Read daasanach Yuána 20 Bible Online

Yuána 20 - daasanach bible

Yuána 20

¹Rám tiiyaká kúlíchlé erká bur af midhab biiy hátlé gaa dhátká María Magaˈdalaká kiiyye, uushich álle mé niiyye. Uushich af kí ˈdiiyyeká, uushich gaalí nyátáábá af gaa eeb!

²Aaléka đo suoyye, Símon Bétiro ubaa máá láli-, Yíésu hí gielká bííyle ˈdú ˈdoote, gáál geeyche, kieye, Máá Guđoká hé gaalí uushich gaa eedhdhe, mú ál gaalí sidheká nyáá nyí muog! chie.

³Aalé Bétiro ubaa máá láli-, Yíésu hí gielká kikite, uushich bííyle mé nie.

⁴Gaal hullaalle ˈdoˈdodhdhe, máátí Bétiro in ká ˈdie, er uushich af kí ˈdie,

⁵uushich ki ˈdoliteká đafaraam ali ija, kor hé uushich ma híliny.

⁶Símon Bétiro giri mú el gaa igireká đo mú láá nadhe, uushich hile, đafaraam ali ija arge.

⁷Mu úba đafar gaalí Yíésu mé ki ˈdaneká đafaraam gaalí mú gónle ki ˈdaneká taak gaa iiyye-, hol agum ˈdú ˈgeyyeká arge.

⁸Waaséél máá er uushich af kí ˈdieká úba uushich hile, mu hát uushich gaa láká ˈdúúw ˈdú ˈdie, iiy yie.

⁹Gaal hééllá met Yíésu hát geđi loolgonot-, uushich yé gáá ˈdeˈdeenká hé Warˈgat Waaˈgiet eiy ma gaa náásan.

¹⁰Aalé gál lálííl đo eiy gale.

¹¹María íín hé uushich láá taal, bebeen. Aalé hátlé bebeenneká đo uushich geer ki ˈdolisate,

¹²gál ˈgasso-, naama-, Waaˈgiet-, đafaraam eegedhká fadhdhe-, ál gaalí gón Yiesu iifieká ijeká argiyye. Mú tikiˈd ˈdaa meká he ki ije, máátí ˈdaa ˈgas metoká he ki ije.

¹³Aalé gál kinaal min yiete, kieye, Minnééllo! Háteka bebeennóol? yie. Min kieye, Gaal hé Máá chia Guđoká ali gaa eedhdhe, ál gaalí mú sidheká yáá muog, chie.

¹⁴Min héél hote-, hol gaa maˈdeká, máádhat ali yaal, mu hát he Yíésuká hé ma kimísan.

¹⁵Aalé Yíésu min yiete, kieye, Minnééllo! Háteka bebeennóol? Mááya hol gaa ˈgeˈgete? yie. María íín tawunyleka, máá mú heetééllá he máá ál kinaallá ˈdeˈdeenká, he chie, đo kieye, Máá guđo, har kúún mú eeteka, mú ál siteká ye ka géesh, mú eedhdhe, chie.

¹⁶Yíésu đo min vie, kieye, María! yie. María đo mú ˈdú suoyye, af Heberew ki ˈdayche, kieye, Rabóóni! chie. Rabóóni hélle kieye, Máá gáál he oonisuoká.

¹⁷Aalé Yíésu María geey, kieye, Ha ye chíran, yáá hátle ˈJaachú hol ma ˈdú náan. Sí, nyaaramchú géesh, yú ˈJaa chia-, ˈJaakícho-, Waag chia-, Waag kíchiaká hol ˈdú naadha, muí María yie.

¹⁸Aalé María Magaˈdalaká đuul gil faate, gál láliká fayám ˈdú site, kieye, Yáá Máá Guđoká nyí hol argiyye! chie. Min ˈdeeny Máá Guđoká hí geey-, Gáál ˈdú sit, muí yieká úba gáál geeyche.

¹⁹Kúlích kinaal gélgálle gál láliká ˈbíllo he gaa ije, tá ˈdaa giri gaal gál guguđo-, Yuuˈdiká kikiadheká gaal ˈbíl af ger ki kuokodhdhe. Yíésu gáál hurt yé gáá ˈdie, kieye, Naanná gaa yíéđía, yie.

²⁰Mu héél hodheká đo gille ubaa beetle gáál argisie. Gál láliká Máállé Guđoká argeká súm ger hí gaa meedhe.

²¹Yíésu geđi kieye, Naanná gaa yíéđía! Hát yú ˈJaachú ye ali gáá kaayallá, yú úba alb haí fafaa, muí gáál yie.

²²Mu hatal yieká đo Hím Naasanle gáál ki nie, kieye, Hím Naasan Waaˈgiet hí hillo.

²³Itín máádhat ađaabanollé ˈguoká hí hayche-, hí mú ˈdú ˈjiiyyeka, máá kinaallá úba Waag haí ˈdú ˈjeenne. Tá har máádhat ađaabanollé ˈguoká hí ma hany-, hí mú ma ˈdú ˈjiinyka, máá kinaallá ađaabanolle hai ˈgaa, Yíésu hí gáál yie.

²⁴Gál láli-, tomon a naamaká tá máá giri Tómas ˈDíđumos léká, af giri Yíésu láli yé ˈdu gáá ˈdieká hé gáál gaa lalay.

²⁵Aalé gál lálíítí mú geey, kieye, Nyáá nyí Máá kúnnaa Guđoká argiyye! yie. Tómas kieye, ˈDaab yú lilo misimaaramká mú gille ma gaa árginy-, gúmúrínychú ma ki gáágan-, ubaa gílchú mú beet ma ki gânká, yáá iiy ma yegen, yie.

²⁶Ram síet ˈgiteká gál láliká geđi ˈbíllo hol ˈdú ije. Tómas úba hé gáál hol af ije. Gaal har úba ˈbíl af ger ki kuokodhdheka, Yíésu đo gáál hurt yé gáá ˈdie, kieye, Naanná gaa yíéđía! gáál yie.

²⁷Aalé mu Tómas geey, kieye, Gúmúrínykú ka hélish, gilchú ki gáágat, dháash. Gílkú ka hélish, beetchú ki gat. Ha ye ki nannáan, ye iiy áat, Yíésu hí mú yie.

²⁸Aalé Tómas kieye, Máá chia Guđo! Waagchú! muí Yíésu yie.

²⁹Aalé Yíésu mú geey, kieye, ˈDaa giri ye ki argiyyeká in ye iiy chie? Gál ye ma árginy-, kor ye iiy yieká, ebá Waag hí ˈdú ˈguunúánne! mú yie.

³⁰Yíésu hé éíy taaka-, gaalí af ˈdaˈdabo-, lalille met gaa eekemey-, máá hí warˈgatééllá úba gaa veere mánká hé tág burnay.

³¹Máá warˈgatééllá ka veerééllá hé he veerééllá, he giri itín Yíésu hát he Messíya-, Iny Waaˈgietká hí iiy chegeto-, tá hí mú iiy chieka, hí luolmit biiyoká mú meenyle ki aargiˈdoká.