Read daasanach He Ekeny Gál Alb Fimiká 16 Bible Online

He Ekeny Gál Alb Fimiká 16 - daasanach bible

He Ekeny Gál Alb Fimiká 16

¹Báulo ubaa Sílas sienylé gaa igireká ˈDérbe ubaa Lústura ki fame. Aalé gaal ˈjien Lustura állé kinaal máá lali-, gaalí Tímote yegie-, ˈjielle min Yuuˈdi-, Kirísto iiy chie-, ˈjaalle máá Hellen mare ál kinaal gaa arge.

²Máá kinaallá gál nyaaram Lústura ubaa Ikónio gaa ijeká hí memey.

³Báulo Tímote kinaallá úba hol egedhdheká he fede. Aaléka mu mú hermisie, giri gál Yuuˈdi lullé alb kinaal gaa ije-, mú ˈjaalle hát he máá Hellen onnoyká mú ma fiichilinyká.

⁴Aalé gaal kie-, ˈjienlé gáá nanadheká, gaal ˈdeeny gál giri alb fimiká ubaa gál Kiristo Yerúsalem gaa ijeká gál nyaaram-, hí met ki ˈgieká hí hol af gáá maaleká fayamle gáál ki ˈdiiyime, giri hé hayyíe gaalí gáál yieká gaalí gaa faaganatká.

⁵Aalé gál Kiristo alb kinaalloká gaalí guofsie, iiy yeen hí fargogoyye, gál Yíésu iiy yieká aadh lulle heegere.

⁶Aalé mú Báulo lés Firgia ubaa lés Galatia gáá nadheká Hím Naasan Waaˈgiet gáál lés Asia ˈdéé ˈdiiyiminy gaa riiyye.

⁷Gaal Mísia kí ˈjobondheká gaal lés Bidhinia sesemeká he fede, kor Hím Naasan Yiesu hé gáál síé ma shíiny.

⁸Gaal lés Misia gáá nadhe, ˈjien Torowas mé nie.

⁹Chúúré kinaallá Báulo Waag hí amasiche. Mu máá Makeˈdonia hí gil ki egefe-, kieye, Lés Makeˈdoníállá káde, nyí ˈdú ˈjé! yieká, amadh kinaal gaa amadhe.

¹⁰Aalé Báulo amadh kinaal amadheká sieny Makeˈdonia đo nyí ká hile. Waag hát nyí ká viiyye-, giri Fayam Midhab Kiristoká nyí gál Makeˈdonia ki ˈdiiyeenneká nyí kimisate.

¹¹Aalé Torówas nyí kadich gaa hilleká, nyí lođuđugul ˈdiiyye, nyí koro Samotarake ˈdú galle. Bííy éíy taaka ka biˈdeká nyí Níábolis ki faanne.

¹²Ál kinaal geđ nyí gaa kiiyye, nyí lés Makeˈdonia ˈjienlé guguđoká ˈjien mé tikiˈd ˈjien gaalí Filíbi yeget-, gál Rooma hí hile-, hí ˈjienle hote mare ki faanne, ál kinaal nyí ram gaa rayye.

¹³Aalé Kúlích Hef ˈGisanká nyí é yé gaa ˈdiiyye, war in ál gálaat hí Waag gaa vivisat-, nyí maalle mare nyí siete. Aalé ˈdég ál kinaal hol ˈdú gáá chimieká nyí les yíéđiyye, gáál nyí fayam Waaˈgiet shiiche.

¹⁴ˈDeg kinaallá hé min Waag iiy chie-, gaalí Líˈdia yeget-, ˈjien Dhiatira gáá chimie-, đafaraam ˈdabaan-, bis hí kóórbiská hol gaa mamadicho mare hé hí gaa iđe. Min kinaal úba nyí af nee koyye. Máá Guđoká min kás shie, min ˈdeeny Báulo hí huogodheká iiy chie.

¹⁵Aalé min ubaa gál ˈbíl geerle gaalí bie gim nieká, min nyí gil ki efiyye, kieye, Har hí ye máá Máá Guđoká iiy yieká ká dhaycheka, ka yimedhíe, ˈbílchú gaa yíéđía, chie. Min nyí súm gil ki efiyye, nyí ˈbílle ˈdú eete.

¹⁶Kulich tikiˈd ál gaalí Waag gaa vivisat kinaal nyí seseenneká ini gedech aryáán hí hille-, mé ki rafananne mare nyí hol met kí ˈdoyye. Ini mé ki rámlé kinaallá gállé guguđoká kaamurasiche.

¹⁷Ini Báulo ubaa nyíín nyí el gáá veeˈde, af gaa guđoká ˈdéé ki huogote, kieye, Gálallá Waag Úr Iđoká gedellé-, hí he ki nannuo-, yaalmit hí rubach ki aargiˈdaká hí ki ˈdiyeenká, ini hí chiegie.

¹⁸Ini aadh lullé nyí el gaa igiˈde, nyí hawul ˈgieˈgete, héél af gaa guđoká ki huogote. Aalé Báulo ini hélléél hí idhansie, mu ini bala ˈdú nie, aryaan ini gaa iđeká geey, kieye, Fargogint meeny Yiesu Kiristo yú ko ki geeye, inííllá yé gaa ˈdé, yie. Tíkíˈdé kinaal aryáán đo ini yé gaa ˈdiiyye.

¹⁹Aalé ini gállé guguđoká kamurlé he ini gaa aargireká el me hí ˈgidhe-, argeká, gaal đo Báulo ubaa Sílas ˈgiiliˈgay, gáál af chiˈde, gáál ál gabaaya-, gál guguđo-, ˈjien kinaalloká hí ijeká ˈdú eedhdhe.

²⁰Aalé gaal mú Báulo gál guguđo-, ˈjien kinaallo-, gálaat ˈdeem ki iđimuoká met ka koyká kieye, Gál Yuuˈdííllá hé gálaat bađisie, ˈjien kúnnaallá shalal fie.

²¹Gaal siraat nyátál kúnnaa Rooma-, hí iiy ma chegen-, ke ma ekemenyká he gáál oonisia, gaalí yie.

²²Aalé nyesebich ˈgúl gaalí mú Báulo tutunoká gáál ˈdú chiˈde. Aalé gál giri gálaat ˈdeem ki iđimuoká gáál đafaraam gaa fure, Gáál tunáa, yie.

²³Aalé gaal he Báulo ubaa Sílas súm tuneká, gaal gáál ˈbíl hiiginká fie, gaal máá ˈbíl hiiginká ˈdeˈdemeká ˈdéé ki mure, kieye, Gálallá hát ˈdabaanká ˈdeeˈdémo, gáál il mé ki súoy, yie.

²⁴Aalé máá ˈbíl hiigin kinaal ˈdeˈdemeká gaalí ˈdeenyéél ki mureká, mu gáál ˈbíl giri ˈbíl geer ˈdaatí gaa yielká fie, gáál ˈguor guguđoká ˈgas met ki ˈdane.

²⁵Aalé chúúre hurtákaká Báulo ubaa Sílas Waago vivite, Waago arram ki ˈdarame, memey. Gál giri gaalí hiigidhe-, gáál hol ˈbíl ˈgar ijeká gáál af nee koy.

²⁶Gaal hátlé Waag vivite-, Waag memeyká, les đo súm motiyye, ˈbíl hiigin-, gaalí gaa ijeká úba motie. Aalé ˈbíl đo af lulle hí furme, ˈguor gáál ˈgas met ki ˈgieká af hí hol eiy gaa bame.

²⁷Aalé máá giri ˈbíl hiiginká ˈdeˈdemeká ram gaa kiiteká, e af mán argeká, đo hol faaˈd tobot kí ˈdoy, onnônyka hollo hol yegies. Hát he tawueká, gál giri gaalí hiigidheká karro ˈdane, he yie.

²⁸Aalé Báulo af gaa guđoká ˈdéé ki hodhe, mú geey, kieye, Ha hol chíésiny, nyíín lulkínyo nyí hállia, mú yie.

²⁹Aalé máá giri ˈbíl hiiginká ˈdeˈdemeká gálle ki ˈday, Nyátáá kí ˈdoˈdodhíe, yie. Mu đo ˈbíl hiiginká ˈjie, Báulo ubaa Sílas ˈgas met les gaa ˈdoy, fađane.

³⁰Aalé mu mú Báulo ˈbíl yé gaa ˈdeey, gáál heete, kieye, Gál yaab! Háte yú ˈdeeme, yú rubach aargira? yie.

³¹Gaal mú ˈdéé hol ˈdú nie, kieye, Máá Guđo Yíésu iiy áat, rubach ha aargiˈda, ˈbíl geerkú úba rubach hai aargira, gaalí mú yie.

³²Aalé Báulo ubaa Sílas mu íín ubaa ˈbíl geerle lulle ˈdeeny Máá Guđoká geey.

³³Aalé ál tikiˈde kinaal mu mú Báulo eedhdhe, ˈjaarsam ˈdeđew-, gaalí ˈgieká lilolle ˈjie. Aalé mu íín ubaa ˈbíl geerle lulle gaalí bie gim nie.

³⁴Mu mú Báulo ˈbílle ˈdú eedhdhe, gáál gololie. Mu íín ubaa ˈbíl geerle lulle geer hí súm gaa meedhe, ˈdaa giri gaal Waag iiy yieká.

³⁵Biiy ká biˈdeká gál giri guguđo-, gáál ˈdeem ki iđimuoká gállé hí el gaa ˈgieká máá ˈbíl hiiginká ˈdeˈdemeká ali ˈdú fie, kieye, Gál giri naamaká muí yíé ˈdeeyo, hí siet, gaalí yie.

³⁶Aalé máá ˈbíl hiiginká ˈdeˈdemeká mú Báulo fayám ˈdú sidhe, kieye, Gál gáál ˈdeem ki iđimuoká gálaat ali ká fie, kieye, Gáál yíé ˈdéesho, he yie. Aaléka, yé ka ˈdée, Waag ki sedhíe, gáál yie.

³⁷Aalé Báulo gál gaalí ali ka fieká geey, kieye, Nyiin in nyí gál Rooma,[44] gaal hé gaalí nyí af kaayká in ˈgas má eeny, in nyí gálaat met gaa tune, nyí ˈbíl hiiginká fie, tá háteeye, geđi hát hinyamietká nyí yíé ˈdeđia? Nyáá nyí yé ma ˈdeeminy, gaal íín tuuˈdle hí ká yimet, hí nyí yíé ˈdeeyo, Báulo hí gáál yie.

³⁸Aalé gál gaalí ali ka fieká gállé guguđoká hol ˈdú nadhe, gaal ˈdeeny Báulo hí huogodheká fayamle gáál shie. Gál giri guguđo-, gálaat ˈdeem ki iđimuo kinaal gaal hát he gál Rooma maaleká birge, ger hí gaa ˈdeenedhe.

³⁹Gaal đo ká yimie, gáál makan fame, gáál ˈbíl hiiginká yé gaa ˈdeey, kor úba gáál gil ki efe, giri gaal ˈjien kinaal yé gaa ˈdeˈdeenká.

⁴⁰Aalé Báulo ubaa Sílas ˈbíl hiiginká yé gaa ˈdieká gaal ˈbíl Liˈdia mé nie. Gaal ál kinaal gál nyaaramká hol gaa arge, gáál af tie, gáál guofsie, đo é yé gaa ˈdie, ali gaa sedhe.