Read daasanach He Ekeny Gál Alb Fimiká 14 Bible Online

He Ekeny Gál Alb Fimiká 14 - daasanach bible

He Ekeny Gál Alb Fimiká 14

¹ˈJien Ikonio álle Báulo ubaa Barnábas hátlé aađaká gál Yuuˈdi ˈbíllé ˈdiiyiminyká hile. Gaal hát ˈdabaanká ˈdéé huogodhe. Gál Yuuˈdi burnayká ubaa gál Hellen burnayká ˈdéé iiy yie.

²Aalé gál giri Yuuˈdi ˈdéé iiy ma yéenká gál giri kidhdhoká ˈbaal chure, gáál gál nyaaram-, Yíésu iiy yieká mé il gaa koy.

³Báulo ubaa Barnábas ál kinaal rám ilishká gaa yíéđie. Gaal Máá Guđo Yíésu ˈdeenyle hát nyaalimoká huogodhe. Máá Guđo Yíésu ˈdeenylé gielmiti-, gaalí huogodhe kinaal ˈduwasie, mu fargogint hélle gálaat hí il ki aargire-, gaalí af ˈdaˈdabe-, gaalí eekemeyká mú Báulo shie.

⁴Aalé gál ˈjien kinaalloká eiy ˈgiiˈgite, ˈdáá tikiˈd gál Yuuˈdi Yíésu iiy ma yéenká ˈdú fame, ˈdáá tikiˈd gál alb fimiká ˈdú fame.

⁵Aalé gál kidhdhoká ubaa gállé Yuuˈdiká tá gállé guguđoká ˈdee hí tikiˈd yieká, gaal mú Báulo ˈdéé tág ki nie, giri gáál he ki ekemeyo-, gáál waar ki tuunoká.

⁶Aalé Báulo ubaa Barnábas gáál điđamlé kinaal maaleká, gaal lés Lukonia ˈjienlé Lustura-, ubaa ˈDerbe-, tá forimlé hí lag ijeká kar ˈdú ˈdoy.

⁷Gaal ˈjienno kar ˈdú ˈdoy kinaal Fayam Midhab Yiesuká gaa ˈdiiyime.

⁸Lústura állé kinaal máá ameeny ká ˈdalidheká kálta hol ma gaa síen-, ˈgas gáá héljo mare hé hí gaa ije.

⁹Mu ˈdeeny Báulo hí hogodheká nee koy. Aalé Báulo mú tág gaa dhaayká, mu iiy yeen máálle gaalí biisuoká ˈgaa.

¹⁰Aalé Báulo af gaa guđoká mú ki geey, kieye, Le gaa keʼ, ˈgas les ki ˈdíit, yie. Máá giriká đo les gaa kiite, hol gaa seeseme.

¹¹Nyesebich hé ki af ˈdaˈdabo-, Báulo hí ekey kinaallá argeká af gaa guđo-, Lukoniaká ˈdéé ki huogodhe, kieye, Waagam hé yaalmit gálaatká hol tág gáá niiyye, gáál ˈdú gáá leete! gaalí yie.

¹²Gaal waaglé guđo Sías léká meenylé Sías lé kinaal Barnábas shie. Gaal úba waaglé afo Hérmes léká meenylé Hérmes lé kinaal Báulo shie, ˈdaa giri Báulo he súm ˈdiyimeká.

¹³Sías ˈbíllé gaalí gaa vivisat-, é sug yielká máállé suoryoká hiit ubaa huraam gaalí ˈguor kállányle tagano gaa nieká é káráfle ká sidhe, giri mu íín ubaa nyésébích kinaal Báulo ubaa Barnábas suor ki ˈgaaloká.

¹⁴Aalé Barnábas ubaa Báulo hé gaalí ekemesetal ˈdeenyle maaleká ger hí gaa ˈdeenedhe, hol đafaraam eiy ki fufue, nyesebich ˈdú kirite, gáál ki ˈday,

¹⁵kieye, Gál yaab, háteka hí héél ekemeychéel? Nyíín úba nyí gálaat, hát itíni! Nyíín Fayam Midhabká ke hí ˈdú gáá sidhe, giri ke hí geđuo-, hí hé ˈdúúw mánnallá haađicha-, Waag giri úr, les, bás, tá héllé hí gaa ijoká tág niiyyeká hí bala ˈdu gáá nanniyyaká.

¹⁶Kíssóótíá mu kidh mé ki hay, giri gaal hátlé fedeká sesemeká.

¹⁷Kor mu hé ˈgíérích hí ki kiimisatká hí ma ka rían. Mu hé hí hé midhabká ki eekemey, giri muí ír úr gáá shigie-, ˈguomkícho muí higisieká. Mu hé hí heeymisie, hí ger gaa meemey, gaalí gáál yie.

¹⁸Gaal har úba ˈdeeméél lulle huogodheka, gaal hát nyifieto suor gaalí ki ˈgaˈgaleká ali koy.

¹⁹Aaléka, gál Yuuˈdi ˈbaal hí Ántiok ubaa Ikónio gáá kie, ény Báulo hí gaa ijeká gálle chure, gaal Báulo waar ki tune. Aalé mú me hí ˈjieká, mu hai kufe, he yie, mú é ˈgas gaa chiˈde, mú biiy sug ki lay.

²⁰Aalé gál Yíésu iiy yie-, láli-, ál kinaal gaa ijeká sedhe, Báulo ki made. Aalé Báulo ka aareká, le gaa kie, é hol ˈdú nadhe. Bííy éíy taaka geđo-, ka biˈdeká mu ubaa Barnábas hol eedhdhe, ˈDérbe mé nie.

²¹Báulo ubaa Barnábas ˈjien ˈDerbe Fayam Midhab Yiesuká gaa ˈdiiyime, lali guđo-, Yíésu iiy yieká arge. Aalé gaal đo Lústura, Ikónio tá Ántiok giri lés Bisidiaká hol ˈdú nadhe.

²²Gaal ˈjien kinaal gál láliká yiir gaa chiˈde, gáál af tie, giri gaal hát ˈdabaanká iiy yeen tág chiiratká. Gaal gáál geey, kieye, Guch Waaˈgiet ki higiloka, hát hé guđoká il hí gáál aargiˈdoká kí onnow, gaalí yie.

²³Báulo ubaa Barnábas aflé higite-, Waag viviteká gál Kiristo ˈjien kinaallo-, alb hí hol ka eiy eiyyeká gállé hí met ki ˈdeenká le gaa shuune. Gaal Máá Guđo Yíésu he iiy yieká gáál gíl geer fie.

²⁴Aalé gaal ˈjien lés Bisidia mé ki ˈdoyká, Bamfília ki fame.

²⁵Gaal Máá Guđo Yíésu ˈdeenyle ˈjien Berga gaa ˈdiiyimeká, gaal ˈjien Atalia mé nie.

²⁶Gaal ˈjien Atalia kinaal kadich gaa hile, Ántiok giri lés Siriaká hol ˈdú nadhe. Ál kinaallá he ál erkob gaalí gáál gielmit Waaˈgiet ˈdú hay-, hújích káána gaalí beetéél gaalí gáál mé ki koyká.

²⁷Aalé gaal he ál Antiok kinaal ki fameká gaal gál Kiristoká hol ˈdú vie. Gaal hát Waag hol ˈgie-, Waag hí hujich ki nannasate-, tá kár giri kidh hí Kirísto iiy ki yegetká Waag hí af ki fuˈdeká, fayamle lulle gáál shie.

²⁸Aalé gaal ubaa gál láli-, al kinaalloká hol súm af yíéđie.