Read daasanach He Ekeny Gál Alb Fimiká 11 Bible Online

He Ekeny Gál Alb Fimiká 11 - daasanach bible

He Ekeny Gál Alb Fimiká 11

¹Gál alb fimiká ubaa gál giri nyaaram-, Yiesu Kirísto iiy yie-, lés Yuuˈdia gaa ijeká kidh hát ˈdeeny Waaˈgiet iiy yieká maale.

²Aalé Bétiro Yerúsalem hol ˈdú nadheká gál Yuuˈdi giri Yíésu iiy yieká ˈdáá tikiˈd[32] mú ki lole,

³gaal kieye, Háteka gál ma hermisanká ényle siete-, hí hol af gaa konyéel? gaalí mú yie.

⁴Aalé Bétiro gáál ˈdéé hát ˈdabaanká ˈgas gaa koy,

⁵kieye, Yú ˈjien Yooba gaa ije. Kulich tikiˈd Waag chia viviteká, me đo ye húˈd yie. Hé Waag yé gáá ˈdie-, hát đafar ká yaal-, guđo-, gaalí ˈdinnam áfúrle ki ˈgie-, gaalí úr gáá leesie mare yú arge.

⁶Aalé hé kinaal yú geer gaa dhaayká bine ˈgas hí aafure-, baaˈdietká ubaa guuré, tá kimir kuol ˈgayyoká hí gaa ija.

⁷Aalé yú ˈdéé hót ye geđicheká a maale, ˈdéé hót kieye, Bétiro, le gaa keʼ, héél áas, he kom, ˈdéé hót hí ye chie.

⁸Aalé yú ˈdéé hol nie, yú kieye, Máá Guđo, hé hát kinaallá muuniny. Yáá hé gaa nyakarich-, gál chia Yuuˈdi-, hí ma kokonyká kálta af ma gaa naanîny, yú yie.

⁹ˈDéé hót geđi af ki naamaká úr gáá ˈgite, kieye, Hé Waag hí iiy chie-, hí ko ká shiicheká ha hé gaa nyakarichká chéen, ˈdéé hót hí ye chie.

¹⁰Héél af hí seđ yieká he lulle geđi gaalí úr ki eedhdhe.

¹¹Tíkíˈdé kinaal gál seđe gaalí Kaisária ye ali ˈdú gáá fie mare ˈbíl yú gaa ijeká af kí ˈdie.

¹²Aalé Hím Naasan Waaˈgiet ye geeyche, giri gáál nyí hol egeet-, yú ger totom ma gaa ˈgiˈgisanká. Gál le nyaaramallá úba nyí hol eete, máá gaalí Kornélios yeget mare ˈbílle nyí ki faanne.

¹³Mu hát máá ˈgasso-, urruká hí ˈbílle geer yé ˈdú gáá ˈdieká nyí geey. Hé máá ˈgasso-, urruká hí mú geeyká kieye, ˈJien Yooba gálaat ali ˈdú faʼ, Símon gaalí Bétiro yegetká gaalí ko kí vie.

¹⁴Mu fayam kúún ubaa gálkú lulkícho hí biisichoká haí ˈdu gáá siidha, muí mú yie.

¹⁵Aalé yú ˈdéé mé gáá eeyká Hím Naasan Waaˈgiet hát giri héle erkob múún gáál ˈdú gáá leeteká úba gáál ˈdu gáá leete.

¹⁶Aalé hé toomeelloʼ Máá Guđoká hí gáál ka geeyká ye táb ká ˈjie, giri mu kieye, Yuána íín bie gálaat gim nie, tá itín Hím Naasan Waaˈgieto Waag hí gim nanniyya, muí gáál yieká.

¹⁷Har Waag Hím Naasanle af giri múúni ke Máá Guđo Yiesu Kirísto iiy yieká gáál ka shiicheká úba gaal íín shiicheka, yú mááya Waag gaa điidhanal? Bétiro hí gáál yie.

¹⁸Aalé gaal ˈdeenyéél maaleká hol ki fálaam hay, Waag meey, kieye, Taglé, Waag úba hé kidh kár he héllé ˈdeđewká ki haađuo-, gaalí makan ki fafaanká shiiche, giri gaal luolmít aargiroká.

¹⁹Af giri Estéfan gaalí yies-, manyjasiny gál Yíésu iiy yieká biiy gáá ˈdiiyyeká, gál gaalí manyjasie kinaal ˈbáál bííy he kar ˈdú ˈdane-, he mé đig yieká he lés Foinike, lés Kuburos, tá ˈjien Antiok. Gaal gállé Yuuˈdiká tákáma ˈdeeny Yiesuká geey.

²⁰Aalé gál Yerúsalem kar gaa ˈdane-, Ántiok mé nieká ˈdáá tikiˈd hí gál lés Kuburos, ˈbaal hí gál ˈjien Kurene. Gál kinaallá ˈjien Antiok kí fameká gál kídh Hellen Máá Guđo Yíésu Fayamlé Midhabká úba shie.

²¹Aalé Waag gáál kúól gaa chirate, gál burnayká ˈdéé iiy yie, gaal Máá Guđo Yíésu gálle yie.

²²Aalé fayam galallóól gál Yíésu iiy yie-, Yerúsalem gaa ijeká hí maaleká gaal máállé Barnábas Ántiok ali ˈdú kaay.

²³Aalé Barnábas ali ki ˈjie-, Waag gielmitle argeká geer hí gaa meedhe, mu gáál lulle guofsie, giri gaal kasle Máá Guđoká gaa iđimuo-, mú el af ma gaa taaminyká.

²⁴Barnábas íín tuuˈdle he máá ˈdúwa-, Hím Naasan Waaˈgiet hí koch onnoyye-, iiy yeen guđoká ˈgieká, in gál burnayká Máá Guđoká iiy yie.

²⁵Aalé mu Társos sedhe, Sáwul ál kinaal ˈdú ˈgeˈgedhe.

²⁶Aalé mu Sáwul argeká mú Ántiok ˈdu gáá eedhdhe. Gaal hullaalle ubaa gál Yíésu iiy yie-, al Antiok kinaalloká hol war tikiˈd af yíéđie. Gaal gál burnayká fayam Yiesu Kiristo onisie. Ál Antiok kinaallá in erkob gál láliká gaalí gál Kiristo gaa yie.

²⁷Af kinaal gál Waag hí ˈdéé ka shigiche mare Yerúsalem gáá yimie, Ántiok kí fame.

²⁸Gál kinaal mú tikiˈd máá gaalí Ágabos yegie mare les gaa kie, ˈdaa fargogint Hím Naasan Waaˈgietká les lulle hát kuoˈd ˈdeewká hí gáá ˈdeˈdeennoká ˈdiiyime. (Kuoˈd kinaallá af giri Kaláúˈdias giri Káísar léká he máá kansich onnoyká les gáá ˈdiiyye.)

²⁹Gál Yíésu iiy yieká hátlé giri hol he ˈdú ˈgaˈguoká ˈdeemanolle ger ki muumuˈde. Gaal nyaaramlé giri gál Yíésu iiy yie-, lés Yuuˈdia gaa ijeká he ˈdaˈdablé shigieká hol ˈdú shuune.

³⁰Gaal héllé hol ˈdú shuune-, gállé nyaaram-, lés Yuuˈdia gaa ijeká ali ˈdú fafieká Barnábas ubaa Sáwul gíl fie, he gaalí gáál karulle ˈdú sidhe.