Read daasanach Yuána 8 Bible Online

Yuána 8 - daasanach bible

Yuána 8

¹Yíésu íín Gúm Saano Salabká álle sedhe.[32]

²Bur biiy ká biˈdeká, Yíésu ˈjien hol ˈdú nadhe, geđi ˈBíl Waaˈgietká nyáláárle geer hile. Mú gálaat lulle hí ki made, mu đo les yíéđie, gáál he onisie.

³Gál gálaat nyatalaam oonisuoká ubaa gál Farisaay min mááyab hol burume mare ál kinaal ká eey, min nyesebich hurt ká koy.

⁴Aalé gaal Yíésu geey, kieye, Máá gáál he oonisúóllo, minnééllá mááyábo hol burume, in nyí ká ˈgiliˈgayye.

⁵Móshe hemuumurit Waaˈgiet ˈdéé gáá hodheká kieye, ˈDeg hatallo-, buruannallá waar ki tunáa, he yie. Tá kúún háte cheedhe? gaalí mú yie.

⁶Gaal mú hatallá yíéllá, hé mú af kí dhaˈgasan-, mú ˈdú ˈdeđensetká he mú gaa ˈgeˈgedhe. Yíésu íín taalle mé les ki ˈdoy, gúmúrínylé he les ki verene.

⁷Aalé gaal hátlé taalle mú hegeteká, mu mé les gaa eey, gáál geey, kieye, Ebá itín máá ađááb mánká hí erkob min wáár ki ˈduo, yie.

⁸Mu geđi mé les ki ˈdoy, he les gaa veere.

⁹Aalé gál min ka ˈgiliˈgayká héél maaleká hát taataká eiy yíé ˈdeeˈdeme, karu erkob yíé ˈdie, ˈjíig gaal lulle el gaa ˈgidhe. Yíésu ubaa min tákámle nyesebich hurt kí ˈgite.

¹⁰Aalé Yíésu mé les gaa eeyká, min yiete, kieye, Minnééllo, gál ko ka ˈgiliˈgayká aake? Gaal hé máá ko ˈdeđenteká mán? yie.

¹¹Min kieye, Máá Guđo, hé mán, chie. Aalé Yíésu kieye, Yáá úba ko ma ˈdeđensen, sí, ha geđi ađááb híliny, yie.][33]

¹²Yíésu geđi gálaat ki ˈdiiyime, kieye, Yú he édhúm lésallá ka yimieká. Máá ye el gáá veeroká hé geđi bííy gaa ongʼoˈdeká ma gaa seseminy, édhúm gálaat luolmít shiguoká he ˈgaa, yie.

¹³Aalé gál Farisaay Yíésu ˈdéé ˈdú tie, kieye, Kúún állá taalallá tákám kua hol ˈduuwkú ˈdú hogoto. Hol ˈdúúw ˈdú huogon kuallá hé tagle muuniny, gaalí mú yie.

¹⁴Aalé Yíésu gáál ˈdéé hol ˈdú nie, kieye, Har káána yú hol ˈduuwchú ˈdú hogodhoka, ˈdaa giri yú ál gáá yimieká ubaa ál seseenká ógká, hol ˈdúúw ˈdú huogon chiallá hé ˈdúwa. Tá itín íín it ál yú gáá yimieká ubaa ál yú seseenká muog.

¹⁵Itín yaalmit gálaatká hí gálaat ˈdéé ki iđimicha. Yú íín yáá máá ˈdéé ki iđimuoká mán.

¹⁶Tá har yú máádhat ˈdéé ki iđieka, ˈdéé ki iđinychú hé ˈdúwa, ˈdaa giri yú tákámchú muuniny-, ˈJaa chia ye ali gáá kaayká nyí hol ˈgayyaká.

¹⁷Warˈgasam kíchia hemuumurit Waaˈgietká ˈdéé umut gaalí gaa veereká kieye, Hé gál naamaká hí ˈdúúw ˈdú ˈdie-, hí ˈduuwle huogodhoká hé ˈdúwa, he chie.

¹⁸Yú he máá ˈduuwle gálaat met gaa hogodhoká. Héétí ˈJaa chia ye ali gáá kaayká ˈduuwchú hogodho, muí yie.

¹⁹Aalé gaal mú heete, kieye, ˈJaakú aake? gaalí mú yie. Yíésu gáál ˈdéé hol ˈdú nie, kieye, Ití ye muog, ˈJaachú úba it muog. Itín hí ye onnônyka, it ˈJaachú úba óg, muí gáál yie.

²⁰ˈDeenyééllá af giri mu ˈBíl Waaˈgietká álle gálaat he gaa oonisieká muí hodhe. Mu af kinaallá ál gálaat hí héllé shiichoká hol ˈdu sisidhoká he láá ije. Tá ˈdaa giri mú aleđuđugulle ali ma kí ˈdíinyká, mú hé máá níínní hí ˈgiliˈgayká mán.

²¹Aalé Yíésu geđi gáál geey, kieye, Yú ali ha gaa seeme, tá itín hollo hí ye hol gaa ˈgeˈgete, kor ađaabanokícho haí ki kufunanna. Ál yú mé nannuoká it hát níínní hí ka chimetká mán, gáál yie.

²²ˈDéé umut kinaallá gál guguđo-, Yuuˈdiká tawuny gaa koyye, gaal hol yiete, kieye, Hé mu kieye, Ál yú mé nannuoká it hát níínní hí ka chimetká mán, muí yíéllá, mu kor hollo hol yegese? gaalí hol yie.

²³Aalé Yíésu kín ˈdéé huogodhe, kieye, Itín lésallá hí le, yú íín úrro le. Itín hí gál lesallá, yú íín yáá máá lesallá muuniny.

²⁴Yú yáá hí geey, ađaabanokícho haí ki kufunanna, yáá hí yie. Itín yú hát he yúká hí iiy ma cheenka, ađaabanokícho gon haí ki kufunanna, Yíésu hí gáál yie.

²⁵Aalé gaal mú yiete, kieye, Kúún mááya? gaalí mú yie. Yíésu gáál ˈdéé hol ˈdú nie, kieye, Hé kinaallá hé yú hí kis geeyká.

²⁶Yú yáá hé guđo-, hí ˈdú ˈdeđensetká ˈguo. Tá Máá ye ali gáá kaayká hé yú gaa maaleká in yú gálaat lésallá gaa geđia. Máá kinaallá hé ˈdúwa, muí gáál yie.

²⁷Gáál hát muí ˈdeeny ˈJaallé Waag geđúóllá hé eiy ma náásan.

²⁸Aalé Yíésu kieye, Af giri hí Iny Máádhat ˈgór đarám yaalká ˈdú ˈdoyyo-, hí mú úr ki eeyyoká in yú hát he yúká hí kiimisata. Héétí hát yú tákámchú hé níínní ekemeyoká mán-, hé ˈJaachú hí ye onisieká tákámle hogodhoká úba haí kiimisata.

²⁹Máá ye ali gáá kaayká yáá nyí hol ˈgayya, tá ˈdaa giri he lullé yú ekemeyoká mú geer gaa memesuoká, mu hé ye ma hâny, Yíésu hí gáál yie.

³⁰Yíésu hátlé ˈdéé af ká ˈgieká đo gál burnayká hí iiy yie.

³¹Yíésu gál Yuuˈdi hí iiy yieká geey, kieye, Har hí he onisinychú tág chirateka, itín af kinaalka gon hí lalichú,

³²tá hé ˈdúwaká eiy haí naasata, hé ˈdúwa kinaal mé haí fuura, Yíésu hí gáál yie.

³³Aalé gál Farisaay Yíésu oosle ˈgieká Yíésu geey, kieye, Nyiin nyí hídh Abiraayam, nyáá nyí kálta gálaat nyí mé les ma ki tíiny, nyí géde ma hóson. Tá háteeye, kúún kieye, hé kinaallá mé haí fuura, nyí chegedhe? gaalí Yíésu yie.

³⁴Yíésu gáál ˈdéé hol ˈdú nie, kieye, Yú hí hé ˈdúwaká geeye, máá ađaabano hileká ííni ađaabano gédéchlé he yie.

³⁵Gedech hé el meeny leđuđugulleká mán, tá iny laag ki ˈdalidheká íín hé el meeny leđuđugulle-, biiyoká ˈguo.

³⁶Yáá Ínyííllá hí mé fureka, mé furit kinaallá he mé furit ˈdúwaká.

³⁷Itín hát hí hídh Abiraayamká yáá hí óg, kor ˈdaa giri hí ˈdeenychú ma ˈdú fafinyká, in hí tagkícho ˈdiiyye, hí ye chegese.

³⁸Yú hé ˈJaachú gaa aargiroká in hogodho. Itín íín hé hí ˈjaakícho gaa mamalloká hí ekemeyche, Yíésu hí gáál yie.

³⁹Gaal đo kieye, ˈJaakínyo he Abirááyam, gaalí yie. Aalé Yíésu gáál geey, kieye, Itín har hí um Abiraayam kátaka, onnônyka hé midhab Abirááyam hí eekemeyká hí ekemeyche.

⁴⁰Yú he máá hé ˈdúwa-, Waag gaa maaleká hí geđuoká, kor káána it ye oos muˈde. Abirááyam íín hé hatallo-, itín hí ekemeychóóllá ma ekêny.

⁴¹Itín hé ˈjaakícho hí ekemeyoká hí ekemeyche, Yíésu hí gáál yie. Gaal falme, kieye, Nyiin nyáá nyí um afoká muuniny, nyiin ˈJaakínyo tikiˈde, Waag tákáma, gaalí yie.

⁴²Aalé Yíésu gáál geey, kieye, Waag har ˈJaakícho kátaka, it onnônyka ye giel, ˈdaa giri yú Waag gáá yimie-, tá káána yú állá ijoká. Yú yáá meenychú ma kí yímen, mu ííni ye ali gáá kaay.

⁴³Itín hé yú hí geđuoká háteka hí eiy ma nannasanal? Hééllá hí eiy ma nannasanallá he ˈdaa giri ˈdeeny chia yú hí geđuoká hí mé ma ki seseminyká.

⁴⁴Itín ˈjaa kíchia hí léká he Sátan. Itín hát ˈjaakícho hí fedoká hí el gaa igiˈdoká hí feˈde. Máá kinaallá he máá aale-, gálaat yeges-, hé ˈdúwaká ma ki yaaliny-, hé ˈdúwaká hí gaa mánká. Mu af giri hódho higiloká in hélle tuuˈdle hogodho. Hééllá he ˈdaa giri mu hódho lé-, hódho ˈjaa léká.

⁴⁵Tá yáá giri hí hé ˈdúwaká geđuoká it ˈdeenychú iiy ma chegen!

⁴⁶Itín mááya yú hát ađááb hileká ká hogodho? Tá har yú ˈdúúw hogodhoka, háteka hí ye iiy ma chegenal?

⁴⁷Máá Waag hí léká Waag ˈdeenyle hai maala. Itín ˈdaa giri hí Waag gálle muuninyká in Waag ˈdeenyle hí mé ma ki seseminy, Yíésu hí gáál yie.

⁴⁸Gál giri guguđo-, Yuuˈdiká mú ˈdéé hol ˈdú nie, kieye, ˈDeeny nyí hote-, nyí kieye, Kuun máá Samaria, aryáánno ˈgayya, nyí ko chieká, hé ˈdúwaká muunîny? yie.

⁴⁹Yíésu kieye, Yú yáá aryáán mán. Yú ˈJaa chia kikiadha, met gaa kekeme, tá itín íín erenyo hí ye kikicha.

⁵⁰Yú yáá hol ˈdúúw ma ki ˈgeˈgen, Máá ye ˈdúúw ki ˈgeˈgedhoká yáá ˈguo. Máá kinaallá ííni he hol eiy gaa ním og.

⁵¹Yú hí hé ˈdúwaká geeye, máá ˈdeenychú ki yaalká taalle bííyyo hé kúfach il hí ma aargiriny, Yíésu hí gáál yie.

⁵²ˈDéé umutéél tákáma muí hodhe, gál Yuuˈdi đo kieye, Hát aryáán ˈgayyoká káána gon nyáá nyí kimisate. Abirááyam hé guraam hí guure, gál Waag hí ˈdeem ká shigicheká úba hé guraam hí guure. Tá háteeye kúún geđi kieye, Máá ˈdeenychú ki yaalká taalle bííyyo hé kúfach il hí ma aargiriny, chegedhe?

⁵³Kúún in ˈjaa kínyaa Abirááyam ˈdúuw ˈdú ˈgayya? Mu íín ubaa gál Waag hí ˈdeem ka shigicheká in guraam hí guure háluke, tá kúún mááya hol hođicha? gaalí Yíésu yie.

⁵⁴Yíésu gáál ˈdéé hol ˈdú nie, kieye, Yú har hol ˈduuwasuoka, af kinaalka ˈduuwchú hé kátaká mán. Máá ye ˈduuwasuoká he ˈJaa chia hí hol bal ki ˈdaraanna-, hí Waagkínyo chegetallá.

⁵⁵Har káána itín hí mú móíytaka, yú yáá mú óg. Tá yáá mú muog, yú yieka, af kinaalka hát itín hí hódho lééllá yú úba yáá hódho lé. Yú íín yáá mú óg, mú ˈdeenyle ki yaal.

⁵⁶ˈJaa kíchia Abirááyam hé ˈjímchú gófle ˈgie. Mu ˈjímchú argeká, hé súm geer hí gaa meedhe, Yíésu hí yie.

⁵⁷Aalé gál Yuuˈdi mú yiete, kieye, Kó warram ko tomon chen ma chéenallo, Abirááyam argíyye? gaalí mú yie.

⁵⁸Yíésu gáál ˈdéé hol ˈdú nie, kieye, Yú hí hé ˈdúwaká geeye, Abirááyam hátlé ma ka ˈdaláanká, yáá ali ije, muí gáál yie.

⁵⁹Gaal héél tákáma maale, đo waar giri mú ki tutunoká shuunne, Yíésu đo gáál mé af ˈgite, ˈBíl Waaˈgietká náble yé gaa ˈdie.