Read daasanach Yuána 7 Bible Online

Yuána 7 - daasanach bible

Yuána 7

¹Hééllá el ˈdaal Yíésu đo Galilááyalle gaa yíéđie, ˈjien totom gaa seeseme. Mu ˈdaa giri gál guguđo-, Yuuˈdiká hí oosle ˈgieká mu hé lés Yuuˈdia ma síen.

²Aalé gál Yuuˈdi ˈjilallé lokoolomká ka ˈjobonteká,

³Yíésu nyaaramle hí geey, gaal kieye, Állá gaa keʼ, Yuuˈdía mé naʼ, lali kua al kinaalloká hí hé kuuní ekemeychóóllá úba argo.

⁴Máá mee hí ˈdeernet-, fedoká héllé ekemeyoká hé ma kakany. Héél in ekemeyche háluke, hol les gálle argísish, mú nyaaramle hí mú yie.

⁵Mú nyaaramle hatallá yíéllá, ˈdaa giri dhúrle mú iiy ma yéenká.

⁶Aalé Yíésu kieye, Aleđuđugul chia yú gaa seseenká hé ali ma kí ˈdíiny, tá itín aadh ˈgás hí gaa seseennoká it uˈda.

⁷Lésallá gálle íín hé hát hí neebenetká mán, máá he nébká he yú, ˈdaa giri gaal héllé ekemeyoká hát he gaa nyakarichká ˈduuwle yú hogodhoká.

⁸Itín ˈjila bííyle mé náa. Yú yáá káánallá ma seeminy, ˈdaa giri hééllá aleđuđugulchú muuninyká, Yíésu hí gáál yie.

⁹Mu hatal yieká đo Galilááya ki ˈgite.

¹⁰Aalé mú nyaaramle kie-, ˈjila bííyle mé nieká, mu íín đo kie, hé gálaat hol ma argisîny, ˈjila bííyle úba mé nie.

¹¹ˈJila kinaal álle gál guguđo-, Yuuˈdiká mú hol gaa ˈgeˈgedhe, gálaat heegete, kieye, Máá giriká in aake? yie.

¹²Nyésébích ál kinaal ijeká gál gúúđo Yíésu ˈdaalle ˈdugaka hol a les ki geey. Gáál ˈbáál kieye, Mu he máá ˈdúwaká. Gáál ˈbáál kieye, Hé muuniny! Mu gálaato nyiimita, gaalí yie.

¹³Tá ˈdaa giri gaal gál guguđo-, Yuuˈdiká kikiadheká, gaal hé máá níínní Yíésu ˈdeenyle af gúch ki huogodheká mán.

¹⁴Aalé ˈjila gaalí ká naate-, toom ka ˈdoyyeká Yíésu ˈBíl Waaˈgietká nyáláárle geer hile, gálaat he onisie.

¹⁵Gál guguđo-, Yuuˈdiká mú he onisinylééllá af ˈdabe, hol yiete, kieye, Máállá in máá gáál he oonisuo-, hí he onisieká man háluke, tá háteeye ˈdaalimééllá arge? gaalí yie.

¹⁶Yíésu gáál ˈdéé hol ˈdú nie, kieye, He onisiny yú gálaat oonisúóllá hé ye yé ma gáá ˈdeˈdeminy, máá yé gáá ˈdeˈdeenká he Máá ye ali gáá kaayká.

¹⁷Máádhat har hé Waag hí feˈdoká ˈgíéríchle nannaatká fedoka, af kinaalka he onisinyééllá har Waag yé gáá ˈdeˈdeenka, har yú tuuˈdchú ye yé gáá ˈdeˈdeenka, eiy hai naata.

¹⁸Máá hélle dhúrle hogodhoká ˈdúuw he hol ki ˈgeˈgedhe, tá máá máá hí ali gáá kaayká ˈduuwle laatle lađaanká he máá ˈdúúw hogodho-, af ka hódho mánká.

¹⁹Itín Móshe hí hemuumurit Waaˈgiet ma shíiny? Har úba hát kinaal kátaka it máá níínní hemuumurít ki yielká mán. Tá háteka hí ye oos ˈgayyáal? Yíésu hí gáál yie.

²⁰Nyésébích ál kinaal gaa ijeká kieye, Kuun aryáán má ˈgayyo! Mááya ko oos ˈgaa? gaalí mú yie.

²¹Aalé Yíésu gáál geey, kieye, Yú he tikiˈde Kúlích Hef ˈGisanká gaa ekey, in itín hí hé kinaallá af ˈdabiyye.[27]

²²Móshe hé hí hemurit hermisanká shie. In káána um kíchia yaabká kúlíchlé hermisanká har úba Kúlích Hef ˈGisanká kátaka, in hí kúlích kinaallá gaa heermisicha. Tá hermisanééllá hé Móshe yé ma gáá ˈdíiny, hermisan eshim eshim kúnnaa giri Móshe metoká he yé gáá ˈdiiyye.[28]

²³Aalé har káána hemurit Móshe hí shíéllá hí ˈdeđeneychoká hí ma fediny-, hí Kúlích Hef ˈGisanká um gaa hermisicha háluke, tá háteka, máádhat gónle lulle yú Kúlích Hef ˈGisanká gaa bisieká hí ye ˈdú idhannéel?

²⁴Haí hállééllá gálaat ˈdug gáá dhaˈgáminy, hí gálaat ˈdeđénsen, gálaat hát ˈduwantiká eiy naannatíe, Yíésu hí gáál yie.

²⁵Aalé gál Yerusalem ˈbaal hol heegete, kieye, Máá oosle gaalí ˈguoká hé máállá muunîny?

²⁶Bá dhaayyíe, mu har gálaat met gaa ˈdiyime, kor gaal hé níínní mú ˈdú hogodhoká mánnaa! Gál ˈdeem mumuroká mu hát Messíyaká má ôg?

²⁷Messíya[29] íín ká yiimetká, állé gáá yiimetká amáre múún ke onnoy? Tá máállá égetle hé ki ógká, muunîny? gaalí hol yie.

²⁸Aalé Yíésu hátlé giri gálaat ˈBíl Waaˈgietká nyáláárle geer he gaa oonisieká af gaa guđoká ˈdéé ki hodhe, kieye, Itín it ye óg, ál yú gáá yimieká úba it óg. Tá yú yáá meenychú ma kí yímen. Máá ye ali gáá kaay-, itín hí muogká, hé tág ˈdúwa.

²⁹Yú íín ˈdaa giri mú álle gáá yimie-, mu ye ali gáá kaayká yáá mú óg, Yíésu hí gáál yie.

³⁰Mu ˈdeenyééllá tákáma hodhe, gál guguđo-, Yuuˈdiká đo mú ˈgiliˈgany gaa ˈgeˈgedhe, kor ˈdaa giri mú aleđuđugulle ali ma kí ˈdíinyká gaal hé máá níínní mú đig yieká mán.

³¹Tá nyésébích kinaal gál burnayká mú iiy yie, kieye, Hé gáál af ˈdaˈdabsuo-, máállá hí eekemeyóóllá ebá fargogóon! Máállá taalle Messíya máámaʼ? gaalí yie.

³²Gál Farisaay nyesebich ˈdeeny Yiesúúl hol geđia maaleká, íín ubaa gál guguđo-, suoryoká đo gál ˈBíl Waaˈgietká ˈdeˈdeenká ali fie, giri gaal Yíésu ka ˈgiiliˈgawká.

³³Aalé Yíésu kieye, Yú rám iraam mánká ke hol af ija, tá Máá ye ali gáá kaayká hol ˈdú naadha.

³⁴Itín gil kíchia hí ye hol gaa ˈgeˈgete, kor it ye ma aargiriny. It ál yú gaa ijoká ál níínní hí kí ˈdiiyyaká mán, muí gáál yie.

³⁵Aalé gál giri guguđo-, Yuuˈdiká hol yiete, kieye, Ál máállá hí seseen-, ke mú ma gaa aargirinyallá ále? Mu kidh gálkúnno hí bash ki yíétí he bííyle mé nannaa, he oonisía?

³⁶Hé mu kieye, Itín gil kíchia hí ye hol gaa ˈgeˈgete, kor it ye ma aargiriny, it ál yú gaa ijoká ál níínní hí kí ˈdiiyyaká mán, muí yíéllá, hélle meete? gaalí hol yie.

³⁷Aalé ˈjila kúlíchlé biiy el ˈdaˈd-, fargogiyyoká ali kí ˈdiiyyeká Yíésu les gaa kie, af gaa guđoká ˈdéé ki huogodhe, kieye, Máádhat har báre ˈguoka, hí ye ˈdu gáá yimet, hí bíé luolmitiká ˈjio.

³⁸Máá ye iiy yieká hát Warˈgat Waaˈgiet hí hotekáka, Wár bíé luolmitiká hí gáá fafaanká haí gáá fafama,[30] Yíésu hí gáál yie.

³⁹ˈDeeny Yíésu hí huogodhééllá he ˈdeeny Hím Naasan Waaˈgietle gál mú iiy yieká hí aargiroká. Yíésu ˈdeenyééllá hogodheká Waag hé hátle Hím Naasanle gál Yíésu iiy yieká ma shíiny, ˈdaa giri Yíésu hátle ˈgór ma ˈdú kúfiny-, uushich yé ma gáá ˈdíiny-, bííy ˈJaalle mé ma níinyká.

⁴⁰Gaal mú ˈdeenyle maaleká, gáál ˈdáá tikiˈd kieye, Máállá Máá Waag hí ˈdeem ká shigicho-, ke met egesseká, yie.[31]

⁴¹Gáál ˈbáál hí kieye, Máállá he Messíya, yie. Tá gáál ˈbáál kieye, Hééllá hé Messíya muuniny. Messíya háteeye lés Galilaaya yé gáá ˈdeˈdeme?

⁴²Warˈgat Waaˈgiet hé kieye, Messíya ˈbíl íl ˈDawuˈdo yé gáá ˈdeeme, ény ˈDáwuˈd hí gaa ije-, Bételeem léká yé gáá ˈdeeme, ma chéen? gaalí hol yie.

⁴³Yaalmitééllá ˈdugaka in nyesebich ˈdee hí hol el ˈgiiˈgite.

⁴⁴Gáál ˈbaal mú ˈgiliˈganyo he fede, kor mú hé máá níínní hí đig yieká mán.

⁴⁵Aalé el ˈdaal gál giri ˈBíl Waaˈgietká ˈdeˈdeenká gál Farisaay ubaa gál guguđo-, suoryoká hol ˈdú nadheká, gál guguđo kinaal gáál yiete, kieye, Háteka hí mú ma ka ˈgiliˈgânyal? gaalí yie.

⁴⁶Aalé gaal gáál ˈdéé hol ˈdú nie, kieye, Hé máá kálta hát máállá ˈdéé ka hogodheká mán, gaalí yie.

⁴⁷Gál Farisaay kinaal đo kieye, Mu itín úba haí nyimite?

⁴⁸Gál kaansúóllá ubaa nyííni nyí Farisaayallá it gál mú iiy yieká nyí gaa argiyye?

⁴⁹Tá nyésébích hemuumurit Waaˈgiet og mánnallá íín hé ˈdor hí hile, gaalí yie.

⁵⁰Aalé Nikoˈdémos giri gál Farisaay kinaal túóyle gaa ije-, meeny gíri Yíésu ˈdú sedheká, gállé guguđo kinaal yiete, kieye,

⁵¹Máádhat har héllé he ekemeyoká er ki ˈgas ma heesen-, ki nee ma konyka, nyátálkúnnoka, hé ki hálléél ˈdeđenset? hí gáál yie.

⁵²Aalé gál giriká Nikoˈdémos ˈdéé hol ˈdú nie, kieye, Kúún úba máá Galilaaya? Ebá warˈgasam gaa ebísso, Máá giri Waag hí ˈdeem ka shigicho-, ki met egessoká gon hé Galilááya yé ma gáá ˈdeeminy, gaalí mú yie.

⁵³[Aalé đo gaal lulle eiy kie, ˈjienle eiy ˈdú gale.