Read daasanach Yuána 6 Bible Online

Yuána 6 - daasanach bible

Yuána 6

¹Hé kinaal el ˈdaal Yíésu Bás Galilaaya-, Tiberiados léká ílung ˈdaatí yé ki ˈdie.

²ˈDaa giri gálaat hé gaalí af ˈdaˈdabo-, muí gál fursam ˈgieká ki ekeyká argeká, nyésébích guđoká mú el gaa veere.

³Aalé Yíésu ubaa lalille gurmit feˈjie, gurmit ˈdú yíéđie.

⁴Af kinaallá ˈjila gál Yuuˈdi-, máá ˈgasso-, urru-, Waaˈgietká hí gáál ˈdug gaa nadheká hé ká ˈjobonte.

⁵Aalé Yíésu nyésébích guđoká hí ˈdú gáá yiimie-, argeká, đo Fílib yiete, kieye, Balasha gáláátallá hí kokuoká in ále ke gáá higidhdha? yie.

⁶Yíésu mú hatallá yietééllá taalle mú ˈdéé afo he kí dhaay, íín dhúrle hé hát he ˈdeˈdeenká ˈguo.

⁷Aalé Fílib mú ˈdéé hol ˈdú nie, kieye, Bíre hújíchle ram hí kúˈd naamaká ki ˈguom ka higían-, ˈguomle úba ki gál ˈdááballóóllá ke ki ˈjiingʼírinyka, hé gáál ma gaa ˈdony, yie.

⁸Aalé mú lalille máá gaalí Ánˈduru yeget-, giri nyárle Símon Bétiro léká Yíésu geey, kieye,

⁹Máá nyigeeny balashá chen[21] ubaa béé naam ˈguoká hállá, tá héél hé gál burnay-, ˈdááballóóllá gaa ˈdúo? yie.

¹⁰Aalé Yíésu kieye, Gálaat geeyyíe, gálaat hí les yíéđuo, yie. Ál kinaallá meka hé tág iish hí ˈdie. Gaal lullé les yíéđieká gál yaab tákámle hé shíí chen nyuoro.

¹¹Aaléka, Yíésu balashá eedhdhe, Waag ˈgielmít hol ˈdú nieká, balashá gaalí gál ál kinaal ijeká eiy gise. Hát tikiˈdéél gaal béé úba gálaat eiy gise. Gálaat lulle balashá ubaa béé ˈdaˈdab fedeká arge.

¹²Aalé gálaat gololte-, heyieká Yíésu lalille geey, kieye, ˈGuom ka ˈgisateká hol ˈdú shuunáa, haí okoˈdîny, yie.

¹³Aaléka balasha giri gaalí ˈdú heyie-, ka ˈgisateká gaal hí hol ˈdu gáá shuune, illam tomon a naama kochkoch.[22]

¹⁴Aalé nyesebich hé Yíésu hí ekey kinaal arge-, he af ˈdabeká kieye, Hééllá gon Máá Waag hí ˈdéé ká shigicho-, Warˈgat Waaˈgiet hí hote-, lésallá ka yiimetká.

¹⁵Aalé Yíésu hát gaalí ˈdú kekeen-, gaalí kansím mé ki tatuo-, gaalí kánsíchle hođisatká kimiteká, đo gáál af ˈgite, tákámle geđi gúm bííyle mé nie.

¹⁶Aalé aadh gaanateká Yíésu lalille bás mé nie,

¹⁷ál kinaal kadich gaa hile, giri ílung ˈdaatí yé ki ˈdeˈdeen-, Kafarnáum seseenká. Aalé gaal kadich kudhdheká Yíésu hátlé gáál ma hílinyká biiy đo chuurayye.

¹⁸Af kinaallá wááních fargogoká hé ˈdarame, baran đo les gaa kiiyye.

¹⁹Aalé gaal bás hurtéétí ˈdoyká,[23] gaal máádhat bás ˈdug see, kadich kí ˈjobóndhe argeká, đo seerey.

²⁰Yíésu đo gáál geey, kieye, He yú, haí seerêny! gáál yie.

²¹Aalé gaal đo mú kadich gaa kaadhdhe, kadich tíkíˈdé kinaallá ál gaalí sesemeká malgle af ki ˈdie.

²²Bííy ka biˈdeká nyésébích ílung ˈdaatí ki ˈgiteká hát kadich tikiˈd tákámle gefere ílung yiel-, gál láliká tákámle hí ˈdeete-, Yíésu hí ma hílinyká, kimite.

²³Aalé kadis ény Tiberiados gáá chimie-, ál Yíésu hí Waag gielmít hol ˈdú nie-, gálaat hí balashá gaa koeyká malgle ˈjobínt ki ˈdiiyye.

²⁴Nyésébích giri ílung kinaal ki ˈgiteká gíl les kí ˈdoyká Yíésu hát láʼ-, lalille íín hol ma ka náanká kimite. Gaal đo kadís hile, Kafarnáum mé nie, bííy kinaal Yíésu ˈdú ˈgeˈgedhe.

²⁵Aalé gaal Yíésu bás ílung ˈdaatí gaa argeká mú yiete, kieye, Máá gáál he oonisúóllo, amáre ál kí ˈjiiyye? mú yie.

²⁶Yíésu gáál ˈdéé hol ˈdú nie, kieye, Yú hí hé ˈdúwaká geeye, itín hí ye hol gaa ˈgeˈgetééllá, hé kieye, hé gáál af ˈdaˈdabsuo-, yú ekeyká hí argiyye, muuniny, he ˈdaa giri hí balashá konye-, hí heyiyyeká in hí héy hol gaa ˈgeˈgete, muí gáál yie.

²⁷ˈGuom geere-, ˈdeđenetoká haí ˈdú aayáˈginy, ˈguom ma ˈdeđenen-, Iny Máádhat hí ka shiguo-, hí luolmit biiyoká yé ˈdú ˈdeđichoká ˈdú aayaˈgáa. Iny Máádhat íín he Máá ˈJaallé Waag hí ˈduuwle gálaat ki edhesieká, Yíésu hí gáál yie.

²⁸Aalé gaal kieye, Háte nyí ˈdeenne, hújích Waag hí nyí gaa feˈdoká nyí nanniyya? gaalí mú yie.

²⁹Yíésu gáál ˈdéé hol ˈdú nie, kieye, Hújích Waag hí gaa feˈdoká hééllá: Máá Waag hí ali gáá kaayyééllá iiy yiedhíe, muí gáál yie.

³⁰Aalé gaal kieye, Hé gáál af ˈdaˈdabsuo-, kuun hí ekemeycho-, nyí aargiˈda-, nyí ko iiy chegetoká meete? Kuun hé yé ká ˈdeđichoká hát káána meete?

³¹Héle eshim eshimkúnno ˈbakat állé he mánna gaa kokoey,[24] hát Warˈgat Waaˈgiet hí hote-, kieye, Gáál muí ˈguom úr gáá shie, gaal ˈguom koey,[25] chieká, gaalí Yíésu yie.

³²Aalé Yíésu kieye, Yú hí hé ˈdúwaká geeye, ˈguom úr gáá chimíéllá máá hí ka shieká hé Móshe muuniny. ˈGuom ˈdúwaká ˈJaa chia hí úr gáá shigia.

³³ˈGuom Waag hí ká shigichóóllá he Máá úr gáá yimie-, gálaat luolmit ˈdúwaká shigúóllá, Yíésu hí gáál yie.

³⁴Aalé gaal kieye, Máá Guđo, taalle nyí ˈguomééllá ka shíígish, gaalí mú yie.

³⁵Yíésu kieye, ˈGuom luolmitiká he yú. Máá ye ˈdú gáá yimetká hé gon geer hí ma gaa bolominy. Máá ye iiy yeetká hé geđi báre hí ma chegesiny.

³⁶Hát hí ye argiyye-, kor hí ye iiy ma chéenká, yáá hí geey.

³⁷Gál ˈJaachú hí ye ká shiguoká lulle ha ye ˈdú gáá yiimedhe, tá máá ye ˈdú gáá yimetká yáá ma aruminy.

³⁸Yú úr gáá yimíéllá yáá hé meenychú ma ekemeny, Máá ye ali gáá kaayká hát he fedoká el gaa igira, ekemeye.

³⁹Máá ye ali gáá kaayká hát he fedoká he gál muí ye gíl geer ká fieká mú tikiˈd úba hí ma gaa baađany-, kúlích biiy el ˈdaˈdká gáál lulle yú uushim yiem gáá ˈdeđuoká.

⁴⁰Hé ˈJaachú hí fedoká hééllá: Máá yáá Ínyííllá ye bala ˈdu gáá nuo-, ye iiy yeetká, luolmit biiyoká hai gaa yíéđima, tá kúlích biiy el ˈdaˈdká úba uushich yé ha yú gáá ˈdeđia, Yíésu hí gáál yie.

⁴¹Aalé ˈdaa giri Yíésu kieye, Yú he balasha úr gáá chimieká, yieká, gál guguđo-, Yuuˈdiká đo yiirsam fadhdhe.

⁴²Gaal kieye, Hééllá hé Yíésu giri iny Yuosef ˈjaalle ubaa ˈjielle ki ógká muunîny? Tá háteeye, káána kieye, Yú úrro gáá yimie, yegedhe? gaalí yie.

⁴³Yíésu gáál ˈdéé hol ˈdú nie, kieye, Haí yiirsam fafáan.

⁴⁴Máádhat ˈdaab ˈJaa chia ye ali gáá kaayká hí ye ma ˈdu gáá éenyká, hé ye ma ˈdu gáá yiimen. Máá ˈJaachú hí ye ˈdu gáá eewká in yú kúlích biiy el ˈdaˈdká uushich yé gáá ˈdeđia.

⁴⁵Warˈgasam gál Waag hí ˈdeem ká shigicheká ali tikiˈd kieye, Gálaat lulle Waag he haí oonisicha, he chie.[26] Máá ˈJaachú af maale-, mú he gaa onnodheká hai ye ˈdú gáá yiimedhe.

⁴⁶ˈJaa kúnnaa Waag hé máá níínní hí argeká mán, Máá mú af gáá kieká tákáma hí arge.

⁴⁷Yú hí hé ˈdúwaká geeye, máá ye iiy yieká hé luolmit biiyoká ˈguo.

⁴⁸Yú he ˈguom luolmitiká.

⁴⁹Eshim eshimkícho har káána úba mánna ˈbakat álle gaa kokoeyka, hé guraam hí guure.

⁵⁰Tá ˈguom úr gáá chimíéllá, máá hí kuoká hé ma kufuminy.

⁵¹Yú he ˈguom luolmiti-, úr gáá chimieká. Máá ˈguomééllá kuoká taalle bííyyo ali he ija. ˈGuomééllá he gón chia yú suor hođuo-, les gálle hí luolmít ki aargiroká, Yíésu hí gáál yie.

⁵²Aalé gál guguđo-, Yuuˈdiká hol ki falme, lole, kieye, Máállá háteeye gáál gónle ká shigia, gon ki kokoo? yie.

⁵³Yíésu gáál geey, kieye, Yú hí hé ˈdúwaká geeye, ˈdaab itín hí gón Iny Máádhat ma kôny-, ubaa hí mú fásle ma înyká, it luolmit hí gaa iđoká mán.

⁵⁴Máá gónchú kuo-, fáschú ˈjioká hé luolmit biiyoká ˈguo, tá kúlích biiy el ˈdaˈdká úba uushich yé ha yú gáá ˈdeđia.

⁵⁵Gónchú he ˈguom ˈdúwaká, fáschú he hé imi-, ˈdúwaká.

⁵⁶Máá gónchú kuo-, fáschú ˈjioká taalle hai ye gaa ija, yú úba taalle mú ha gaa ija.

⁵⁷Hát káána ˈJaa chia luolallá ye ali gáá kaay-, tá yú ˈJaachú ˈdaalle ki luolallá, in máá gónchú kuoká úba ˈdaachú ki luol.

⁵⁸Yú he ˈguom úr gáá chimieká. Eshim eshimkícho hé mánna koey, kor úba hé guraam hí guure, tá máá ˈguomééllá kuoká taalle bííyyo ali he ija, Yíésu hí gáál yie.

⁵⁹Hééllá af giri mu ˈbíl ˈdiiyiminy-, Kafarnaumká gáál he gaa oonisieká muí huogodhe.

⁶⁰Aalé lali ilish Yíésu el gaa veereká mú he onisinyléél maaleká gál gúúđo kieye, He onisiny fargogiyyóól, mááya hí iiy yeedhe? gaalí yie.

⁶¹Aalé Yíésu hát lalille hí he onisinyléél yiirsam gaa fafaatóól ógká, đo gáál geey, kieye, Hééllo hí birgisie?

⁶²Tá itín Iny Máádhat hátlé úr mé nannuo-, állé er he gáá yimieká hol ˈdú nannaatká hí aargírinyka, háte hí chíe?

⁶³Hím Naasan Waaˈgieto gálaat luolmít shigicha. Gon hé uˈdoká mán. ˈDeeny yú hí geeyallá he Hím Naasan Waaˈgiet sidhamkícho luolmít shigichoká.

⁶⁴Tá itín ˈbaal it hátle iiy ma chéen, Yíésu hí gáál yie. Yíésu hatallá yíéllá, he ˈdaa giri mu íín kis gál hí iiy ma yéenká ubaa máá gál mú oosle ˈguoká mú ˈdu gáá egewká onnoyká.

⁶⁵Aalé mu geđi gáál geey, kieye, ˈDaa kinaallá ˈdugaka in yú hí geey, yú kieye, Máádhat ˈdaab ˈJaachú hí ye ma ˈdu gáá éenyká, hé ye ma ˈdu gáá yiimen, yú hí yie.

⁶⁶Ameeny kinaallá in lali ilishká Yíésu el hol gaa nadhe, mú hol ˈgar seseenká điidhe.

⁶⁷Aalé Yíésu lalillé tomon a naamaká yiete, kieye, Itín úba hí ye el hol gaa nannaataká hí má feˈde? gáál yie.

⁶⁸Aalé Símon Bétiro mú ˈdéé hol ˈdú nie, kieye, Máá Guđo, mááya nyí ˈdú seenne? Kúún in luolmit biiyoká ˈdeenyle ˈgayya háluke!

⁶⁹Kuun hát Waag Máállé saas mánká nyáá nyí kimisate, nyáá nyí ko iiy chie, Bétiro hí Yíésu yie.

⁷⁰Aalé Yíésu gáál ˈdéé hol ˈdú nie, kieye, It tomon a naamáállá, máá hí waaˈdeká hé yú muunîny? Tá itín mú tikiˈd har hí máá Satanaa! Yíésu hí gáál yie.

⁷¹Yíésu máá ˈdeenyle hogodhóóllá he Yúúˈdas giri Iskáryot-, iny Simon-, gál láli tomon a naamaká máállé giri Yíésu gál hí oosle ˈgieká Yíésu ˈdu gáá egewká.