Read daasanach He Ekeny Gál Alb Fimiká 2 Bible Online

He Ekeny Gál Alb Fimiká 2 - daasanach bible

He Ekeny Gál Alb Fimiká 2

¹Kúlích ˈjila Bentekos[4] ali kí ˈdiiyyeká gál alb fimi kinaal lulle ˈbíllo he gaa ije.

²Toomareka gaal kóˈd hát wááních fargogo-, úr gáá ˈdoyká maale. Kóˈd kinaallá ˈbíl gaalí gaa ijeká koch yie.

³Gaal hé hát ˈjiet bólo ki ég-, hol eiy gaa ˈgiiˈgite-, gáál lulle met eiy ˈdú yíéđieká arge.

⁴Gaal lulléká Hím Naasan Waaˈgiet hí koch chie, gaal lulle af hol ká eiyye-, Hím Naasan Waaˈgiet hí shiicheká ˈdeem ki huogodhe.

⁵Aalé Yerúsalem hé gál Yuuˈdi-, giri gál Yisirayel lé-, Waag kikiadhe-, les lúl gáá yimieká hé hí gaa ije.

⁶Kódal gálaat hí maaleká, nyesebich hol ˈdú gáá yimie, af gil hí fame, ˈdaa giri gaal íín lulle hátlé les eiy gáá yimieká aflé gaalí hogodheká eiy mamaleká.

⁷Aalé gaal he af ˈdabe, hol heegete, kieye, Gálallá lulle hé gál Galilaayaká muunîny?

⁸Héél kor háteeye, hé afkúnno hátlé hol ká eiy eiyyéél gaalí ˈdeem ki hogodhoká ki eiy maalóol?

⁹Múúni ki állá ˈgíéllá ki gál lés Bartia, gál lés Meˈdia, gál lés Ellim, gál lés Mesobotamia, gál lés Yuuˈdia, gál lés Kabaˈdosha, gál lés Bontos, gál lés Asia,

¹⁰gál lés Firgia, gál lés Bamfilia, gál lés Misirayim, tá gál lés Libia e hí ˈjien Kurene kí ˈjóbká. Múún gáál ˈdáá tikiˈd Róóma gáá yimie.

¹¹Múúni kinaallá ˈdáá tikiˈd ke gál Yuuˈdi, tá gálatí he gál Waag Yuuˈdi iiy yieká. Tá múún ˈdáá tikiˈd ke gál lés Kerete ubaa gál lés Arabia. Tá gaal íín har hé gáál af ˈdaˈdabsuo-, Waag hí ekemeycheká afkúnno eiy ki memeye! Ki maala! gaalí yie.

¹²Gaal lulle he af ˈdabe, he hí mé eiy ki sedhe, hol heegete, kieye, Hééllá kor hélle meete? gaalí yie.

¹³Gáál ˈbáál gáál hélléél eeshey, kieye, Gáál bershó hí faanne, yie.

¹⁴Aalé Bétiro ubaa gál alb fimi-, tomon a takachká les gaa kie, nyesebich met ki ˈdie. Bétiro af gaa guđoká nyesebich ki ˈdiiyime, kieye, Gál Yuuˈdi ubaa it halúg lul kíchia hí Yerúsalem gaa iđáállo, ebá yú hí hééllá ká geeye. Hé yú ka hogodhóóllá hát ˈdabaanká nee kóo.

¹⁵Hé hát hí taawuyyáállá muuniny, biiy hátle burro, gálallá hé bersh níínní hí faanneká mán.

¹⁶Máá Waag hí ˈdéé ka shigiche-, Yówel léká ˈdeenylé hodheká hééllá:

¹⁷Waag kieye, Bár giri biiy el ˈdaˈd hí ká ˈjoobonotká Hím Naasanchú gálaat lulle ha yú ˈdú leesia. Nyígéénykícho ubaa hadakícho ˈdeeny yú shiguoká hai ˈdiyime, gál kíchia rúóre yaabká ˈdeeny ˈdaachú yé gáá ˈdeˈdeenká hai aargira. Gál kíchia káru yaabká amádh ha yú shigia, hai aamadhma.

¹⁸Gede chia yaabká ubaa gede chia ˈdietká Hím Naasanchú ha yú ˈdú leesia, gaal ˈdeeny yú shiguoká hai ˈdiyime.

¹⁹Yú hé gáál af ˈdaˈdabsuoká úr yé ha gáá ˈdeđia. Les úba hé gálaat il hí aargiˈdoká yé ha yú gáá ˈdeđia, fás, ˈjiete, tá ér guđoká yé ha yú ká ˈdeđia.

²⁰Kúlích giri ˈdúwa-, fargogiyyo-, yáá Guđóóllá hí gáá ˈjeen-, hí ˈdéé gálaat ki iđimuoká hátlé ali ma kí ˈdíinyká, aadh ha yú oongʼorosia, ˈgúíy hollo yú hol gaa laama, bur ˈdíngi hát fáská ha yú hođia.

²¹Tá máá meenychú vivisatká ha yú riima,[5] Waag hí chie, Bétiro hí yie.

²²Aalé Bétiro geđi gáál geey, kieye, Gál Yisirayel, hééllá nee kóo. Yíésu giri Nasaretká héllé farguogo-, Waag hí shiiche-, hí hurt gaa eekemey-, hí af ˈdaˈdabiyyeká ití óg. Hé kinaallá ˈdugaka in mu hát he máá ˈdúwaká Waag hí itín argisiche.

²³Máállá Waag hí gíl geer gáá kaayyééllá, he hát giri kis Waag hí tawuyye-, hí gaa feˈdeká in gál nyatalaam maamanká hí mú yiir kí chiˈde, mú hí ˈgór đarám yaalká ˈdú chies.

²⁴Aalé ˈdaa giri kufach fargogint níínní he ˈguo-, mú uushich ki chichirat-, mánká, in Waag mú kúfach gaa eeyye, mú uushich yé gáá ˈdeeyche.

²⁵ˈDáwuˈd mú ˈdeenyle huogodheká kieye, Máá chia Guđoká bar lullé yú met gaa kokodhdho.[6] Yú yáá hé ye riitisuoká mán, ˈdaa giri mu ye gíl ˈdaa naaniet yaalká.

²⁶Aaléka, geer hé ye gaa meedhe, af hé ye hé midhabká huogodhe, gónchú aalé úba naanná hai gaa yíéđianna,

²⁷ˈdaa giri kuun sídhchú ál gaaramká ma ki haađiny-, máá kua lé-, kuun hí taak koyyeká mooˈdowká kuun hí iiy ma chegenká.

²⁸Kó ye ˈgíérích luolmitiká argisiche, innumkú geer ha ye gaa memesicha.[7] ˈDáwuˈd ˈdeenyééllá ˈdaa Kiristo he ki hodhe, Bétiro hí gáál yie.

²⁹Aalé Bétiro geđi kieye, Nyaaramchú, ebá yú hí hát ˈdabaanká ká geeye, eshi eshimkúnno ˈDáwuˈd lééllá héle mán yieká, állá gaalí ki ˈgodhe, úúshíchle káána úba hé állá gaa ijo.

³⁰Mu íín he máá Waag hí ˈdéé ka shigicheká, hát Waag úba hí he af iđicheká hé onnoy, giri mú hídhle mú tikiˈd Waag hí mú karalle ˈdú iđimichoká.

³¹Mu hé biiy metoká onnoyká, in Messíya[8] uushich yé gáá ˈdímle huogodhe, giri mú Waag hí ál gaaramká ma ki haađiny-, ubaa mu ma mooˈdonyká.

³²Waag hé Yíésu kinaallá loolnoyche, uushich yé gáá ˈdeeyche, tá nyíín lulkínyo nyáá nyí hé kinaallá ˈdúúw ˈdú ˈdiiyye.

³³Mú hé Waag hí les gaa eeyye, Waag hí gíl ˈdaallé naanietká iđisate, mú ˈJaalle Hím Naasanlé he mú af iđieká hé mú shie. Hé káána aalé hí argiyya-, hí mamallóóllá he Hím Naasan Waaˈgiet kinaallá muí nyí ˈdú gáá leesie.

³⁴Tá ˈDáwuˈd bár giri ˈdeenyééllá hodheká hé úr ma síen, kor kieye, Máá Guđo Waag Máá chia Guđoká geey, kieye, Gíl ˈdaa chia naanietká yíéđig,

³⁵ˈdaab gál ko ka kídhká kara kuun hí ˈgas ˈdú kokoyyoká yú ma hônyká, Waag hí Máá chia Guđoká chie.[9] ˈDáwuˈd Waag hí ˈdeenyééllá shiiche, Bétiro hí gáál yie.

³⁶Aalé Bétiro geđi kieye, Aalé it Yisirayelallá, lulkícho hééllá hát ˈdabaanká onnóo, Yíésu giri hí ˈgór đarám yaalká ˈdú chies kinaallá hé Waag hí Máá Guđoká ubaa Messíya hoyche, muí yie.

³⁷Gálaat héél maaleká gáál ˈdee hí geer hile, gaal Bétiro ubaa gál Yiesu alb fimiká heete, kieye, Nyaaramkínyo, háte nyí ˈdeenne? gaalí yie.

³⁸Bétiro gáál ˈdéé hol ˈdú nie, kieye, Hé kíchia ˈdeđew-, hí gaa seseenká hayyíe, Waag makan famíe, lulkícho gaalí meeny Yiesu Kiristo bie gim ki nuo, ađaabano ubaa nyuogim kícho Waag hí gaa eeyyo. Hát kinaallá in Hím Naasan Waaˈgiet hí aargiˈda.

³⁹He af iđinyééllá meka he af iđinykícho ubaa he af iđiny umkícho, tá he af iđiny gál fág-, Máá kúnnaa Guđo Waag hí ká veveenká, Bétiro hí gáál yie.

⁴⁰ˈDeem burnay hatalloká Bétiro hí gáál geey, muí gáál net gaa kaay, mu kieye, Gál barallo-, ˈgierim hí kuongʼodóóllá hol ka ridhdhíe, muí gáál yie.

⁴¹Gál mú ˈdeenylé kinaal iiy yieká gaalí bie gim nie. Kúlích kinaal gáál shíí seđ gáál túóyle ˈdú fame.

⁴²Gál Yíésu iiy yie kinaallá aalé đo gál alb fimiká hol af yíéđie, gáál he onisinyle nee kuokoy, gáál balashá hol ˈgar goolmote,[10] tá hol Waag ˈgar viivite.

⁴³Yíésu gállé alb fimiká hé burnay-, gáál af ˈdaˈdabsuo-, gaalí il ki argeká eekemey, gálaat lulle he af ˈdabe.

⁴⁴Gál Yíésu iiy yieká hol af yíéđie, tá héllé ˈgieká hol gil gáá gise.

⁴⁵Gaal aanyle ubaa shokodaamle madie, birm hidhdhe, gál he hí ki ˈgeeˈgerneyká gil gáá gise.

⁴⁶Gaal aadh lulle ˈBíl Waaˈgiet nyáláárle geerle hol ˈdú gáá yiimie. Gaal lúl hol af yíéđie, ˈjienle hát gielmitiká hol ˈgar gaa golmote, ger hí gaa memeedhe.

⁴⁷Gaal bar lullé Waag memey, gáál gálaat lulle úba hí geelnedhe. Ram hátlé hol el gaa igiˈdeká Máá Guđoká gál hí iiy yieká gáál af ˈdú faafie.