Read daasanach Yuána 16 Bible Online

Yuána 16 - daasanach bible

Yuána 16

¹Hééllá lullé yú hí geeyallá, he giri iiy yeen kíchia hí ye ka ˈgayyaká hí ma haađinyká.

²Itín gaal ény ˈdiiyiminyká haí ká riidha. Tá bár gál hí yegeská kieye, Nyíín Waago nyí hujich ki nanniyya, yegetká, hé geđ igiˈdo.

³Gaal hí hééllá ki ekemeyóóllá he ˈdaa giri gaal ˈJaachú ubaa yú nyí muogká.

⁴Aaléka, yáá hí geey, giri hééllá bárle ali kí ˈdiiyyeka, hát yú hí geeyká hí táb ka ˈjeenká. ˈDaa giri kis ke hol ˈgieká in yú hí hééllá biiy ératíá ma gáá géeny.

⁵Tá káána yú Máá ye ali gáá kaayká bííylé mé nannaa, tá itín it máá níínní ye hegeset-, kieye, Ále seseenne? ye yegetká mán.

⁶ˈDaa giri yú hí hééllá geeyká, in ger hí gaa ˈdeenedhe.

⁷Tá yú hí hé ˈdúwaká geeye, kímchú hé hí ki midhab. Har yú ma kiinyka, Máá hí rangʼit yegetká hé hí ma ˈdu gáá yiimen. Tá yú sedheka, mú ali ha yú hí ˈdu gáá kakaa.

⁸Mu ká yimieka, gálaat tawunylé ˈdaa ađaabano-, ubaa he fedit Waaˈgiet-, tá ˈdéé ki iđiny Waaˈgietká hát gaalí taawuo-, tagle muuninyallá gáál eiy hai ki nannaa.

⁹Ađaabano muí gáál eiy ki nannúóllá hélle hééllá: Gaal ađaabano ˈgúóllá, he ˈdaa giri gaal ye iiy ma yéenká.

¹⁰Mu he fedit Waaˈgiet hélle gálaat eiy ki nannúóllá, he ˈdaa giri yú bííy ˈJaachú mé nannuo-, hí ye ál ˈjob ma gaa aargirinyká.

¹¹Tá ˈdéé ki iđiny muí gálaat eiy ki nannúóllá, he ˈdaa giri Waag kis kánsích lesallo-, Sátan léká ˈdéé ki iđicheká.

¹²Yú yáá hé guđo-, hí ka geđuoká ˈguo, kor it káánallá hé kinaallá ma uriny.

¹³Tá Hím Naasan hí ˈduuw Waaˈgiet af ki tatiyyo kinaallá ká chimieka, he lullé ˈdúwaká af haí gáá kokoyyo. Mu hé hélle ma hogon, mu hé maaleká hai hogodho, hé geđ igiroká haí ká geđia.

¹⁴Mu héchú met hai ye gáá egedhdhe, haí ˈdu gáá siidha, eiy haí kí nannaa. Yaalmitééllá in mu ye ˈduuwasia.

¹⁵He lullé ˈJaachú hí léká, héchú. ˈDaa kinaallá in yú kieye, Hím Naasan héchú met hai ye gáá egeete, haí ˈdu gáá siita, eiy haí kí nanniyya, yú hí yie.

¹⁶It guch guđo hí yíéđiannoká mán it ye ma aargiriny, it guch guđo úba hí yíéđiannoká mán đo haí ye argiyye, Yíésu hí lalille yie.

¹⁷Mú lalille ˈbaal hí hol heegesete, kieye, ˈDeeny muí hodhe-, mu kieye, It guch guđo hí yíéđiannoká mán it ye ma aargiriny, it guch guđo úba hí yíéđiannoká mán đo haí ye argiyye, muí yíéllá, kor hélle meete? Héétí ˈdeeny muí hodhe-, kieye, Yú ˈJaa chia bííyle mé nannaa, muí yíéllá, hélle úba meete? gaalí hol yie.

¹⁸Aalé gaal taalle hol heegete, kieye, Guch guđo mán, hélle meete? Hé muí hogodhóóllá, har ki múógaa! gaal hí hol yie.

¹⁹Yíésu hát gaalí ˈdéé hótal hegesetká kimite, gáál geey, kieye, He in hé yú hodhe-, yú kieye, It guch guđo hí yíéđiannoká mán, it ye ma aargiriny, it guch guđo úba hí yíéđiannoká mán đo haí ye argiyye, yú hí yíéllo, hélle hí hol hegesete?

²⁰Yú hí hé ˈdúwaká geeye, itín haí beenne, imiro haí ˈjiibicha, les gálle íín ger haí gaa meedhe. Itín ger haí gaa ˈdeđendhe, tá ger gaa ˈdeenenkícho geyyiny yé hai ˈdú ˈdeenne.

²¹Min ˈdal hí ká chirate-, geer hí veerenneka, đo gon haí boloyye. Hol eiy niiyyeka, gon bolo he argiyyeká gíl sugó ki hayche, geer haí gaa meedhe, ˈdaa giri véel ˈdalleká.

²²Aalé káánaka, itín it ger hí gaa ˈdeenedhe. Tá yú geđi hollo ke hol aargira, af kinaallá ger haí gaa meedhe, geyyiny kíchia kinaallá hé máá níínní hí gaa egeetká mán.

²³Kúlích kinaallá it hé hí ye hegesetoká mán. Tá yú hí hé ˈdúwaká geeye, ˈJaachú hé hí ˈdaa meenychú ki hegesetoká haí ká shigia.

²⁴It hátle hé hí ˈdaa meenychú ki ruogonneká mán. Roogonóo, he haí aargiˈda, ger súm haí gaa meedhe.

²⁵Hééllá lulle hát he hol ki ekeny-, hibanoká yú hí ká geey. Tá aadh ˈgas yú hí hát he hol ki ekeny-, hibanoká ma ká geđiny-, yú hí yaalmit ˈJaachú hát ˈdabaanká ka geđuoká ali hai kí ˈdeenne.

²⁶Kúlích kinaallá ˈdaa meenychú he haí ki rogononno. Tá yáá kieye, Itín ˈJaachú he yú hí kí rogonmo, hí ma yegen.

²⁷ˈJaachú íín hé hí giel, ˈdaa giri itín hí ye giel-, ubaa yú hát Waag gáá yimieká hí iiy chieká.

²⁸Yú ˈJaa chia gáá yimie, in lésallá mé ká nie. Aalé káána lésallá ha haađia, ˈJaa chia hol ˈdú naadha, Yíésu hí gáál yie.

²⁹Aalé Yíésu lalille kieye, Đug, kó káána ˈdeeny édhká huogote, kó hibano hélle nyí eiy ma nannasanká ma húógon.

³⁰Aaléka, hát kuun he lulle óg-, máá ko ˈdéé hol ˈdu gáá nannuo-, mánká nyáá nyí argiyye. Hééllá in hát kuun Waag gáá chimieká nyí iiy hoy, gaalí mú yie.

³¹Yíésu gáál ˈdéé hol ˈdú nie, kieye, Afééllo hí iiy chegedhe?

³²Bá dhaayyíe, aadh ˈgas hé tág ká ˈjobonte, giri itín hí eiy baađayya-, hí eiy gaallaʼ-, hí ye tákámchú ká gaataká. Tá yáá tákámchú ma ká ˈgiisan, ˈJaachú nyáá nyí hol ˈgayya.

³³Yú hí hééllá geeyallá, he giri ˈdaachúka, hí naanná aargiˈdaká. Lésallá he il haí gaa aargiˈda, tá haí ger mare ˈgíiny, yáá les ká adhdhe, muí gáál yie.