Read daasanach He Ekeny Gál Alb Fimiká 10 Bible Online

He Ekeny Gál Alb Fimiká 10 - daasanach bible

He Ekeny Gál Alb Fimiká 10

¹Kaisária álle máá gaalí Kornélios yegie mare hí gaa ije. Máá kinaallá yuoy Talyan kúˈd tikiˈde mé ki yiel.

²Mu ubaa umle he gál ˈdúwa Waag kikiatká. Mu gál Yuuˈdi-, he maamanká he shigie, bar lulle Waago he vivite.

³Kulich mé tikiˈd aadh ˈgas saal-, a ˈdaa gelgaká máá ˈgasso-, urru-, Waaˈgietká hát amadhyoká mú yé ˈdu gáá ˈdiiyye, muí hát ˈdabaanká arge. Máá kinaal mú vie, kieye, Kornélios, yie.

⁴Aalé Kornélios hát binenenyká mú gaa dhaay, kieye, Máá Guđo, he meete? yie. Mu Kornélios ˈdéé hol ˈdú nie, kieye, Waag visankú ubaa hé kua gál he maamanká shigichoká hé Waag ká nyuore, tá Waag hé ko táb ˈdoˈdoot.

⁵Aaléka gálaat Yóóba ali ˈdú faʼ, gaalí máá gaalí Símon yeget-, giri Bétiro léká ko kí vie.

⁶Mu hé Símon giri issam ubaa lokodo gaa dhudhuˈgo-, ˈbil hí bás in yaalká hol af ijo, muí mú yie.

⁷Aalé máá ˈgasso-, urru-, mú geđieká sedheká, Kornélios máállé yuoyo-, hí he ki nannie-, Waag kikiadhe mare ubaa gál géde naama mú ˈbílle hujich gaa nannie mare ká vie.

⁸Mu hé argeká lulle gáál fayamle shie, gáál Yóóba ali ˈdú fie.

⁹Bííy eiy ká biˈdeká gál Kornélios hí ali fieká ˈgíéríchlé gaa igireká aadh ˈgas le chieká Yóóba kí ˈjobondhe. Aadh ˈgas tikiˈde kinaallá Bétiro ˈbíllé gaa ijeká ˈdúglé gaa ˈbasiyyo mare feˈjie, Waago he vivite.

¹⁰Aalé mu Waaglé viviteká mú geer hí gaa boloy, mu hé geere kokoeyká fede. ˈGuom óróómle hátlé gaalí gílká ˈgieká mú me hí húˈd yie.

¹¹Aalé mu úr af hí furmeká arge. Hé đafar guđoká ki ég-, gaalí ˈdinnam afuraalle ki ˈgie-, gaalí les kí lelesieká muí arge.

¹²Hé đafar ki ég kinaallá bine met lullé ˈgas hí afurká, ubaa guur lesietká, tá kimir kuol ˈgayyoká hí gaa ije.

¹³Aalé mu ˈdéé hót maale, ˈdéé hót mú geeyche, kieye, Bétiro, le gaa keʼ, hééllá áas, he kom, ˈdéé hót hí mú chie.

¹⁴Aalé Bétiro kieye, Máá Guđo, he hát kinaallá muuniny. Yáá hé gaa nyakarich-, gál chia Yuuˈdi-, hí ma kokonyká kálta af ma gaa naanîny, muí yie.

¹⁵Aalé ˈdéé hót geđi a ki naamaká mú geeyche, kieye, Hé Waag hí iiy chie-, Waag hí ko ka shiicheká ha hé gaa nyakarichká chéen, ˈdéé hót hí mú chie.

¹⁶Aalé héél af hí seđ yieká he giri đafareká đo geđi gaalí úr ki eedhdhe.

¹⁷Bétiro hátle héllé argeká yaalmitle ubaa hélle taawua, gál Kornélios hí ali ká fieká ˈbíl Simon yiete, gaalí ˈbíl argisie, gaal đo sedhe, ˈbíl af ki ˈdie.

¹⁸Gaal gáál vie, gáál yiete, har Símon giri gaalí Bétiro yegetká ˈbíl kinaal gaa ijoka.

¹⁹Aalé Bétiro hátlé héllé arge kinaal taawueká Hím Naasan Waaˈgiet hí geeyche, kieye, Bá dháash, gálaat seđ ko hegete.

²⁰Le gaa keʼ, léet, ha ger totom gaa ˈgiˈgísan, giri gáál hí hol egeetoká. Gáál yaa hí ali ká fie, Hím Naasan Waaˈgiet hí mú chie.

²¹Aalé Bétiro leedhe, gáál hol ˈbíl af gaa arge, gáál geey, kieye, Máá hí hol gaa ˈgeˈgetééllá he yú. He háte? yie.

²²Aalé gaal mú geey, kieye, Nyíín máá yuoy kúˈd tikiˈd mé ki yaal-, gaalí Kornélios yeget mare nyí ali ká fie. Máá kinaallá he máá ˈdúwa-, Waag kikiat-, gál Yuuˈdi lulle hí memeyoká. Máá ˈgasso-, urru-, Waaˈgieto mú geey, giri mu ko ká kekero-, hé hogotoká muí mamaloká, gaalí mú yie.

²³Aalé Bétiro gáál ˈbíl fadhdhe, gáál ííf shie. Aalé gaal rafe, biiy ká biˈdeká Bétiro gáál hol eedhdhe, gál nyaaram-, Yíésu iiy yie-, Yóóba gaa ijeká ˈdáá tikiˈd úba gáál hol eedhdhe.

²⁴Bííy éíy geđo ka biˈdeká gaal Kaisária ki fame. Kornélios íín af kinaal kisso gálle ubaa sheelle hol ˈdú vie, Bétiro he met egese.

²⁵Aalé Bétiro ˈbíl af ki ˈdieká Kornélios mú a gim nadhe, mú ˈgas met les kurram gaa ˈdoy.

²⁶Aalé Bétiro mú les gaa eey, kieye, Le gaa keʼ, yú he máádhát, hát kúúni, yie.

²⁷Aalé Bétiro hátlé mú hol geđie-, ˈbíl higileká, nyésébích guđo mé ki yíéđie-, ˈbíl gaa ijeká arge.

²⁸Mu nyésébích kinaal geey, kieye, Hát káána yú máá kídh éíyyallá ˈbílle ka hilééllá, nyátál gál kínyia Yuuˈdikáka hát tagle muuninyká it óg. Tá Waag hé ye he ká argisiche, giri yú máádhat máá ˈdúúw mán-, gaa nyakarichká ma ká dhaˈgaminyká.

²⁹Aalé hí ye gáál ali ˈdu gáá fiiyyeká, yáá hé níínní in gáá kodhdheká mán, đo ká kie. Aalé ha yú hí heete, meete hí ye kí kieˈde? Bétiro hí gáál yie.

³⁰Aalé Kornélios mú geey, kieye, Rám seđe ˈgitééllá aadh ˈgas saal, hát aadh ˈgas káána ke gaa ijóóllá yú ˈbíl chia gaa ije, Waag gaa vivite. Toomareka máá đafaraam bíl bíl yegetká fadhdhe mare ye met kí ˈdie,

³¹kieye, Kornélios, Waag hé Waag visankú maalle, tá hé kua gál he maamanká shigichoká hé úba méká ˈgayyo.

³²Aalé Símon giri gaalí Bétiro yeget-, Yóóba gaa ijóótíá gáál ali ˈdú faʼ. Mu Símon giri issam ubaa lokodo gaa dhudhuˈgo-, ˈbil hí bás in yaalká máállé dheeˈgo, mu hí ye yie.

³³In đo yú ko ál ˈjob gáál ali ˈdu gáá fie. Hát ka chimíéllá hé tág midhab. Aalé nyíín lul kínyia nyí innum Waaˈgiet gaa iđáállá hé mákárta Máá Guđoká hí ko kí mure-, nyí ka geđichoká nyí nee kokoyyo, Kornélios hí mú yie.

³⁴Aalé Bétiro gáál ki ˈdiiyime, kieye, Aalé káána yáá hát ˈdabaanká he kimite, Waag hát he gáál mé tikiˈd tákámle ma ˈdú iifinyká.

³⁵É meet lulle gál Waag kikiat-, hé ˈdabaanká gaa seseenká Waag iiy haí chegedhe.

³⁶ˈDeeny Waag hí gállé Yisirayelká ali ˈdu gáá kaayyeká it óg. ˈDeeny kinaal he Fayam Midhab naanna-, ˈdaa Yiesu Kiristo ka naateká. Yiesu Kirísto kinaallá he gálaat lulle Máállé Guđoká.

³⁷Hé Yíésu hí lés Yuuˈdia lulle gaa eekemeyká it óg. Hé kinaallá he bár giri Yuána bie gim niiny fayamle ˈdiiyimeká el ˈdaallá. Hé kinaal lulle er lés Galilaaya yé gáá ˈdie.

³⁸It Yíésu Nasaretká hát Waag hí Hím Naasan Waaˈgiet ubaa fargogínt ˈdu gáá leesicheká it óg. Waag hé mú hol ˈgie, giri mu hol gaa seseme-, hé midhabká ekemey-, mu gál kídhích kúnnaa giri Sátan léká hí he ki ekemeycheká úba lulle bibisieká.

³⁹Nyííni he lullé muí lés gál Yuuˈdi ubaa ˈjien Yerusalem gaa ekemeyká nyí il ki argiyye. In gaal mú ˈgór đarám yaalká ˈdú ˈdoy, mú yies.

⁴⁰Kor kúlích ki seđeká Waag íín mú uushich yé gáá ˈdeeyche, nyí mú ká argisiche, nyí mú il ki argiyye.

⁴¹Mú hé gálaat lulle hí ma árginy. Nyííni giri kis Waag nyí waarate-, hé nyí il ki argiyyeká nyí hogotoká tákáma nyí mú argiyye. Gál kinaallá he nyííni giri mu uushich yé gáá ˈdieká nyí mú hol ˈgar gololsote-, mú nyí hol he ˈgar iiyyeká.

⁴²Mu hé nyí ˈdéé kí mure, giri mú fayamle nyí gálaat ki ˈdiyeenneká. Mu hé Waag hí máá gál luogolká ubaa gál kufeká máállé hí ˈdéé ki iđimuoká hoyche. Fayamééllá gálaat geeyyíe, muí nyí yie.

⁴³Gál Waag hí ˈdéé ka shigicheká lulle hé mú ˈdeenyle huogodhe, giri mú meenyle ˈdaalle ˈdugaka gál mú iiy yeetká ađaabanolle Waag hí gaa egeyyoká, Bétiro hí gáál yie.

⁴⁴Bétiro hátlé ˈdéé hogodheká Hím Naasan Waaˈgiet gál ˈdéé nee kokoyká lulle ˈdu gáá leete.

⁴⁵Aalé gál Yuuˈdi-, Yíésu iiy yie-, Bétiro hol Yóóba gáá eedhdheká Hím Naasan Waaˈgiet hát Waag hí gál Yuuˈdi muuninyká úba ˈdu gáá leesicheká argeká he af ˈdabe.

⁴⁶Gál Hím Naasan Waaˈgiet hí ˈdu gáá leete kinaal af hol ká eiyyeká đo ká huogodhe, Waag ki meey, gaalí maale. Aalé Bétiro kieye,

⁴⁷Mááya gálallá bie gim nímle điidhma? Hát tikiˈde múún ke Hím Naasan Waaˈgiet ke ki arge kinaallá in úba gálallá hí ki arge, muí gáál yie.

⁴⁸Aalé mu gáál he ki mure, kieye, Gaal hí meeny Yiesu Kiristo bie gim ki nuo, gáál yie. Aalé gaal Bétiro yiete, giri mu gáál rám mákártaká hol af yíéđianká.