Read daasanach He Ekeny Gál Alb Fimiká 1 Bible Online

He Ekeny Gál Alb Fimiká 1 - daasanach bible

He Ekeny Gál Alb Fimiká 1

¹Tíáfeles, warˈgat chia erkob yú veereká he lullé giri Yíésu hí mé gáá kodhdhe-, hí eekemey-, tá hí gálaat oonisie-, tá ˈjíig kúlích muí úr mé gaa nieká yú gaa veere. Kúlích kinaallá mu hátlé úr mé ma níinyká, mu gállé giri waaˈde-, muí alb fafieká muí Hím Naasan Waaˈgiet af ki tie.

³Aalé mú manyjasinyle ubaa kúfáchle el ˈdaal, mu gállé waaˈde kinaal af burnayká hol yé ˈdu gáá ˈdeey, tá hé burnay-, máálle hát geđi luolká ˈduuwle gaalí kiimisatká muí gáál argisie. Rám tomonaam afur kinaal mu gáál hol yé ˈdú gáá ˈdeeđieká mu Guch Waaˈgiet ˈdeenyle huogodhe.

⁴Af tikiˈd mu hátlé gáál hol ˈgar golmoteká mu gáál hatal geey, kieye, Ha hí Yerúsalem gaa kíiny, hé hí ye af gaa maalle-, yú hogodhe-, ˈJaachú hí ye af iđie-, yú hí ka shiguoká esée.

⁵Yuána bie he gálaat gim nannie, tá itín rám iraam mán ka chiimetallá Hím Naasan Waaˈgieto Waag hí gim nanniyya, muí yie.

⁶Aalé gál alb fimiká ubaa Yíésu hol ˈdu gáá yimieká, gaal mú heete, Máá Guđo, kúún aalé káána gál Yisirayello kansím hol ˈdu gáá nanniyya? gaalí yie.

⁷Mu gáál geey, kieye, Hééllá bárle ubaa aflé giri ali kí ˈdeˈdeen-, ˈJaachú hí hemuritle taak ki koyká hé hé kíchia hí gaa ijoká mán.

⁸Aalé Hím Naasan Waaˈgiet hí ˈdu gáá leeteka, fargogínt haí aargiˈda. Itín ˈjien Yerusalem, lés Yuuˈdia lullé, tá lés Samaria, tá ˈjíig les ameenylé ki taalká ˈdeenychú gálaat ha hí gaa maalsicha, muí yie.

⁹Mu ˈdeenyéél beeteká hátlé gaalí dhaˈgameká úr mé nie, nyáˈdow hí buanne, gáál in ki bađay.

¹⁰Gaal hátlé mu bííylé mé nieká gaa dhaˈgameká gál naama đafaraam eegedhká fadhdhe mare ál tikiˈde kinaal đo gáál láá kí ˈdie,

¹¹kieye, Gál Galilaaya, háteka hí ál ˈgiiyya-, hí úr gaa dhaˈgasannóol? Yíésu Waag hí gaa eetééllá hát tikiˈde hí argiyya-, he ur Waaˈgiet mé níéllá in geđi hol kí naadha, gaalí yie.

¹²Aalé gaal Gúm Saano Salabká hol gáá nadhe, Yerúsalemle mé nie. (Sieny kinaallá he sieny mé gaaw-, gáál nyátálleka gaalí Kúlích Hef ˈGisanká gaa seseenká.)

¹³Aalé gaal é kí ˈdieká ˈbíllé biiy ˈdug yiel he gaa ijeká feˈjie. Gaal ííni kinaallá he mú Bétiro, Yuána, Yákob, Ánˈduru, Fílib, Tómas, Bartolomáyo, Matááyo, Yákob giri iny Alfaayaká, ubaa Símon giri gálaat ˈjegeduoká, tá aalé Yúúˈdas giri iny Yakobká.

¹⁴Gaal bar lulle ubaa gál ˈdiet, tá Yíésu ˈjiellé ubaa Yíésu nyaaramlé hol Waag ˈgar vivite.

¹⁵Af kinaal Bétiro les gaa kie, gál giri nyaaram-, Yíésu iiy yieká hurt ki ˈdie. Gál kinaallá amú kúˈd tikiˈde tómón eiy naama giri hol ˈdú gáá yimieká.

¹⁶Aalé mu kieye, Nyaaramchú, he veerit Waaˈgiet gon hé ˈduwayye, giri kíssóótí Hím Naasan Waaˈgiet hí ˈDáwuˈd a geer gaa kaayye-, giri ˈdeeny Yuuˈdas-, máálle gál Yíésu ˈgiliˈgayká Yíésu ˈdú eeyká.

¹⁷Yúúˈdas kinaallá úba hé túóykúnno gaa yiel, hé fayam Waaˈgiet úba ki hol ˈgar sisidhe.

¹⁸ˈDeeny Hím Naasan Waaˈgiet hí ˈDáwuˈd a geer gaa kaayye-, gaalí warˈgat Arramká gaa veereká hatallá he chie: Mú egemle gaalí hayo, ha máádhat hí el meenyle hóson,[1] warˈgát hí chie, Bétiro hí yie. (Hé kinaallá hé ˈduway, af giri Yúúˈdas birellé ˈgíérích ađaabiet ki argeká les hidhdhe-, ál kinaal mu úr gáá ˈjie-, le ˈdoy-, geer hí eiy fuadhe-, nyimereem lulle hí gáá leedheká. Héétí gál Yerusalem lulle úba hí maaleká, gaal ál kinaal meeny he shieká Hakelˈdáma. Hakelˈdáma gáál afleka hélle kieye, Ál fasiet.) Aalé Bétiro geđi kieye, ˈDeeny ˈDáwuˈd warˈgat Arramká hí hoteká úba kieye, Máá eiy hé mú álle eet,[2] he chie.

²¹Aalé mú tikiˈd kí ká eew, kí ál Yuuˈdas kinaal gaa kuo. Máá kinaallá hé máá ameeny Yíésu Yuána hí bie gim gaa nie-, Yíésulle ke hol ˈgieká tá ˈjíig kúlích muí úr mé gaa nieká ke hol af ijeká onnow. Máá kinaallá Yíésu uushich yé gaa ˈdímle kí misikirle hol ˈgar yeet, Bétiro hí gáál yie.

²³Aalé gaal gáál naam hol ki koy, Yúósef giri gaalí Barsábas yegie-, Yóstos léká ubaa Matías.

²⁴Aalé gaal Waag vite, kieye, Máá Guđo, kúúni gálaat lulle gerle og. Gál naamáállá máá feˈdoká nyí ka argísish.

²⁵Mú ál gálle Yíésu hí alb fafuo-, Yúúˈdas hí ká hay-, muí állé fedeká mé gaa níéllá nyí gaa koyyo, gaalí yie.

²⁶Aalé gaal gál naama kinaal koiy ki ˈdoy,[3] Matías kot hí ˈdú ˈdoyye. Mú gaalí gál tomon a takach alb fimi-, Yiesuká ˈdú kaay.