet af ki tatuoká. Hím Naasan kinaallá in hí ˈduuwchú geđia.

²⁷Aalé ˈdaa giri kíssóótí ke hol ˈgie-, káána đigallá itín úba ˈduuwchú gálaat haí geđicha.