Read daasanach Yuána 2 Bible Online

Yuána 2 - daasanach bible

Yuána 2

¹Aalé ram seđ ˈgiteká ény Kanna giri lés Galilaayaká máádhat hí gaa eedhdhe. Yíésu ˈjielle hé ál kinaallá gaa iđe.

²Yíésu ubaa lalille úba gaalí kiere, sedhe.

³Aalé gál gaalí kiereká ˈduuny vinnaʼ[9] hí gaa beeyká Yíésu ˈjielle hí geeyche, kieye, ˈDuu hé gálaat gaa beey, mú chie.

⁴Yíésu ˈjielle ˈdéé hol ˈdú nie, kieye, ˈJíe, ye hash! Háte ye hatal geđichóol? Aleđuđugulchú hátle hé ali ma kí ˈdíiny, yie.

⁵Aalé Yíésu ˈjielle gál gálaat golmieká geeyche, kieye, Hé muí geeyoká tág kóo, gáál chie.

⁶Ál kinaallá ibilaam bie-, gaalí waar tág gaa nieká le hí ˈgie. Ibilaam kinaallá nyátál gál Yuuˈdika, bíé gaalí illam ki dhidhiroká, ubaa gaalí hol ki dhidhiroká gaalí fafaa. Ibil tikiˈdeká bie ˈdáb egeetká đudm guguđoká tomon naama, muuninyka, tomon seđe hí higila.

⁷Aaléka, Yíésu gál gálaat ˈdúú shigieká geey, kieye, Ibilaam bie fáa, yie. Gaal ibilaam bie kochkoch fie.

⁸Aalé mu geđi gáál geey, kieye, Ebá hé níínni gáá aría, máá ˈjila mé ki yaalká ˈdú sidháa, yie. Gaal đo hát kinaal ˈdie.

⁹Máá ˈjila mé ki yaalká bíé giri ˈdúú yieká meeteká, mu đo máá eedhdheká tól eedhdhe. Hééllá he ˈdaa giri ˈduu állé ka nadheká muí muog-, gál bie gáá arieká íín hí ógká.

¹⁰Aalé máá ˈjila mé ki yaalká mú geey, kieye, Gálaat lulle erkob ˈduuny midhabká he biiy met ká nannaa, tá waaséél gálaat ˈduu hí gaa nadheka, in ˈduuny ˈdúú elloká gaalí yé ká ˈdeđia, kor kuun káána kó ˈduuny midhaballá biiy el ki ete, yie.

¹¹Hééllá Yíésu héllé erkob ekey-, gálaat hí af ˈdabe-, mu gálaat ˈduuwle argisieká. Hééllá ény Kanna giri lés Galilaayaká muí gaa ekey. Mu hééllá ekeyká, mú lalille đo mú iiy chie.

¹²Aaléka, héél đueká Yíésu kie, ˈjielle ubaa nyaaramle tá lalille hol eedhdhe, Kafarnáum mé nie. Gaal ál kinaal rám iraam mánká gaa rafe.

¹³ˈJila gál Yuuˈdi-, máá ˈgasso-, urru-, Waaˈgietká hí gáál ˈdug gaa nadheká ka tirtirayyeká Yíésu Yerúsalem mé nie.

¹⁴Mu hoy guđo-, ˈBíl Waaˈgiet náble gaa iđo-, ˈgúó ubaa wála tá hóle birm higiat-, ˈbaal karm birm hí ˈdug ˈdú ijoká lag ijo-, tá birm eiy gaa fufumuoká arge.

¹⁵Aalé mu massam anakoto hote, gálaat ubaa aanyle lulle ˈBíl Waaˈgiet náble geer gaa arie. Mu gál hol birm eiy ki fufumieká birmle okodie, karm abuunam mure.

¹⁶Mu gál hóle nyáláár geer gaa mamadieká ós ki koy, kieye, Hééllá állá geer yé gaa ˈdeeyyíe, ˈbíl ˈJaachú haí ál kíchia hoyyo hóson! gáál yie.

¹⁷Mú lalille đo ˈdeeny Warˈgat Waaˈgiet hí hote-, giri kieye, ˈGat yú ˈbílkú ka ˈguoká chiralle hé tág ye chies,[10] chieká, hí táb ká ˈjie.

¹⁸Aalé gál guguđo-, Yuuˈdiká mú yiete, kieye, Kúún ˈduuw máre ˈgayya, hééllá ki ekemeyche? Har ˈduuw kinaallá Waag gaa argiyyeka, ebá nyí hé gáál af ˈdaˈdabsuoká ka argísish, yie.

¹⁹Yíésu gáál ˈdéé hol ˈdú nie, kieye, ˈBílallá eiy ˈgieˈgía, ˈbíl kulich seđ gaa ˈdissa, yie.

²⁰Aalé gál Yuuˈdiká kieye, ˈBíl gaalí warram tomon afur tá a le gaa ˈdisseká, háteeye kuun hí kulich seđ tákámle gaa ˈdiita? yie.

²¹Tá ˈbíl Yíésu hí ˈdeenyle hodhééllá íín he mú gónlé.

²²Aalé af giri Waag Yíésu uushich yé gáá ˈdeeycheká mú lalille hé kisso-, muí hogodheká hí táb ká ˈjie. Gaal Warˈgat Waaˈgiet ubaa ˈdeeny Yíésu hí kis huogodheká iiy yie.

²³Aalé Yíésu hátlé Yerúsalem álle ˈjila gaa ijeká, gál burnayká hé ke af ˈdaˈdabo-, muí eekemeyká argeká mú iiy yie.

²⁴Tá Yíésu ˈdaa giri gálaat lulle yaalmisanolle eiy eiy ógká, hé gál kinaal hol ma ˈdú fáminy.

²⁵Mu ˈdaa giri hé gaalí ger ka ˈguoká ógká, hé máá éíy taaka hegete-, hí ˈdeeny máádhat geđieká mán.