Read daasanach He Ekeny Gál Alb Fimiká 22 Bible Online

He Ekeny Gál Alb Fimiká 22 - daasanach bible

He Ekeny Gál Alb Fimiká 22

¹Mu kieye, Idhaamchú ubaa nyaaramchú, ˈdeeny chia yú hol ˈdú hogodhóóllá, ebá nee kóo, yie.

²Aalé gaal mu af Heberew hodhe-, maaleká, gaal lúl shab yie. Aalé Báulo kieye,

³Yú máá Yuuˈdi, ˈjien Tarsos-, giri lés Kilikiaká ki ˈdalidhe, tá ˈjien Yerusalemallá gáá guđandhe. Yú Gamáliello ye nyátál eshim eshimkúnno hát ˈdabaanká onisie. Yú tágo Waag he ki nímle hol ˈdú sillie, hát káána kulichallo itín hí iđóóllá.

⁴Yú gál ˈgíérích Yiesúúllá el gaa igireká manyjasie, gál yaab ubaa gál ˈdieto ˈgiiliˈgay, gáál ény hiiginká fafie, gáál ˈbaal úba hí alb nadhe.

⁵Máá méte suoryoká ubaa karullé ˈdeemoká ˈdeenyééllá úba hát he ˈdúwaká ha ye ˈdú chiiˈda. Gaal ííni yú warˈgasam ˈdú ˈgiedhe, giri warˈgasam yú gáál nyaaramlé ˈDamáskas gaa ijeká ˈdú siidho-, giri gál ˈgíérích Yiesúúllá el gaa igire-, ál kinaal gaa ijeká ˈgiiliˈgaw-, gáál yú Yerúsalem ká siidho-, gáál gaalí he ki ekemeyoká.

⁶Aadh he é mé ˈdug ˈdoyyeká yú sieny chia gaa igire-, ˈDamáskas kí ˈjobondheká, édhúm édhká úr yé gáá ˈdie, ye gaa veere, ye ˈdinnam lulle gaa veere.

⁷Aalé yú đo le ˈdoy, ˈdéé hót maale, ˈdéé hót kieye, Sáwul, Sáwul, háteka ye hatal manyjasichóol? ˈdéé hót hí ye chie.

⁸Aalé yú ˈdéé hol nie, kieye, Kúún mááya, Máá Guđo? yú yie. Mu ye geey, kieye, Yú he Yíésu Nasaret-, kuun hí maanyjasichóóllá, muí ye yie.

⁹Gál chia nyí hol ˈgayyeká úba hé édhúm kinaallá arge, kor hé Máá giri ye geđieká af ma mááliny.

¹⁰Aalé yú mú heete, kieye, Máá Guđo, háte yú ˈdeeme? yú yie. Máá Guđoká ye geey, kieye, Les gaa keʼ, ˈDamáskas mé naʼ, ál kinaallá he lullé yú ko mé ki kokuoká ha gaalí ko gaa geđia, ye yie.

¹¹Gál chia nyí hol ˈgayyeká ye gíl mé chiˈde, ye ˈDamáskas eey, ˈdaa giri édhúm édh ye gaa veereká ye in rieká.

¹²Aalé máá gaalí Ananías yegie-, hemuumurit Waag hí Móshe ka shiicheká hát ˈdabaanká ki yiel-, gál Yuuˈdi al kinaalloká hí súm memey mare ye ˈdu gáá yimie,

¹³ye láá kí ˈdie, kieye, Nyár chia Sáwul, in hí ko eiy ˈdie, muí ye yie. Aalé tíkíˈdé kinaallá yú đo in ye eiy ˈdie, mú arge.

¹⁴Aalé mu kieye, Waag eshim eshimkúnno hé ko ká viiyye, giri kuun mu hát he fedoká kiimisat-, mú Máállé ˈdúwa-, saas mánká aargiˈdo-, ubaa ˈdéé af gaa mamaloká.

¹⁵Kúún aaléka mú máállé misikirká ha cheedhe, hé argiyye-, ubaa maalééllá fayamle gálaat lulle ha shigicha.

¹⁶Aalé káána meete egete? Les gaa keʼ, mú ki búoy, gaalí ko bie gim nuo, ađááb hí ko yé gaa ˈdiiyyo, muí ye yie, Báulo hí gáál yie.

¹⁷Aalé mu geđi ˈdéé huogodhe, gáál geey, kieye, Yú Yerúsalem hol ˈdu gáá nadhe-, ˈBíl Waaˈgiet Waag gaa viviteká, me đo ye húˈd yie,

¹⁸Máá Guđoká yú arge, mu ye geey, kieye, Đo keʼ, Yerúsalem yé gaa ˈdé. Gál alloká hé ˈdeeny chia kuun hí geđichoká iiy ma yegen, muí ye yie.

¹⁹Yú mú ˈdéé hol ˈdú nie, kieye, Máá Guđo, gál alloká yú hát he mumure-, gál ko iiy yieká gaalí ény ˈdiiyiminy gáá shugunne-, gaalí tutune-, ubaa gáál gaalí ˈbíl hiiginká fafieká lulle hé óg.

²⁰Yú máá kua ˈdeenykú hol gaa sisidhe-, Estéfan léká af giri gaalí yegieská úba yáá álle gaa ije, mú kúfáchle iiy yie, met yiel. Gál mú yegieská đafaraamle úba yaa hí ˈdeˈdeme, yú mú yie.

²¹Aalé Máá Guđoká ye geey, kieye, Keʼ, sí, yú kidh fágatíá ko ali ˈdú kakaa, muí ye yie, Báulo hí gáál yie.

²²Gálaat Báulo af nee koy, mu bár ˈdéé hótal đig ka yieká gaal kúóˈd ˈdoy, kieye, Máállá les gaa yiesíe! Hééllá hé máá les ˈdug ˈdú ijoká muuniny! yie.

²³Gaal koˈdamlé ˈdarame-, đafaraamle urgano ki lalame-, edo urgano ki tutuneká,

²⁴máá giri yuoy mé ki yielká yuoyle geey, giri Báulo gaalí ény yuoyoká álle egewká. Aaléka mu yuoy ˈdéé ki mure, giri mú gaalí tuuno-, tá hé mákárta gálaat hí mú kúóˈd ˈdú ˈdaraanallá gaalí mú ka hegesetká.

²⁵Aalé Báulo gaalí hiigidhe-, bár onnônyka gaalí tuuneká, mu yuoy máállé hí mé ki yielká máállé hí ello-, ál kinaal yielká heete, kieye, Máá Rooma héllé ˈdeeneyká hátlé ke ˈduuwle ma árginyká ke tuunoká taglê? Báulo hí mú yie.

²⁶Aalé máá giri Báulo hí geđieká sedhe, yuoy máállé hí mé ki yielká geey, kieye, Kúún aaléka háte ˈdeenne? Máál in máá Rooma háluke! yie.

²⁷Máá yuoy mé ki yiel kinaal đo Báulo ˈdú sedhe, mú yiete, kieye, Ebá ye ka géesh, kuun in máá Rooma? yie. Báulo kieye, Iiy-hí. Yú máá Rooma, muí mú yie.

²⁸Aalé máá guđo kinaal Báulo geey, kieye, Yú mangis bíre guđoká les ki fie, in káána máá Rooma yie, muí Báulo yie. Báulo mú ˈdéé hol ˈdú nie, kieye, Yú íín ˈdalmáátka máá Rooma, yie.

²⁹Aalé gál giri ká yimie-, kerka mú hegeteká đo lulle eiy kie. Aalé máá giri yuoy mé ki yiel kinaal đo bineneny hí faanne, ˈdaa giri máá Rooma nyarugano ki hiigidheká.

³⁰Aalé bííy geđo ka biˈdeká máá giri yuoy mé ki yielká hé mákárta gál Yuuˈdi hí Báulo ˈdú kataseká ˈgas egeyká he fede. Aalé mu Báulo nyarugano gaa fure, mu gál guguđo-, suoryoká ubaa karullé guguđo ˈdeemo-, Yuuˈdiká hol ˈdú vie, Báulo gáál met ká eey.