Read daasanach Yuána 17 Bible Online

Yuána 17 - daasanach bible

Yuána 17

¹Aalé Yíésu ˈdeeny kinaal beeteká đo úr gaa dhaay, kieye, Baabá, aadh ˈgas hé ali kí ˈdiiyye. Inykú ˈduwásish, Iny íín hí ko ˈduwayo.

²Kuun kó kansim yáá Iny kuallá hí gálaat lulle he ki mumuroká ye shiiche, giri gál ye ka shiicheká lulle yú luolmit biiyoká shiguoká.

³Luolmit biiyoká hatallá gaalí aargira, giri kúúni Waag tikiˈde-, ˈdúwáállá gaal ko óg-, yáá Yiesu Kirísto-, kuun ye ali gáá kaayyééllá úba gaal ye ógká.

⁴ˈDaa giri hújích ye ka shiicheká yú beeteká, yáá ko lésallá gaa ˈduway.

⁵Aalé, Baabá, ye ˈduuw héle les hátle biiy gaa mannayyeká yú ubaa kuun ke hol ka ˈgieká, ye káánallá ki ˈdúwash.

⁶Yáá gál ye lésallá gáá shiicheká húgúmkú argisie. Gaal he gálkú, kúúni hí ye ká shiiche, gaal hé ˈdeenykú el gaa veere.

⁷Aalé káána, gaal he lullé ye ka shiicheká hát ko yé gáá ˈdieká hé kimite.

⁸Fayam ye ka shiicheká yáá gáál shie, hé gaalí iiy yie. Gaal hát yú ko yé gáá ˈdieká hé eiy naate, tá kuun hát ye ali gáá kaayyeká úba hé iiy yie.

⁹Yú ˈdaa galallá ko kí rogonmo, yáá ko les gálle ˈdaalle ma kí rogonminy. Tá gál ye ka shiichééllá he gál yú ko kí rogononká, ˈdaa giri gaal he gálkúká.

¹⁰He lullé yú ˈguoká hékú, tá he lullé kuun hí ˈgayyoká héchú. Tá gáál ˈdaalleka, ˈduuwchú hé gálaat hí arge.

¹¹Yú yáá lésallá ma gaa iđiny, yú bííy kua mé ká nannaa, gaal íín lésallá he kí ˈgiita. ˈJaa chia saas mánnallo, meeny kua ye ká shiichééllá ˈdaalleka, gáál in ki ˈdé. Hát muun ke tikiˈdééllá, gaal íín úba hí tikiˈd yeet.

¹²Af giri gáál nyí hol ˈgayyeká meeny ye ká shiichééllá yú gáál in ki yiel, in gaal naanná ije. Gaal hé máá níínní muun gáál gaa ˈgiteká mán. Gálallá máállé tikiˈde-, muun gáál gaa ˈgiteká he iny baađawká tákáma,[53] giri ˈdeeny kua warˈgát hí hoteká ˈduuwawká.

¹³Yú káána bííy kua mé ká nannaa. Hééllá lésallá yú gaa hogodho, giri geyyinychú gálallá koch chegetká.

¹⁴Yáá gáál fayamkú shie. Tá ˈdaa giri gaal íín hát yúka, gál lesallo-, muuninyká, gáál hé les gálle hí nebedhe.

¹⁵Yáá ko ma rogonminy, kieye, Gáál lésallá gaa éeb, ma yegen, he gáál ˈdaa Sátanáka in ki ˈdé, yú yegedhe.

¹⁶Hát tikiˈde yú máá lesallo-, muuninyallá, gaal íín úba hé gál lesallá muuniny.

¹⁷Gáál hol taak ki kúo, gáál ˈduuwkú ki dhíir. ˈDuuw kinaallá he ˈdeenykú.

¹⁸Hát ye les ali ˈdu gáá kaayyééllá, yú úba yáá gáál alb fie.

¹⁹Gaal íín ˈdaalle ˈdugaka in yú dhúrchú ko hol taak kí koy, giri gaal íín úba ˈdeeny kua ˈdúwaká hí ko taak kí kokuoká.

²⁰Yáá gálallá tákámle ko ma kí rogonminy, yú gál fayam chia gálallá hí hogodhoká maalo-, ye iiy yegetká úba ko kí rogonmo,

²¹giri gaal lulle tikiˈd yegetká. Baabá, hát kuun ye gaa iđo-, yú ko gaa ijóóllá, gaal íín úba hí muun gáál gaa yíéđuo, giri les gálle hát kuun ye ali gáá kaayyeká iiy yegetká.

²²Yáá gáál ˈduuw kuun hí ye ka shiicheká shie, giri gaal íín hát muun ke tikiˈdééllá íín úba tikiˈd yegetká.

²³Hát yú gáál gaa ijo-, kuun ye gaa iđóóllá, gaal hí hát ˈdabaanká tikiˈd yeet, giri les gálle hát kúún ye ali gáá kaayye-, gielmit kuun hí ye gielká, úba kuun hí gáál gielká kiimisatká.

²⁴Baabá, gál ye ka shiichééllá, ál yú gaa ijoká úba yíéđian-, guch chia ye ka shiichééllá úba aargiroká yú fede. Kuun les hátle biiy gaa mán, in ye giel, ye guchééllá ká shiiche.

²⁵ˈJaa chia saas mánnallo, har úba les gálle ko móíytaka, yú yáá ko óg, tá hát ye ali gáá kaayyeká hé gál chiallá úba hí óg.

²⁶Yáá gáál ˈduuwkú onisie, gaal ko onnodhe, tá gáál taalle ha yú ko oonisia, giri gielmit ye gielká úba gáál gaa iđo-, yú úba gáál gaa ijoká, Yíésu hí ˈJaalle yie.