Read daasanach Yuána 18 Bible Online

Yuána 18 - daasanach bible

Yuána 18

¹Aalé Yíésu ˈdeeny kinaal beeteká ubaa lalille hol eedhdhe, Il Kediron hođoˈd ˈdoy. Gaal ˈguor saano salab-, íl in ˈdaatí ˈgieká hile.

²Yúúˈdas giri gál Yíésu oosle ˈguoká Yíésu ˈdu gáá egewká hé ál gaalí sedhe kinaal onnoy, ˈdaa giri Yíésu ubaa lalille ál kinaal af burnayká hol ˈdú sesemeká.

³Aalé Yúúˈdas, yuoy ubaa gál ˈBíl Waaˈgietká ˈdedeen-, giri gál guguđo-, suoryoká, ubaa gál Farisaay hí ali ka fieká eedhdhe. Gaal nyátáá ubaa kat ˈjiet hí gaa boloonnoká, tá ˈgulo shuunne, ál kinaal mé nie.

⁴Yíésu hát he lulle il hí aargiˈdoká ógká, gáál af ki sedhe, gáál yiete, kieye, Mááya hí hol gaa ˈgeˈgete? yie.

⁵Gaal mú geey, kieye, Nyiin Yíésu Nasaretká nyí hol gaa ˈgeˈgete, gaalí yie. Yíésu kieye, Yíésu Nasaret he yú, yie. Yúúˈdas giri mú gáál ˈdu gáá eeyká hé gál kinaallá hurt gaa yiel.

⁶Aalé tikiˈde Yíésu kieye, He yú, yegetallá, gaal đo el ki gaagabe, les ˈdane.

⁷Mu geđi gáál yiete, kieye, He in mááya hí hol gaa ˈgeˈgete? yie. Gál giriká kieye, Yíésu Nasaretká, yie.

⁸Aalé Yíésu kieye, Yáá kis hí geey, he yú, yáá hí yie. Aalé káána hí ye hol gaa ˈgeˈgete háluke, gálallá hayyíe, hí siet, yie.

⁹Hééllá hatallá ˈdíéllá, he ˈdeeny muí hodhe-, giri mu kieye, Gál ye ka shiichééllá hé máá níínní hí gaa baađawká mán, muí yieká, ˈduuwawká.

¹⁰Aalé Símon Bétiro faaˈdlé órof ˈgieká ká sillite, máá méte suoryoká máállé gedech-, hí hujich ki nannieká sabite, mú nét ˈdaa naaniet gaa sare. Máá gedech kinaallá meenyle Málkas.

¹¹Aalé Yíésu Bétiro ki ˈday, kieye, Faaˈd tobotle hol ˈdú naʼ! Kulu ˈJaachú hí ye ka shíéllá, yáá ma igimîny? yie.

¹²Aalé yuoy ubaa máállé hí mé ki yielká, tá gál Yuuˈdi-, gállé ˈBíl Waaˈgietká ˈdeˈdeenká Yíésu ˈgiliˈgay, mú gil sug ki hiigidhe,

¹³mú erkob Ánnas giri Kayáfas sodh léká met eey. Kayáfas he máá wár kinaalláka, máá méte suoryoká onnoyká.

¹⁴Kayáfasallá he máá giri gál Yuuˈdi geey-, kieye, Mú tikiˈd gálaat ˈdú kufunanká kalat, yieká.

¹⁵Símon Bétiro ubaa máá éíy láliká Yíésu el gaa veere. Máá láli kinaal íín hé máá méte suoryoká hí onnoy. Aalé mu náb máá méte suoryo-, gaalí Yíésu sidheká álle úba sedhe.

¹⁶Bétiro íín náb kinaal káráfle ki ˈdie. Máá giri láli-, máá méte suoryoká hí onnoyká hol ká nadhe, ini karaf ˈdeˈdeenneká geey, Bétiro nááb gáá kaadhdhe.

¹⁷Aalé ini kinaal Bétiro heesete, kieye, Máá gaalí állá ka eeyallá lalille mú tikiˈd hé kuun muunîny? chie. Aalé Bétiro kieye, Hé yú muuniny! yie.

¹⁸Aalé ˈdaa giri biiy ˈdéeny ˈgayyeká gál gédeká ubaa gál biiy ˈdeˈdemeká ˈduno he ˈjiet gaa iđiteká ˈbuˈbute. Bétiro úba hé ál kinaal yiel, gáál hol ˈjiet kinaal ˈgar ˈbuˈbute.

¹⁹Aaléka máá méte suoryoká Yíésu yaalmit lalille ubaa he onisinyle yiete.

²⁰Aalé Yíésu kieye, Yú les ˈdeeny édhká geey. Yú bar lullé ény ˈdiiyiminyká ubaa ˈBíl Waaˈgiet-, gál Yuuˈdi-, hí hol ˈdu gáá yiimetká gálaat he gaa oonisie. Yáá ˈdeeny níínní hát shuolitiká huogodheká mán.

²¹Tá háte ye hegesetóol? Gál hé yú huogodheká maaleká yíéso. Hé yú huogodhe kinaallá hé gaalí óg, yie.

²²Yíésu héél hodheká, gál ˈBíl Waaˈgiet ˈdeˈdeme-, ál kinaal ˈgieká mú tikiˈd hí innum gíl gaa ˈdoy, kieye, Máá méte suoryoká hatallo ˈdéé af ki nanniyya? yie.

²³Yíésu mu ˈdéé hol ˈdú nie, kieye, Har hé ˈdeewká yú hodheka, héllé ˈdeew kinaal ebá ká hot. Tá har hé ˈdúwaká yú hodheka, háteka ye ˈdoyyéel? mú yie.

²⁴Ánnas đo Yíésu hátlé gaalí gil hiigidheká yuoy geey, giri Yíésu gaalí máá méte suoryo-, Kayáfas léká ˈdú egewká.

²⁵Aalé Bétiro állé yiel-, ˈjiet gaa ˈbuˈbuteká, gaalí yiete, Mú máá lalille tikiˈd hé kuun muunîny? gaalí mú yie. Mu falme, kieye, Hé yú muuniny, yie.

²⁶Máá méte suoryoká gállé gédeká máá máálle Bétiro hí net gaa sareká Bétiro yiete, kieye, Máá yú arge-, ˈguor saano salabká álle mú hol gaa ˈgieká hé kuun muunîny? yie.

²⁷Aalé Bétiro geđi Yíésu gaa falme, tíkíˈdé kinaallá lúg đo ˈdayche.

²⁸Aalé bar fuadheká gaal Yíésu Kayáfas álle gaa eedhdhe, mú máá Rooma kansichká ˈbíllé kansimoká eey. Gál guguđo-, Yuuˈdi-, gáál hol ˈgieká hé ˈbíl kansimo kinaallá náble geer ma híliny. Gaal ál kinaal hílinyka, saasso he kaadhdhe, hé ˈjila gólólle ma kokôny.

²⁹Aalé Bilááto gáál yé ˈdu gáá ˈdie, gáál yiete, kieye, Máállá meete ˈdeeney, hí ˈdú katate? yie.

³⁰Gaal kieye, Mu onnônyka he ma ˈdeenenyka nyáá nyí ko ma ˈdu gáá egêny, yie.

³¹Aalé Bilááto gáál geey, kieye, Mú itle hí eedhdhíe, mú nyátálkícho ˈdaalle ˈdéé ki iđía, yie. Gál Yuuˈdiká kieye, Hemurit kíchia Roomakáka, oos nyí gálaat chegeseká it nyí ká riate, gaalí yie.

³²Hééllá hatallá ˈdíéllá, he ˈdaa giri Yíésu kúfáchlé yaalmitle kis huogodheká ˈduuwawká.

³³Aalé Bilááto ˈbíllé kansimoká geer hol ˈdú nadhe, Yíésu vie, mú heete, kieye, Kúún in he kánsích gál Yuuˈdi? yie.

³⁴Yíésu mú ˈdéé hol ˈdú nie, kieye, He in ˈdéé hótkúû, ebá gál éíyyo ko ye geey? yie.

³⁵Aalé Bilááto kieye, Yú he máá Yuuˈdi? Kuun gál kua Yuuˈdiká ubaa gál guguđo-, suoryoká ko ye ˈdu gáá eey. Meete ˈdeeneyche? muí Yíésu yie.

³⁶Aalé Yíésu kieye, Guch chú hé guch lesallá muuniny. Guch chú guch lesallo-, onnônyka, gál chia yú mé ki yaalká hé onnônyka oos iđie, gál Yuuˈdi hé ye ma ˈgiiliˈgâny. Tá guch chú íín álle taaka, yie.

³⁷Bilááto kieye, Kuun a kinaalka, máá kansichaa! yie. Yíésu mú ˈdéé hol ˈdú nie, kieye, Yú hát kansichká kó hote. Yú ˈdaa kinaallá ˈdugaka in ˈdalidhe, lésallá ká yimie, giri ˈdúúw hogodhoká. Tá gál ˈdeeny ˈdúwaká ˈdaalle ki yaalká lulle af nee hai ye kokoo, yie.

³⁸Bilááto kieye, ˈDeeny ˈdúwaká meete? yie. Bilááto ˈdéé hótal hodheká đo yíé ˈdie, gál Yuuˈdiká geđi ˈdú sedhe, kieye, Yáá máállá hé ˈdeeney gaa argeká mán.

³⁹Tá itín it nyátál ˈgayya, af giri ˈjila Waag máállé ˈgasso-, urruká gálaat ˈdug gaa nadheká aflékáka, gál gaalí hiigidheká yú hí mú tikiˈd kí fufuroká. Aaléka, itín yú hí kánsích Yuuˈdi kí fuuroká it feˈdée? yie.

⁴⁰Gaal đo kúóˈd ˈdoy, kieye, Ha nyí máá kinaallá kí fúriny, nyí Baráábas kí fur! gaalí yie. Baráábas íín he máá gál les mé ki ˈgieká mé il gaa yielká.