Read daasanach He Ekeny Gál Alb Fimiká 21 Bible Online

He Ekeny Gál Alb Fimiká 21 - daasanach bible

He Ekeny Gál Alb Fimiká 21

¹Gáál nyí hol Waag ki viiyyeká, nyí ál kinaal gaa kiiyye, nyí kadich hille, nyí lođugul ˈdiiyye, nyí koro Koos ˈjienle ki faanne. Bííy éíy taaka ka biˈdeká nyí ál kinaal gaa kiiyye, nyí koro Rooˈdos ˈjienle ki faanne. Aalé ál kinaal nyí gaa kiiyyeká nyí ˈjien Batara mé niiyye.

²Batára állé kinaal kádích Foiníke seseme mare nyí argiyye, nyí kádích kinaal hille.

³Aalé nyí koro Kuburos bííy fag ka argiyyeká nyí ˈdaa urru naate, nyí lés Siria ˈdú kuate. ˈJien Turoka nyí kadich mé ˈdite, giri shokodich gaalí kadich gaa lelesuoká.

⁴Aalé nyí gál nyaaram láli-, al kinaalloká ˈgas ˈgeˈgete, gáál nyí hol argiyyeká gáál nyí hol ram tiiya af rayye. ˈDaa giri gál láli kinaal Hím Naasan Waaˈgiet hí kas giri hé Báulo Yerúsalem álle il hí gaa aargiˈdoká shiicheká, gaal mú af kí mote, kieye, Ha Yerúsalem síen, mú yie.

⁵Kor rám kínyia al kinaalloká beeyyeká, nyí kiiyye, nyí sienykínyo mé veeˈde. Tá hátlé nyí ˈjien kinaal ma gaa kíinyká, gál láli kinaal ubaa ˈdegle tá umle nyí ˈjien hol gaa eete, bás in álleka lulkínyo nyí le kurram ˈdoyye, nyí hol Waag ˈgar visate.

⁶Aalé gáál nyí hol Waag ki viiyye, tá nyiin nyí kadich hille, gaal íín ényle hol ˈdú nadhe.

⁷Nyí ál Turo kinaal gaa kiiyyeká, nyí Botólomay ki faanne. Ál kinaal gál nyaaram Yíésu iiy yieká nyí hol naa gaa chie, gáál nyí hol tikiˈd af rayye.

⁸Biiy ka biˈdeká nyí ál kinaal gaa kiiyye, nyí Kaisária ki faanne. Ál kinaal gál giri tiiya-, kis gál alb fimiká hí le gaa shuuneká, Fílib[51] giri ˈdeeny Waaˈgiet hol gaa sisidhoká ˈbílle nyí ki faanne, nyí mú hol af yíéđiyye.

⁹Máá kinaal hada Waag hí ˈdéé ka shigicheká afuro he ˈgie.

¹⁰Ál kinaal nyí ram ki kaateká máá Waag hí ˈdéé ka shigiche-, gaalí Ágabos yegie mare lés Yuuˈdia gáá yimie.

¹¹Mu nyí ˈdú gáá yimieká mu Báulo sáblé seeteká eedhdhe, mu sááb gille ubaa ˈgasle ki hiigite, kieye, Hím Naasan Waaˈgiet hatallá he chie: Sáballá máálle gál Yuuˈdi Yerusalemká hatallá hí higidha, tá hí kidh gíl gaa kakaa, Hím Naasan hí ye chie, muí yie.

¹²Nyíín nyí héél maaleká, nyíín ubaa gál nyaaram Kaisaria kinaal nyí Báulo gil ki efiyye, Ha Yerúsalem síen, nyí mú chie.

¹³Aalé Báulo nyí ˈdéé hol ˈdu gáá nie, kieye, Háteka hí bebeenne-, hí ye gúóf gaa gagalicháal? Yerúsalem yú sedheka, Máá Guđo Yíésu meenyle ˈdugaka hiigin úba kí hayo, kúfach yáá ki ég, muí nyí yie.

¹⁴Aalé hé nyí mú geđichaká nyí ˈdabiyyeká, nyí shab chie, đo nyí mú geeyche, He hí hát Máá Guđoká hí gaa fedoká ˈdie, nyí mú chie.

¹⁵Rám kínyia nyí ál kinaal gaa iđeká hol ki sieteká, nyí shókódíchkínyo tág koote, nyí Yerúsalem mé niiyye.

¹⁶Aalé ˈjien Kaisaria kinaal gállé láli-, Yíésu iiy yieká ˈbaal nyí hol eete. Gaal máá lés Kuburos kíssóótí Yíésu iiy yie-, gaalí Manáson yegie mare ká eedhdhe, máá Yerúsalem nyí ki faanneka, ˈbílle nyí gaa yíéđiannoká.

¹⁷Nyí Yerúsalem ki faanneká gál nyaaram-, ál kinaal gaa ijeká nyí argeká ger hí gaa meedhe.

¹⁸Bííy éíy taaka ka biˈdeká Báulo nyí hol eete, nyí Yákob ˈdú siete. Gál nyaaramká gállé hí met ki ˈgieká lulle úba hé ál kinaallá gaa ije.

¹⁹Báulo gáál naa yieká Waag hát hí hujich ki naasate-, Waag hé burnay-, kidh hursam gaa ekeycheká fayamle lulle gáál hát ˈdabaanká shie.

²⁰Gaal fayaméél maaleká Waag meey. Aalé gaal Báulo geey, kieye, Nyárkínyo, gál Yuuˈdi burnay shíí-, Yíésu iiy yíéllá kó argiyyo? Gálallá hemuumurit kúnnaa Waag hí Móshe ka shiicheká úba he tág ki yaalla.

²¹Tá gaal hé ˈdéé maale, hát kuun kerka gál Yuuˈdi lulle giri kidh hurt gaa ijoká geđicho-, gaal hemuumurit kúnnaa Moshe kinaal el af gaa tataan-, gaal umle ma hermisiny-, ubaa siraatkúnno haađuoká.

²²Aalé káána háte ke ˈdeeme? Gaal hát ál kí ˈjiiyyeká hai maala.

²³Aaléka, hát nyí ko geeychoká ˈdé. Gál yaab afur-, Waag he af iđieká nyáá nyí ˈgayya.

²⁴Gál Waag héllé af iđieká mé đig yie kinaallá éew, siraat he naasanle gaalí nannasatallá gáál hol ˈgar naatíe, hol dhiiráa. Suor gaalí ˈgaˈgalatká aanyle kuun hí ka yío, suor ˈgallíe, gaal hí met gaa dhuursat. Hát kinaallá in gálaat lulle ˈdeeny er he maaleká hát he hódho-, kuun íín hí hemuumurít ki taalká kiimita.

²⁵Gál kidhdho-, Yíésu iiy yieká ˈdaalleka, warˈgat hélle nyí muˈdeká íín nyáá nyí gáál ˈdú veeˈde, giri gaal ˈguom suorle gaalí waagam hodhoká ki ˈgaˈgaloká ubaa so aanyle gaalí himano ki yegeská gáá faaganat-, fasam ma igiminy-, tá herginy gálle hol ma shúúnanká hol ká ririatká, nyí chie, gaalí Báulo yie.

²⁶Aalé biiy ka biˈdeká Báulo gál afur kinaal hol eedhdhe, gaal hol dhiire. Héél đueká Báulo đo kie, ˈBíl Waaˈgiet sedhe. Mu máá suoryoká gáál he naasanle rámlé hí ka ˈgisateká ubaa kúlích gaal hí mú ˈdú seseen-, gaal suor ˈgaˈgaloká fayamle mú shie.

²⁷Rám giri tiiya-, mú Báulo he naasanlé kinaal bár hí ká bebeyyeká gál Yuuˈdi giri gál Asiaká Báulo ˈBíl Waaˈgiet geer gaa argeká nyésébích ál kinaal gaa ijeká chure, tíkíˈdé kinaal đo gál Asia kinaal Báulo ˈgiliˈgay,

²⁸kúóˈd ˈdoy, kieye, Gál yááb Yisirayel, nyí mú ˈdú chiˈdíe. Hééllá máá gálkúnno ubaa nyátál kúnnaa Moshe-, tá ˈBíl kúnnaa ke Waag gaa vivisatallá gálaat ká ririatká. Héél úba kí hayo, mu úba hé gál Hellen ˈBíl Waaˈgietallá ká eey, gaal ál saas mánnallá ˈdeeney, gaalí yie.

²⁹Gál Yuuˈdi kinaal hééllá huogodhééllá ˈdaa giri gaal kulich tikiˈd mu Torofímos giri máá ˈjien Efesoká mú hol ki argeká. Aalé gaal gáál hol ki argeká hé tawueká, Báulo mú ˈBíl Waaˈgieto he sidhe, he yie.

³⁰ˈDeenyéél gálaat lullé ˈjien kinaalloká shalal kaay, gálaat ídho hí ˈjiiyye, biiy ˈdinnam lulle gáá kirite, Báulo ˈgiliˈgay, mú náb ˈBíl Waaˈgietká af gaa chiˈde, mú biiy sug yé ki ˈdeey, karafano náb ˈBíl Waaˈgietká đo gaalí af gaa koy.

³¹Gálaat bár onnônyka mú yegieská fayam ˈjienle shalal hí ˈdiiyyeká máá yuoy mé ki yielká hille.

³²Aalé máá yuoy mé ki yiel kinaal gállé hí el ˈgie-, yuoy kúˈd taat met ki ˈgieká ubaa yuoy ˈbáál eedhdhe. Gaal nyesebich bííyle ˈdú kirite. Nyesebich he máá yuoy mé ki yiel kinaal ubaa yuoyle argeká Báulo ˈgul hay.

³³Aalé máá yuoy mé ki yiel kinaal Báulo ˈgiliˈgay, yuoyle geey, kieye, Mú nyarugano naam ki hiigidháa, yie. Aaléka mu nyesebich yiete, kieye, Hééllá mááya? Tá mu meete he ˈdeeney? yie.

³⁴Aalé nyesebich af hí hol el ˈgiiˈgite, gálal hélle hogodhoká gálatí héllé he hogodho. Aalé máá yuoy mé ki yiel kinaal shalal hí ˈdéé ˈgas eeny ká riateká yuoyle geey, kieye, Mú ény kúnnaa yuoyóótíá álle ée, yie.

³⁵Gaal ál giri gaalí ki feˈjeenká ka ˈdoyká, nyesebich ˈdeenylé osietal yuoy far ˈdú gogoy, yuoy đo Báulo úr ki eete.

³⁶Aalé nyésébích gáál el gaa igireká đo kúóˈd ˈdoy, kieye, Mú gon kí yees! yie.

³⁷Aalé gál giri yuoyoká hátlé énylé yuoyoká ma hílinyká, Báulo máá yuoy mé ki yielká af ki helie, kieye, ˈDéé hótéél yú ko ká heeteka hai ˈdeeníta? mú yie. Máá giri yuoy mé ki yiel kinaal kieye, Af Hellen ha óíyta?

³⁸Kuun kó máá Misirayim gálaat chure-, gaal mangis hol yeges-, shút shíí afur ˈbakat ˈdú eedhdheká muunîny? muí mú yie.

³⁹Aalé Báulo kieye, Yú máá Yuuˈdi, ˈjien ˈdúwa-, Tarsos-, giri lés Kilikiaká ki ˈdalidhe. Gillo yú ko ki efe, ye hash, nyésébíchallá geeye, yie.

⁴⁰Aalé Báulo muí af iiy yieká, đo ál gaalí ki feˈjeenká ˈdú ˈdie, nyesebich gil shab ki hoy. Aalé gaal lulle shab yieká, mu gáál af Heberew ki geey.