Read daasanach He Ekeny Gál Alb Fimiká 18 Bible Online

He Ekeny Gál Alb Fimiká 18 - daasanach bible

He Ekeny Gál Alb Fimiká 18

¹Aalé af kinaal el ˈdaal Báulo Ádhenay gaa kie, Korínto ki ˈjie.

²Mu ál kinaal máá Yuuˈdi gaalí Akúla yegie-, Bóntos ki ˈdalidhe mare hol arge. Máá kinaallá ubaa minlé Biriskílla rám gáá ˈjóbká lés Talyan gáá fame. Gaal lés Talyan gaa kíéllá he ˈdaa giri Kaláúˈdias giri Káísar léká[47] ˈdéé mure-, gál Yuuˈdi lulle ˈjien Rooma gaa kekeenká. Aalé Báulo Akúla ubaa minlé kinaal ˈdú sedhe.

³Gálallá he gál đonganaam dhadhaw-, đongaanam mamarsatká. Aalé ˈdaa giri Báulo úba he máá đongaanam dhadhawká onnoyká, gáál hol af yíéđie, gáál hol hujich ˈgar nie.

⁴Báulo ˈjien Korinto kinaal bar lulle Kúlích Hef ˈGisanká ˈbíl ˈdiiyiminyká seeseme. Mu fayam Yiesu gálaat ki ˈdiiyime, gál Yuuˈdi ubaa gál Hellen ˈdéé af gaa kuokoy.

⁵Aalé Sílas ubaa Tímote Makeˈdónia gáá fameká, Báulo đonganaam dhaany hay, hol sillie, aadh lulle ˈdeeny Yiesu gálaat ki ˈdiiyime, gál Yuuˈdi Yíésu hát he Messíyaká geeđie.[48]

⁶Aalé gál Yuuˈdi mú ˈdeenyle điidhe-, mú chaachareká Báulo đo đafaraamle hurgufe,[49] kieye, Ađaabkícho itle hí ki yíéđía, yú yáá konf hé ka ˈguoká mán. Yú aaléka káána ke gaa ijóóllá kidhdho bala ˈdú nannaa, yie.

⁷Aalé mu ˈbíl ˈdiiyiminy kinaal gaa kie, mu máá Waag iiy yie-, gaalí Titio Yóstos yegie-, ˈbil hí ˈbíl ˈdiiyiminy kinaal láá yiel mare ˈbílle sedhe.

⁸Aalé ˈbíl ˈdiiyiminy kinaal máállé hí mé ki yiel-, gaalí Kirísbos yegie mare ubaa ˈbíl geerle lulle Máá Guđo Yíésu iiy yie. Gál burnay Korinto-, ˈdiiyiminy Baulo nee kokoyká úba ˈdéé iiy yie, gáál gaalí bie gim nie.

⁹Aalé chuure tikiˈd Máá Guđo Yíésu Báulo hát amadhyoká geey, kieye, Ha biiy gaa kían, ˈdeenychú taalle ˈdiiyímo, ha shab chéen.

¹⁰Yú yáá ko hol ˈguo, yáá gál burnay-, ye iiy yieká úba ˈjienééllá ká ˈguo. Hé máá níínní ko đig yeget-, ko he ki ekemeyoká mán, Máá Guđo Yíésu hí mú yie.

¹¹Aalé Báulo ál kinaal ˈguiyam tomon a síet gaa yíéđie, gáál ˈdeeny Waaˈgiet onisie.

¹²Af giri Gallíyo lés Akaya[50] mé ki yielká gál Yuuˈdi giri Báulo nebeneyká hol af vedhdhe, mú ˈbíl gaalí gálaat ˈdeem ki iđimuoká ˈdú eedhdhe, mú Gallíyo met eey.

¹³Gaal Gallíyo geey, kieye, Máállá hé gálaat chure. ˈGíérích muí gálaat Waag ki oonisúóllá hé gálaat nyátálkúnno gaa bađisie, gaalí mú yie.

¹⁴Aalé Báulo hátlé onnônyka af eiy ˈdeđite-, ˈdéé hogodheká Gallíyo gál Yuuˈdi geey, kieye, It Yuuˈdííllo, ˈdeenyééllá har máálle máá hé ˈdeewká, muuninyka, ađááb ekeyká onnônyka, taglé, yáá hí af nee koy.

¹⁵Kor héél káána hol ki fáláám ˈdeem ubaa meet nyatalaam kíchiaká háluke, itle hí hol eiy gaa náa. Yú yáá hé hatalloká hol eiy ma gaa nanniny, muí gáál yie.

¹⁶Mu đo gáál ˈbíl kinaal gaa arie.

¹⁷Aalé gaal lulle Sóstenes giri ˈbíl ˈdiiyiminy mé ki yielká fame, mú ˈbíl gaalí gálaat ˈdéé ki iđimuo kinaal met gaa tune. Kor Gallíyo íín hé ˈgúl kinaal hol ma héésen.

¹⁸Báulo ˈjien Korinto kinaal rám éíy taaka ilishká gaa yíéđieká mu gál nyaaramká in ká kie. Mú kímlé kinaal Biriskílla ubaa Akúla hé mú hol ˈgie. Gaal hátlé kadich ma híliny-, Kenkéra ma gaa kíiny-, Síria mé ma níinyká, Báulo he af iđiny kis Waag af iđieká ˈduwasie-, mé đig yieká, đo mé gaa dhuurte.

¹⁹Gaal he Eféso kí fameká Báulo Biriskílla ubaa Akúla ál kinaal ki hay. Mu ˈbíl ˈdiiyiminyká sedhe, gál Yuuˈdi hol ki falme.

²⁰Gaal mú heete-, kieye, Kí rám guđoká hol af yíéđuo, yieká, mu gáál gaa điidhe.

²¹Kor mu gáál in ká kekemeká mu gáál geey, kieye, Har Waag hí feˈdoka, yú geđi hollo hí hol ˈdú gáá naadha, gáál yie. Aalé mu đo kadich hile, Eféso gaa kie.

²²Aalé mu Kaisária ki ˈjieká mu Yerúsalem sedhe, gál nyaaramká naa yie, đo ál kinaal gaa kie, Ántiok mé nie.

²³Mu Ántiok állé kinaal ram gaa rafe, đo kie, lés Galatia ubaa lés Firgia lulle gaa sedhe, lali Yiesu alb kinaal gaa ijeká yiir gaa chiˈde, gáál guofsie.

²⁴Aalé máá Yuuˈdi gaalí Abóllos yegie-, Alekesánđara gaa ˈdalidhe mare Eféso kí ˈjie. Mu íín he máá ˈdaalím hí guđo-, Warˈgat Waaˈgiet hát ˈdabaanká ógká.

²⁵Mu íín kisso gaalí ˈgíérích Máá Guđoká af gaa koy. Mu chira ˈdeeny Yiesu ki ˈdiyeenká he ˈgie, mu ˈdéé hát ˈdabaanká ˈdiiyime. Kor mu íín he onisiny Yuana bie gím nímle tákáma onnoy.

²⁶Aalé Abóllos hát nyaalimiká ˈbíl ˈdiiyiminyká gaa ˈdiiyime. Biriskílla ubaa Akúla ˈdiiyiminy muí ˈdiiyime kinaal maaleká mú ˈbílle ˈdú eedhdhe, mú ˈgíérích Waaˈgiet hát ˈdabaanká af gaa koy.

²⁷Aalé Abóllos sieny Akaya hí ka hileká, gál nyaaram al kinaalloká hí guofsie. Gál nyaaram kinaal warˈgát gál nyaaram Akayaká ˈdú veere, giri gaal mú egeet-, mú máállé dheeˈgo hođisatká. Aalé Abóllos Akaya ki ˈjieká mu gál ˈdaa gielmit Waaˈgiet ˈdugaka Yíésu iiy yieká hát ˈdabaanká yiir gaa chiˈde.

²⁸Aalé Abóllos gálaat metle gál Yuuˈdi hát ˈdabaanká hol ki ˈdiiyimeká, gáál a mé kí ˈjie. Mu Yíésu hát Messíyaká gáál Warˈgat Waaˈgiet gaa argisie.