Read daasanach Yuána 21 Bible Online

Yuána 21 - daasanach bible

Yuána 21

¹Aalé hé kinaal el ˈdaal, Yíésu lalille Bás Tiberiados álle yé ˈdu gáá ˈdie. Mu hát gáál yé ˈdu gáá ˈdieká hatallá:

²Mú lalillé hol ˈgayyeká he Símon Bétiro, Tómas giri gaalí ˈDíđumos yegetká, Nadhániel giri ény Kanna-, lés Galilaaya gáá yimieká, ubaa hele Dhebeˈdaya, tá gál éíy taaka naama-, láliká.

³Aalé Símon Bétiro gáál geey, kieye, Yú áwuo seeme, yie. Gaal kieye, Muun áwúlkúnno áwuo ke hol ˈgar seeme, yie. Aalé gaal kie, kadich hile, kor chúúré kinaallá gaal hé béch he yieská mán.

⁴Bur a midhab-, biiy he biˈdeká, gál láliká máádhát ílung yaalká arge, kor gaal mu hát he Yíésuká hé ma kimísan.

⁵Aalé Yíésu gáál vie, kieye, Ummo, it béch níínní hí ka argiyyeká mân? yie. Gaal kieye, Mán, gaalí yie.

⁶Aalé Yíésu kieye, Buit kadich ˈdaa naaniet ki láa, béé haí cheese, gáál yie. Gaal hát muí geeyká ˈdieká, buit hergisan hí ká adhate, ˈdaa giri buit beeny burnayká ka ˈgiiliˈgayyeká.

⁷Aalé máá giri láli-, Yíésu hí gielká kieye, Bétiro, he har Máá kúnnaa Guđúa! yie. Bétiro ˈdeenyéél tákáma mú af gaa maale, đo đafarlé biiy ˈdugo-, fure-, ali iđieká seet ki ˈdanne, bie ki suoy.

⁸Aalé ˈdaa giri kadich ílung ma gaa faganâny-, fagintle hát gil tooson kúˈd naamaká, gál lálíítí kadich ílung ˈdu gáá ˈdeete, buit kí laađame.

⁹Kadich ílung ka ˈdoy-, gaal kadich gaa leedhe-, baaˈd yé ki ˈdieká, ˈduno boodoy-, beech hí gaa iifeká ubaa balashá arge.

¹⁰Aalé Yíésu gáál geey, kieye, Beeny hí chieská ˈbaal állá ka sidháa, yie.

¹¹Símon Bétiro đo buit ílung ˈdú hergite. Buit kinaallá beeny guguđoká hí koch, béé túóyle kúˈd tikiˈde, tómón eiy chen, tá a seđe. Buit har úba beeny burnayallá ká ˈgiiliˈgayyeka, hé ma ˈgîn.

¹²Aalé Yíésu gáál geey, kieye, Ka yimedhíe, he chira mé ki ˈdóo, gáál yie. Gál láliká ˈdaa giri mu hát gáál Máállé Guđoká onnoyká ógká, hé máá hol yíé ˈdeey-, mú yiete-, kieye, Kúún mááya? mú yieká mán.

¹³Yíésu đo balashá eedhdhe, gáál balashá shie, gáál beech úba shie.

¹⁴Yíésu ameeny he uushich yé gáá ˈdieká, hééllá he gíl ki seđe-, mu lalille yé ˈdu gáá ˈdieká.

¹⁵Aalé gáál golol hí gaa đueká, Yíésu Bétiro tól eedhdhe, mú yiete, kieye, Símon, iny Yuana, kó ye gálallá ˈdú giel? yie. Bétiro kieye, Iiy-hí, Máá Guđo, kuun hát yú ko gielká, kó óg, yie. Yíésu kieye, Walachú ˈdeeˈdémo, yie.

¹⁶Yíésu geđi mú yiete, kieye, Símon, iny Yuana, kó ye giel? yie. Aalé Símon kieye, Máá Guđo, kuun hát yú ko gielká kó óg, yie. Yíésu kieye, Walachú ˈdíésish, yie.

¹⁷Yíésu gíl ki seđeká geđi mú yiete, kieye, Símon, iny Yuana, kuun kín kó ye giel? yie. Bétiro ˈdaa giri Yíésu hí a seđ ki yiete-, Kó ye giel? muí yieká, đo geer hí gaa ˈdeenedhe, kieye, Máá Guđo, kuun kó he lulle óg, hát yú ko gielká kó óg, yie. Yíésu kieye, Walachú ˈdeeˈdémo, mú yie.

¹⁸Aalé Yíésu mú geey, kieye, Yú ko ˈdúúw geeye, kúún ruorich onnoyyeká kó đafarkú higisate, alb feˈdeká seseenne. Tá af giri vinnamoká gil ha faata, máá eiy đafar hai ko higidha, ál ma fedinyká hai ko siidha, Yíésu hí mú yie.

¹⁹Yíésu hééllá hodhééllá kúfách Bétiro hí kufunan-, mu Waag ˈduuwayoká yaalmitlé he mú geey. Aalé Yíésu ˈdeenyéél hodheká mú geey, kieye, Ye el gáá véer, yie.

²⁰Aalé Bétiro hol gaa madeká, máá giri láli-, Yíésu hí gielká gáál el gaa igira arge. Máá kinaallá he máá af giri gaal gólól biiy el ˈdaˈdká golmoteká Yíésu túmus ki koy-, kieye, Máá Guđo, máá ko gál ko oos ˈguoká ˈdu gáá egewallá he mááya? yieká.

²¹Aalé Bétiro máá kinaal argeká, Yíésu yiete, kieye, Máá Guđo, tá máál, hát hí háteeye? yie.

²²Yíésu mú ˈdéé hol ˈdú nie, kieye, Har yú fedo-, mu les ˈdug ˈdú yíéđian-, ˈjíig af giri yú hol ká nannaatká đig kátaka, hé kinaallá meete kua hí gaa ija? Kúún ye el gáá véer! mú yie.

²³ˈDeenyéél ˈdugaka, máádhat ˈdéé hótéél gál nyaaramká af ki veere, máá lálííllá hé ma kufuminy, gáál yie. Tá Yíésu íín hé kieye, Mu hé ma kufuminy, ma yéen. Mu hé hodheká kieye, Har yú fedo-, mu les ˈdug ˈdú yíéđian-, ˈjíig af giri yú hol ká nannaatká đig kátaka, hé kinaallá meete kua hí gaa ija? he yie.

²⁴Máá lálííllá he máá hééllá ˈduuwle hogodho-, tá he veereká. Hééllá hát ˈdúwaká nyáá nyí óg.

²⁵Yíésu hé éíy taaka burnayká úba eekemey. Hé kinaallá lulle gaalí véérinyka, yú tawueka, warˈgasam kinaallá hé les alb he hol ki yíéđuoká mán.